ཉེ་ཆར། 2024ལོའི་ལྗོངས་ཡོངས་ཀྱི་བཟོ་ལས་ཐོན་རྫས་ཀྱི་སྤུས་ཚད་ལྟ་སྐུལ་འཐེན་བཤེར་དང་བཟའ་བཅའི་བདེ་འཇགས་འཐེན་བཤེར་ལྟ་ཞིབ་ལས་དོན་གྱི་གསར་འགྱུར་ཡོངས་བསྒྲགས་ཚོགས་འདུ་ལྷ་སར་འཚོགས་ཤིང་། ངོ་སྤྲོད་བྱས་པར་གཞིགས་ན། 2024ལོར་ལྗོངས་ཡོངས་ཀྱིས་བཟོ་ལས་ཐོན་རྫས་ཁག་ཐེངས་3010འཐེན་བཤེར་དང་བཟའ་བཅའ་ཁག་ཐེངས་13427འཐེན་བཤེར་གྱི་ལས་འགན་བཀོད་སྒྲིག་བྱས་པས་ལྗོངས་ཡོངས་ཀྱི་བཟའ་བཅའི་བདེ་འཇགས་སྤྱི་ཡོངས་ཀྱི་གནས་ཚུལ་བརྟན་ཐོག་ཡར་འཕེལ་བྱུང་ཡོད་པ་རེད།

བཟའ་བཅའི་བདེ་འཇགས་ནི་དམངས་འཚོའི་བདེ་རྩ་དང་། ཐོན་ལས་འཕེལ་རྒྱས། སྤྱི་པའི་བདེ་འཇགས། སྤྱི་ཚོགས་བརྟན་ལྷིང་བཅས་དང་ཐད་ཀར་འབྲེལ་བ་ཡོད་པའི་དམངས་འཚོའི་གནད་དོན་གལ་ཆེན་ཞིག་རེད། 2024ལོར། རང་སྐྱོང་ལྗོངས་ཁྲོམ་ར་ལྟ་འདོམས་ཅུས་ཀྱིས་རིམ་བཞིའི་སྤྱི་འདོམས་དོན་འཁྱོལ་ནན་པོ་བྱས་ནས་རྒྱལ་ཁབ་ཀྱི་འཐེན་བཤེར་དང་། ཞིང་ཆེན་གྱི་འཐེན་བཤེར། གྲོང་ཁྱེར་གྱི་འཐེན་བཤེར། རྫོང་གི་འཐེན་བཤེར་བཅས་རིམ་པ་བཞི་ཡི་ལས་བགོས་ནུས་ཤུགས་ཡོད་རྒུས་ལེགས་སུ་བཏང་བ་དང་ལྟ་སྐུལ་འཐེན་བཤེར་དང་། ཉེན་ཁ་ལྟ་ཞིབ་ཚད་ལེན། གདེང་འཇོག་རང་བཞིན་གྱི་འཐེན་བཤེར་བཅས་ཀྱི་ནུས་པའི་ངེས་གནས་ཁ་གསལ་བཟོས་ཤིང་། 2024ལོར། ཁོངས་གཏོགས་ཡོངས་ལ་བཟའ་བཅའི་འཐེན་བཤེར་ལས་འགན་ཁག་ཐེངས་13427བཀོད་སྒྲིག་བྱས་པའི་ནང་རང་སྐྱོང་ལྗོངས་རིམ་པའི་ཁག་ཐེངས་8221དང་། གྲོང་ཁྱེར་དང་རྫོང་རིམ་པའི་ཁག་ཐེངས་5206ཡོད་པ་དང་བཟའ་བཅའ་ཧྲིལ་པོ་འཐེན་བཤེར་དང་རིགས་ཁག་གི་འཐེན་བཤེར་ཚད་གཞི་ལོན་ཚད་ལོ་གོང་མ་ལས་ཅུང་མཐོ་རུ་ཕྱིན་ཡོད་པ་རེད།

མིག་སྔར། ཞིབ་བཤེར་བྱས་ཟིན་པ་མ་ཟད། ཡོངས་བསྒྲགས་ཀྱི་ཆ་རྐྱེན་དང་འཚམ་པའི་ཁག་ཐེངས་4012ཀྱི་འཐེན་བཤེར་ཆ་འཕྲིན་ཁག་5ལ་བགོས་ནས་ཡོངས་བསྒྲགས་བྱས་པའི་ནང་། ཚད་ལོན་ཐོན་རྫས་ཀྱི་ཆ་འཕྲིན་ཁག་ཐེངས་3936དང་ཚད་གཞི་མ་ལོན་པའི་ཐོན་རྫས་ཀྱི་ཆ་འཕྲིན་ཁག་ཐེངས་76ཡོད་པ་དག་རིམ་པས་ཡོངས་བསྒྲགས་བྱ་རྒྱུ་ཡིན་པ་རེད།

གཞན་ཡང་ཤེས་རྟོགས་བྱུང་བར། ད་ལོ་རང་ལྗོངས་ཀྱི་ཁྲོམ་ར་ལྟ་འདོམས་སྡེ་ཚན་གྱིས་བཟའ་བཅའི་བདེ་འཇགས་ཐད“ཁྱེད་ཀྱིས་ཞིབ་བཤེར་བྱེད་དགོས་རིགས་བཏོན་མ་ཐག་ངས་ཞིབ་བཤེར་བྱེད་པའི”བྱེད་སྒོ་སྤེལ་བར་མང་ཚོགས་དེའི་ནང་ཧུར་ཐག་ཞུགས་པ་དང་ཁོང་ཚོའི་བསྔགས་བརྗོད་ཐོབ་ཡོད། བོད་རང་སྐྱོང་ལྗོངས་ཁྲོམ་ར་ལྟ་འདོམས་ཅུས་ཀྱི་ཏང་ཙུའི་ཁོངས་མི་དང་ཅུས་ཀྲང་གཞོན་པ་ཟླ་བས་གཏམ་བཤད་སྤེལ་སྐབས། བཟའ་བཅའི་བདེ་འཇགས་ཐད“ཁྱེད་ཀྱིས་ཞིབ་བཤེར་བྱེད་དགོས་རིགས་བཏོན་མ་ཐག་ངས་ཞིབ་བཤེར་བྱེད་པའི”བྱེད་སྒོ་སྤེལ་བ་ནི་ཁྲོམ་ར་ལྟ་འདོམས་སྡེ་ཚན་གྱིས“འགོ་འཛུགས་མ་ཐག་འཐེན་བཤེར་བྱེད་པའི”གསོན་ཉམས་དོད་པའི་རྣམ་པ་ཞིག་ཡིན་ལ། མང་ཚོགས་ཀྱི་ཁས་ལེན་དང་གདེང་འཇོག་བྱེད་ཚད་མཐོ་བའི་བྱེད་སྟངས་ཤིག་ཀྱང་རེད་ཅེས་བརྗོད།

རང་སྐྱོང་ལྗོངས་ཁྲོམ་ར་ལྟ་འདོམས་སྡེ་ཚན་གྱིས་སྤྱི་བསྒྲགས་བཀྲམ་པ་དང་། འདེམས་ཤོག་འཕེན་པའི་བྱ་རིམ་ཆུང་ངུ་དང་ཁྲིད་སྟོན་བརྙན་ལམ་ཆུང་ངུ་བཟོ་བ་སོགས་ཀྱི་བྱ་ཐབས་སྣ་ཚོགས་བརྒྱུད་མང་ཚོགས་རང་འགུལ་ངང་འཐེན་བཤེར་ནང་ཞུགས་པ་དང་བརྒྱུད་རིམ་ཧྲིལ་པོར་ལྟ་སྐུལ་ཚད་ལེན་བྱེད་པའི་རྣམ་པ་བཟང་པོ་ཧུར་ཐག་བཏོད་ཡོད་པ་རེད། ད་ལོ་རང་སྐྱོང་ལྗོངས་ཁྲོམ་ར་ལྟ་འདོམས་སྡེ་ཚན་གྱིས“ཁྱེད་ཀྱིས་ཞིབ་བཤེར་བྱེད་དགོས་རིགས་བཏོན་མ་ཐག་ངས་ཞིབ་བཤེར་བྱེད་པའི”བྱེད་སྒོ་ཐེངས་གསུམ་སྤེལ་ཞིང་། འཐེན་བཤེར་གྱི་གཙོ་གནད་ཐོན་རྫས་ནི་རྒྱུན་གཏན་གྱི་འཛད་སྤྱོད་བྱེད་ཚད་མང་བ་དང་། མི་སེར་གྱི་འཚོ་བ་དང་འབྲེལ་བ་དམ་ཟབ་ཡོད་པ། མང་ཚོགས་ཀྱི་ཚུར་སྣང་ལན་ཆ་ཆེ་བ་བཅས་ཀྱི་བཟའ་བཅའ་དང་། དུས་ཚིགས་ཀྱི་བཟའ་བཅའ། ས་གནས་ཀྱི་ཁྱད་ལྡན་བཟའ་བཅའ། ཟས་ཆོག་ཚལ། དུས་ཆེན་རིང་བྲིན་ཁ་རྒྱུག་པའི་ཐོན་རྫས་བཅས་ཡིན་པ་དང་འཐེན་བཤེར་བྱ་ཡུལ་ལྗོངས་ཡོངས་ཀྱི་ས་ཁུལ་དང་གྲོང་ཁྱེར་བདུན་ཚང་མ་ཡིན་པ་རེད།