དྲ་ཐོག་གྲགས་ཅན“ནག་ཆུའི་ལྷ་མོ”ཞེས་པ་ནི་ནག་ཆུ་གྲོང་ཁྱེར་སྦྲ་ཆེན་རྫོང་དམར་རུ་ཤང་གི་བུ་མོ་བསོད་ནམས་དཔའ་དབྱངས་ཡིན་པ་དང་། དྲ་རྒྱ་ཡོངས་སུ་དགའ་པོ་བྱེད་མཁན་ཁྲི་400ལྷག་ཙམ་ཡོད་པ་རེད། བསོད་ནམས་དཔའ་དབྱངས་ཀྱིས་2023ལོའི་ཟླ་5ཚེས་5ཉིན་ནས་བཟུང་ཚགས་ཤ་སྐམ་པོ་དང་ཁ་ཆེ་ཤ་སྐམ་སོགས་ཐད་གཏོང་བརྒྱུད་ཕྱིར་ཚོང་བྱས་པས་ས་གནས་དེ་གའི་ཁྱད་ལྡན་ཐོན་རྫས་ཕྱིར་ཚོང་ལ་སྐུལ་འདེད་ཐུབ་པ་དང་ཞིང་འབྲོག་པར་འབབ་འཕར་བྱུང་ཡོད། འདི་ནི“ནག་ཆུའི་ལྷ་མོས”ཐད་གཏོང་ཁང་ནས་བོད་ཀྱི་ཁྱད་ལྡན་ཐོན་རྫས་ངོ་སྤྲོད་བྱེད་བཞིན་པ།

ཞིང་འབྲོག་པའི་ཞིང་ལས་ཐོན་རྫས་ཕྱིར་ཚོང་ལ་རོགས་རམ་དང་། ཞིང་པ་ཐུན་མོང་འབྱོར་ཕྱུག་ལ་སྣེ་ཁྲིད། ཞིང་པའི་འབབ་འཕར་ཡོང་ཁུངས་ཡག་པོ་སྲུང་བ་བཅས་བྱ་ཆེད། རང་སྐྱོང་ལྗོངས་ཀྱི་རིམ་པ་ཁག་དང་སྡེ་ཚན་ཁག་གིས་ཤུགས་མང་ཙམ་རྒྱག་པ་དང“དྲ་ཐོག་དང་དྲ་ཕྱི”ཟུང་དུ་འབྲེལ་བའི་ཁྱབ་གདལ་གཏོང་སྟངས་སྤྱད་དེ་ཞིང་ལས་ཐོན་རྫས་ལ་ཚོང་ལམ་འཚོལ་བ་དང་། ཞིང་ལས་ཐོན་རྫས་ཕྱིར་ཚོང་གི་དཀའ་གནད་ཐག་གཅོད་ནུས་ལྡན། ས་གནས་ཀྱི་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་ལ་སྣེ་ཁྲིད་བཅས་བྱས་ནས་མཉམ་སྡེབ་དཔལ་འབྱོར་གྱི་ཕན་འབྲས་ཆེ་རུ་དང་མང་ཚོགས་ལ་འབབ་འཕར་ཡོང་བར་བྱས་ཡོད།

གཞི་རིམ་གྱི་འདེགས་སྐྱོར་བྱེད་ཤུགས་ཆེ་རུ་བཏང་ནས་ཞིང་པར་མཁོ་ཚོང་དྲ་བ་བཙུགས་པ།

རྒྱལ་རྩེ་རྫོང་རྒྱལ་རྩེ་གྲོང་རྡལ་ལ་འཛེགས་སྡེ་ཁུལ་གྲོང་ལྷན་གྱི་མཁོ་ཚོང་མཉམ་ལས་ཁང་གིས་མང་ཚོགས་ལ་རྨོ་འདེབས་དང་། འདེབས་འཛུགས། གཡོག་བྱེད། སྔོན་འགོག རྔ་བསྡུ། གྲབས་གསོག་བཅས་ཀྱི་ཞིང་ལས་ཐོན་སྐྱེད་འཁོར་སྦྲེལ་གྱི“གཅིག་འཐུས་རྣམ་པའི”ཚབ་སྒྲུབ་ཞབས་འདེགས་ཞུས་ནས་མཁོ་ཚོང་མཉམ་ལས་ཁང་གིས་ཞིང་པའི་ཚབ་བྱས་ཀྱི་ས་ཞིང་འདེབས་རོགས་བྱེད་སྟངས་གསར་པ་བཙུགས་པ་དང་། པ་སྣམ་རྫོང་དགའ་སྡོང་གྲོང་རྡལ་ཀུན་རྭ་གྲོང་ཚོའི་མཁོ་ཚོང་མཉམ་ལས་ཁང་གིས“ཀུང་སི་དང་། གཞི་རིམ་ཁང་། རྟེན་གཞི། ཞིང་པ”བཅས་ཟུང་དུ་འབྲེལ་བའི་མཉམ་ལས་བྱེད་སྟངས་ཁྱབ་གདལ་བཏང་ནས་ཞིང་པ་མང་ཚོགས་ལ་འབབ་འཕར་ཕྱུག་འགྱུར་ཡོང་རོགས་བྱས་པ། སྨན་གླིང་གྲོང་ཁྱེར་ཆབ་ནག་ཤང་བྷ་ག་གྲོང་ཚོའི་མཁོ་ཚོང་མཉམ་ལས་ཁང་གིས་མ་དངུལ་སྒོར་ཁྲི་500བཏང་ནས་འགྱིག་ཤོག་དྲོད་ཁང་50བསྐྲུན་ཏེ་ཀོ་ཤ་ཤ་དཀར་དང་མོག་རོ་ནག་པོ་སོགས་ཞིང་ལས་ལོ་ཏོག་བཏབ་པ་དང་རིགས་གཅིག་མཁས་ཅན་ཚོགས་པ་གདན་དྲངས་ཏེ་ལག་རྩལ་གསོ་སྦྱོང་དང་མཛུབ་ཁྲིད་བྱས་ཡོད།

འདི་ལོ་ཚུན་དུ། རང་སྐྱོང་ལྗོངས་མཁོ་ཚོང་མཉམ་ལས་ཁང་གིས་དྲ་ཐོག་དང་དྲ་ཕྱི་གཉིས་ཀྱི་ཕྱོགས་བསྡུས་ཕྱིར་ཚོང་ཐབས་ལམ་གཏོད་རྒྱུ་དམ་འཛིན་བྱ་གཞིར་བྱས་ནས“སྤུས་ཚད་དང་། རིན་གོང་། མཁོ་སྤྲོད”བཅས་འགག་རྩའི་ལྷུ་ཚིགས་གསུམ་ལ་དམ་འཛིན་ནན་པོ་བྱེད་པ་དང་ཁྱད་ལྡན་ཐོན་ལས་འཕེལ་རྒྱས་ལ་སྐུལ་འདེད་གཏོང་བའི་ཐད་བྱས་རྗེས་ཧུར་ཐག་བཞག་ནས་ཞིང་འབྲོག་པར་འབབ་འཕར་ཕྱུག་འགྱུར་གྱི་རྣམ་པ་གསར་པ་བཏོད་ཡོད།

རང་སྐྱོང་ལྗོངས་མཁོ་ཚོང་མཉམ་ལས་ཁང་གིས་ལྗོངས་ཡོངས་ཀྱི་ཞིང་འབྲེལ་ཁེ་ལས་དང་ཞིང་འབྲོག་པའི་ཆེད་ལས་མཉམ་ལས་ཁང་སོགས་གཉེར་སྐྱོང་བྱེད་པོ“ལས་སྟེགས་832”ནང་ཞུགས་རྒྱུར་མུ་མཐུད་མཛུབ་ཁྲིད་བྱས་ཏེ་ཐོན་རྫས་ཞུགས་ཚད་མང་དུ་བཏང་བ་དང་། ཞིང་ཞོར་ཐོན་རྫས་ཕྱིར་ཚོང་ཐབས་ལམ་རྒྱུན་ཆད་མེད་པར་རྒྱ་ཆེར་བཏང་བ། ཁྱད་ལྡན་ཐོན་ལས་འཕེལ་རྒྱས་ལ་སྐུལ་འདེད་བཏང་བ། ཞིང་འབྲོག་པར་འབབ་འཕར་ཕྱུག་འགྱུར་ཡོང་བར་སྣེ་ཁྲིད་བཅས་བྱས་ཡོད། འདི་ལོ་རང་ལྗོངས་ཀྱི་ཞིང་འབྲོག་ཁྱད་ལྡན་ཁེ་ལས་མཁོ་སྤྲོད་ཚོང་པ་467“ལས་སྟེགས་832”ནང་ཞུགས་པར་རིམ་རྩིས་བརྒྱབ་ན་ཕྱིར་ཚོང་ཡོང་འབབ་སྒོར་ཁྲི་10214.33ཟིན་ཡོད། དུས་ཚིགས་དང་པོ་ནས་གསུམ་པའི་བར་ཅིང་ཏུང་ལས་སྟེགས་ཐོག་ཚགས་ཤ་དང་། ལུག་ཤ། ཕག་ཤ་བཅས་ཀྱི་ཕྱིར་ཚོང་ཡོང་འབབ་སྒོར་ཁྲི་8409.9ཟིན་པ་དེ་དུས་མཚུངས་ལས་ལྡབ་92འཕར་ཡོད།

སྤུས་རྟགས་ཀྱི་སྣེ་ཁྲིད་མཐའ་འཁྱོངས་བྱས་ནས“བོད་ཀྱི་ཁྱད་ལྡན”རིན་ཐང་ཆེ་རུ་བཏང་བ།

ཉེ་བའི་ལོ་ཤས་རིང་། རང་ལྗོངས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་འགོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ་དང་། ས་ཁོངས་ཀྱི་ལེགས་ཆ་དང་ཐོན་ཁུངས་ཀྱི་སྤུས་ཚད་ལ་གཞི་ཚུགས་པ། སྤུས་རྟགས་ལྗོངས་སྟོབས་ཆེན་བསྐྲུན་པའི་འཐབ་ཇུས་ལག་བསྟར་ཤུགས་ཆེན་བཅས་བྱས་ཏེ་སྲིད་ཇུས་གསར་གཏོད་དང་། ལས་སྟེགས་གཞི་རྟེན། ལས་ཀའི་ལམ་སྲོལ་སོགས་ཀྱི་ཐད་རྒྱུན་ཆད་མེད་པར་ལག་ལེན་དང་གསར་གཏོད་བྱས་ནས་དཔལ་འབྱོར་གྱི་སྤུས་ཚད་མཐོར་གཏོང་དང་ཕན་འབྲས་ཆེར་གཏོང་ལ་རྒྱུན་མཐུད་ངང་སྒུལ་ཤུགས་མཁོ་འདོན་བྱས་ཡོད།

རྩེ་རིམ་ཇུས་འགོད་བྱེད་ཤུགས་ཆེ་རུ་བཏང་ཞིང་།《བོད་རང་སྐྱོང་ལྗོངས་ཀྱི་ཞིང་འབྲོག་ལས་ས་ཁོངས་ཀྱི་སྤྱི་སྤྱོད་སྤུས་རྟགས་སྐྱེད་སྲིང་ལག་བསྟར་ཇུས་གཞི(2023ནས་2025ལོ་བར)》བཟོས་ནས་བཀྲམ་སྟེ་ས་ཁོངས་ཀྱི་སྤྱི་སྤྱོད་སྤུས་རྟགས་གཏོད་པའི་དམིགས་ཚད་ལས་འགན་དང་། ལས་ཀའི་བྱེད་ཐབས། དུས་ཚོད་ཀྱི་འཕེལ་རིམ་བཅས་ཁ་གསལ་བཟོས་ཡོད། ས་ཁོངས་ཀྱི་ཁྱད་ལྡན་ལེགས་ཆའི་ཐོན་ཁུངས་ལ་གཙོ་གནད་ཐོག་དམིགས་ཏེ་འབྲེལ་ཡོད་སྡེ་ཚན་དང་ཚན་པ་དང་མཉམ་དུ“བོད་ཀྱི་ནས”དང“བོད་ཀྱི་ཁུ་ལུ”སོགས་ས་ཁོངས་ཀྱི་ཁྱད་ལྡན་སྤྱི་སྤྱོད་སྤུས་རྟགས་བཏོད་པའི་ནང“བོད་ཀྱི་ནས”ཀྱི་ས་ཁོངས་སྤུས་རྟགས《ཞིང་ལས་སྤུས་རྟགས་རྩེ་གྲ་སྐྱེད་སྲིང་འཆར་གཞི(2022ནས་2025ལོ་བར)》ནང་བདམས་པ་དང་ཁུལ་ལྡན་ར་རྒྱུད་སྤེལ་དང་གསོ་ཚགས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་ཕྱིན་པ་དང་། འབྲེལ་ཡོད་ལས་སྣོན་དང་ཕྱིར་ཚོང་ཁེ་ལས་འཕེལ་རྒྱས་མྱུར་པོ་ཕྱིན་པ། བོད་ལྗོངས་ཧྲེང་ཤིན་བཟོ་ཚོང་ཚད་ཡོད་ཀུང་སི་དང་སའི་གོ་ལའི་སྣེ་གསུམ་པའི་འཁེལ་འཐག་ཐོན་ལས་ཚད་ཡོད་ཀུང་སི་སོགས་ཁུ་ལུ་ལས་སྣོན་ཁེ་ལས་ཀྱི་གཞི་ཁྱོན་རགས་ཙམ་ཆགས་ནས་ལོར་ལས་སྣོན་བྱེད་ཚད་ཏུན་290ཙམ་ཟིན་པ་དང་ལས་སྣོན་གྱི་ཐོན་སྐྱེད་རིན་ཐང་སྒོར་དུང་ཕྱུར་1.77ཟིན་ཡོད་པ་རེད།

གཉེར་ཚོང་འོས་སྦྱོར་བྱེད་ཤུགས་ཆེ་རུ་བཏང་ཞིང་། ཞིང་འབྲེལ་ཁེ་ལས་དང་མཉམ་ལས་ཁང་སོགས་གཉེར་སྐྱོང་བྱེད་པོ་སྒྲིག་འཛུགས་བྱས་ཏེ་བོད་ལྗོངས་འགྲེམས་ཚོགས་དང་། ཞིང་ལས་འགྲེམས་ཚོགས། ཞིང་ལས་ཐོན་རྫས་ཉོ་ཚོང་འདུ་ཚོགས། དེ་བཞིན་བོད་སྐྱོར་ཁ་གཏད་ཞིང་ཆེན་དང་གྲོང་ཁྱེར་ཁག་གིས་གཉེར་བའི་ཞིང་ལས་ཀྱི་ཁྱད་ལྡན་ཐོན་རྫས་འགྲེམས་སྟོན་དང་འགྲེམས་ཚོང་གི་བྱེད་སྒོར་ཞུགས་ནས་ས་ཁོངས་ཀྱི་སྤྱི་སྤྱོད་སྤུས་རྟགས་དང་། ཁེ་ལས་ཀྱི་སྤུས་རྟགས། ཐོན་རྫས་ཀྱི་སྤུས་རྟགས་བཅས་སྐད་གྲགས་ཆོད་ཚད་ཟམ་མི་ཆད་པར་ཆེ་རུ་བཏང་བ་དང་ཆབས་ཅིག ལྗོངས་ནང་ཁུལ་གྱི་ཞིང་འབྲོག་ལས་འགྲེམས་ཚོགས་དང་། རིག་གནས་ཡུལ་སྐོར་དུས་ཆེན། ཐོན་སྐྱེད་དང་ཕྱིར་ཚོང་འབྲེལ་མཐུད་སོགས་ཀྱི་བྱེད་སྒོ་ཧུར་ཐག་སྤེལ་བ་བརྒྱུད། ཞིང་ལས་ཐོན་རྫས་ཀྱི་སྤུས་རྟགས་དང་། ས་གནས་དེ་གའི་སྡེབ་ཚོང་ཁྲོམ་ར་དང་། ཚོང་ཁང་དང་སྒོ་རྩིས་ཚོང་ཁང་། སློབ་གྲྭ་སོགས་མཉམ་ལས་གཏིང་ཟབ་ལ་སྐུལ་འདེད་བཏང་ནས། ལྗོངས་ནང་ཁུལ་གྱི་ཁྲོམ་ར་སྔར་བས་ཕུན་སུམ་ཚོགས་སུ་གཏོང་བ་དང་ཐོན་སྐྱེད་དང་ཕྱིར་ཚོང་གནད་སྨིན་འབྲེལ་མཐུད་ལ་སྐུལ་འདེད་བཏང་ཡོད།

སྤུས་རྟགས་ཀྱི་སྤུས་ཚད་མཐོ་རུ་བཏང་ཞིང་། ཞིང་ལས་ཐོན་རྫས་ཀྱི་སྤུས་ཀའི་ཚད་གཞི་དང་ཁྱད་ཆོས་ཁ་གསལ་བཟོ་བ་དང་། “རྫས་གསུམ་རྟགས་གཅིག”གི་ཐོན་རྫས་གྲགས་ཁྱད་ལེགས་གསར་བཅས་ཀྱི་བདེན་དཔང་ར་སྤྲོད་ལ་སྐུལ་འདེད་ཧུར་ཐག་གཏོང་བ། ཞིང་ལས་ཐོན་རྫས་ཐོན་སྐྱེད་དང་ལས་སྣོན་སོགས་ལྷུ་ཚིགས་ཀྱི་འགག་སྒོ་ནན་པོ་སྲུང་བར་ཤུགས་སྣོན་རྒྱག་པ་བཅས་བྱས་ཏེ། ཞིང་ལས་ཐོན་རྫས་སྤུས་རྟགས་ཀྱི་ནང་གནས་སྤུས་ཚད་ལེགས་སུ་བཏང་ཡོད། ཟླ་6པའི་ཟླ་མཇུག་བར་རིམ་རྩིས་བརྒྱབ་ན“རྫས་གསུམ་རྟགས་གཅིག”གི་ཁས་ལེན་ཐོབ་པའི་ཞིང་ལས་ཐོན་རྫས་325ཡོད་པའི་ནང་ལྷད་མེད་བཟའ་བཅའ་160དང་། སྐྱེ་ལྡན་ཞིང་ལས་ཐོན་རྫས་100 ཞིང་ལས་ཐོན་རྫས་ཀྱི་ས་ཁམས་མཚོན་རྟགས་39 གྲགས་ཁྱད་ལེགས་གསར་བཅས་ཀྱི་ཞིང་ལས་ཐོན་རྫས་26བཅས་ཡོད་པ་རེད།

དྲ་ཐོག་དྲ་ཕྱི་མཉམ་ཤུགས་བསྒྲིལ་ནས་ཞིང་ལས་ཐོན་རྫས་ཕྱིར་ཚོང་ཁྲོམ་ར་བཏོད་པ།

ཟླ་7ཚེས་12ནས་14ཉིན་བར། ལྷ་ས་གྲོང་ཁྱེར་དཔལ་འབྱོར་དང་ཆ་འཕྲིན་ཅན་ཅུས་དང་ཅང་སུའུ་ཞིང་ཆེན་ཅང་སུའུ་ཚོང་དོན་འཕེལ་རྒྱས་ཡར་སྐུལ་ཚོགས་པས་མཉམ་འབྲེལ་ཐོག་གཙོ་གཉེར་བྱས་པའི་2024ལོའི་ལོ་འཁོར་གྱི“ལྷ་སའི་ཆུ་བཟང་དང་དངོས་ཟོག་སྤུས་ལེགས”ཆེད་དོན་འོས་སྦྱོར་ཚོགས་འདུ་དང་། མྱོང་དཔྱོད་ཚོགས་འདུ། ཁྲོམ་རའི་ལམ་བསྒྲགས་བཅས་ཀྱི་བྱེད་སྒོ་ཅང་སུའུ་ནན་ཅིང་དུ་བདེ་བླག་ངང་སྤེལ་ཡོད། རིམ་རྩིས་བརྒྱབ་ན་ཅང་སུའུ་རུ“ལྷ་སའི་ཆུ་བཟང”ཏུན་5000ལྷག་ཙམ་ཕྱིར་ཚོང་བྱས་ཡོད། ཁྲུང་ཆིང་གྲོང་ཁྱེར་གྱིས་བོད་སྐྱོར་འཛད་སྤྱོད་རོགས་སྐྱོར་གྱི“གཤམ་སྤེལ་ལྔའི”ཆེད་དོན་འོས་སྦྱོར་བྱེད་སྒོ་སྤེལ་ནས་ཆབ་མདོ་གྲོང་ཁྱེར་གྱི་ཐོན་རྫས་སྣ་ཁ་300ལྷག་ཙམ་བོད་ནས་ཕྱིར་ཚོང་བྱས་ཡོད།

ཟླ་7ཚེས་24ཉིན་ཆུ་ཚོད་3ལྷག་ཙམ་གྱི“གངས་ལྗོངས་ས་མཐོ། རིན་ཆེན་གཏེར་མཛོད”ཅེས་པའི་ཐད་གཏོང་བྱེད་སྒོ་དེས་དྲ་གྲོགས་ཁྲི་2000ལྷག་ཙམ་གྱི་ཡིད་དབང་བཀུག་ཡོད། བོད་ཀྱི་གྲོང་ཁྱེར(ས་ཁུལ)7གྱི་ཚོང་དོན་ཅུས་ཀྱི་ལས་བྱེད་པས་ཐད་གཏོང་ཁང་དུ་བསྐྱོད་དེ་བོད་ཀྱི་སྤུས་ལེགས་ཐོན་རྫས་འོས་སྦྱོར་བྱས་ནས་ས་གནས་དེ་གའི་ཁྱད་ལྡན་ཞིང་ལས་ཐོན་རྫས་ཀྱི“མགྲིན་ཚབ”བྱས་ཡོད།

ཉེ་བའི་ལོ་ཤས་རིང་། བོད་ཀྱིས་དྲ་ཐོག་ཚོང་དོན་གྲོང་གསེབ་ཏུ་ཁྱབ་གདལ་གཏོང་བའི་ཕྱོགས་བསྡུས་དཔེ་སྟོན་ལས་དོན་རྨང་གཞིར་བྱས་ཏེ་གྲངས་འཛིན་ཚོང་གཉེར་སྟོབས་ཆེར་དང་ཞིང་ལས་དར་རྒྱས་གཏོང་བ་དང་། ཞིང་ལས་ཐོན་རྫས་སྤུས་རྟགས་ཚོང་གཉེར་བྱེད་སྒོ་ཤུགས་ཆེན་སྤེལ་བ། ཞིང་འབྲོག་པའི་འབབ་འཕར་ཐབས་ལམ་རྒྱ་སྐྱེད་གཏོང་བ་བཅས་བྱས་ཡོད། དྲ་ཐོག་ཚོང་དོན་དཔུང་ཁག་ཟམ་མི་ཆད་པར་སྟོབས་ཆེར་གཏོང་བ་དང་། དྲ་ཐོག་ཚོང་དོན་གྱི་འཁོར་རྒྱུག་རྣམ་པ་ལེགས་སུ་གཏོང་བ། ཞིང་ལས་ཐོན་རྫས་གྲོང་ཚོ་ནས་ཐོན་ཏེ་གྲོང་ཁྱེར་དུ་དར་བའི་ལས་ཕྱོད་ཆེ་རུ་གཏོང་བ་བཅས་བྱས་ཏེ། ཞིང་འབྲོག་ཁུལ་གྱི་ཁྱད་ལྡན་ཐོན་ལས་འཕེལ་རྒྱས་ལ་སྐུལ་ཁྲིད་བྱས་ཡོད། མེ་ཏོག་རྫོང་གི་ཞིམ་ཟས་རྡོ་ཁོག་ནས་ཉིང་ཁྲིའི་བེ་ཤ་སོས་པའི་བར་དང་། ནས་ཀྱི་བཟའ་བཅའི་འཚོ་བཅུད་དང་ནག་ཆུའི་དབྱར་རྩྭ་དགུན་འབུའི་སྨན་ནུས་བར་སོགས་གངས་ལྗོངས་ས་མཐོའི་མཆོག་ནོར་དེ་དག་རི་ཁུག་ནས་དེ་བས་ཡངས་ཤིང་རྒྱ་ཆེ་བའི་ཁྲོམ་རའི་ཕྱོགས་སུ་སྐྱོད་བཞིན་ཡོད། འབྱུང་འགྱུར“བོད་ཟོག་བོད་ནས་ཐོན་པའི”འཐབ་ཇུས་ལག་བསྟར་གཏིང་ཟབ་བྱེད་པ་དང་ཕྱིར་ཚོང་ཐབས་ལམ་ཟམ་མི་ཆད་པར་རྒྱ་སྐྱེད་གཏོང་བ། དེ་བཞིན་བོད་ཀྱི་ཁྱད་ལྡན་ཐོན་རྫས་སྤུས་རྟགས་ཀྱི་ཤུགས་རྐྱེན་ཟམ་མི་ཆད་པར་ཆེ་རུ་འགྲོ་བ། འཛད་སྤྱོད་པའི་བདེ་ཐང་དང་། ལྷད་མེད། སྐྱེ་ལྡན་བཅས་ཀྱི་བཟའ་བཅའི་དགོས་མཁོ་ཉིན་བཞིན་ཆེ་རུ་འགྲོ་བ་བཅས་དང་བསྟུན་ནས་བོད་ཀྱི་ཁྱད་ལྡན་ཐོན་རྫས་ཀྱི་ཁྲོམ་རའི་མདུན་ལམ་སྔར་བས་ཡངས་སུ་འགྲོ་རྒྱུ་རེད།