ཤིན་ཧྭ་གསར་འགྱུར་ཁང་གྲོང་ཁྱེར་པ་ཞི་ལི་ཡ་ནས་ཟླ་11ཚེས་20ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཟླ་11ཚེས་20ཉིན་གྱི་དགོང་མོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གྲོང་ཁྱེར་པ་ཞི་ལི་ཡར་པར་ཙིར་གྱི་ཙུང་ཐུང་ལུའུ་ལཱ་ཡིས་བཤམས་པའི་དགའ་བསུ་ཞུ་བའི་གསོལ་སྟོན་གཟབ་རྒྱས་ལ་ཞུགས་པ་རེད།

ཞི་ཅིན་ཕིང་གིས་ཤིས་ཚིག་གསུངས་སྐབས་ཙུང་ཐུང་ལུའུ་ལཱ་དང་པར་ཙིར་མི་དམངས་ཀྱི་སྤྲོ་སེམས་འཁོལ་བའི་མཛའ་མཐུན་གྱི་སྣེ་ལེན་གནང་བར་ཐུགས་རྗེ་ཆེ་ཞུས་པ་དང་། ཙུང་ཐུང་ལུའུ་ལཱ་ཡི་འགོ་ཁྲིད་འོག་པར་ཙིར་ལ་འཕེལ་རྒྱས་ཀྱི་གྲུབ་འབྲས་མངོན་གསལ་དོད་པོ་ཐོབ་པར་རྟེན་འབྲེལ་ཞུས་པ་རེད། ཞི་ཅིན་ཕིང་གིས་གསུངས་དོན། ཀྲུང་གོ་དང་པར་ཙིར་དབར་མུ་མཐའ་མེད་པའི་རྒྱ་མཚོ་ཆེན་པོས་ཆོད་མོད། འོན་ཀྱང་འདིས་ཕན་ཚུན་རྒྱུས་མངའ་དང་འཆམ་མཐུན་གྱི་གོམ་སྟབས་འགོག་མི་ཐུབ། ཀྲུང་གོ་དང་པར་ཙིར་རྒྱལ་ཁབ་གཉིས་པོར་སོ་སོའི་ཁྱད་ཆོས་མངོན་གསལ་དོད་པོ་ལྡན་ཡོད་ལ། ཕན་ཚུན་ཞི་མཐུན་མཉམ་འདྲེས་ཀྱང་ཐུབ་ཡོད། སྒོ་དབྱེ་གསར་གཏོད་དང་སྣ་མང་གཞི་གཅིག་ནི་ང་ཚོ་རྒྱལ་ཁབ་གཉིས་པོའི་ཐུན་མོང་གི་ཁྱད་ཆོས་དང་དོན་གཉེར་ཡིན།

ཞི་ཅིན་ཕིང་གིས་གསུངས་དོན། ང་དང་ཙུང་ཐུང་ལུའུ་ལཱ་ཡིས་རྒྱལ་ཁབ་གཉིས་པོའི་འབྲེལ་བའི་ངེས་གནས་དེ་ལག་གདང་སྦྲེལ་ནས་དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཆོག་པའི་སྐར་མའི་གོ་ལའི་ཀྲུང་གོ་དང་པར་ཙིར་གྱི་ལས་དབང་གཅིག་མཐུན་ཚོགས་པར་རིམ་སྤོར་བྱེད་པའི་ཁྱབ་བསྒྲགས་བྱས་པ་དང་འབྲེལ། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་པར་ཙིར་གྱི་འཕེལ་རྒྱས་འཐབ་ཇུས་སྦྲེལ་མཐུད་ཀྱི་མཉམ་ལས་ཡིག་ཆར་མིང་རྟགས་བཀོད་པའི་དཔང་པོ་ཡང་བྱས་ཡོད། དེར་བརྟེན་རྒྱལ་ཁབ་གཉིས་པོའི་འབྲེལ་བར་མཆོང་སྐྱོད་གསར་པ་བྱུང་བ་དང་དུས་རབས་ཀྱི་ནང་དོན་གསར་པ་བསྣན་པས། སྐྱེ་སྟོབས་ཀྱི་དཔལ་རབ་ཏུ་འབར་བ་དང་ཡངས་ཤིང་རྒྱ་ཆེ་བའི་མདུན་ལམ་མངོན་ཡོད། སྔར་སོང་ལ་ཕྱིར་དྲན་བྱེད་སྐབས། ཀྲུང་གོ་དང་པར་ཙིར་གྱི་འབྲེལ་བར་ཐོབ་པའི་གྲུབ་འབྲས་ལ་ང་ཚོ་སྤོབས་པ་བྱེད་འོས་པའི་རྒྱུ་མཚན་ཡོད་ལ། འབྱུང་འགྱུར་ལ་རྒྱང་ལྟ་བྱེད་སྐབས། ཀྲུང་གོ་དང་པར་ཙིར་གྱི་འབྲེལ་བའི་འོད་ཟེར་འཕྲོ་བའི་མདུན་ལམ་ལ་ང་ཚོས་རེ་སྒུག་ཆེན་པོ་བྱེད་འོས་པའི་གདེང་ཚོད་ཀྱང་ཡོད། འགོ་འཛུགས་ས་གསར་པའི་ཐོག་ནས་ཀྲུང་གོ་ཕྱོགས་ཀྱིས་པར་ཙིར་ཕྱོགས་དང་མཉམ་དུ་འབད་བརྩོན་བྱས་ནས་སྙིང་རུས་གཏན་འཁྱོངས་དང་འབད་བརྩོན་ལྷོད་མེད་ཀྱིས་ལག་གདང་སྦྲེལ་ནས་ཀྲུང་གོ་དང་པར་ཙིར་གྱི་ལས་དབང་གཅིག་མཐུན་ཚོགས་པ་བཙུགས་ཏེ། ཀྲུང་གོ་དང་པར་ཙིར་གྱི་འབྲེལ་བའི“རྫོགས་ལྡན་གྱི་ལོ་50”རྗེས་མའི་འགོ་འཛུགས་འདོད་ཡོད།

ལུའུ་ལཱ་ཡིས་གསུངས་དོན། ཀྲུའུ་ཞི་ཞི་ཅིན་ཕིང་དང་ང་ནི་སའི་གོ་ལའི་ཤར་ཕྱེད་དང་ནུབ་ཕྱེད་ཀྱི་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་གཉིས་པོའི་འགོ་ཁྲིད་པ་ཡིན། ང་ཚོ་ཚང་མས་དམངས་ཁྲོད་ཀྱི་དཀའ་སྡུག་གསལ་པོར་ཤེས་ཀྱི་ཡོད་པས་དམངས་འཚོ་ལེགས་བཅོས་དང་དབུལ་སྒྲོལ་ལས་ལ་གཞོལ་བཞིན་ཡོད། ཀྲུའུ་ཞི་ཞི་ཅིན་ཕིང་གིས་ཀྲུང་གོར་འགོ་ཁྲིད་གནང་ནས་ཐོབ་པའི་འཕེལ་རྒྱས་ཀྱི་གྲུབ་འབྲས་དང་། ལྷག་པར་དུ་མི་དུང་ཕྱུར་1དབུལ་སྒྲོལ་བྱུང་བར་པར་ཙིར་ཕྱོགས་ཀྱིས་ཚད་མཐོའི་བརྩི་འཇོག་དང་ཡིད་སྨོན་བྱེད་ཀྱི་ཡོད། ཀྲུའུ་ཞི་ཞི་ཅིན་ཕིང་གིས་མི་དམངས་ལ་བདེ་རྩ་སྐྲུན་པ་དང་། སྤྱི་ཚོགས་ཀྱི་དྲང་གཞག་དྲང་བདེན་ལ་སྲུང་སྐྱོང་། ཞི་བདེ་ལས་དམག་འཁྲུག་མིན་པ་དང་། མཉམ་ལས་ལས་འགྲན་རྒོལ་མིན་པ། གསར་གཏོད་ལས་གཏོར་བཤིག་མིན་པ་བཅས་དར་སྤེལ་གཏོང་གནང་སྟེ་འཛམ་གླིང་ལ་མིག་དཔེ་བསྟན་ཡོད། ཕྱི་འབྲེལ་བཙུགས་ནས་ལོ་50ལྷག་ཙམ་སོང་རིང་། པར་ཙིར་དང་ཀྲུང་གོའི་འབྲེལ་བ་དེ་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་མཐུན་སྒྲིལ་མཉམ་ལས་དང་གཉིས་ཁེ་གཉིས་ཕན་གྱི་དཔེ་མཚོན་ལ་གྱུར་ཡོད། པར་ཙིར་དང་ཀྲུང་གོའི་འཕེལ་རྒྱས་ཀྱི་འཐབ་ཇུས་འབྲེལ་མཐུད་ཐུབ་པ་དེས་རྒྱལ་ཁབ་གཉིས་པོ་ཐུན་མོང་དར་རྒྱས་ཡོང་བར་རམ་འདེགས་ཐུབ་ནས། ང་ཚོས་རང་ཉིད་ཀྱི་འགྲོ་ལམ་བརྒྱུད་འཕེལ་རྒྱས་དར་རྒྱས་དང་དྲང་གཞག་དྲང་བདེན་མངོན་འགྱུར་ཐུབ་པ་འཛམ་གླིང་ལ་ར་སྤྲོད་བྱེད་རྒྱུ་ཡིན། པར་ཀྲུང་རྒྱལ་ཁབ་གཉིས་པོས་ཕྱོགས་མང་རིང་ལུགས་མཐའ་འཁྱོངས་དང་ཞི་བར་བརྟེན་ནས་རྩོད་གཞི་ཐག་གཅོད་བྱ་རྒྱུ་དར་སྤེལ་གཏོང་གི་ཡོད་པས། པར་ཙིར་དང་ཀྲུང་གོ་ལག་གདང་སྦྲེལ་ཚེ་འཛམ་གླིང་ལ་ཤུགས་རྐྱེན་གལ་ཆེན་ཟབ་མོ་ཐེབས་ངེས་ཡིན། པར་ཙིར་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་རོགས་ལས་དམ་ཟབ་བྱས་ཏེ་པར་ཙིར་དང་ཀྲུང་གོའི་ལས་དབང་གཅིག་མཐུན་ཚོགས་པ་འཛུགས་པའི་རེ་སྒུག་བྱེད་ཀྱི་ཡོད།