ཚེས་18ཉིན་གྱི་ཕྱི་དྲོར། ཀྲུང་གོ་རྒྱལ་སྤྱིའི་ཁེ་ལས་འབྲིང་ཆུང་གི་དངོས་མང་སྟོན་ཚོགས་སྐབས་བཅུ་དགུ་པ་ཀོང་ཀྲོའུ་རུ་མཇུག་འགྲིལ་བ་རེད། སྐབས་འདིའི་ཀྲུང་གོ་རྒྱལ་སྤྱིའི་ཁེ་ལས་འབྲིང་ཆུང་གི་དངོས་མང་སྟོན་ཚོགས་རིང་ཉོ་སྒྲུབ་ཚོང་པ་ཁྲི་ལས་བརྒལ་བ་དངོས་མང་སྟོན་ཚོགས་སུ་ཡོང་ནས་ཉོ་སྒྲུབ་བྱས་ཤིང་། དྲ་ཕྱིར་ལྟ་སྐོར་དང་། གྲོས་མོལ། ཉོ་སྒྲུབ་བཅས་བྱེད་མཁན་མི་ཐེངས་ཁྲི་12ལྷག་ཙམ་ཟིན་ནས་ལོ་གཅིག་ལྟར་བརྩིས་པའི་ཚོང་འགྲིག་འདོད་འདུན་སྒོར་དུང་ཕྱུར་1000ཙམ་ཟིན་གྱི་ཡོད་པ་རེད། དམའ་དབྱིངས་དཔལ་འབྱོར་དང་། སྒྲིག་ཆས་རྩེ་གྲ། སྐྱེ་དངོས་སྨན་རྫས། དེ་བཞིན་སྨན་བཅོས་སྒྲིག་ཆས་རྩེ་གྲ་སོགས་ཁྱབ་ཁོངས་ཀྱི་སྟོབས་ཆེན་ཁེ་ལས་དང་དེ་བཞིན་རྣམ་གྲངས་རྐྱང་པའི་ཨང་དང་པོ་ཐོབ་མཁན་ཁེ་ལས་ཀྱིས་དངོས་མང་སྟོན་ཚོགས་ཐོག་སྤུས་ལེགས་ཐོན་རྫས་དང་སྔོན་ཐོན་ལག་རྩལ་འགྲེམས་སྟོན་བྱས་ནས་ལས་རིགས་གོང་འོག་གི་སྤེལ་རེས་དང་མཉམ་ལས་ལ་སྐུལ་འདེད་བཏང་ཡོད།

སྐབས་འདིའི་ཀྲུང་གོ་རྒྱལ་སྤྱིའི་ཁེ་ལས་འབྲིང་ཆུང་གི་དངོས་མང་སྟོན་ཚོགས་ཐོག་ལེ་ལག་ཚང་བའི་བྱེད་སྒོ་ཐེངས་60ལྷག་ཙམ་སྤེལ་ཞིང་། 《ཁེ་ལས་འབྲིང་ཆུང་གི་གྲངས་གཞི་ཅན་གྱི་ནུས་སྤྲོད་ཆེད་དོན་བྱ་སྤྱོད་ཇུས་གཞི(2025-2027)》དང་2024ལོའི་ལོ་འཁོར་གྱི་ཁེ་ལས་ཆེ་གྲས་ཀྱི་ལག་རྩལ་གསར་གཏོད་ཀྱི་དགོས་མཁོའི་མིང་ཐོ་ཁྱབ་བསྒྲགས་བྱས་ནས་སྦྲེལ་ཐག་ཁེ་ལས་གཙོ་བོ་དང“ཆེད་ཞིབ་ཁྱད་གསར”བཅས་ཀྱི་ཁེ་ལས་འབྲིང་ཆུང་དང་གན་རྒྱ་འཇོག་རྒྱུར་སྐུལ་འདེད་བཏང་བ་རེད། “ལག་རྩལ་གསར་པ་དང་། སྒྲིག་ཆས་གསར་པ། ཐོན་རྫས་གསར་པ”བཅས་ཀྱི་ཡོངས་བསྒྲགས་བྱེད་སྒོ་30སྤེལ་བ་དང་། མཚོན་བྱེད་རང་བཞིན་གྱི་ཕུལ་བྱུང་འགྲེམས་ཞུགས་ཁེ་ལས་160ཡིས་ལག་རྩལ་གསར་པ་དང་། སྒྲིག་ཆས་གསར་པ། ཐོན་རྫས་གསར་པ་བཅས་ཁག་གཅིག་ཡོངས་བསྒྲགས་བྱས་པ་རེད།