གནམ་གཤིས་འགྱུར་ལྡོག་ལ་ཁ་གཏད་གཅོག་པའི་ལྷོ་ལྷོ་མཉམ་ལས་ཀྱི་རིམ་པ་མཐོ་བའི་གླེང་སྟེགས་COP29ཀྲུང་གོའི་ཟུར་ཁུལ་དུ་འཚོགས་པ།
ཚེས་15ཉིན་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་ལྷོ་ལྷོ་མཉམ་ལས་ཀྱི་རིམ་པ་མཐོ་བའི་གླེང་སྟེགས《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་COP29ཐེངས་ཉེར་དགུ་པ་ཀྲུང་གོའི་ཟུར་ཁུལ་དུ་འཚོགས་ཡོད། གླེང་སྟེགས་དེ་འཚོགས་པའི་དམིགས་ཡུལ་ནི་ལྷོ་ལྷོ་རྒྱལ་ཁབ་ཀྱི་གནམ་གཤིས་བྱ་སྤྱོད་ཀྱི་ཐུན་མོང་ངོས་འཛིན་གཅིག་ཏུ་བསྡུས་ནས“རྒྱུད་གཅིག་ལམ་གཅིག”གི་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་ལྷོ་ལྷོ་མཉམ་ལས་ཟབ་ཏུ་བཏང་སྟེ་ལྗང་མདོག་ཐཱན་ཉུང་གི་དེང་རབས་ཅན་གྱི་འཕེལ་རིམ་ལ་མཉམ་དུ་སྐུལ་འདེད་གཏོང་རྒྱུ་དེ་རེད།
ཀྲུང་གོ་སྐྱེ་ཁམས་ཁོར་ཡུག་པུའི་པུའུ་ཀྲང་ཧོང་རུན་ཆིའུ་ཡིས་ཤིས་ཚིག་སྒྲོན་སྐབས། མིག་སྔར་རྒྱལ་སྤྱིའི་དུས་བབ་རྙོག་འཛིང་ཆེ་ཞིང་འགྱུར་ལྡོག་མང་བ་དང་། གོ་ལ་ཧྲིལ་པོའི་དཔལ་འབྱོར་སླར་གསོ་ཞན་པ། གནམ་གཤིས་ཤིན་ཏུ་ངན་པའི་གནོད་འཚེ་ཡང་སེ་ཐོན་པ། གནམ་གཤིས་ཀྱི་ཉམས་ཉེན་ཐོན་སྲིད་པས་ཕྱོགས་མང་རིང་ལུགས་ངོ་མ་ལག་ལེན་ཧུར་ཐག་བསྟར་བ་དང་རྒྱལ་སྤྱིའི་མཉམ་ལས་ལ་ཤུགས་སྣོན་བརྒྱབ་ཚེ། གཞི་ནས་གོ་ལ་ཧྲིལ་པོའི་དཔལ་འབྱོར་སླར་གསོ་དང་། གནམ་གཤིས་ཀྱི་ཉམས་ཉེན་ལ་ཁ་གཏད་གཅོག་པ། གོ་ལ་ཧྲིལ་པོ་རྒྱུན་མཐུད་ཆོག་པའི་འཕེལ་རྒྱས་བཅས་ཀྱི་དམིགས་ཚད་མངོན་འགྱུར་བྱེད་ཐུབ། དུས་ཡུན་རིང་པོའི་ནང་། འགན་འཁུར་མཁན་གྱི་འཕེལ་རྒྱས་འགྲོ་བཞིན་པའི་རྒྱལ་ཁབ་ཅིག་ཡིན་པའི་ཀྲུང་གོས་གནམ་གཤིས་འགྱུར་ལྡོག་ལ་ཁ་གཏད་ཧུར་ཐག་གཅོག་པའི་རྒྱལ་ཁབ་ཀྱི་འཐབ་ཇུས་ལག་བསྟར་མཐའ་འཁྱོངས་དང་། ཐཱན་ཚད་མཐོ་ཤོས་དང་ཐཱན་ཚད་སྙོམ་སྦྱོར་གྱི་དམིགས་ཚད་མཐའ་གཅིག་ཏུ་དོན་འཁྱོལ། གནམ་གཤིས་འགྱུར་ལྡོག་ལ་ཁ་གཏད་གཅོག་པའི“བཅུ་བརྒྱ་སྟོང”གི་གྲོས་འགོ་དོན་འཁྱོལ་ཧུར་ཐག་བཅས་བྱས་ཡོད།