འདི་ནི་བཀྲ་ཤིས་གསུམ་མདོ་གྲོང་ཚོའི་ཡུལ་མིས་ལུག་འཚོ་བཞིན་པ།

ལྷོ་ཁ་གྲོང་ཁྱེར་མཚོ་སྨད་རྫོང་དུ་སྐྱོད་སྐབས་མུ་མཐའ་མེད་པའི་རྩྭ་ཐང་སྟེང་ནོར་ལུག་གིས་ཁེངས་ཤིང་། ས་བབ་མཐོ་ཚད་ལ་སྨི་4900ཟིན་པའི་ལུ་གུ་ལ་བརྒྱབ་ཚེ་སྒོ་བསྡུས་ཤང་བཀྲ་ཤིས་གསུམ་མདོ་གྲོང་ཚོའི་འབྲོག་རར་འབྱོར་གྱི་ཡོད། ཉེ་བའི་ལོ་ཤས་རིང་། ས་མཐོའི་འབྲོག་ལས་སྒྱུར་བཅོས་ཀྱི་སྐུལ་འདེད་འོག་བཀྲ་ཤིས་གསུམ་མདོ་གྲོང་ཚོ་འདི་ཉིད་ཉེ་རིང་གང་སར་སྐད་གྲགས་ཆོད་པའི་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་གཏོང་བའི་གཞི་རིམ་ཏང་རྩ་འཛུགས་ཀྱི་དཔེ་སྟོན་ས་ཚིགས་ཤིག་ཏུ་གྱུར་ནས་འབྲོག་ལས་གཙོ་བོར་བྱེད་པའི་རྫོང་ཆུས་དང་། གྲོང་ཚོ་སོགས་ཀྱི་རྩ་འཛུགས་མི་ཉུང་བ་ཞིག་འབྲོག་ལས་སྒྱུར་བཅོས་ལ་བརྟེན་ནས་འབབ་འཕར་ཕྱུག་འགྱུར་ལ་སྐུལ་འདེད་གཏོང་བའི་ཉམས་མྱོང་སློབ་སྦྱོང་བྱེད་པར་ཡོང་བའི་ཡིད་དབང་བཀུག་ཡོད།

གྲོང་ཚོའི་ཏང་ཀྲི་པུའི་སྣེ་ཁྲིད་འོག་བཀྲ་ཤིས་གསུམ་མདོ་གྲོང་ཚོའི་འབྲེལ་ཡོད་ལས་དོན་པས་ཡུལ་མི་ཚོར“འབྲོག་ལས་ཚབ་གཉེར”གྱི་ལེགས་ཆ་དྲིལ་བསྒྲགས་ཧུར་ཐག་བྱས་ཏེ། མང་ཚོགས་ལ་ཁྱིམ་ཚང་གིས་ཁ་ཐོར་དུ་གསོ་ཚགས་བྱེད་པའི་ཕྱུགས་ཟོག་གྲོང་ཚོའི་མཉམ་སྡེབ་མ་རྐང་ནང་ཞུགས་སུ་བཅུག་ནས་གྲོང་ཚོས་གཅིག་སྡུད་ཐོག་ཚབ་གཉེར་གསོ་ཚགས་བྱས་པས་མང་ཚོགས་ཚོས་ནོར་ལུག་བདག་དབང་ལོངས་སུ་སྤྱོད་ཐུབ་ལ། ལོ་མཇུག་ཏུ་བགོ་འགྲེམས་ཀྱང་རག་གི་ཡོད། “ཚབ་གཉེར་བྱེད་སྟངས”བརྒྱུད། བཀྲ་ཤིས་གསུམ་མདོ་གྲོང་ཚོས་དུད་ཚང་96གི་ལུག་1080སྔ་རྗེས་སུ་མ་རྐང་ནང་བཅུག་པ་དང་། མང་ཚོཌ་མ་རྐང་ནང་ཞུགས་ཚད་78%ཟིན་ཏེ་འབྲོག་ཁུལ་གྱི་ངལ་ནུས་མི་གྲངས་110ལྷག་ཙམ་ལས་ཞུགས་གཞན་སྒྱུར་ཐུབ་པ་རེད།

བཀྲ་ཤིས་གསུམ་མདོ་གྲོང་ཚོའི་ཏང་ཀྲི་པུའི་ཧྲུའུ་ཅི་གཞོན་པ་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པ་པ་སངས་ཟླ་བས། “ང་ཚོའི་གྲོང་ཚོར་རྩྭ་ར་མུའུ་ཁྲི་29ལྷག་ཙམ་ཡོད་པ་མ་ཟད། གྲོང་ཚོའི་མཉམ་སྡེབ་དཔལ་འབྱོར་གྱིས་མུའུ་ཁྲི་20ལྷག་ཙམ་འགན་གཙང་བླངས་པ་དེས་ལོ་ལྟར་འབྲོག་པ་མང་ཚོགས་ལ་འགན་གཙང་ལེན་པའི་འགྲོ་གྲོན་སྤྲོད་པ་མ་ཟད། ད་དུང་མ་རྐང་ནང་ཞུགས་པར་གཞིགས་ནས་ནོར་ལུག་དང་གླ་ཆ་སྤྲད་པས་མང་ཚོགས་ཀྱི་ཡོང་འབབ་ཇེ་མང་དུ་ཕྱིན་ཡོད”ཅེས་བཤད།

བཀྲ་ཤིས་གསུམ་མདོ་གྲོང་ཚོའི་ཏང་ཡོན་དཔུང་ཁག་གིས་གྲོང་གསེབ་དར་རྒྱས་གཏོང་བའི་སྣེ་ཁྲིད་ནུས་པ་འདོན་སྤེལ་ཧུར་ཐག་དང་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་གཏོང་སྟངས་གསར་གཏོད་བྱས་པས། འབྲོག་པ་མང་ཚོགས་སྒོ་རྩར་ལས་ཞུགས་ཐུབ་ནས་ས་མཐོའི་འབྲོག་ལས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་འགྲོ་བར་སྐུལ་མ་ཐེབས་པ་མ་ཟད། མང་ཚོགས་ཀྱི་འཚོ་བའི་ཆུ་ཚད་ཀྱང་བརྟན་པོའི་ངང་འཕར་བ་རེད།