2016ལོའི་ཟླ་7པར། ཀྲེང་ཧའོ་ཡིས་བོད་ལ་རོགས་སྐྱོར་བྱ་རྒྱུའི་སྐོར་གྱི་རྒྱལ་ཁབ་ཀྱི་འབོད་སྐུལ་དང་ལེན་ཧུར་ཐག་བྱས་ཏེ་ཧྥུའུ་ཀྲོའུ་ནས་ཆབ་མདོ་གྲོང་ཁྱེར་དཔའ་ཤོད་རྫོང་དུ་ཡོང་།

དཔའ་ཤོད་རྫོང་དུ་ཐོག་མར་སླེབས་སྐབས་ཀྲེང་ཧའོ་ཡིས་དབུལ་ཕོངས་ཀྱི་གནད་དོན་ཐད་སེམས་ཁྲལ་ཆེན་པོ་བྱེད་ཀྱི་ཡོད། ཁོང་གིས་ལ་དུག་ཕོག་ཀྱང་ངལ་བ་ཁྱད་བསད་ཀྱིས་ལ་ལུང་བརྒལ་ནས་གཞི་རིམ་དུ་བརྟག་ཞིབ་བྱེད་པར་བསྐྱོད་དེ་མགྱོགས་མྱུར་ལས་ཀའི་ནང་ཞུགས།

གནས་རབ་གྲོང་ཚོ་དང་གཤས་པ་གྲོང་ཚོའི་ཡུལ་གཞན་དུ་གནས་སྤོ་བྱ་ཡུལ་གྱི་འཛུགས་སྐྲུན་ལས་ཡུལ་དུ་ཁོང་གིས་བདེ་འཇགས་སྲུང་ཞྭ་གྱོན་ཏེ། འདམ་རྫབ་ལ་མི་འཛེམ་པར་ཨར་སྐྲུན་གྱི་མྱུར་ཚད་དང་སྤུས་ཚད་ལ་ནན་ཏན་ངང་ལྟ་ཞིབ་བྱས་ཤིང་། ཐ་ན་རང་ཉིད་ཀྱི་འོག་འཇུག་རྔུལ་ཆུས་འཚོས་པ་ཡང་ཚོར་མེད། རྫོང་འཕྲོད་བསྟེན་ཞབས་ཞུའི་ལྟེ་གནས་ཀྱི་རྣམ་གྲངས་འཛུགས་སྐྲུན་བྱེད་རིང་ཀྲེང་ཧའོ་ཡིས་ལས་ཡུལ་དུ་ཐེངས་མང་བསྐྱོད་དེ་སྨན་བཅོས་ཞབས་ཞུའི་སྤུས་ཚད་ལ་ཤུགས་རྐྱེན་བཟོ་སྲིད་པའི་གནས་ཚུལ་ཆུང་ཙག་ཀྱང་ལྷོད་གཡེང་དུ་གཏན་ནས་བཏང་མེད།

རྫོང་སློབ་འབྲིང་གི་རྣམ་གྲངས་ཀྱི་ལས་ཡུལ་དུ་ཀྲེང་ཧའོ་ཡིས་གྲང་རླུང་ལ་མི་འཛེམ་པར་ཨར་ལས་རྒྱུ་ཆའི་སྤུས་ཚད་ལ་ཞིབ་བཤེར་ནན་ཏན་བྱས། ཁོང་གིས་རང་ཉིད་ཀྱི་སེར་ཁ་གས་པའི་ལག་གཉིས་པོས་སོ་ཕག་དང་ཨར་འདམ་ལ་རེག་སྐབས་ཕྲུ་གུ་ཚོའི་འབྱུང་འགྱུར་དང་རེ་བ་མཐོང་བ་ལྟར་གྱི་སྣང་བ་བྱུང་།

ཀྲེང་ཧའོ་ཡིས་དཔའ་ཤོད་ཡུན་རིང་འཕེལ་རྒྱས་བརྟན་པོ་ཡོང་བར་རང་ངོས་ཀྱི་ནང་སྐྱེས་སྒུལ་ཤུགས་འཕེལ་བ་བྱེད་དགོས་ལ་ཕྱི་ཕྱོགས་ཀྱི་རོགས་སྐྱོར་ཡང་དགོས་པ་གསལ་པོ་ཤེས་ཀྱི་ཡོད། དེས་ན་ཁོང་གིས་ཧྥུའུ་ཀྲོའུ་གྲོང་ཁྱེར་གྱི་གཅེས་སེམས་ཚན་པ་དང་མི་སྣ་དང་མཐུན་སྦྱོར་ཧུར་ཐག་བྱས་ཏེ་དཔའ་ཤོད་རྫོང་གི་ལས་དོན་ཁག་ནང་ཞུགས་ནས་རོགས་སྐྱོར་མ་དངུལ་དང་དངོས་ཟོག་སྒོར་དུང་ཕྱུར་1ཙམ་གྲབས་གསོག་ཐུབ་སྟེ་དཔའ་ཤོད་རྫོང་གི་འཕེལ་རྒྱས་ལ་གསོན་ཤུགས་བསྣན། དེ་དང་ཆབས་ཅིག ཧྥུའུ་ཀྲོའུ་གྲོང་ཁྱེར་གྱི་རྫོང(གྲོང་ཁྱེར)ཆུས་9ཡིས་དཔའ་ཤོད་རྫོང་གི་ཤང(གྲོང་རྡལ)14དང་ཆ་སྒྲིག་རོགས་སྐྱོར་གྱི་གྲོས་མཐུན་འཇོག་རྒྱུར་སྐུལ་འདེད་བཏང་བས། ཆ་སྒྲིག་རོགས་སྐྱོར་ཕྱོགས་་ཡོངས་ལ་ཁྱབ་ནས་མི་རིགས་མཐུན་སྒྲིལ་ལ་སྔར་བས་སྐུལ་འདེད་ཐེབས་ཡོད།

དཔའ་ཤོད་རྫོང་དུང་དཀར་ཨར་འདམ་བཟོ་གྲྭའི་རྣམ་གྲངས་བརྩོན་ལེན་བྱེད་རིང་པེ་ཅིང་དང་ལྷ་སར་ཕར་འགྲོ་ཚུར་འོང་བྱེད་པའི་ལམ་བར་དུ་ཀྲེང་ཧའོ་ཡིས་ལམ་ཐག་རིང་པོའི་འགྲུལ་བཞུད་ཀྱི་ངལ་དུབ་བཟོད་ཐབས་ཀྱིས་སྙན་ཞུའི་ཡིག་ཆ་བསྡུ་སྒྲིག་བྱས་ནས་སེམས་ནང་ངེས་པར་དུ་དཔའ་ཤོད་ལ་རྣམ་གྲངས་དེ་བརྩོན་ལེན་བྱེད་ཐུབ་པའི་རེ་བ་འཆང་བཞིན་ཡོད།

དཔའ་ཤོད་རྫོང་དུང་དཀར་ཨར་འདམ་བཟོ་གྲྭའི་རྣམ་གྲངས་གྲུབ་འབྲས་ཐོབ་པའི་ངང་དོན་འཁྱོལ་བྱུང་བའི་སྐབས་དེར་ཀྲེང་ཧའོ་ལ་སེམས་འགུལ་ཆེན་པོ་ཐེབས་ནས་མིག་ལ་མཆི་ཞག་ཀྱང་འཁོར། རྣམ་གྲངས་དེ་ལས་དཔལ་འབྱོར་གྱི་ཕན་འབྲས་ཐོན་པ་མ་ཟད། ལས་ཞུགས་ཀྱི་གོ་སྐབས་ཀྱང་དེ་བས་ཐོབ་ནས་འབྲེལ་ཡོད་ལས་རིགས་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་རྒྱུར་སྐུལ་ཁྲིད་ཐུབ་སྟེ་དཔའ་ཤོད་ཀྱི་དབུལ་སྒྲོལ་འགག་སྒྲོལ་ལ་རྨང་གཞི་བརྟན་པོ་ཞིག་བཏིང་ཡོད།

ལས་བྱེད་པ་དང་མང་ཚོགས་ལ་སྣེ་ཁྲིད་བྱས་ཏེ་བྱ་གཞག་གཏོད་པའི་ཐད་ཀྲེང་ཧའོ་ཡིས་ནུས་ཤུགས་ཡོད་རྒུ་བཏོན་ཞིང་། ཁོང་གིས“གདན་དྲངས་པ་དང་ཕྱིར་སྐྱོད་པའི”བྱེད་སྟངས་ཟུང་འབྲེལ་བྱས་ཏེ་ཕྱོགས་ཁག་གི་རིགས་གཅིག་མཁས་ཅན་གདན་དྲངས་ནས་སྤེལ་རེས་དང་མཛུབ་ཁྲིད་བྱས་པ་དང་། ལས་བྱེད་པ་དང་མང་ཚོགས་སྒྲིག་འཛུགས་བྱས་ནས་ཕྱིར་ཉམས་མྱོང་སློབ་སྦྱོང་བྱེད་པར་མངགས་པ། སྣེ་འཁྲིད་དེ་ལས་རིགས་སློབ་གསོའི་གསོ་སྦྱོང་བཅས་བྱས་ཡོད།

ད་ཆའི་དཔའ་ཤོད་རྫོང་དུ་དཔལ་འབྱོར་དང་སྤྱི་ཚོགས་རྒྱུན་མཐུད་འཕེལ་རྒྱས་འགྲོ་བཞིན་ཡོད། 2023ལོར་རྫོང་ཡོངས་ཀྱི་ས་གནས་ཀྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་19.87ཟིན་པ་དེ་2016ལོ་ལས་ལྡབ་1.95འཕར་བ་དང་། བཟོ་ལས་ཀྱི་ཐོན་རྫས་རིན་ཐང་བསྡོམས་འབོར་སྒོར་དུང་ཕྱུར་8.5ཟིན་པ། གྲོང་ཁྱེར་དང་གྲོང་རྡལ་དུ་གྱུར་ཚད་27.89%ཟིན་ཡོད། ཡུལ་གཞན་དུ་གནས་སྤོས་བཀོད་སྒྲིག་བྱ་ཡུལ་དུ་ཕྲུ་གུ་ཚོའི་དགོད་སྒྲ་ལྷང་ལྷང་དུ་གྲགས་བཞིན་ཡོད་ལ། རྒན་རྒོན་ཚོའི་ངོ་གདོང་ནས་བདེ་སྐྱིད་ཀྱི་འཛུམ་མདངས་འཕྱུར་བཞིན་ཡོད།

ད་ཆ་ཧྥུའུ་ཀྲོའུ་ཡི་ལས་གནས་སུ་ལོག་ནས་ལོ་མང་སོང་ཡང་ཀྲེང་ཧའོ་ཡིས་ཐོག་མའི་བསམ་འདུན་མ་བརྗེད་པར་ལས་ཀར་ལྷོད་གཡེང་སྤུ་ཙམ་ཡང་གཏོང་གི་མེད།

ཀྲེང་ཧའོ་ཡིས་རང་ཉིད་ཀྱི་ལང་ཚོ་དང་དཀའ་སྤྱད་ལ་བརྟེན་ནས་དཔའ་ཤོད་ཀྱི་ས་གཞིའི་ཐོག་མི་སེམས་འགུལ་བའི་ལེགས་སྐྱེས་ཕུལ་ཡོད།