འདི་ནི་ལཱ་ལི་པོ་ཐ་ཏིའི་གྲུ་ཁ་གསར་པ་ཡིན་པ།

སན་སར་ཝ་ཏོལ་ནས་གནས་ཚུལ་སྤེལ་བར་གཞིགས་ན། ཉིན་ཤས་གོང་། ཀྲུང་གོ་མཚོ་ཁུག་ལས་གྲྭ་ཚད་ཡོད་འགན་འཁྲི་ཀུང་སིས་རོགས་སྐྲུན་བྱས་པའི་སར་ཝ་ཏོལ་ལཱ་ལི་པོ་ཐ་ཏིའི་གྲུ་ཁ་གསར་པའི་རྣམ་གྲངས་སྤྱོད་འགོ་ཚུགས་པ་རེད།

སར་ཝ་ཏོལ་གྱི་ཡུལ་སྐོར་པུའུ་ཀྲང་མོའོ་ལུའེ་ནཱ·པར་ཏེ་སི་དང་། ཕྱི་འབྲེལ་པུའུ་ཀྲང་གཞོན་པ་ཨ་ཏེ་ལི་ཨན་ནཱ·སྨི་ལཱ། སར་ཝ་ཏོལ་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཀྲང་ཡན་ཧུའེ་སོགས་ལཱ་ལི་པོ་ཐ་ཏི་ཞིང་ཆེན་དུ་གྲུ་ཁ་གསར་པ་སྤྱོད་འགོ་ཚུགས་པའི་མཛད་སྒོར་ཞུགས་པ་རེད།

པར་ཏེ་སིས་ཤིས་ཚིག་སྒྲོན་སྐབས། ཀྲུང་གོ་ཕྱོགས་ཀྱིས་རོགས་སྐྲུན་བྱས་པར་ཐུགས་རྗེ་ཆེ་ཞུས་པ་དང་འབྲེལ། གྲུ་ཁ་གསར་པ་དེ་ཉིད་སར་ཝ་ཏོལ་གྱི་དམངས་ཚོགས་དང་རྒྱལ་སྤྱིའི་ཡུལ་སྐོར་བའི་ཡུལ་སྐོར་ས་ཚིགས་གསར་པར་འགྱུར་རྒྱུ་མ་ཟད། ད་དུང་ས་གནས་དེ་གའི་དམངས་ཚོགས་ལ་ལས་ཀའི་གོ་སྐབས་ཐོབ་སྟེ་ཁོང་ཚོའི་ཕུགས་འདུན་མངོན་འགྱུར་ཡོང་བར་རམ་འདེགས་ཐུབ་ངེས་རེད་ཅེས་བརྗོད་པ་རེད།

སྨི་ལཱ་ཡིས་ཤིས་ཚིག་སྒྲོན་སྐབས། ཀྲུང་གོ་ཕྱོགས་ཀྱིས་ལས་གྲྭ་གལ་ཆེན་དེ་རོགས་སྐྲུན་བྱས་པར་ཐུགས་རྗེ་ཆེ་ཞུ་རྒྱུ་ཡིན། གྲུ་ཁ་གསར་པ་བསྐྲུན་པ་དེས་རྒྱུན་མཐུད་ཆོག་པའི་འཕེལ་རྒྱས་ཀྱི་འདུ་ཤེས་རྒྱུན་འཛིན་ཐུབ་ཡོད། འབྱུང་འགྱུར་སར་ཀྲུང་མཉམ་ལས་ཀྱིས་སར་ཝ་ཏོལ་གྱི་རྨང་གཞིའི་སྒྲིག་བཀོད་དེང་རབས་ཅན་ལ་འགྱུར་བར་སྔར་བས་སྐུལ་འདེད་བཏང་སྟེ། མི་དམངས་ཀྱི་འཚོ་བའི་སྤུས་ཚད་མཐོ་རུ་དང་འཕེལ་རྒྱས་ཀྱི་གོ་སྐབས་གསར་པ་སྦྱིན་ངེས་རེད་ཅེས་བརྗོད་པ་རེད།

ལཱ་ལི་པོ་ཐ་ཏི་ནི་སར་ཝ་ཏོལ་གྱི་རྒྱལ་ས་སན་སར་ཝ་ཏོལ་དང་བར་ཐག་སྤྱི་ལེ་30ཙམ་ཆོད་ཅིང་། དེ་ནི་རྒྱལ་ཁབ་དེའི་ཡུལ་སྐོར་ཁུལ་གལ་ཆེན་གྱི་གྲས་ཤིག་རེད། ངོ་སྤྲོད་བྱས་པར་གཞིགས་ན། ལཱ་ལི་པོ་ཐ་ཏིའི་གྲུ་ཁ་ནི་ཀྲུང་གོ་ཕྱོགས་ཀྱིས་སར་ཝ་ཏོལ་ལ་རོགས་སྐྲུན་བྱས་པའི་ལེ་ལག་ཚང་བའི་རྣམ་གྲངས་དང་པོ་དེ་ཡིན་ཞིང་། 2021ལོའི་ཟླ་6པར་དངོས་སུ་ལས་འགོ་བཙུགས་པ་དང་། གསར་དུ་སྐྲུན་པའི་ཟམ་སྣེ་དང་གྲུ་ཁའི་ལས་སྟེགས་སོགས་ཀྱི་གྲུ་ཁའི་ལས་གྲྭ་ཕུད། ད་དུང་ཚོང་ལས་ཁུལ་དང་། སྤྱི་པའི་འཕྲོད་བསྟེན་ཁུལ། ལྗོངས་གཟིགས་ཁུལ་སོགས་ཕྱོགས་བསྡུས་ཐོག་ཁང་གི་འཛུགས་སྐྲུན་ཡང་ཚུད་ཡོད་པ་རེད།