2023ལོའི་ཟླ་7ཚེས་4ཉིན། 2023ལོའི་ཀྲུང་གོ་དང་ཨ་རབ་ཀྱི་གཞོན་ནུའི་མཛའ་གྲོགས་གཞུང་ཚབ་ཆེ་མོ་བའི་རྣམ་གྲངས་ཀྱི་འཐུས་མིས་ཅུས་ཡུང་ཀོན་ལྕགས་རི་རིང་པོར་དྲན་རྟེན་པར་རྒྱག་བཞིན་པ།

2023ལོའི་ཟླ་11ཚེས་1ཉིན། ཨ་རིའི་སྟག་མཆོང་རུ་ཁག་གི་དམག་མི་རྒན་གྲས་ཀྱིས་ཁྲུང་ཆིན་ཧྲི་ཏི་ཝེ་རྟེན་རྫས་བཤམས་མཛོད་ཁང་དུ་ལྟ་སྐོར་བྱེད་བཞིན་པ།

2024ལོའི་ཟླ་5ཚེས་28ཉིན། རི་པིན་གྱི་གཞོན་ནུའི་འཐུས་མི་ཚོགས་པས་ཀྲུང་གོའི་སུང་ཆིང་ལིང་གཞོན་ནུ་ལོ་ཆུང་ཚན་རྩལ་རིག་གནས་སྤེལ་རེས་ལྟེ་གནས་སུ་ཀྲུང་གོའི་སྲོལ་རྒྱུན་གྱི་རིག་གནས་ལ་མྱོང་རོལ་བྱེད་བཞིན་པ།

2024ལོའི་ཟླ་10ཚེས་12ཉིན། ཕྱི་རྒྱལ་གྱི་མཛའ་གྲོགས་མི་སྣ་ཞུང་ཨན་ཁུལ་གསར་དུ་ཕྱོགས་བསྡུས་ཞབས་ཞུའི་ལྟེ་གནས་སྤྱོད་འགོ་ཚུགས་པའི་བྱེད་སྒོར་ཞུགས་པའི་གནས་ཚུལ་ཡིན་པ།

2024ལོའི་ཟླ་6ཚེས་24ཉིན། ཀྲུང་གོ་དང་ཨ་རིའི་གཞོན་ནུས་མཉམ་དུ་ཧྥུའུ་ཀྲོའུ་ཀུའུ་ལིང་དུ“ཀྲུང་གོ་དང་ཨ་རིའི་གཞོན་ནུའི་མཛའ་གྲོགས་ནགས་ཚལ”དུ་ཤིང་འཛུགས་ནགས་བཟོ་བྱེད་བཞིན་པ།

གོང་གི་པར་རིས་ཚང་མ་ནི་ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་ཀྱིས་མཁོ་འདོན་བྱས།

ཉིན་ཤས་གོང་། ཀྲུང་གོ་རྒྱལ་སྤྱིའི་མཛའ་གྲོགས་ཚོགས་ཆེན་དང་ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་བཙུགས་ནས་ལོ་70འཁོར་བའི་དྲན་གསོའི་ཚོགས་ཆེན་འཚོགས་པ་དང་། ཀྲུང་གོ་མི་དམངས་ཀྱི་གྲོགས་པོ་བློས་ཐུབ་དང་གྲོགས་པོ་རྙིང་པ་མང་པོ་ཐག་རིང་ནས་ཕེབས་ཡོད། ཁོང་ཚོས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་ཀྲུང་གོ་ཕྱོགས་དང་མཉམ་དུ་ཁྱབ་ཁོངས་ཁག་གི་མཛའ་གྲོགས་དང་སྤེལ་རེས་མཉམ་ལས་ལ་མུ་མཐུད་ཤུགས་སྣོན་བརྒྱབ་ནས་མི་དམངས་དབར་གྱི་མཛའ་གྲོགས་མི་རབས་ནས་མི་རབས་བར་རྒྱུན་འཛིན་ཐུབ་པའི་རེ་སྒུག་བྱེད་བཞིན་ཡོད་ཅེས་བརྗོད།

“མཛའ་གྲོགས་ཡུན་རིང་འཛུགས་ཆེད་སྟོབས་ཤུགས་ གཅིག་ཏུ་སྒྲིལ་དགོས”

—— ཐེ་ལན་རྒྱལ་ཚོགས་ཀྱི་ཀྲུའུ་ཞི་ཟུར་པ་ཐེ་ལན་དང་ཀྲུང་གོའི་རིག་གནས་དཔལ་འབྱོར་ མཐུན་ཚོགས་ཀྱི་ཚོགས་གཙོ་ཕོ་ཆིན·ཕུང་ལ་ཅུན་ལ་བཅར་འདྲི་བྱས་པའི་སྐོར་བཀོད་པ།

འདི་ག་ཚགས་པར་གྱི་གསར་འགོད་པ། ཀྲང་ཉན་ཧྲེང་།

ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་ཀྱི་གདན་ཞུས་ལྟར། ཐེ་ལན་རྒྱལ་ཚོགས་ཀྱི་ཀྲུའུ་ཞི་ཟུར་པ་དང་། དེ་སྔའི་ཙུང་ལི་གཞོན་པ། ཐེ་ལན་དང་ཀྲུང་གོའི་རིག་གནས་དཔལ་འབྱོར་མཐུན་ཚོགས་ཀྱི་ཚོགས་གཙོ་བཅས་ཡིན་པའི་ཕོ་ཆིན·ཕུང་ལ་ཅུན་གྱིས་ཉིན་ཤས་གོང་ཀྲུང་གོར་འཚམས་འདྲི་བྱས་ནས་ཀྲུང་གོ་རྒྱལ་སྤྱིའི་མཛའ་གྲོགས་ཚོགས་ཆེན་དང་ཀྲུང་གོ་མི་དམངས་ཕྱོ་ཕྱོགས་མཛའ་གྲོགས་མཐུན་ཚོགས་བཙུགས་ནས་ལོ་70འཁོར་བར་དྲན་གསོ་ཞུ་བའི་བྱེད་སྒོར་ཞུགས་པ་དང་འབྲེལ་འཐུས་མིའི་གྲས་ཡིན་པའི་ངོས་ནས་ཚོགས་འདུའི་ཐོག་གཏམ་བཤད་ཀྱང་བྱས་ཡོད། འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས་ཁོང་གིས་དམངས་ཁྲོད་ཕྱི་འབྲེལ་གྱི་གལ་ཆེའི་དོན་སྙིང་ནན་བཤད་བྱས་ཡོད།

“ཐེ་ལན་དང་ཀྲུང་གོ་ཁྱིམ་ཚང་གཅིག་ལྟར་ཡིན་པས་ཕན་ཚུན་འགྲོ་འོང་ཇེ་མང་དུ་འགྲོ་ངེས་རེད”ཅེས་ཕོ་ཆིན་གྱིས་བརྗོད་པ་དང་། ཁོང་གིས་ཐེ་ལན་དང་ཀྲུང་གོ་རྒྱལ་ཁབ་གཉིས་དབར་རྒྱལ་སྒྲོལ་ཐོངས་མཆན་མི་དགོས་པ་སོགས་ཀྱི་སྲིད་ཇུས་ལག་ལེན་བསྟར་བ་དེས། རྒྱལ་ཁབ་གཉིས་པོའི་དམངས་ཚོགས་འགྲོ་འོང་ལ་སྟབས་བདེ་སྔར་བས་སྐྲུན་པར་བརྟེན། ཐེ་ལན་དམངས་ཚོགས་ཀྱིས་ཀྲུང་གོའི་རིག་གནས་དང་། ཞིམ་ཟས། ལོ་རྒྱུས་གནའ་ཤུལ་བཅས་ལ་རྒྱུས་ལོན་ཡོང་ཐུབ་ལ། ཀྲུང་གོའི་ཡུལ་སྐོར་བ་ཐེ་ལན་དུ་བསྐྱོད་དེ་ས་གནས་དེའི་ཁྱད་ལྡན་རིག་གནས་ལའང་ཤེས་རྟོགས་ཐུབ་རྒྱུ་རེད། ཡང་སྒོས་ལོ་མང་རིང་། གཞོན་ནུའི་སྤེལ་རེས་རྣམ་གྲངས་མང་དུ་བཏང་བ་དེས་སློབ་མ་ཁྲི་སྟོང་མང་པོར་ཕན་ཚུན་རྒྱལ་ཁབ་སོ་སོར་སློབ་སྦྱོང་བྱེད་པའི་གོ་སྐབས་བྱུང་ནས་རྒྱལ་མཚམས་སྒྲོལ་བའི་མཛའ་གྲོགས་འཛུགས་ཐུབ་ཡོད། “དེས་འབྱུང་འགྱུར་རྒྱལ་ཁབ་གཉིས་པོས་ཕན་ཚུན་རྒྱུས་མངའ་སྔར་བས་ཟབ་ཏུ་དང་མཉམ་ལས་བྱེད་ཤུགས་ཆེ་རུ་གཏོང་བར་རྨང་གཞི་འདིང་ཐུབ”ཅེས་བརྗོད།

ཕོ་ཆིན་གྱིས་ཐེ་ལན་དང་ཀྲུང་གོའི་དབར་གྱི་མཛའ་གྲོགས་འབྲེལ་བའི་ལོ་རྒྱུས་རིང་བས། འབྱུང་འགྱུར་རྒྱལ་ཁབ་གཉིས་པོའི་མཉམ་ལས་ལ་གཉིས་ཁེའི་གྲུབ་འབྲས་སྔར་བས་མང་བ་ཐོབ་ངེས་ཡིན་པའི་ཡིད་ཆེས་ཡོད། རང་ཉིད་སྡོད་སའི་སྒྲིག་གཞིས་ཀྱང་ཚོང་དོན་དང་། རིག་གནས། སྒྱུ་རྩལ། གཞོན་ནུའི་སྤེལ་རེས་སོགས་ཀྱི་ཁྱབ་ཁོངས་གཙོ་བོར་སྔར་བས་དམིགས་ཏེ། རྒྱལ་ཁབ་གཉིས་པོའི་མི་དམངས་དབར་གྱི་བར་ཐག་ཇེ་ཐུང་དུ་གཏོང་བ་དང་། ཕན་ཚུན་ཤེས་རྟོགས་ཟབ་མོ་དང་གསར་གཏོད་མཉམ་ལས་ཡོང་བའི་གོ་སྐབས་གཏོད་ཆེད་ལེགས་སྐྱེས་དེ་བས་མང་བ་འབུལ་རྒྱུ་ཡིན། “ང་ཚོས་འཛམ་གླིང་ལ་དམངས་ཁྲོད་ཕྱི་འབྲེལ་སྟོན་པ་ནི་འདུ་ཤེས་ཙམ་ཞིག་མིན་པར་རྒྱལ་ཁབ་ཕན་ཚུན་སྦྲེལ་ནས་དེ་བས་བརྩི་འཇོག་ལ་སྐུལ་འདེད་དང་ཡུན་རིང་གི་མཛའ་གྲོགས་འབྲེལ་བ་འཛུགས་ཕྱིར་སྟོབས་ཤུགས་གཅིག་ཏུ་བསྒྲིལ་རྒྱུ་དེ་ཡིན”ཞེས་བརྗོད།

“སྤེལ་རེས་ཁྲོད་མཛའ་མཐུན་དང་བརྩི་འཇོག་ཚོར་བྱུང”

—— ཨ་རིའི“ཀུའུ་ལིང་མཛའ་གྲོགས”ཀྱི་སྐོང་སྡུད་མཁན་མུའུ་ཡན་ལིང་ལ་བཅར་འདྲི་ བྱས་པའི་སྐོར་བཀོད་པ།

འདི་ག་ཚགས་པར་གྱི་གསར་འགོད་པ། ཁྲེན་ཞང་ཝུན།

ཀྲུང་གོར་ཡོང་ནས་ཀྲུང་གོ་རྒྱལ་སྤྱིའི་མཛའ་གྲོགས་ཚོགས་ཆེན་དང་ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་བཙུགས་ནས་ལོ་70འཁོར་བར་དྲན་གསོ་ཞུ་བའི་བྱེད་སྒོར་ཞུགས་པའི་ཨ་རིའི“ཀུའུ་ལིང་མཛའ་གྲོགས”ཀྱི་སྐོང་སྡུད་མཁན་མུའུ་ཡན་ལིང་གིས་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱས་ཡོད།

དུས་རབས་20པའི་ལོ་རབས་40པ་ནས་བཟུང་། མུའུ་ཡན་ལིང་གིས་སྒྱུག་པོ་མུའུ་ཨའེ་རེན་ཐག་རིང་ཕྱི་རྒྱལ་ནས་དེ་དུས་ནན་ཕིང་ཡང་ཁོའུ་གྲོང་རྡལ་དུ་བཙུགས་པའི་ཧྥུའུ་ཀྲོའུ་དབྱིན་ཧྭ་སློབ་གྲྭར་སློབ་ཚན་ཁྲིད་མྱོང་ཡོད། འཛམ་གླིང་དམག་ཆེན་གཉིས་པའི་སྐབས་ཁོང་ཨ་རིའི་སྟག་མཆོང་རུ་ཁག་གི་ཀྲུང་ཝེ་དམག་དཔོན་བྱས་ཏེ་ཧྥུའུ་ཅན་དུ་ཡོང་ནས་ཀྲུང་གོའི་རི་འགོག་དམག་འཁྲུག་ལ་རོགས་སྐྱོར་བྱེད་པའི་ནང་ཞུགས་ཏེ་དཔུང་པ་མཉམ་གཤིབ་ཀྱིས་དམག་འཐབ་བྱེད་རིང་ཀྲུང་གོ་མི་དམངས་དང་མཛའ་མཐུན་ཟབ་མོ་ཆགས་ཡོད། རི་འགོག་དམག་འཁྲུག་ལ་རྒྱལ་ཁ་ཐོབ་རྗེས་མུའུ་ཨའེ་རེན་རང་རྒྱལ་ཁབ་ཏུ་ཕྱིར་ལོག་སྟེ་སློབ་གྲྭ་འགྲིམ་པ་དང་ཁྱིམ་གཞིས་བཙུགས་ནའང་། ཁོང་གིས་སྔར་བཞིན་ཀྲུང་གོར་བརྩེ་བ་འཆང་བས་1947ལོར་ཧྥུའུ་ཅན་ཞེ་ཧོ་སློབ་ཆེན་དུ་དགེ་རྒན་བྱེད་པའི་གོ་སྐབས་ཐོབ་སྟེ་ཁོང་གི་ཁྱིམ་མི་རྣམས་དང་མཉམ་དུ་སླར་ཡང་ཧྥུའུ་ཀྲོའུ་ལ་ཡོང་ཡོད།

མུའུ་ཡན་ལིང་དང་ཁོང་གི་བཟའ་ཟླས་མཉམ་དུ“ཀུའུ་ལིང་མཛའ་གྲོགས”ཀྱི་དྲ་ཚུགས་བཙུགས་ཏེ་ཨ་རིའི་ཤར་ནུབ་མཚོ་འགྲམ་དབར་བསྐྱོད་ནས་ཕྱི་སྡོད་རང་མིའི་རྒྱུད་པ་དང་འབྲེལ་གཏུག་ཧུར་ཐག་བྱས་ཡོད། སྨན་པ་ཧྥུའུ་དབྱི་ཧྭ་ལ“ང་རང་ཀྲུང་གོ་མི་དམངས་ལ་དགའ་ཞེན་ཡོད་ལུགས”ཀྱི་ཁ་ཆེམས་བཞག་པ་དང་། ལོ་103ལ་སླེབས་པའི་རྒད་པོ་ལིང་ཨིན·པོ་ལིང་སྐུ་འདས་ཁར་བརྙན་ལམ་ནས་འཕྲེང་སེམས་ལོ་87བཅངས་པའི་ཀུའུ་ལིང་ལ“ཕྱིར་དྲན”བྱེད་པ་སོགས་མྱུར་སྐྱོབ་རང་བཞིན་གྱི་ཐོ་འགོད་དང་ཀུའུ་ལིང་དང་འབྲེལ་བའི་མཛའ་གྲོགས་སྤེལ་རེས་ཀྱི་དྲན་ཤེས་རྒྱུན་འཛིན་བྱས་པ་དང་མུའུ་ཡན་ལིང་གིས་སྐབས་དེ་དུས་དེའི་འགན་ཁུར་གྱི་ཡོད།

མུའུ་ཡན་ལིང་གིས་འདི་ལོ་ནི་ཀྲུང་གོ་གསར་པ་དབུ་བརྙེས་ནས་ལོ་75འཁོར་བས། ངས་ཀྲུང་གོའི་ཁྱབ་ཁོངས་ཁག་ལ་བྱ་འཕུར་བ་ལྟར་གྱི་འཕེལ་རྒྱས་བྱུང་ཚུལ་ཚོར་བས་སྙིང་དབུས་ནས་དགའ་ཚོར་སྐྱེ་གི་འདུག “ཨ་རིའི་མི་དམངས་དང་ལྷག་པར་དུ་གཞོན་ནུ་སྔར་ལས་མང་བ་ཀྲུང་གོར་ཡོང་སྟེ་གང་སར་སྐྱོད་ནས་ཀྲུང་གོ་ཇི་མ་ཇི་བཞིན་ཤེས་རྟོགས་བྱེད་པ་དང་སྤེལ་རེས་ཁྲོད་མཛའ་མཐུན་དང་བརྩི་འཇོག་ཚོར་ཐུབ་རྒྱུའི་རེ་བ་ཡོད” སླད་ཕྱིན་ངས་མུ་མཐུད་འབད་བརྩོན་བྱས་ཏེ་ཀུའུ་ལིང་གི་གཏམ་རྒྱུད་མུ་མཐུད་བརྗོད་རྒྱུ་ཡིན། གང་ལགས་ཤེ་ན། མཛའ་གྲོགས་ནི་ཧ་ཅང་རྩ་ཆེ་བས་རེད་ཅེས་བརྗོད།

“དེང་རབས་ཅན་གྱི་རྒྱང་ལམ་གསར་པར་མཉམ་དུ་སྐྱོད”

—— ཐན་ཙན་ནི་ཡའི་ཙུང་ལི་ཟུར་པ་ཐན་ཀྲུང་མཛའ་གྲོགས་མཐུན་ཚོགས་ཀྱི་ཚོགས་གཙོ་གཞོན་པ་སྨི་ ཙེང་ཀེ·ཕིང་ཏར་བཅར་འདྲི་བྱས་པའི་སྐོར་བཀོད་པ།

འདི་ག་ཚགས་པར་གྱི་གསར་འགོད་པ། ཚུའེ་ཆི།

ཐན་ཙན་ནི་ཡའི་ཙུང་ལི་ཟུར་པ་དང་། གསར་བརྗེ་ཏང་ཀྲུང་དབྱང་གི་ཨུ་ཡོན། ཐན་ཀྲུང་མཛའ་གྲོགས་མཐུན་ཚོགས་ཀྱི་ཚོགས་གཙོ་གཞོན་པ་བཅས་ཡིན་པའི་སྨི་ཙེང་ཀེ·ཕིང་ཏས་འདི་ག་ཚགས་པར་གྱི་ཆེད་དོན་བཅར་འདྲི་དང་ལེན་བྱེད་སྐབས། ཀྲུང་གོས་ཐོག་མཐའ་བར་གསུམ་དུ་སྒོ་དབྱེ་བསྟུན་མཁས་ཀྱི་རྩ་དོན་རྒྱུན་འཛིན་གྱིས་འཛམ་གླིང་གི་རྒྱལ་ཁབ་ཁག་དང་མཛའ་གྲོགས་སྤེལ་རེས་ལ་ཤུགས་སྣོན་བརྒྱབ་ནས་ཕ་ཚ་བུ་རྒྱུད་ཀྱི་ཆེད་དུ་དེ་བས་མཛེས་སྡུག་ལྡན་པའི་འཛམ་གླིང་ཞིག་མཉམ་དུ་སྐྲུན་གྱི་ཡོད་ཅེས་བརྗོད་ཡོད།

ཕིང་ཏས། ཀྲུང་གོ་གསར་པ་དབུ་བརྙེས་ནས་ལོ་75འཁོར་རིང་། ཀྲུང་གོས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ཏེ་མི་དུང་ཕྱུར་མང་པོ་དབུལ་ཕོངས་གནས་ལས་བསྒྲལ་ཞིང་། དཔལ་འབྱོར་འཕེལ་རྒྱས་དང་། རྨང་གཞིའི་སྒྲིག་བཀོད། ཚན་རྩལ་གསར་གཏོད་སོགས་ཀྱི་ཁྱབ་ཁོངས་ཁག་ལ་གྲུབ་འབྲས་ཆེན་པོ་ཐོབ་ཡོད་ལ་འཛམ་གླིང་གི་སྔོན་ཐོན་བཟོ་ལས་དང་ཚན་རྩལ་རྒྱལ་ཁབ་སྟོབས་ཆེན་ཕྱོགས་སུ་སྐྱོད་བཞིན་ཡོད།“ལམ་ཚད་རྡོ་རིང་ལྟ་བུའི་འཕེལ་རྒྱས་ཀྱི་གྲུབ་འབྲས་འདི་དག་ཀྲུང་གོ་གུང་ཁྲན་ཏང་གི་བློ་བརྟན་འགྱུར་མེད་དང་མིག་རྒྱང་རིང་བའི་འགོ་ཁྲིད་དང་། དེ་བཞིན་ཀྲུང་གོ་མི་དམངས་ཀྱི་གཞོགས་འདེགས་དམ་ཟབ་དང་ལས་ལ་བརྩོན་པའི་བློ་གྲོས་བཅས་དང་ཁ་འབྲལ་ཐབས་མེད། ཀྲུང་གོས་སོ་སོའི་རྒྱལ་བབ་དང་འཚམ་པའི་འཕེལ་རྒྱས་ཀྱི་འགྲོ་ལམ་དུ་བསྐྱོད་པ་དེས་འཛམ་གླིང་གི་རྒྱལ་ཁབ་གཞན་དག་ལ་དཔྱད་གཞིར་འཛིན་པའི་དོན་སྙིང་གལ་ཆེན་ལྡན་ཡོད”ཅེས་བརྗོད་ཡོད།

ཕིང་ཏས། 2024ལོའི་ཀྲུང་ཧྥེའི་མཉམ་ལས་གླེང་སྟེགས་པེ་ཅིང་དབུ་ཚོགས་བདེ་བླག་ངང་གཉེར་བ་དང་། ཀྲུང་གོ་ཕྱོགས་ནས་ཀྲུང་ཧྥེ་མཉམ་དུ་ལག་གདང་སྦྲེལ་ཏེ“དེང་རབས་ཅན་དྲུག”ལ་མཉམ་དུ་སྐུལ་འདེད་གཏོང་བ་དང་རོགས་ཟླའི་བྱ་སྤྱོད་ཆེན་པོ་བཅུ་སྤེལ་བའི་ཁྱབ་བསྒྲགས་བྱ་རྒྱུ་བཏོན་ཞིང་། དེ་དག་འཕྲོད་བསྟེན་དང་། སློབ་གསོ། རྨང་གཞིའི་སྒྲིག་བཀོད་འཛུགས་སྐྲུན་སོགས་ཀྱི་ཁྱབ་ཁོངས་མང་པོ་དང་འབྲེལ་ཡོད་ལ། ཀྲུང་གོས་ཐོག་མཐའ་བར་གསུམ་དུ་ཨ་ཧྥེ་རི་ཁ་གླིང་དང་མཉམ་ལས་བྱེད་པའི་འདྲ་མཉམ་ལྟ་སྟངས་མཐའ་འཁྱོངས་བྱས་ཏེ་ཨ་ཧྥེ་རི་ཁ་གླིང་དང་མཉམ་དུ་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་བར་གཞོལ་ལུགས་མཚོན་ཡོད། “ཨ་ཧྥེ་རི་ཁ་གླིང་གི་རྒྱལ་ཁབ་ཀྱིས་མུ་མཐུད་ཀྲུང་གོ་དང་མཉམ་དུ་ཁྱབ་ཁོངས་ཁག་གི་དངོས་སྒྲུབ་མཉམ་ལས་དང་མི་ཆོས་རིག་གནས་ཀྱི་སྤེལ་རེས་ཟབ་ཏུ་གཏོང་བ་དང་། དེང་རབས་ཅན་གྱི་རྒྱང་ལམ་གསར་པར་མཉམ་དུ་བསྐྱོད་ནས་ཧྥེ་ཀྲུང་མཛའ་གྲོགས་མཉམ་ལས་ཀྱི་ལེའུ་གསར་པ་གཏོད་འགོ་ཚུགས་ཡོད”ཅེས་བརྗོད་པ་རེད།