ཉེ་ཆར། བོད་རང་སྐྱོང་ལྗོངས་མི་སྤྱི་ཐིང་དང་མཚོ་སྔོན་ཞིང་ཆེན་མི་སྤྱི་ཐིང་གིས་གཙོ་གཉེར་བྱས་པའི་སྤྱི་ཚོགས་འགན་བཅོལ་གཱའི“མཚོ་བོད་གཱ་གཅིག་ཀུན་འཐུས”ཀྱི་འགོ་ཚུགས་མཛད་སྒོ་ལྷ་སར་འཚོགས་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་མཚོ་སྔོན་ཞིང་ཆེན་དང་བོད་རང་སྐྱོང་ལྗོངས་གཉིས་སུ་སྤྱི་ཚོགས་འགན་བཅོལ་གཱ་གཞི་རྟེན་དུ་བྱས་པའི“གཱ་གཅིག་ཀུན་འཐུས”ཀྱི་ཞབས་ཞུའི་དོ་དམ་བྱེད་སྟངས་བཙུགས་པ་ལས། ཞིང་ཆེན་དང་རང་སྐྱོང་ལྗོངས་གཉིས་ཀྱི་སྤྱི་ཚོགས་འགན་བཅོལ་གཱ་ཁྱབ་ཁོངས་མང་པོ་ཞིག་ཏུ་ས་ཁོངས་བསྒྲལ་ནས་སྤྱོད་ཐུབ་རྒྱུ་རེད། སྐབས་དེར་ས་གནས་གཉིས་སུ་སྤྱི་ཚོགས་འགན་བཅོལ་གཱ་རེ་ཞུ་དང་། ནུས་སློང་། གསབ་བརྗེ། བོར་ཐོ་འགོད་པ་དང་སུབ་པ། གསང་ཨང་བཟོ་བཅོས་དང་བསྐྱར་འགོད་སོགས་ལས་སྒོ་ཁག་10མཉམ་དུ་བསྒྲུབ་ཐུབ་རྒྱུ་མ་ཟད། གཱ་འཁྱེར་ནས་ས་གནས་གཉིས་ཀྱི་མི་སྤྱིའི་སྐར་ཁུང་དུ་འགན་བཅོལ་ནང་ཞུགས་པའི་སྐོར་འདྲི་རྩད་དང་། ལས་ཞུགས་ཐོ་འགོད། ཤེས་ལྡན་པའི་མི་དོན་སོགས་མི་སྤྱིའི་ཞབས་ཞུའི་འགྲོ་ལུགས་ཀྱང་གཉེར་ཐུབ་ཀྱི་ཡོད་པ་དང་། འགན་བཅོལ་ནང་ཞུགས་མཁན་གྱིས་གཱ་ཁྱེར་ནས་ས་གནས་གཉིས་ཀྱི་དམིགས་འཛུགས་སྨན་བཅོས་སྒྲིག་གཞིར་ཨང་ཐོ་འགོད་པ་དང་། སྨན་བཅོས་བྱེད་པ། སྨན་ཉོ་བ། མཇུག་རྩིས་རྒྱག་པ་བཅས་ཀྱི་ལས་རིམ་ཧྲིལ་པོའི“སྨན་བཅོས་གཱ་གཅིག་ཀུན་འཐུས”ཀྱི་ཞབས་ཞུ་ལོངས་སྤྱོད་ཐུབ་རྒྱུ་རེད།

གཞན་ཡང་། “མཚོ་བོད་གཱ་གཅིག་ཀུན་འཐུས”ཀྱིས་རིག་གནས་ཡུལ་སྐོར་དང་འགྲིམ་འགྲུལ་འགྲོ་སྐྱོད་སོགས་རྒྱུན་གཏན་འཚོ་བའི་ཁྱབ་ཁོངས་ཀྱི་དམངས་ཕན་བྱེད་སྒོ་དུས་གཅིག་ཏུ་སྤེལ་བས་ས་གནས་གཉིས་ཀྱི་གཱ་ཡོད་མཁན་ཚོས་སྤྲིན་རྩིས་མྱུར་སྤྲོད་ཀྱི་APPཕབ་ལེན་དང་སྤྱི་ཚོགས་འགན་བཅོལ་གཱའི་དངུལ་ཁང་གི་རྩིས་ཐོ་དང་མགོ་སྦྲེལ་བྱས་ནས་གཱ་དྲད་ཚེ་གཟིགས་སྐྱོང་དུས་ཐོག་ཏུ་ལོངས་སྤྱོད་ཐུབ་ཀྱི་ཡོད། གོང་གསལ་གྱི་དམངས་ཕན་བྱེད་སྒོ་དེ་2024ལོའི་ཟླ་11པ་ནས་བཟུང་གཅིག་རྗེས་གཉིས་མཐུད་ངང་སྤེལ་འགོ་འཛུགས་རྒྱུ་ཡིན་ཞིང་། ཞིབ་ཕྲའི་གནས་ཚུལ་སྐོར“བོད་ལྗོངས་སྤྱི་ཚོགས་འགན་བཅོལ་གཱའི”སྐད་འཕྲིན་སྤྱི་རྟགས་ནས་དོ་ཁུར་བྱེད་ཆོག་གི་ཡོད་པ་རེད།