ཉེ་ཆར། པར་ཙིར་གྱི་ཙུང་ཐུང་ལུའུ་ལཱ་ཡི་གདན་ཞུས་ལྟར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པར་ཙིར་ལ་རྒྱལ་དོན་འཚམས་འདྲི་གནང་བ་རེད། འཚམས་འདྲི་གནང་རིང་། ཀྲུའུ་ཞི་ཞི་ཅིན་ཕིང་དང་ཙུང་ཐུང་ལུའུ་ལཱ་རྣམ་གཉིས་ཀྱིས་ཀྲུང་གོ་དང་པར་ཙིར་གྱི་འབྲེལ་བའི་ངེས་གནས་དེ་ལག་གདང་སྦྲེལ་ནས་དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཆོག་པའི་སྐར་མའི་གོ་ལའི་ཀྲུང་གོ་དང་པར་ཙིར་གྱི་ལས་དབང་གཅིག་མཐུན་ཚོགས་པ་འཛུགས་པར་མཐོར་འདེགས་བྱ་རྒྱུ་དང་འབྲེལ། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་པར་ཙིར་གྱི་འཕེལ་རྒྱས་ཀྱི་འཐབ་ཇུས་གཉིས་སྦྲེལ་མཐུད་བྱ་རྒྱུའི་ཁྱབ་བསྒྲགས་གནང་བ་རེད། འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་མཁན་པར་ཙིར་གྱི་ལས་རིགས་ཁག་གི་མི་སྣ་ཚོས། ཀྲུའུ་ཞི་ཞི་ཅིན་ཕིང་གི་ད་ཐེངས་ཀྱི་འཚམས་འདྲིར་གྲུབ་འབྲས་གཡུར་དུ་ཟ་བ་ཐོབ་པ་མ་ཟད་དོན་སྙིང་ཀྱང་ཟབ་མོ་ལྡན་པས། དེ་ནི་པར་ཙིར་དང་ཀྲུང་གོའི་འབྲེལ་བའི་ལོ་རྒྱུས་ཀྱི་ལམ་ཚད་རྡོ་རིང་གལ་ཆེན་ཞིག་ཏུ་གྱུར་ཡོད་ཅེས་བརྗོད།

“རྒྱལ་ཁབ་གཉིས་པོའི་ཁྱབ་ཁོངས་ཁག་གི་དངོས་སྒྲུབ་མཉམ་ལས་ཕྱོགས་ཡོངས་ནས་ཟབ་ཏུ་འགྲོ་བར་ཁ་ཕྱོགས་གསལ་སྟོན་བྱས་པ”

ཀྲུའུ་ཞི་ཞི་ཅིན་ཕིང་གིས། ཀྲུང་གོ་དང་པར་ཙིར་ནི་སའི་གོ་ལའི་ཤར་ཕྱེད་དང་ནུབ་ཕྱེད་ཀྱི་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོ་གཉིས་ཡིན། འདས་ཟིན་པའི་ལོ་50ལ་ཕྱིར་མིག་ལྟ་སྐབས། ཀྲུང་གོ་དང་པར་ཙིར་རྒྱལ་ཁབ་གཉིས་པོའི་མཚོ་ལས་ཟབ་པའི་འབྲེལ་བ་ལས་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོའི་ཕན་ཚུན་བརྩི་འཇོག་དང་། གཉིས་ཁེ་མཛའ་གྲོགས། མཉམ་ལས་གཉིས་ཁེ་བཅས་ཀྱི་ཡང་དག་པའི་མཉམ་གནས་ཀྱི་ལམ་བུ་ཞིག་འཚོལ་ཞིབ་ཐུབ་ཡོད་ཅེས་གསུངས།

པར་ཙིར་དང་ཀྲུང་གོའི་མཛའ་གྲོགས་མཐུན་ཚོགས་ཀྱི་ཀྲུའུ་ཞི་ཨེན་ལི་ཁེ·ཏ་ནུའོ་པུའུ་ལེ་ཅཱ་ཡིས། “ཀྲུའུ་ཞི་ཞི་ཅིན་ཕིང་ད་ཐེངས་འཚམས་འདྲིར་ཕེབས་པ་དེས་རྒྱལ་ཁབ་གཉིས་པོའི་འབྲེལ་བ་སྔར་བས་འཕེལ་རྒྱས་འགྲོ་བར་སྐུལ་མ་ཐེབས་ཏེ། རྒྱལ་ཁབ་གཉིས་པོའི་ཁྱབ་ཁོངས་ཁག་གི་དངོས་སྒྲུབ་མཉམ་ལས་ཕྱོགས་ཡོངས་ནས་ཟབ་ཏུ་འགྲོ་བར་ཁ་ཕྱོགས་གསལ་སྟོན་བྱས་ཡོད”ཅེས་བརྗོད་པ་དང་། ཁོང་གིས་པར་ཙིར་དང་ཀྲུང་གོ་རྒྱལ་ཁབ་གཉིས་དབར་ས་ཐག་རིང་པོས་ཆོད་ཀྱང་། རྒྱལ་ཁབ་གཉིས་པོའི་མི་དམངས་ཀྱི་བརྩེ་སེམས་མཚོ་ལས་ཟབ་པ་དང་། སྐད་ཡིག་དང་རིག་གནས་འདྲ་པོ་མེད་ཀྱང་རྒྱལ་ཁབ་གཉིས་པོའི་མི་དམངས་ཀྱིས་མཛེས་སྡུག་ལྡན་པའི་འཚོ་བར་བཅངས་པའི་འདུན་པ་ནི་གཅིག་མཚུངས་ཡིན་པའི་ངོས་འཛིན་བྱེད་བཞིན་ཡོད།

པར་ཙིར་རིག་གནས་པུའི་པུའུ་ཀྲང་མཱ་ཀེ་ལི་ཐེ·མའེ་ནེ་སའེ་སིས། “ཀྲུའུ་ཞི་ཞི་ཅིན་ཕིང་ད་ཐེངས་འཚམས་འདྲིར་ཕེབས་པ་དེས་རྒྱལ་ཁབ་གཉིས་པོའི་མི་ཆོས་རིག་གནས་སྤེལ་རེས་སོགས་ཁྱབ་ཁོངས་ཀྱི་མཉམ་ལས་ཀྱི་མི་མངོན་པའི་སྟོབས་ཤུགས་ཆེ་རུ་ཕྱིན་ཡོད”ཅེས་བརྗོད་པ་མ་ཟད། ཁོང་གིས“རྒྱལ་ཁབ་གཉིས་པོའི་མི་དམངས་ཀྱིས་ཕན་ཚུན་དབར་གྱི་རིག་གནས་ལ་བཅངས་པའི་སྤྲོ་སེམས་ཉིན་བཞིན་ཆེ་རུ་འགྲོ་བཞིན་ཡོད”ཅེས་བརྗོད།

པར་ཙིར་ལི་གཡོད་རེ་ནེ་ལུའུ་ཀྲོའུ་གྲོས་ཚོགས་ཀྱི་གྲོས་དཔོན་གཞོན་པ་དང་པར་ཙིར་དང་ཀྲུང་གོའི་གྲོས་མིའི་འཐབ་ཕྱོགས་ཀྱི་ཀྲུའུ་ཞི་ཏི་ཡཱ·རུའུ་ཡིས། “ཀྲུའུ་ཞི་ཞི་ཅིན་ཕིང་འཚམས་འདྲིར་ཕེབས་པ་དེས་རྒྱལ་ཁབ་གཉིས་པོའི་འབྲེལ་བ་ཟབ་ཏུ་གཏོང་བར་ལོ་རྒྱུས་རང་བཞིན་གྱི་དོན་སྙིང་ལྡན་ཡོད”ཅེས་བརྗོད་པ་དང་། ཁོང་གིས་གོ་ལ་ཧྲིལ་པོའི་ལྷོ་ཕྱོགས་ཀྱི་དཔལ་འབྱོར་སྒྲིག་གཞི་གལ་ཆེན་གཉིས་ཡིན་པའི་པར་ཙིར་དང་ཀྲུང་གོ་རྒྱལ་ཁབ་གཉིས་པོས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་ལེགས་སྐྱེས་དེ་བས་མང་བ་འབུལ་རྒྱུའི་རེ་བ་བྱེད་བཞིན་ཡོད་ཅེས་བརྗོད།

“པར་ཙིར་གྱི་འཕེལ་རྒྱས་མྱུར་པོ་དང་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་རང་སྟོབས་མངོན་འགྱུར་ཡོང་བར་དངོས་ཡོད་ཀྱི་དོན་སྙིང་གལ་ཆེན་ལྡན་ཡོད”

པར་ཙིར་ཕྱི་ཕྱོགས་ཚོང་དོན་ཚོང་ཚོགས་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་ཨ་ཏེར·ཁར་ནེ་ལུའོ་ཡིས། “‘རྒྱུད་གཅིག་ལམ་གཅིག’མཉམ་སྐྲུན་གྱི་གྲོས་འགོ་དང་པར་ཙིར་གྱི་འཕེལ་རྒྱས་ཀྱི་འཐབ་ཇུས་སྦྲེལ་མཐུད་བྱས་པ་དེས། རྒྱལ་ཁབ་གཉིས་པོའི་སྲོལ་རྒྱུན་མཛའ་གྲོགས་སྔར་བས་ཟབ་ཏུ་འགྲོ་བ་མ་ཟད། པར་ཙིར་དང་ཀྲུང་གོའི་དཔལ་འབྱོར་ཚོང་དོན་མཉམ་ལས་ལའང་གོ་སྐབས་ཧ་ཅང་ཆེན་པོ་འཕྲད་ངེས་རེད”ཅེས་བརྗོད་པ་དང་། ཁོང་གིས་པར་ཙིར་ཚོང་ལས་ལས་རིགས་ཀྱིས་ཀྲུའུ་ཞི་ཞི་ཅིན་ཕིང་ད་ཐེངས་འཚམས་འདྲིར་ཕེབས་པར་ཚད་མཐོའི་དོ་ཁུར་བྱེད་བཞིན་ཡོད་ཅིང་། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོར་ཤུགས་རྐྱེན་ཆེན་པོ་ལྡན་ཡོད། “པར་ཙིར་དང་ཀྲུང་གོ་རྒྱལ་ཁབ་གཉིས་ཀྱིས་འཐབ་ཇུས་ཀྱི་སྦྲེལ་མཐུད་ལ་ཤུགས་སྣོན་བརྒྱབ་པ་དེས། པར་ཙིར་འཕེལ་རྒྱས་མྱུར་པོ་དང་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་རང་སྟོབས་མངོན་འགྱུར་ཡོང་བར་དངོས་ཡོད་ཀྱི་དོན་སྙིང་གལ་ཆེན་ལྡན་ཡོད”ཅེས་བརྗོད།

ཀྲུང་གོ་འདི་ཉིད་ལོ་15བསྟུད་མར་པར་ཙིར་གྱི་ཚོང་དོན་རོགས་ཟླ་ཆེ་ཤོས་དང་པོ་དང་། པར་ཙིར་གྱི་ཕྱི་ཕྱོགས་མ་དངུལ་ཡོང་ཁུངས་ཀྱི་རྒྱལ་ཁབ་གཙོ་བོའི་གྲས་ཤིག་ཡིན། འདས་ཟིན་པའི་ལོ་3གྱི་རིང་། ཀྲུང་གོས་པར་ཙིར་ནས་ལོ་རེའི་ནང་འདྲེན་བྱེད་ཚད་ཆ་སྙོམས་ཨ་སྒོར་དུང་ཕྱུར་སྟོང་ལས་བརྒལ་ཡོད། ཉེ་བའི་ལོ་ཤས་རིང་། ཀྲུང་གོ་དང་པར་ཙིར་ཕྱོགས་གཉིས་པོའི་ཚོང་དོན་གྲུབ་ཆ་ཉིན་རེ་བཞིན་ལེགས་སུ་ཕྱིན་པ་དང་། མཉམ་ལས་ཀྱི་ཆུ་ཚད་མཐོ་རུ་རྒྱུན་མཐུད་ཕྱིན་པ། ཐུན་མོང་གི་ཁེ་ཕན་རྒྱུན་ཆད་མེད་པར་ཆེ་རུ་ཕྱིན་པ། ཞིང་ལས་དང་། རྨང་གཞིའི་སྒྲིག་བཀོད། ནུས་རྒྱུའི་ཐོན་ཁུངས། ལྗང་མདོག་འཕེལ་རྒྱས། ཚན་རྩལ་གསར་གཏོད། དངུལ་རྩ་སོགས་ཁྱབ་ཁོངས་ཀྱི་གཉིས་ཁེ་མཉམ་ལས་ལ་བཀྲག་མདངས་འཚེར་ས་མང་བ་དང་གྲུབ་འབྲས་གཡུར་དུ་ཟ་བ་ཐོབ་ནས། རང་རང་སོ་སོའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་མ་ནུས་ལྡན་ཐེབས་ཡོད།

“འཛམ་གླིང་གི་ཞི་བདེ་དང་འཕེལ་རྒྱས་བྱ་གཞག་ལ་ལེགས་སྐྱེས་གསར་པ་ཕུལ་བ”

ཀྲུའུ་ཞི་ཞི་ཅིན་ཕིང་གིས། ཀྲུང་གོ་ཕྱོགས་ཀྱིས་པར་ཙིར་ཕྱོགས་དང་མཉམ་དུ་མིའི་རིགས་ཀྱི་མདུན་ལམ་དང་མི་དམངས་ཀྱི་བདེ་རྩ་བློ་ལ་བཅངས་ཏེ། དུས་རབས་གསར་པའི་ཀྲུང་གོ་དང་པར་ཙིར་འབྲེལ་བའི་ནང་དོན་རྒྱུན་ཆད་མེད་པར་ཕུན་སུམ་ཚོགས་སུ་གཏོང་བ་དང་། ཕན་ཚུན་དབར་གྲུབ་འབྲས་ཀྱིས་ཕྱུག་པའི“རོགས་པ་ཡག་ཤོས”བྱས་ཏེ། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པ་དང་། དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཆོག་པའི་སྐར་མའི་གོ་ལ་འཛུགས་པའི་དམིགས་ཚད་ཀྱི་ཕྱོགས་སུ་མུ་མཐུད་མདུན་སྐྱོད་བྱས་ཏེ། མིའི་རིགས་ཀྱི་ཞི་བདེ་དང་ཡར་ཐོན་བྱ་གཞག་ལ་ལེགས་སྐྱེས་དེ་བས་ཆེ་བ་འབུལ་འདོད་ཡོད་ཅེས་གསུངས།

རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ཐེངས་བཅུ་དགུ་པ་མ་འཚོགས་གོང་། ཀྲུའུ་ཞི་ཞི་ཅིན་ཕིང་གིས་ཚོགས་ཞུགས་འགོ་ཁྲིད་པ་དང་ལྷན་དུ་པར་ཙིར་ཕྱོགས་ཀྱིས་བཏོན་པའི“བཀྲེས་ལྟོགས་དང་དབུལ་ཕོངས་འགོག་རྒོལ་གྱི་གོ་ལ་ཧྲིལ་པོའི་མནའ་འབྲེལ”གྱི་གྲོས་འགོའི་འགོ་ཚུགས་མཛད་སྒོར་ཞུགས་པ་དང་འབྲེལ། ཚོགས་འདུའི་ཐོག་ཀྲུང་གོས་གོ་ལ་ཧྲིལ་པོའི་འཕེལ་རྒྱས་ལ་རྒྱབ་སྐྱོར་བྱེད་པའི་བྱ་སྤྱོད་ཁག་བརྒྱད་ཁྱབ་བསྒྲགས་གནང་བ་རེད། པར་ཙིར་ལུའུ་ལཱ་སློབ་ཚོགས་ཀྱི་ཚོགས་གཙོ་མཱ་ལི་ཡཱ·ཏ་ཞིར་ཝ་ཡིས། “ཀྲུང་གོའི་ཉམས་མྱོང་མཉམ་སྤྱོད་བྱས་པ་དེས་པར་ཙིར་དང་ཐ་ན་འཛམ་གླིང་གི་དབུལ་པོ་ཉུང་གཏོང་གི་ལག་ལེན་ལ་དཔྱད་གཞིར་འཛིན་ཆོག་པའི་དོན་སྙིང་གལ་ཆེན་ལྡན་ཡོད”པ་དང་། རྒྱལ་ཁབ་གཉིས་པོའི་ཐུན་མོང་འབད་བརྩོན་འོག བཀྲེས་ལྟོགས་དང་དབུལ་ཕོངས་ཀྱི་དཀའ་གནད་ལས་སྒྲོལ་ཆེད་བློ་གྲོས་དང་སྟོབས་ཤུགས་སྐྱེས་སུ་ཕུལ་ཏེ། དེ་བས་དྲང་གཞག་དང་ཞི་མཐུན་གྱི་འཛམ་གླིང་ཞིག་གཏོད་རྒྱུའི་རེ་བ་བྱེད་བཞིན་ཡོད། “དེ་ནི་ང་ཚོའི་ཐུན་མོང་གི་དམིགས་ཡུལ་ཡིན་ལ་མིའི་རིགས་ཧྲིལ་པོའི་དམིགས་ཡུལ་ཡང་ཡིན”ཞེས་བརྗོད།