མཚོ་སྔོན་ཚྭ་མཚོའི་བཟོ་ལས་མ་རྐང་ཚད་ཡོད་ཀུང་སིའི་ཐོན་སྐྱེད་ལག་རྩལ་པུའི་སྤྱི་གཉེར་གཞོན་པ་ཡུས་ཞུའེ་ཧྥུང་ཁིལ་འགྱུར་ཅ་སོགས་སྐྱེ་མེད་ཚྭ་ཐོན་སྐྱེད་ཀྱི་འཐབ་ས་དང་པོར་ལས་ཀ་བྱས་ནས་ལོ་20ཙམ་སོང་རིང་། ཁོང་རྒྱལ་ཁབ་རིམ་པ་དང་ཞིང་ཆེན་རིམ་པའི་ཚན་ཞིབ་རྣམ་གྲངས་7ནང་སྔ་རྗེས་སུ་ཞུགས་ལ། 《སྐྱེ་མེད་ཚྭའི་བཟོ་རྩལ་རིག་པ》སོགས་ཀྱི་དེབ་2རྩོམ་འབྲིའི་ནང་དུའང་ཞུགས་པ་མ་ཟད། མཚོ་སྔོན་ཞིང་ཆེན་གྱི་ལྔ་གཅིག་ངལ་རྩོལ་གཟེངས་རྟགས་ཀྱང་ཐོབ་ཡོད། འདི་ནི་ཡུས་ཞུའེ་ཧྥུང་ཡིན་པ།

མཚོ་སྔོན་ཞིང་ཆེན་གོར་མོ་གྲོང་ཁྱེར་གྱི་ཚྭ་ཁར་བྱང་རླུང་དལ་གྱིས་ལྡང་བ་དང་བསྟུན་ལྕེ་རྩེར་ལན་ཚྭའི་རོ་ཞིག་མྱོང་ཐུབ་ཀྱི་ཡོད། ཚྭ་ཞིང་གི་རྣང་མར་མཚོ་སྔོན་ཚྭ་མཚོའི་བཟོ་ལས་མ་རྐང་ཚད་ཡོད་ཀུང་སིའི་ཐོན་སྐྱེད་ལག་རྩལ་པུའི་སྤྱི་གཉེར་གཞོན་པ་ཡུས་ཞུའེ་ཧྥུང་གིས་ལག་ཏུ་མ་དཔེ་ལེན་ཆས་ཤིག་ཁྱེར་ནས་གཟུགས་པོ་ཡང་སེ་སྒུར་སྒུར་ངང་ཚྭ་ཆུར་དཔེ་ལེན་བརྟག་དཔྱད་བྱེད་བཞིན་འདུག “དུས་ཚིགས་ཀྱི་ཁྱད་པར་དང་ཆར་ཆུ་འབབ་ཆེ་ཆུང་དབང་གིས་ཚྭ་ཆུའི་སྤུས་ཚད་ལའང་དེ་མཚུངས་ཀྱིས་འགྱུར་ལྡོག་འགྲོ་བས། ང་ཚོས་གཏེར་རྡོ་ཀོང་ལུའུ་ཧྲི་ལས་ལན་ཚྭ་གྲུབ་ཚད་ལ་རྗེས་འདེད་ལྟ་ཞིབ་བྱས་ནས་ཐོན་སྐྱེད་ཀྱི་གནས་ཚུལ་ཤེས་ཐུབ་པ་བྱེད་དགོས་ཀྱི་ཡོད”ཅེས་ཡུས་ཞུའེ་ཧྥུང་གིས་ངོ་སྤྲོད་བྱས།

2005ལོར། སི་ཁྲོན་དབྱི་པིན་ཐེན་ཡོན་རྫས་འགྱུར་བཟོ་ལས་ཚོགས་པ་དང་མཚོ་སྔོན་ཞིང་ཆེན་ཀྲུང་ཞིན་རྒྱལ་བདེ་ཚན་རྩལ་འཕེལ་རྒྱས་ཚད་ཡོད་ཀུང་སིར་སྔ་རྗེས་སུ་ལས་ཀ་བྱས་མྱོང་བའི་ཡུས་ཞུའེ་ཧྥུང་མཚོ་སྔོན་ཚྭ་མཚོ་བཟོ་ལས་ཚད་ཡོད་ཀུང་སིའི་ཆིང་དབྱང་མཱེ་འགྱུར་འཁོར་ཁང་དུ་ལས་ཀ་བྱེད་རིང་། ཁོང་གི་ལས་འགན་དང་པོ་ནི་ཆིང་དབྱང་མཱེ་འགྱུར་ཐོན་སྐྱེད་མ་བྱས་གོང་གི་ཚོད་ལྟའི་རྣམ་གྲངས་འཛུགས་སྐྲུན་ནང་ཞུགས་རྒྱུ་དེ་ཡིན་པ་རེད།

“འཛུགས་སྐྲུན་ལས་ཀ་ནི་དཀའ་ངལ་ཆེན་པོ་རེད”ཅེས་ཆེད་ལས་རྫས་འགྱུར་བཟོ་ལས་ཡིན་པའི་ཡུས་ཞུའེ་ཧྥུང་མ་གཞིར་སློབ་གྲྭ་འགྲིམ་པའི་སྐབས་ནས་ཚྭ་རྫས་བཟོ་མྱོང་ཡོད་ཀྱང་། ཐོན་སྐྱེད་ཀྱི་སྒྲིག་ཆས་གསར་རྐྱང་མཐོང་སྐབས་ད་དུང་སློབ་སྦྱོང་ལ་སྦྱངས་བརྩོན་ཧུར་ཐག་བྱས་ནས་ལས་ཀར་གོམས་འདྲིས་གང་མགྱོགས་ཡོང་བ་བྱེད་དགོས་པ་མཐོང་ནས་དེ་ལྟར་བཤད། འགོ་ཚུགས་མ་ཐག་པའི་ཐོན་སྐྱེད་བདེ་བླག་ཡོང་ཆེད། འཁོར་ཁང་གི་ལག་རྩལ་པ་ཞིག་ཡིན་པའི་ཡུས་ཞུའེ་ཧྥུང་གིས་དཔེ་རིས་ལ་ནན་ཏན་ངང་ཞིབ་འཇུག་དང་། ས་གནས་སུ་ཚོད་ལྟ་སྙོམས་སྒྲིག དཔྱད་གཞི་འཚོལ་བ་བཅས་བྱས་ཏེ། “སྒྲིག་ཆས་ཡོད་ས་དང་། དེའི་མིང་རེ་རེར་རྟགས་གསལ་པོ་བརྒྱབ་ནས་མི་རེ་ངོ་རེ་ཚང་མས་ཤེས་ཐུབ་པ་བྱས”ཤིང་། ཟླ་བ་གཉིས་ཀྱི་རྗེས་སུ་ཡུས་ཞུའེ་ཧྥུང་གིས་བཟོ་རྩལ་གྱི་ལས་རིམ་དང་། བཀོལ་སྤྱོད་ཀྱི་ཆ་རྐྱེན་སོགས་གསལ་པོར་ངེས་པ་མ་ཟད། བཀོལ་སྤྱོད་བྱེད་སྟངས་ཁ་གསལ་ཞིང་ཚད་དང་ལྡན་པ་རྩོམ་འབྲི་བྱས་ནས་རྣམ་གྲངས་བདེ་བླག་ངང་སྤྱོད་ཐུབ་རྒྱུར་རྨང་གཞི་བརྟན་པོའང་བཏིང་ཡོད།

“བཟོ་བོའི་སྙིང་སྟོབས་ལ་བརྟེན་ནས་ལག་རྩལ་ཡར་རྒྱས་ཡོང་བར་བྱེད་དགོས”ཞེས་པ་ནི། ཡུས་ཞུའེ་ཧྥུང་གིས་རྟག་ཏུ་ཤོད་པའི་སྐད་ཆ་ཞིག་རེད། ཉེ་བའི་ལོའི་རིང་། ཡུས་ཞུའེ་ཧྥུང་དང་ལས་རོགས་ཚོས་ཕྱོགས་སྡོམ་བྱས་པའི་གྲུབ་འབྲས་མང་པོ་བཏོན་ནས་ཁྱབ་གདལ་བཏང་ཡོད། ཁོང་གིས་རྒྱལ་ཁབ་རིམ་པ་དང་ཞིང་ཆེན་རིམ་པའི་གཙོ་གནད་ཚན་ཞིབ་རྣམ་གྲངས་7ནང་སྔ་རྗེས་སུ་ཞུགས་ལ། 《སྐྱེ་མེད་ཚྭའི་བཟོ་རྩལ་རིག་པ》སོགས་ཀྱི་དེབ་2ཀྱི་རྩོམ་འབྲིའི་ནང་དུའང་ཞུགས་ཡོད། 《ཁིལ་འགྱུར་ཅ་ཐོན་སྐྱེད་ལག་རྩལ་གྱི་ཚ་ཞུ་སྟེ། མཁའ་རླུང་མེད་པར་ཞུན་ཆགས་ཐབས》སོགས་མཚོ་སྔོན་ཞིང་ཆེན་གྱི་ས་གནས་ཀྱི་ཚད་གཞི་2དང་ཚོགས་པའི་ཚད་གཞི་1ལ་འགན་གཙོ་བོར་ཁུར་ནས་བཟོས་པ་དང་། 《ཅ་རྒྱུའི་ལུད་ཐོན་སྐྱེད་མ་ལག་གི་ཁིལ་འགྱུར་ཅ་སྙོམས་སྒྲིག་སྙན་ཞུ》རྣམ་གྲངས་མང་པོའི་ཆེད་ལས་ལག་རྩལ་སྙན་ཞུའི་རྩོམ་ཡིག་6སོགས་ལ་འགན་གཙོ་བོ་ཁུར་ནས་བྲིས་ཡོད།

ད་ཆ་ཚྭ་ཞིང་དང་། ཐོན་སྐྱེད་འཁོར་ཁང་། ཚོད་ལྟ་ཁང་བཅས་ནི་ཡུས་ཞུའེ་ཧྥུང་འགྲོ་མང་ཤོས་ཀྱི་ས་ཆ་དག་རེད།“འཐབ་ས་མདུན་མར་སླེབས་ཚེ་གཞི་ནས་སེམས་པ་ལྷོད་ལ་འབབ་ཀྱི་འདུག གང་ལགས་ཤེ་ན། དེར་ཁ་ཚ་དགོས་གཏུགས་ཀྱིས་ཐག་གཅོད་བྱེད་དགོས་པའི་གནད་དོན་ཡོད་ལ་ཐག་གཅོད་ཀྱི་ཇུས་གཞི་ཡག་ཤོས་ཀྱང་དེ་གར་ཡོད་པས་ཡིན”ཞེས་ཡུས་ཞུའེ་ཧྥུང་གིས་བཤད།