དགུན་དུས་རྣམ་གྲངས་འཛུགས་སྐྲུན་གྱི་ཚ་རླབས་རབ་ཏུ་འཕྱུར། ནག་ཆུའི་ཡངས་པའི་རྩྭ་ཐང་དུ་སྐྱོད་སྐབས་བོད་ཀྱི“གློག་གསོག་འབོ”ཆེ་ཤོས་དང་། གོ་ལ་ཧྲིལ་པོའི་ས་བབ་མཐོ་ཤོས། གློག་འདོན་ཤུགས་ཆེ་ཤོས་བཅས་ཀྱི་རང་ཚུགས་དྲ་གྲུབ་རྣམ་པའི་ནུས་གསོག་རྣམ་གྲངས་ཏེ། བོད་ལྗོངས་གསར་སྤེལ་མ་འཇོག་གསེར་རྙེད་ཆུས་རྟ་སྒ་ཕུ་རང་ཚུགས་དྲ་གྲུབ་རྣམ་པའི་ནུས་གསོག་གློག་ཁང་གི་བཟོ་ཁང་ནང་འཕྲུལ་འཁོར་འཁོར་སྐྱོད་བྱེད་བཞིན་འདུག ནུས་གསོག་རྣམ་གྲངས་བདེ་བླག་ངང་ལག་ལེན་བསྟར་བ་དེས་ནག་ཆུ་གྲོང་ཁྱེར་ཡོངས་ཀྱི་གློག་ཤུགས་མཁོ་འདོན་སྔར་བས་བརྟན་པོ་ཡོང་བའི་འགན་ལེན་ཐུབ་ནས་དེ་སྔའི་དགུན་དཔྱིད་གཉིས་སུ་གློག་དཀོན་པའི་སྣང་ཚུལ་ཇེ་ལེགས་སུ་འགྲོ་རྒྱུ་རེད།

ཟླ་11ཚེས་10ཉིན། བོད་ལྗོངས་གསར་སྤེལ་མ་འཇོག་གསེར་རྙེད་ཆུས་རྟ་སྒ་ཕུ་རང་ཚུགས་དྲ་གྲུབ་རྣམ་པའི་ནུས་གསོག་གློག་ཁང་གི་གློག་དྲ་སྦྲེལ་མཐུད་ཐུབ་ནས་གློག་གཏོང་འགོ་ཚུགས་པ་རེད། ས་གནས་ས་ཐོག་ཏུ་གསར་འགོད་པར་ཤེས་རྟོགས་བྱུང་བར། རྣམ་གྲངས་དེ་གཏན་འཁེལ་བྱས་ཏེ་ལས་འགོ་ཚུགས་པ་ནས་ལེགས་གྲུབ་བྱུང་བའི་བར་ཉིན་82ལས་འགོར་མེད་པ་དང་མ་དངུལ་བསྡོམས་འབོར་སྒོར་དུང་ཕྱུར་4.52བཏང་བའི་འཛུགས་སྐྲུན་ལས་འགན་ལེགས་གྲུབ་བྱུང་ཡོད་པ་རེད། “ང་ཚོས་ལས་རིམ་ལེགས་སུ་བཏང་ནས་རྣམ་གྲངས་འཛུགས་སྐྲུན་གྱི‘འཕྲེད་ལམ་རི་མོ’དང‘ཉ་རུས་ས་བཀྲ’བཟོས་པ་དང་ཨར་ལས་བཟོ་སྐྲུན་དང་རྨང་གཞིའི་འཛུགས་སྐྲུན་གཉིས་མཉམ་དུ་སྤེལ་ཏེ་རྣམ་གྲངས་འཛུགས་སྐྲུན་གྱི་དུས་ཚོད་ཐུང་དུ་གཏོང་གང་ཐུབ་བྱས་པ་དང་། ནུས་ཤུགས་ཡོད་རྒུས་རྣམ་གྲངས་འཛུགས་སྐྲུན་གྱི་འཕེལ་རིམ་དང་ཨར་ལས་ཀྱི་བདེ་འཇགས་སྟངས་འཛིན་ཡག་པོ་བྱས་པ་ཡིན”ཞེས་བོད་ལྗོངས་གསར་སྤེལ་མ་འཇོག་གི་འབྲེལ་ཡོད་འགན་འཁུར་བས་ངོ་སྤྲོད་བྱས།

ཉེ་ཆར། མངའ་རིས་ས་ཨུད་ཀྱིས“གལ་ཆེན་གཉིས”ཀྱི་འཛུགས་སྐྲུན་དང“གསར་པ་གཉིས”ཀྱི་བྱ་སྤྱོད་སོགས་ཀྱི་གོ་སྐབས་ལ་དམ་འཛིན་ནན་པོ་བྱས་ཏེ། 2025ལོའི་རྣམ་གྲངས་གྲབས་གསོག་དང་སྒྲིག་བཟོའི་སྙན་ཞུ་ཡག་པོ་བྱེད་པ་དང་། དུས་ཚིགས་བཞི་པའི་འགག་སྒྲོལ་བྱ་སྤྱོད་ཀྱི་འཆར་གཞི་དོན་འཁྱོལ་ཡག་པོ་བྱེད་པ། རྣམ་གྲངས་དོན་འཁྱོལ་དང་། འཛུགས་སྐྲུན། ལས་མཇུག་འགྲིལ་བ། ཐོན་སྐྱེད་བཅས་ཀྱི་འཕེལ་རིམ་མགྱོགས་སུ་བཏང་ནས། ལོ་ཧྲིལ་པོའི་གཏན་འཇགས་རྒྱུ་ནོར་གྱི་མ་འཇོག་དམིགས་ཚད་ལས་འགན་ལེགས་གྲུབ་ཐུབ་པ་བྱེད་དགོས་པའི་བླང་བྱ་ཁ་གསལ་བཏོན་པ་རེད།

ཟླ་10པའི་ཟླ་མཇུག་ཏུ། ཉིང་ཁྲི་གྲོང་ཁྱེར་དང་ཀོང་ཏུང་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པས་ཁྲེང་ཏུར་2024ལོའི་སི་ཁྲོན(ཁྲེང་ཏུའུ)དང་བོད་ལྗོངས(ཉིང་ཁྲི)ཀྱི་ཚོང་འགུགས་མ་འདྲེན་གྱི་འོས་སྦྱོར་སྤེལ་རེས་བྱེད་སྒོ་གཉེར་བར། སི་ཁྲོན་ཞིང་ཆེན་དང་བོད་རང་སྐྱོང་ལྗོངས་ཀྱི་ཁེ་ལས་115ཞུགས་ཏེ་རྣམ་གྲངས་15ལ་གན་རྒྱ་བཞག་པར། མ་དངུལ་སྒོར་དུང་ཕྱུར་10.79ཟིན་པའི་ནང་ནུས་རྒྱུ་གཙང་མ་དང་ཁྱད་ལྡན་རིག་གནས་ཡུལ་སྐོར་སོགས་ཕྱོགས་མང་པོ་ཚུད་ཡོད་པ་རེད།

ལོ་འཁོར་གྱི་དམིགས་ཚད་མངོན་འགྱུར་བྱེད་པར་དུས་ཚིགས་བཞི་པ་ནི་གལ་འགངས་ཤིན་ཏུ་ཆེ་བ་ཞིག་ཡིན། ཉེ་ཆར། རང་སྐྱོང་ལྗོངས་ཀྱིས་དུས་ཚིགས་བཞི་པའི་ལྗོངས་ཡོངས་ཀྱི་གཙོ་གནད་འཛུགས་སྐྲུན་རྣམ་གྲངས་ཀྱི་འགག་སྒྲོལ་བྱ་སྤྱོད་ཀྱི་ཇུས་གཞི་སོགས་བཀྲམ་པ་དང་། གཙོ་གནད་འཛུགས་སྐྲུན་རྣམ་གྲངས་157བཀོད་སྒྲིག་བྱེད་རྩིས་ཡོད་པར་མ་དངུལ་སྒོར་དུང་ཕྱུར་420གཏོང་རྩིས་ཡོད་པ་དེ་དག་གཙོ་བོ་རྨང་གཞིའི་སྒྲིག་བཀོད་དང་། ཁྱད་ལྡན་ལེགས་ཆའི་ཐོན་ལས། སྤྱི་ཚོགས་བྱ་གཞག་སོགས་ཁྱབ་ཁོངས་ཀྱི་རྣམ་གྲངས་དང་འབྲེལ་བ་ཡོད་པ་རེད། མིག་སྔར། རྣམ་གྲངས་དེ་དཔལ་འབྱོར་འཁོར་རྒྱུག་གི་བཀོད་གཏོང་ལམ་སྲོལ་ལྟར་ནུས་ལྡན་གྱི་ལས་ཡུན་དམ་འཛིན་བྱས་ནས། ལོ་འགོར་གཏན་འཁེལ་བྱས་པའི་དམིགས་ཚད་ལས་འགན་ལེགས་གྲུབ་ཐུབ་པའི་འགན་ལེན་བྱེད་བཞིན་ཡོད་པ་རེད།

ལས་དོན་དོན་འཁྱོལ་ལ་སྔར་བས་དམ་འཛིན་ནན་པོ་དང་ནུས་ལྡན་གྱི་མ་འཇོག་བྱེད་རྒྱ་མུ་མཐུད་ཆེ་རུ་གཏོང་ཆེད། ད་ལོ་རང་སྐྱོང་ལྗོངས་ཀྱི་ཞིང་ཆེན་རིམ་པའི་འགོ་ཁྲིད་ངོ་མས་གཙོ་གནད་རྣམ་གྲངས་21འཛུགས་སྐྲུན་ལ་སྐུལ་འདེད་གཏོང་རྒྱུ་འགན་གཙང་བླངས་ཏེ། “འགོ་ཁྲིད་ཀྱིས་འགན་གཙང་ལེན་པ་དང་། ཆེད་དོན་ཚན་ཁག་གིས་ཞབས་འདེགས་ཞུ་བ། དུས་བཀག་ལྟར་བཀོད་གཏོང་བྱེད་པ། ནུས་ཤུགས་ཡོད་རྒུས་སྐུལ་འདེད་གཏོང་བ”བཅས་ཀྱི་ལས་ཀའི་རྩ་དོན་དང་། “རྣམ་གྲངས་གཅིག་དང་། འགོ་ཁྲིད་གཅིག ཇུས་གཞི་ཆ་ཚང་གཅིག དམ་འཛིན་མཐར་ཕྱིན”བཅས་ཀྱི་ལས་དོན་སྤེལ་སྟངས་གཞིར་བཟུང་། འགན་གཙང་འགན་ལེན་རྣམ་གྲངས་འཛུགས་སྐྲུན་ལ་ནུས་ཤུགས་ཡོད་རྒུས་སྐུལ་འདེད་བཏང་བ་རེད། ད་ལོའི་ཟླ་10པའི་བར། ལྗོངས་ཡོངས་ཀྱི་འགན་གཙང་འགན་ལེན་རྣམ་གྲངས་ལ་མ་དངུལ་སྒོར་དུང་ཕྱུར་465.6བཏང་བ་དེས་ལོ་ཧྲིལ་པོའི་དམིགས་ཚད་ཀྱི་70%བཟུང་ཡོད་པ་རེད།