དྲ་ཐོག་ནས་ཨང་ཀི་ལེན་པ་དང་། རེའུ་མིག་རྒྱོང་བ། དངུལ་བསྐུར་བ་བཅས་ལས་སྐར་གྲངས་གསོག་པ་དང་། བསགས་པའི་ཐཱན་གྱི་སྐར་གྲངས་ཀྱིས་གློག་བརྙན་སྤ་སེ་དང་། ཉོ་སྐྱེལ་འཛིན་ཤོག འཛད་སྤྱོད་འཕྲལ་གཅོག་དངུལ་བཅས་བརྗེ་ཆོག་པ། དེ་དག་ནི་ཐཱན་ཉུང་བྱ་སྤྱོད་ཀྱི་རིན་ཐང་གཞན་སྒྱུར་བྱེད་པ་ལས་མི་སེར་ལ་ཕན་པ་དངོས་ཐོབ་པ་བཅས་བྱས་ཏེ་མི་སྒེར་གྱི་འཚོ་བའི་འཛད་སྤྱོད་ཁྱབ་ཁོངས་དེ་ཐཱན་ཉུང་ཁོར་ཡུག་སྲུང་སྐྱོང་གི་ཕྱོགས་སུ་བསྒྱུར་བར་རམ་འདེགས་བྱས་ཡོད། འདི་ནི་ཉིང་ཁྲི་གྲོང་ཁྱེར་གྱིས་མི་སྒེར་གྱི“ཐཱན་རྩིས་ཁྲར”སྐུལ་འདེད་གཏོང་བའི་ཚོད་ལྟའི་ལས་དོན་སྤེལ་ཏེ་དངུལ་རྩའི་ནུས་སྤྲོད་ལ་བརྟེན་ནས་ལྗང་མདོག་ཐཱན་ཉུང་འཕེལ་རྒྱས་གཏོང་བའི་གསོན་ཉམས་དོད་པའི་ལག་ལེན་ཞིག་རེད།

འདི་ལོའི་ཟླ་7པར། ཉིང་ཁྲི་གྲོང་ཁྱེར་མི་དམངས་སྲིད་གཞུང་དང་། ཀྲུང་གོ་མི་དམངས་དངུལ་ཁང་རང་སྐྱོང་ལྗོངས་ཡན་ལག་དངུལ་ཁང་། འཛུགས་སྐྲུན་དངུལ་ཁང་རང་སྐྱོང་ལྗོངས་ཡན་ལག་དངུལ་ཁང་བཅས་ཕྱོགས་གསུམ་མཉམ་འགུལ་གྱིས་སྤྱི་ཚོགས་ལྗང་མདོག་ཐཱན་ཉུང་གི་འཚོ་བའི་ལག་ལེན་ནང་ཞུགས་པའི་ཐབས་ལམ་འཚོལ་ཞིབ་ཧུར་ཐག་བྱས་ཏེ“ལྗང་མདོག་དངུལ་རྩར་བརྟེན་ནས་ལྗང་མདོག་འཕེལ་རྒྱས་ལ་རམ་འདེགས་བྱེད། ཐཱན་ཉུང་འཚོ་བར་བརྟེན་ནས་མཛེས་སྡུག་ལྡན་པའི་ཉིང་ཁྲི་མཉམ་དུ་སྐྲུན་པའི”བྱེད་སྒོ་སྤེལ་ནས་བོད་ཀྱི་གྲོང་ཁྱེར་ཁྱབ་ཁོངས་ནང་མི་སྒེར་གྱི“ཐཱན་རྩིས་ཁྲའི”ཚོད་ལྟའི་རྣམ་གྲངས་ཐོག་མ་ཉིང་ཁྲིར་དོན་འཁྱོལ་བྱེད་པར་སྐུལ་འདེད་བཏང་བས། “ཐཱན་ཉུང”དེ“མི་སྒེར་གྱི་དུས་རབས”སུ་རིམ་བཞིན་སླེབས་པར་བྱས་ནས་སྤྱི་དམངས་ལྗང་མདོག་ཐཱན་ཉུང་བྱ་སྤྱོད་ནང་ཞུགས་པའི་སྤྲོ་སེམས་འཕེལ་བར་བྱས་ཡོད།

འཛུགས་སྐྲུན་དངུལ་ཁང་ཉིང་ཁྲི་གྲོང་ཁྱེར་ཡན་ལག་དངུལ་ཁང་གིས་ལག་ཐོགས་ཁ་པར་དངུལ་ཁང་དང་འཛུགས་སྐྲུན་དངུལ་ཁང་གི་འཚོ་བའི“སྐར་གཉིས”ལས་སྟེགས་རྨང་གཞིར་བྱས་ནས་སྔོན་ལ་ཚོད་ལྟ་བྱས་ཏེ་འཛད་སྤྱོད་དུད་སྣེའི་ཐཱན་འབུད་ཉུང་གཏོང་དང་ལྗང་མདོག་འཛད་སྤྱོད་ལ་སྐུལ་འདེད་གཏོང་བའི་ཐོན་རྫས་གསར་པའི་མི་སྒེར་གྱི“ཐཱན་གྱི་རྩིས་ཁྲ”བཟོས་ཏེ། མི་སྒེར་གྱི་ཐཱན་འབུད་ཚད་བསྡོམས་རྩིས་དང་དོ་དམ་བྱས་ནས་སྤྱི་ཚོགས་ཀྱི་སྤྱི་དམངས་མི་སྒེར་གྱིས་ཆུ་དང་གློག་གྲོན་ཆུང་དང་། དྲ་ཐོག་ནས་དངུལ་རྩའི་ལས་སྒོ་གཉེར་བ། ལྗང་མདོག་འགྲོ་སྐྱོད་སོགས་ཀྱི་བྱ་སྤྱོད་ལས་གྲོན་ཆུང་ཐུབ་པའི་ཐཱན་འབུད་ཚད་དེ་ཐཱན་གྱི་སྐར་གྲངས་ལ་སྒྱུར་བ་དང་། ཆ་འཕྲིན་ཅན་ལ་བརྟེན་ནས་གྲོང་མིའི་འཚོ་བའི་ཁྱབ་ཁོངས་ཀྱི་ཐཱན་འབུད་ཚད་ལ་རྗེས་སྙེགས་དང་དོ་དམ་བྱས་ནས་ལྗང་མདོག་འཛད་སྤྱོད་ལ་ཁྲིད་སྟོན་དང་ལྗང་མདོག་བྱ་སྤྱོད་ལ་ལྕག་སྐུལ་བྱས་ཡོད། འདི་ལོའི་ཟླ་11ཚེས་4ཉིན་བར་འཛུགས་སྐྲུན་དངུལ་ཁང་ཉིང་ཁྲི་གྲོང་ཁྱེར་ཡན་ལག་དངུལ་ཁང་གིས་རིམ་རྩིས་བྱས་ན་མི་སྒེར་གྱི“ཐཱན་གྱི་རྩིས་ཁྲ”2735ལ་སྤྱོད་དབང་སྤྲད་ཡོད།

“སྤྱི་རྒྱ་1.5ཡི་ལྗང་མདོག་ནུས་པར་ཉོ་སྐྱེལ་སྒོར་10ཟིན་ཚེ་སྒོར་4གཅོག་པའི་གཟིགས་སྐྱོང་འཛིན་ཤོག་བརྗེ་ཆོག་པ་དང་། དེའི་ནང་འཛུལ་ཚེ་ཉོ་སྐྱེལ་གྱི་དྲ་ངོས་སུ་འཛུལ་ཐུབ་ནས་དངུལ་སྤྲོད་སྐབས་ཐད་ཀར་སྤྱོད་ཐུབ་ཀྱི་ཡོད། ནུས་ཚད་དངུལ་བཞིན་སྤྱོད་རྒྱུ་ཡོད་པས་ཐཱན་འབུད་ཉུང་དུ་གཏོང་ཐུབ་ལ་དངུལ་ཡང་གྲོན་ཆུང་ཐུབ་ཀྱི་ཡོད”ཅེས་སྐུ་ཞབས་ལི་ལགས་ཀྱིས་གསར་འགོད་པར་བཤད་བྱུང་།