འདི་ནི་བོད་རང་སྐྱོང་ལྗོངས་མཚོ་ཆེན་རྫོང་གྲོང་ཁུལ་གྱི་ནུས་རྒྱུ་གཙང་མའི་གཅིག་སྡུད་དྲོད་རླངས་མཁོ་འདོན་གྱི་དམིགས་བསལ་ཆོག་མཆན་ཐོབ་པའི་གཉེར་སྐྱོང་རྣམ་གྲངས་ཡིན་པ།

གྲང་རླུང་འུར་འུར་དུ་ལྡང་བ་དང་ས་བབ་མཐོ་ཚད་ལ་སྨི་4700ཟིན་པའི་བོད་རང་སྐྱོང་ལྗོངས་མངའ་རིས་ས་ཁུལ་མཚོ་ཆེན་རྫོང་གི་ཕྱིའི་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་10ལ་སླེབས།

རྫོང་གྲོང་གི་གྲོང་མི་མི་འགྱུར་རྡོ་རྗེ་ཕྱི་ནས་ཁྱིམ་དུ་སླེབས་མ་ཐག་འཕྲལ་མར་རང་ལུས་ཀྱི་སློག་པ་མཐུག་པོ་ཕུད་དེ་ཇ་ཚ་པོ་ཕོར་གང་བླུགས་ནས་ཚ་སོབ་སོབ་ངང་བཏུངས།

མི་འགྱུར་རྡོ་རྗེས“དེ་སྔ་ཉིན་མོར་ཡང་ལྕི་བའི་མེ་བཏང་ནས་དྲོད་གཏོང་དགོས་པ་མ་ཟད། ལྕགས་ཐབ་ཀྱི་འཁྲིས་ལ་མ་གཏོགས་གཞན་དག་ལ་ཧ་ཅང་གྲང་མོ་ཡོད། ལྷག་པར་དུ་ཕྱི་ནས་ནང་དུ་ལོག་སྐབས་ལྕགས་ཐབ་ལ་མེ་སླར་ཡང་སྤོར་དགོས་ལ་དུས་ཚོད་རིང་པོར་དྲོད་ཁུག་གི་མེད། ད་ཆ་དྲོད་རླངས་ལྕགས་ལྷེབ་ཡོད་པས་ཁང་པ་ཚ་སོབ་སོབ་ཏུ་འགྱུར་གྱི་འདུག”ཅེས་བཤད།

ཚེ་དབང་ནོར་བུ་ནི་དྲོད་རླངས་མཁོ་འདོན་ཀུང་སིའི་ཉམས་གསོ་བ་ཞིག་རེད་ལ་ས་སྐྱེས་རྡོ་སྐྱེས་ཀྱི་མཚོ་ཆེན་བ་ཞིག་ཀྱང་རེད། ཉེ་དུས་ཁོང་ཉིན་ལྟར་འབྲོག་པའི་ཁྱིམ་དུ་དྲོད་རླངས་ལྕགས་ལྷེབ་སྙོམ་སྒྲིག་ཚོད་ལྟ་བྱེད་པར་བྲེལ་བཞིན་ཡོད། ཡུལ་མི་ཚོའི་དགོས་མཁོར་གཞིགས་ཏེ་ཚེ་དབང་ནོར་བུས་ཁྱིམ་ཚང་རེ་རེ་བཞིན་ལ་བསྐྱོད་དེ་ཐག་གཅོད་བྱེད་རོགས་བྱས་པ་མ་ཟད། དྲོད་རླངས་ལྕགས་ལྷེབ་ཇི་ལྟར་སྤྱོད་དགོས་ཚུལ་ལ་ངང་རྒྱུད་རིང་པོས་འགྲེལ་བཤད་རྒྱག་གི་ཡོད།

དྲོད་རླངས་ལྕགས་ལྷེབ་དེ་དག་ནི་འདི་ལོ་སྤྱོད་འགོ་ཚུགས་མ་ཐག་པའི་མཚོ་ཆེན་རྫོང་གྲོང་ཁུལ་གྱི་ནུས་རྒྱུ་གཙང་མའི་གཅིག་སྡུད་དྲོད་རླངས་མཁོ་འདོན་གྱི་དམིགས་བསལ་ཆོག་མཆན་ཐོབ་པའི་གཉེར་སྐྱོང་རྣམ་གྲངས་ཤིག་རེད། མཚོ་ཆེན་རྫོང་དུ་ལོ་གཅིག་ནང་ཟླ་བ་བརྒྱད་ཙམ་སྐམ་ཤས་ཆེ་ལ་གྲང་བའི་གནམ་གཤིས་བསྟན་གྱི་ཡོད། དེ་གོང་རྫོང་གིས་སྐྱེ་དངོས་ནུས་རྒྱུའི་ཆུ་ཚ་བཟོའི་ཁྲོ་ཐབ་སྤྱད་དེ་གཅིག་སྡུད་ཐོག་དྲོད་མཁོ་འདོན་བྱེད་ཀྱི་ཡོད་པས་ནུས་རྒྱུ་ཟད་གྲོན་ཆེ་བ་དང་། འཁོར་སྐྱོད་ཀྱི་འགྲོ་གྲོན་མཐོ་བ། སྐྱེ་དངོས་ཀྱི་འབུད་རྫས་ཡག་པོ་འབར་མི་ཐུབ་པ་བཅས་ཀྱིས་རྐྱེན་པས་ཁང་པའི་ནང་གི་དྲོད་ཚད་ཧྲེ་ཧྲི་ཏུའུ་18ཀྱང་ཟིན་གྱི་མེད་པ་རེད།

ནུས་རྒྱུ་གཙང་མ་སྤྱོད་རྒྱུ་ཁྱབ་གདལ་བཏང་བས་དྲོད་རླངས་མཁོ་འདོན་གྱི་ཕན་འབྲས་ཆེ་རུ་ཕྱིན་པ་མ་ཟད། ནུས་རྒྱུ་ཟད་གྲོན་ཡང་ཆུང་དུ་ཕྱིན་ཡོད།

མཚོ་ཆེན་རྫོང་གྲོང་གི་བྱང་ཤར་ཕྱོགས་སུ་འོད་ཤུགས་ཤེལ་ལེབ་6000ལྷག་ཙམ་ཉི་མའི་འོག་འོད་ཆེམ་ཆེམ་དུ་འཕྲོ་བཞིན་ཡོད་པ་དང་། ཚ་ཤུགས་མཁོ་འདོན་བཟོ་གྲྭར་སྐྱོད་སྐབས། གྱང་ཐོག་ཏུ་བཀལ་བའི་རིག་ནུས་ཅན་གྱི་བརྙན་ཤེལ་ནས་ཉི་ནུས་འོད་དྲོད་ཤེལ་ལེབ་ཀྱི་དྲོད་སྡུད་ཚད་དང་། དྲོད་སྐྱེད། དྲོད་རླངས་མཁོ་འདོན་མདོང་ལམ་དྲ་བའི་གནོན་ཤུགས། རྒྱུགས་ཚད་དྲོད་རླངས་མཁོ་འདོན་སོགས་མངོན་ཞིང་། ལས་དོན་པས་གྲངས་གཞི་དེ་དག་བརྒྱུད་ཉི་ནུས་དྲོད་རླངས་མཁོ་འདོན་མ་ལག་གི་འཁོར་སྐྱོད་གནས་ཚུལ་དུས་ཐོག་ཏུ་ཤེས་རྟོགས་ཐུབ་ནས་རིག་ནུས་ཅན་གྱི་དྲོད་རླངས་མཁོ་འདོན་ཐུབ་ཀྱི་ཡོད་པ་རེད།

མཚོ་ཆེན་རྫོང་གྲོང་ཁུལ་གྱི་ནུས་རྒྱུ་གཙང་མའི་གཅིག་སྡུད་དྲོད་རླངས་མཁོ་འདོན་གྱི་དམིགས་བསལ་ཆོག་མཆན་ཐོབ་པའི་གཉེར་སྐྱོང་རྣམ་གྲངས་ལ་ཁྱོན་མ་དངུལ་སྒོར་དུང་ཕྱུར་3.14བཏང་ཡོད། སྲིད་གཞུང་གི་ཁྲིད་སྟོན་འོག་དྲོད་རླངས་མཁོ་འདོན་ཁེ་ལས་ཀྱིས་རྫོང་གྲོང་གི་དེ་སྔའི་མ་ལག་སྒྱུར་བཀོད་བྱས་པར་དྲོད་རླངས་མཁོ་འདོན་བྱེད་ཁྱོན་སྨི་ངོས་གྲུ་ཁྲི་5.69མང་དུ་ཕྱིན་ཡོད།

རྫོང་དེ་ཡོངས་ཀྱི་མདོང་ལམ་དྲ་བར་ཕྱོགས་ཡོངས་ནས་སྒྱུར་བཀོད་བྱ་རྒྱུ་ནི་ལས་སླ་པོ་ཞིག་མིན། དྲོད་རླངས་ལག་རྩལ་མཁོ་འདོན་གྱི་འགན་འཁུར་བ་ལི་ཧའོ་ཅུས་ཀྱིས“ས་བབ་སྨི་4700ཟིན་པ་དང་། དྲོད་ཚད་དམའ་བ། འཁྱགས་པ་ཐེབས་པ། འཁྱགས་སའི་རིམ་པ་མང་བ། སྒྲིག་བཀོད་རྙིང་འགྱུར་བཅས་ཀྱི་རྒྱུ་རྐྱེན་མང་པོའི་དབང་གིས་མདོང་ལམ་དྲ་བ་སྒྱུར་བཀོད་ལ་དཀའ་བ་ཆེན་པོ་འཕྲད་ཀྱི་ཡོད”ཅེས་བཤད།

མཚོ་ཆེན་རྫོང་ཨུད་ཀྱི་ཧྲུའུ་ཅི་གཞོན་པ་དང་རྫོང་དཔོན་ལིའུ་ཡུང་ཀང་གིས“རྫོང་དེ་ཡོངས་ཀྱིས་ནུས་ཤུགས་ཡོད་རྒུས་ལས་གྲྭ་ལག་བསྟར་དང་དེར་སྐུལ་འདེད་བཏང་སྟེ་དྲོད་རླངས་མཁོ་འདོན་དུས་ཚིགས་སུ་ཐེག་ཚད་ཧྲིལ་པོ་འཁོར་རྒྱུག་ཐུབ་པའི་འགན་ལེན་བྱས་ནས་མང་ཚོགས་ཚོ་དགུན་ཁར་དེ་བས་ཚ་སོབ་སོབ་དང་སྐྱིད་སྣང་དོད་པའི་འཚོ་བ་ཞིག་སྐྱེལ་ཐུབ་པ་བྱས་ཡོད”ཅེས་བཤད།

དེ་ལྟ་བུའི་གཅིག་སྡུད་དྲོད་གཏོང་སྒྱུར་བཀོད་རྣམ་གྲངས་ནི་འདི་གཅིག་པུ་མིན། འདི་ལོ་བོད་ཀྱིས་ནུས་རྒྱུ་གཙང་མའི་གཅིག་སྡུད་དྲོད་རླངས་མཁོ་འདོན་ལས་གྲྭར་མུ་མཐུད་སྐུལ་འདེད་བཏང་བའི་ནང་མངའ་རིས་ས་ཁུལ་གྱི་རྫོང(ཆུས)7གྱི་གྲོང་ཁུལ་གྱིས་དྲོད་རླངས་མཁོ་འདོན་ནུས་རྒྱུ་གཙང་མས་ཚབ་རིམ་བཞིན་བྱ་རྒྱུ་དང་། དྲོད་རླངས་མཁོ་འདོན་གྱི་སྤྱིའི་རྒྱ་ཁྱོན་སྨི་ངོས་གྲུ་ཁྲི་622.41གསར་སྐྲུན་དང་སྒྱུར་བཀོད་བྱ་རྒྱུའི་འཆར་གཞི་ཡོད་པས་བསྐྲུན་ཟིན་རྗེས་གྲོང་མི་ཁྲི་20ཡི་དྲོད་རླངས་མཁོ་འདོན་གྱི་དགོས་མཁོ་སྐོང་ཐུབ་རྒྱུ་རེད།