ཀྲུང་གོ་དང་ཕེ་རུའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་སྐས་རིམ་གསར་པར་སླེབས་རྒྱུར་སྣེ་ཁྲིད་བྱས་པ།
—— ཀྲུའུ་ཞི་ཞི་ཅིན་ཕིང་གིས་རྒྱལ་དོན་འཚམས་འདྲི་གནང་བར་ཕེ་རུའི་ལས་རིགས་ཁག་གི་མི་སྣའི་ཚད་མཐོའི་གདེང་འཇོག་ཐོབ་པ།
ཉེ་ཆར། ཕེ་རུའི་ཙུང་ཐུང་པོ་ལུའུ་ཨར་ཐེའི་གདན་ཞུས་ལྟར་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ཕེ་རུར་རྒྱལ་དོན་འཚམས་འདྲི་གནང་བར་ཕེབས་པ་རེད། ཀྲུང་ཕེ་རྒྱལ་ཁབ་གཉིས་པོའི་གཙོ་བདག་གིས་ཕེ་རུའི་རྒྱལ་ས་ལི་མའི་ཙུང་ཐུང་ལས་ཤག་ཏུ་གྲོས་མོལ་གནང་ཞིང་། ཕྱོགས་གཉིས་པོའི་འབྲེལ་བ་དང་ཐུན་མོང་ཐོག་དོ་ཁུར་བྱེད་པའི་གནད་དོན་ཐད་དགོངས་འཆར་བརྗེ་རེས་གཏིང་ཟབ་གནང་བ་བརྒྱུད་ཐུན་མོང་གི་ངོས་འཛིན་རྒྱ་ཁྱབ་བྱུང་བ་རེད། འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་མཁན་ཕེ་རུའི་ལས་རིགས་ཁག་གི་མི་སྣས། ད་རེས་ཀྲུའུ་ཞི་ཞི་ཅིན་ཕིང་གིས་འཚམས་འདྲི་གནང་བར་གྲུབ་འབྲས་གཡུར་དུ་ཟ་བ་ཐོབ་ཅིང་། རྒྱལ་ཁབ་གཉིས་པོའི་དངོས་སྒྲུབ་མཉམ་ལས་ཀྱི་སྤུས་ཚད་མཐོར་གཏོང་དང་རིམ་སྤོར་ལ་སྐུལ་འདེད་བཏང་སྟེ། རྒྱལ་ཁབ་གཉིས་པོའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་སྐས་རིམ་གསར་པར་སླེབས་རྒྱུར་སྣེ་ཁྲིད་བྱས་ཡོད་ཅེས་བཤད་པ་རེད།
ཆན་ཁའེ་གྲུ་ཁ་སྒོ་དབྱེ་བས་དུས་རབས་གསར་པའི་ཨེ་ཤེ་ཡའི་སྐམ་མཚོའི་བགྲོད་ལམ་གསར་པ་ཞིག་ཐོན་པ།
འཚམས་འདྲི་གནང་རིང་ཀྲུའུ་ཞི་ཞི་ཅིན་ཕིང་དང་ཙུང་ཐུང་པོ་ལུའུ་ཨར་ཐེ་རྣམ་གཉིས་ཀྱིས་བརྙན་ལམ་བརྒྱུད་ཆན་ཁའེ་གྲུ་ཁ་སྒོ་དབྱེ་བའི་མཛད་སྒོར་ལྷན་དུ་ཞུགས་པ་རེད། ཀྲུའུ་ཞི་ཞི་ཅིན་ཕིང་གིས་ད་ཆའི་ཆན་ཁའེ་གྲུ་ཁ་དེ་ཉིད“དུས་རབས་གསར་པའི་དབྱིན་ཅ་གནའ་ལམ”གྱི་འགོ་འཛུགས་ས་གསར་པར་འགྱུར་བཞིན་ཡོད། “ཆན་ཁའེ་ནས་ཧྲང་ཧའེ་བར”ང་ཚོས་ད་ལྟ་བདེན་དཔང་བྱེད་བཞིན་པ་ནི“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་ཕེ་རུར་རྩ་བ་ཚུགས་ནས་མེ་ཏོག་བཞད་པ་ཙམ་མ་ཟད། དུས་རབས་གསར་པའི་ཨེ་ཤེ་ཡའི་སྐམ་མཚོའི་བགྲོད་ལམ་གསར་པ་ཞིག་ཀྱང་རེད་ཅེས་བསྟན་གནང་བ་རེད།
ཆན་ཁའེ་གྲུ་ཁའི་དུས་ཐེངས་དང་པོའི་ལས་གྲྭས་ཕེ་རུ་ནས་ཀྲུང་གོའི་བར་གྱི་མཚོ་ཐོག་སྐྱེལ་འདྲེན་གྱི་དུས་ཡུན་ཉིན་23བར་ཐུང་དུ་གཏོང་ཐུབ་ཀྱི་ཡོད། ཕེ་རུ་རྒྱལ་ཁབ་བཟོ་ལས་མཐུན་ཚོགས་ཀྱི་ཀྲུའུ་ཞི་ཧྥེ་ལི་ཕེ·ཀྲན་མུའུ་སིས། ཆན་ཁའེ་གྲུ་ཁས་ཕེ་རུ་དང་ཨེ་ཤེ་ཡའི་རྒྱལ་ཁབ་དབར་གྱི་དངོས་ཟོག་སྐྱེལ་འདྲེན་གྱི་དུས་ཡུན་ཐུང་དུ་བཏང་བ་མ་ཟད། སྐམ་ས་དང་རྒྱ་མཚོ་སྦྲེལ་མཐུད་དང་ཨེ་ཤེ་ཡ་དང་ལ་ཏིང་མེ་གླིང་སྦྲེལ་མཐུད་བྱེད་པའི་ཕེ་རུའི་གཙོ་ཆེའི་གནས་བབ་ཀྱང་བརྟན་དུ་ནུས་ལྡན་ཕྱིན་ཡོད། “ཆན་ཁའེ་གྲུ་ཁ་ལས་ཕེ་རུ་དེ་ཉིད་ལ་ཏིང་མེ་གླིང་དང་ལྷོ་ཞི་བདེ་རྒྱ་མཚོ་ཆེན་པོའི་ངོགས་ཀྱི་ཟོག་འགྲེམས་ལྟེ་གནས་སུ་འགྱུར་རེ་ཡོད”ཅེས་བཤད་པ་རེད། 《ཕེ་རུ་བའི་ཚགས་པར》གྱི་སྤྱི་ཁྱབ་རྩོམ་སྒྲིག་པ་ལུའུ་ཏའོ་ཧྥུའུ·ཨའེ་སི་ཕི་ནར་གྱིས“ཀྲུང་གོས་ཕེ་རུ་ཚུད་པའི་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་དང་མཉམ་ལས་བྱས་ན། དཔལ་འབྱོར་འཕེལ་རྒྱས་ལ་སྐུལ་འདེད་གཏོང་རྒྱུར་ཕན་ཐོགས་ཡོད། ས་ཁུལ་གྱི་གྲུ་ཁ་ཆེན་པོ་ཞིག་ཡིན་པའི་ཆན་ཁའེ་གྲུ་ཁ་ལས་ས་ཁུལ་དང་རྒྱལ་ཁབ་དབར་གྱི་དཔལ་འབྱོར་ཚོང་དོན་མཉམ་ལས་གཏིང་ཟབ་ཏུ་ཕྱིན་ནས་ཐུན་མོང་ཐོག་འཕེལ་རྒྱས་འགྲོ་རྒྱུར་རམ་འདེགས་ཐུབ་རྒྱུ་ཡིན”ཞེས་བཤད་པ་རེད།
རང་མོས་ཚོང་དོན་ཆོད་ཡིག་གི་རིམ་སྤོར་གྲོས་ཆོད་ཡི་གེར་མིང་རྟགས་བཀོད་ནས་དཔལ་འབྱོར་ཚོང་དོན་འགྲོ་འོང་ལ་སྐུལ་འདེད་བཏང་བ།
འཚམས་འདྲི་གནང་རིང་རྒྱལ་ཁབ་གཉིས་པོའི་གཙོ་བདག་གིས《“རྒྱུད་གཅིག་ལམ་གཅིག”མཉམ་སྐྲུན་སྐོར་གྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སྲིད་གཞུང་དང་ཕེ་རུ་སྤྱི་མཐུན་རྒྱལ་ཁབ་སྲིད་གཞུང་དབར་གྱི་མཉམ་ལས་འཆར་འགོད》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སྲིད་གཞུང་དང་ཕེ་རུ་སྤྱི་མཐུན་རྒྱལ་ཁབ་སྲིད་གཞུང་གི་རང་མོས་ཚོང་དོན་ཆོད་ཡིག་གི་རིམ་སྤོར་གྲོས་ཆོད་ཡི་གེར》མིང་རྟགས་བཀོད་པར་ཐུན་མོང་ཐོག་དཔང་པོ་གནང་བ་དང་འབྲེལ་དཔལ་འབྱོར་ཚོང་དོན་དང་། ཐོན་ལས་མ་འཇོག བཟོ་ལས་གླིང་ཁུལ། སློབ་གསོ། ལྗང་མདོག་འཕེལ་རྒྱས་སོགས་ཁྱབ་ཁོངས་ཀྱི་ཕྱོགས་གཉིས་པོའི་མཉམ་ལས་ཡིག་ཆ་མང་པོ་བརྗེ་རེས་བྱས་པ་ལའང་དཔང་པོ་གནང་བ་རེད།
“ཕེ་རུ་དང་ཀྲུང་གོར་ཐུན་མོང་འཕེལ་རྒྱས་ཀྱི་འདུན་པ་ཡོད། ཀྲུང་གོའི་ལུགས་ཀྱི་དེང་རབས་ཅན་འཕེལ་རྒྱས་ཀྱི་ཉམས་མྱོང་དེ་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་དཔྱད་གཞིར་འཛིན་འོས་པ་ཞིག་རེད” “རིམ་པ་སྤར་བའི་རང་མོས་ཚོང་དོན་ཆོད་ཡིག་འདིས་རྒྱལ་ཁབ་གཉིས་པོའི་ཚོང་དོན་འགྲོ་འོང་གི་ཁྱད་ཆོས་ལ་གཞིགས་ནས་ནང་དོན་གསར་བརྗེས་དང་རྒྱ་སྐྱེད་བཏང་བ་སྟེ། སྔོན་མའི་ཆོད་ཡིག་གི་རྨང་གཞིའི་ཐོག་འགྲན་རྩོད་ཀྱི་སྲིད་ཇུས་དང་། གོ་ལ་ཧྲིལ་པོའི་མཁོ་སྤྲོད་འཁོར་འབྲེལ། ཁོར་ཡུག་དང་ཚོང་དོན་སོགས་ལེའུ་གསར་པ་བསྣན་ཡོད། དེ་མིག་སྔའི་གོ་ལ་ཧྲིལ་པོའི་ཚོང་དོན་མ་འཇོག་ཁྱབ་ཁོངས་ཀྱི་འཕེལ་ཕྱོགས་དང་དེ་བས་འཚམ་ནས་ཕེ་རུ་དང་ཀྲུང་གོའི་དཔལ་འབྱོར་ཚོང་དོན་མཉམ་ལས་ཀྱི་ལས་ཕྱོད་ཆེ་རུ་དང་མ་གནས་ཆུང་དུ་ནུས་ལྡན་འགྲོ་རྒྱུ་རེད། ཀྲུང་གོའི་དཔལ་འབྱོར་མུ་མཐུད་བརྟན་པོའི་ངང་འཕར་ཏེ། ཕེ་ཀྲུང་གི་དཔལ་འབྱོར་ཚོང་དོན་མཉམ་ལས་ལ་ཕན་པ་དེ་བས་མང་པོ་འདོགས་རྒྱུ་དང་གོ་ལ་ཧྲིལ་པོའི་དཔལ་འབྱོར་ལ་དྲང་ཕྱོགས་ཀྱི་ཕན་འབྲས་དེ་བས་མང་བ་འདོགས་རྒྱུའི་རེ་སྒུག་བྱེད་ཀྱི་ཡོད”ཅེས་ཕེ་རུའི་རྒྱལ་བཙུགས་ཧྲེང་མཱ་ཁོ་སི་སློབ་ཆེན་ཨེ་ཤེ་ཡ་ཞིབ་འཇུག་ལྟེ་གནས་ཀྱི་ཀྲུའུ་རེན་ཁ་ལུའོ་སི·ཨ་ཅི་ནུའོ་ཡིས་བཤད་པ་རེད།
“ཀྲུའུ་ཞི་ཞི་ཅིན་ཕིང་གིས་ཕེ་རུར་རྒྱལ་དོན་འཚམས་འདྲི་གནང་བ་དེས་ཕེ་ཀྲུང་མཉམ་ལས་སྐས་རིམ་གསར་པར་སླེབས་རྒྱུར་སྐུལ་མ་ཐེབས་ནས་ཕེ་རུར་འཕེལ་རྒྱས་ཀྱི་གོ་སྐབས་དེ་བས་མང་པོ་ཐོབ་རྒྱུ་རེད”ཅེས་དང་། འབྱུང་འགྱུར་ཕེ་རུའི་ཁྱད་ལྡན་ཐོན་རྫས་དེ་བས་མང་བ་ཀྲུང་གོའི་ཁྲོམ་རར་འདོན་རྒྱུའི་རེ་བ་ཡོད་ལ། ཀྲུང་གོའི་ཚན་རྩལ་ཐོན་རྫས་དེ་བས་མང་བ་ཕེ་རུའི་འཛད་སྤྱོད་པས་གདམ་ག་བྱ་རྒྱུའི་རེ་བའང་ཡོད་ཅེས་ཕེ་རུ་ཚན་རྩལ་སློབ་ཆེན་གྱི་སློབ་སྤྱི་ཆའོ་ན་སེན·ཀེར་ཀན་ཐེས་བཤད་པ་རེད།
ཕེ་ཀྲུང་གི་སྤེལ་རེས་ལ་ཤུགས་སྣོན་རྒྱག་པ་དང་ཐུན་མོང་ཐོག་འཕེལ་རྒྱས་བཏང་ནས་དམངས་ཚོགས་དེ་བས་མང་བར་བདེ་སྐྱིད་བསྐྲུན་པ།
ཀྲུའུ་ཞི་ཞི་ཅིན་ཕིང་གིས་ཙུང་ཐུང་པོ་ལུའུ་ཨར་ཐེ་དང་གྲོས་མོལ་གནང་སྐབས། ཕྱོགས་གཉིས་པོས་གཏེར་ཁའི་ནུས་རྒྱུ་དང་། རྨང་གཞི་སྒྲིག་བཀོད། འགྲིམ་འགྲུལ་འཕྲིན་གཏོང་སོགས་སྲོལ་རྒྱུན་ཁྱབ་ཁོངས་ཀྱི་མཉམ་ལས་ལ་སྤྱི་འདོམས་སྐུལ་འདེད་བཏང་སྟེ་གྲངས་འཛིན་དཔལ་འབྱོར་དང་། མི་ཐབས་རིག་ནུས། ལྗང་མདོག་ཆུ་ཐོག་སྐྱེལ་འདྲེན། གློག་སྒུལ་རླངས་འཁོར། འོད་ཤུགས་ཐོན་ལས་སོགས་གསར་དར་ཁྱབ་ཁོངས་ཀྱི་མཉམ་ལས་རྒྱ་ཆེར་གཏོང་དགོས་ཞེས་གསུངས་པ་རེད།
ཕེ་རུའི་ཧྲེང་དབྱི་ཀེ་ན་ཤིས་ཨའོ་ཏེ་ལུའོ་གཡོད་ལཱ་སློབ་ཆེན་སྨྱན་སྦྱོར་སློབ་གླིང་གི་ཡོན་ཀྲང་ལུའོ་ལན་ཏུའོ·ལུའོ་ཏེ་ལི་ཆིས། ཀྲུང་གོའི་དུས་བསྟུན་འཕེལ་རྒྱས་ཀྱི་ཚན་རྩལ་གསར་གཏོད་ནུས་པར་མི་རྣམས་ཧང་སངས་དགོས་པ་ཞིག་འདུག ནུས་རྒྱུ་ཕྱོགས་སྒྱུར་དང་ལྷག་པར་དུ་བསྐྱར་སྐྱེས་ཐུབ་པའི་ནུས་རྒྱུ་གསར་སྤེལ་ཁྱབ་ཁོངས་སུ་གྲུབ་འབྲས་གཡུར་དུ་ཟ་བ་ཐོབ་འདུག “ཕེ་ཀྲུང་རྒྱལ་ཁབ་གཉིས་པོས་ཁྱབ་ཁོངས་དེ་དག་ནང་སྤེལ་རེས་ལ་ཤུགས་སྣོན་རྒྱག་པ་དང་ཐུན་མོང་ཐོག་འཕེལ་རྒྱས་བཏང་ནས་དམངས་ཚོགས་དེ་བས་མང་པོར་བདེ་སྐྱིད་བསྐྲུན་རྒྱུའི་རེ་སྒུག་བྱེད་ཀྱི་ཡོད”ཅེས་བཤད་པ་རེད།