ཞབས་ཞུའི་ནུས་ཕྱོད་སྔར་བས་ཆེ་རུ་གཏོང་ཆེད། རྫ་ཡུལ་རྫོང་སྲིད་དོན་ཞབས་ཞུ་ལྟེ་གནས་ཀྱིས“གློད་སྡོམ་ཞབས་གསུམ”གྱི་སྒྱུར་བཅོས་གཏིང་ཟབ་ཏུ་གཏོང་བའི་བླང་བྱ་གསར་པར་དམ་པོར་དམིགས་པ་དང་། མི་དམངས་ཀྱི་བློ་ཡིད་ཚིམ་ཚད་མཐོ་རུ་གཏོང་རྒྱུ་ལས་དོན་གྱི་གཞི་ཚུགས་སར་བྱེད་པ། རང་སོའི་ཁྱད་ཆོས་ལྡན་པའི་ཞབས་ཞུ་དང་དྲོ་སྐྱིད་ལྡན་པའི་ཞབས་ཞུའི་བྱ་སྤྱོད་ལ་རྒྱུན་ཆད་མེད་པར་སྐུལ་འདེད་གཏོང་བ། དམངས་ལ་ཞབས་འདེགས་ཞུ་བའི་ལས་དོན་ཏན་ཏིག་དང་། ཞིབ་ཚགས། ནུས་ལྡན་བཅས་ཡོང་བར་བྱས་ནས། མང་ཚོགས་ལ་ཞབས་འདེགས་ཞུ་བའི་མཐའ་མའི་འགག་གནད་ཏན་ཏིག་བསལ་ཡོད།

ཁེ་ལས་དང་མང་ཚོགས་ཀྱི་དགོས་མཁོར་གཞིགས་ཏེ། རྫ་ཡུལ་རྫོང་སྲིད་དོན་ཞབས་ཞུ་ལྟེ་གནས་ཀྱིས“སྲིད་དོན་ཞབས་ཞུ་དང་རོགས་སྒྲུབ་ཚབ་སྒྲུབ”ཟུང་འབྲེལ་གྱི་དཔུང་ཁག་བཙུགས་པ་དང་། “འཕྲེད་ཕྱོགས་རོགས་ལས་དང་། གཞུང་ཕྱོགས་མཉམ་འགུལ། གཙོ་གནད་རོགས་སྒྲུབ། ཚང་མས་ཚབ་སྒྲུབ”བཅས་བྱེད་པའི་ཞབས་ཞུའི་མ་ལག་བཙུགས་ནས། རྒན་འཁོགས་དང་། གཟུགས་ཞན། ནད་པ། དབང་པོ་སྐྱོན་ཅན་སོགས་དམིགས་བསལ་ཚོགས་སྤྱིར་ཕྱོགས་ཡོངས་ནས་ཚབ་སྒྲུབ་བྱེད་པ་དང་། དཔྱད་གཞི་མི་ཚང་བ་དང་ལས་སྒོ་གསལ་པོ་མི་ཤེས་པ་སོགས་ཀྱི་གནས་ཚུལ་ལ་ཕྱོགས་ཡོངས་ནས་རོགས་རམ་བྱས་ཏེ། མང་ཚོགས་དང་ཁེ་ལས་ལ་རྒྱུན་ཆད་མེད་པར་གཅིག་གཏད་གཅིག་དང་། གནས་དང་གནས། ཁྱོན་དང་ཁྱོན། རང་སོའི་ཁྱད་ཆོས་ལྡན་པ་བཅས་ཀྱི་ཞབས་འདེགས་ཞུས་ནས། མང་ཚོགས་ཀྱིས་བྱ་བ་སྒྲུབ་པར་སྟབས་བདེ་བསྐྲུན་ཡོད། ད་ལོའི་ཟླ་7པ་ནས་བཟུང་། རོགས་སྒྲུབ་དང་ཚབ་སྒྲུབ་བྱས་པའི་ལས་དོན་རིམ་རྩིས་བྱས་ན་ཁྱོན་1128ཟིན་པ་དང་། ས་གནས་ས་ཐོག་ཏུ་མང་ཚོགས་ཀྱི་བློ་འདྲི་3900ལྷག་ཙམ་ལ་ལན་བཏབ་པ། གནད་དོན་དངོས་210ལྷག་ཙམ་ཐག་གཅོད་བྱེད་རོགས་བྱས་པ་རེད།

རྫ་ཡུལ་རྫོང་སྲིད་དོན་ཞབས་ཞུ་ལྟེ་གནས་ཀྱིས“ལས་དོན་གཅིག་ལ་བརྒྱུད་རིམ་རེ་དང་ཕྱོགས་སྟོན་རེ”ཡོད་གང་ཐུབ་བྱེད་པ་དང་། “རྒྱལ་ཁབ་སྲིད་དོན་ཞབས་ཞུའི་ལས་སྟེགས”ཀྱི་བྱ་རིམ་ཆུང་གྲས་ཁྱབ་གདལ་དང་བེད་སྤྱོད་བྱེད་ཤུགས་ཆེ་རུ་གཏོང་བ། མང་ཚོགས་ལ་ཞབས་འདེགས་ཞུ་བར་དྲ་ཐོག་དང་དྲ་ཕྱི་མཉམ་འདྲེས་བྱེད་པར་སྐུལ་འདེད་གཏོང་བ། “འགྲོ་སྐྱོད་ཉུང་དུ་གཏོང་བ་དང་། དུས་བཀག་ཐུང་དུ་གཏོང་བ། དཔྱད་གཞི་ཉུང་དུ་གཏོང་བ། ལས་སྒྲུབ་བརྒྱུད་རིམ་ལེགས་སུ་གཏོང་བ”བཅས་རྩ་དོན་དུ་བྱས་ཏེ། སྲིད་དོན་ཞབས་ཞུའི་དོན་ཚན་གྱི་གསལ་ཐོར་ཞིབ་བསྡུར་བྱས་ནས། ཚད་གཞི་ལྡན་པའི་ལས་སྒྲུབ་ཕྱོགས་སྟོན་རེ་རེ་བཞིན་བཟོས་ཏེ་མང་ཚོགས་ལ་ལས་སྒྲུབ་མཛུབ་སྟོན་གསལ་པོ་མཁོ་འདོན་བྱས་ཡོད།

དེ་དང་དུས་མཚུངས། རྫ་ཡུལ་རྫོང་སྲིད་དོན་ཞབས་ཞུ་ལྟེ་གནས་ཀྱིས་ལས་སྒྲུབ་དགོས་མཁོར་གཞིགས་ཏེ། ཞབས་ཞུའི་དུས་ཚོད་འོས་འཚམ་རིང་དུ་གཏོང་བ་དང་། དཔྱད་གཞི་ཆ་ཚང་ཡོད་པ་དང་ས་གནས་ས་ཐོག་ཏུ་སྒྲུབ་གཉེར་བྱེད་ཐུབ་རིགས་ཚང་མ་བསྒྲུབས་ཟིན་རྗེས་གཞི་ནས་ངལ་གསོ་རྒྱག་པ། ས་གནས་ས་ཐོག་ཏུ་སྒྲུབ་མི་ཐུབ་པའི་དོན་ཚན་ཡིན་ཚེ་སྔོན་ལ་དཔྱད་གཞི་ཉར་ཏེ། དུས་འགྱངས་ཞབས་ཞུའི་བྱ་ཐབས་གནད་འཁེལ་ཡོང་བར་བྱས་ནས། སྲིད་དོན་ཞབས་ཞུ་ཕྱོགས་མཚམས་ཡོངས་དང་། བརྒྱུད་རིམ་ཧྲིལ་པོ། ཁུག་ཆ་མེད་པ་བཅས་ཀྱི་སྒོ་ནས་ཁྱབ་པར་བྱས་ཡོད།