ཟླ་11ཚེས་10ཉིན། ཀྲུང་གོ་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་སྐབས་བདུན་པ་མཇུག་འགྲིལ་ཞིང་། ཉིན་6གི་ནང་རྒྱལ་ཁབ་དང་། ས་ཁུལ། རྒྱལ་སྤྱིའི་རྩ་འཛུགས་བཅས་152དང་། འགྲེམས་ཞུགས་ཁེ་ལས་3500ཙམ། ཆེད་ལས་ལྟད་མོ་བ་ཁྲི་བཅུ་ལྷག་བཅས་ཀྱིས་ནང་འདྲེན་དངོས་མང་སྟོན་ཚོགས་སུ་ཚོང་ཟོག་དང་ཞབས་ཞུ་ཉོ་ཚོང་དང་རིག་གནས་དང་འདུ་ཤེས་སྤེལ་རེས་བྱས་པས། ཀྲུང་གོའི་ཁྲོམ་རའི་གོ་སྐབས་ཀྱི་ངོས་འཛིན་དང་སྒོ་དབྱེ་མཉམ་ལས་ཀྱི་འདུ་ཤེས་ཀྱི་ངོས་འཛིན་སྔར་བས་ཟབ་ཏུ་ཕྱིན་ཡོད་པ་རེད།

“ནང་འདྲེན་དངོས་མང་སྟོན་ཚོགས”ནང་མཉམ་དུ་ཞུགས་པས་ཕྱོགས་ཁག་གིས་ཀྲུང་གོས་ཆུ་ཚད་མཐོ་བའི་སྒོ་མོ་འབྱེད་རྒྱ་ཆེ་རུ་བཏང་བའི་ལྷག་བསམ་སྔར་བས་ཚོར་ཐུབ་པ་བྱུང་ཡོད། ཀྲུང་གོ་གུང་ཁྲན་ཏང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་རྗེས་སུ་གཉེར་བའི་དཔལ་འབྱོར་ཕྱི་འབྲེལ་གྱི་བྱེད་སྒོ་གལ་ཆེན་ཞིག་ཡིན་པའི་ནང་འདྲེན་དངོས་མང་སྟོན་ཚོགས་སྐབས་བདུན་པས་འཛམ་གླིང་ལ་ཀྲུང་གོས་ཕྱོགས་ཡོངས་ནས་སྒྱུར་བཅོས་སྔར་བས་ཟབ་གཏོང་དང་ཆུ་ཚད་མཐོ་བའི་སྒོ་དབྱེའི་ལས་དོན་ལ་སྐུལ་འདེད་གཏོང་བའི་ཆོད་སེམས་དང་བྱ་སྤྱོད་མངོན་པར་བྱས་ཡོད། རྒྱལ་ཁབ་དང་རྒྱལ་སྤྱིའི་རྩ་འཛུགས་77རྒྱལ་ཁབ་ཀྱི་འགྲེམས་ཚོགས་ནང་ཞུགས་པ་དང་། རྒྱལ་ཁབ་དང་ས་ཁུལ་129ཡི་འགྲེམས་ཚོང་བ་ཁེ་ལས་ཀྱི་འགྲེམས་ཚོགས་ནང་ཞུགས་པ། འགྲེམས་ཚོགས་ནང་ཞུགས་མཁན་འཛམ་གླིང་གི་ཁེ་ལས་རབ་གྲས་500དང་ལས་རིགས་ཀྱི་སྣེ་འདྲེན་ཁེ་ལས་297ཟིན་པ་སོགས་གྲངས་གཞི་རབ་དང་རིམ་པ་ནས་སྐབས་འདིའི་ནང་འདྲེན་དངོས་མང་སྟོན་ཚོགས་ཀྱི་སྒོ་མོ་འབྱེད་ཚད་གསལ་པོར་མངོན་ཡོད། མཉམ་འབྲེལ་རྒྱལ་ཚོགས་ཚོང་དོན་འཕེལ་རྒྱས་ཚོགས་འདུའི་དྲུང་ཆེ་ཀེ་ལིན་སི་ཕན་གྱིས་ཀྲུང་གོས་ནང་འདྲེན་དངོས་མང་སྟོན་ཚོགས་གཉེར་ཏེ་སྒོ་དབྱེའི་སྙིང་སྟོབས་ལ་བརྟེན་ནས་གོ་ལ་ཧྲིལ་པོའི་ཁེ་ལས་ཕན་ཚུན་འབྲེལ་མཐུད་དང་རོགས་ཟླའི་འབྲེལ་བ་བཙུགས་ཏེ། དེ་བས་དར་རྒྱས་དང་མཉམ་སྦྲེལ་གྱི་གོ་ལ་ཧྲིལ་པོའི་དཔལ་འབྱོར་ཐུན་མོང་ཐོག་གཏོད་རྒྱུ་ཡིན་ཞེས་བརྗོད།

“ནང་འདྲེན་དངོས་མང་སྟོན་ཚོགས”ནང་མཉམ་དུ་ཞུགས་པས་ཕྱོགས་ཁག་གིས་ཀྲུང་གོར་མ་འཇོག་བྱེད་པ་དང་ཀྲུང་གོའི་ཁྲོམ་རར་གཏིང་ཟབ་ཞུགས་པའི་ཡིད་ཆེས་སྔར་བས་བརྟན་དུ་ཕྱིན་ཞིང་། ཀྲུང་གོས་འཕེལ་རྒྱས་ཀྱི་རྣམ་པ་གསར་པ་གཏོད་པའི་སྐར་ཁུང་ཞིག་ཡིན་པའི་ངོས་ནས་ནང་འདྲེན་དངོས་མང་སྟོན་ཚོགས་ཀྱིས་ཀྲུང་གོའི་འཕེལ་རྒྱས་གསར་པར་བརྟེན་ནས་འཛམ་གླིང་ལ་གོ་སྐབས་གསར་པ་མཁོ་འདོན་བྱེད་པའི་གསོན་ཉམས་དོད་པའི་འགྲེལ་བཤད་བརྒྱབ་ཡོད། རྒྱུ་ཆ་གསར་པའི་ཆེད་ཁུལ་ཐོག་མར་འཛུགས་པ་དང་། གསར་གཏོད་གསོ་སྐྱོང་ཆེད་ཁུལ་རིམ་སྤོར་བྱས་ནས་གཏོད་པ། ཕུད་འགྲེམ་དཔལ་འབྱོར་དང་འཛད་སྤྱོད་ལ་སྐུལ་འདེད་གཏོང་བའི་འབྲེལ་ཡོད་ཡན་ལག་གླེང་སྟེགས་སོགས་ཀྱི་བྱེད་སྒོ་སྤེལ་བ་ནས་གོ་ལ་ཧྲིལ་པོའི་ཐོན་རྫས་གསར་པའི་ཕུད་འགྲེམ་བྱ་ཡུལ་དང་། མདུན་གྲལ་ལག་རྩལ་ཐོག་མར་འདེམས་ཁུལ། གསར་གཏོད་ཞབས་ཞུ་ཐོག་མར་སྤེལ་ཡུལ་བཅས་རྒྱུན་མཐུད་ངང་གཏོད་པའི་བར་དང་མཚོན་བྱེད་རང་བཞིན་གྱི་ཐོན་རྫས་གསར་པ་དང་། ལག་རྩལ་གསར་པ། ཞབས་ཞུ་གསར་པ་བཅས་450ལྷག་ཙམ་འགྲེམས་སྟོན་བྱས་པ་དང་དེ་རྗེས“ཀྲུང་གོར་མ་འཇོག་བྱེད་པའི”རང་མོས་ཚོང་དོན་ཚོད་ལྟའི་ཁུལ་གྱི་ཆེད་དོན་འོས་སྦྱོར་དང་། ཕྱི་རྒྱལ་གྱི་མ་འཇོག་ཁེ་ལས་ཀྱི་གྲལ་སྒོར་ཚོགས་འདུ་སོགས་ཀྱི་བྱེད་སྒོ་སྤེལ་བའི་བར་ཀྲུང་གོས་མུ་མཐུད་ཕྱོགས་ཁག་དང་མཉམ་དུ་ཁྲོམ་རའི་མི་མངོན་པའི་སྟོབས་ཤུགས་ཧ་ཅང་ཆེན་པོ་དང་། གསར་གཏོད་ཀྱི་གསོན་ཤུགས་ཆེན་པོ། འཕེལ་རྒྱས་ཀྱི་ཁེ་སྤོགས་ཆེན་པོ་བཅས་ལོངས་སྤྱོད་བྱ་རྒྱུ་ཡིན་པ་རེད། སྐབས་འདིའི་ནང་འདྲེན་དངོས་མང་སྟོན་ཚོགས་ཐོག་རྒྱལ་སྒྲོལ་ཁེ་ལས་མང་པོས་ཀྲུང་གོར་མུ་མཐུད་མ་འཇོག་འཆར་གཞི་ལག་བསྟར་བྱ་རྒྱུའི་ཁྱབ་བསྒྲགས་བྱས་ཏེ། བྱ་སྤྱོད་དངོས་ལ་བརྟེན་ནས་ཀྲུང་གོའི་ཁྲོམ་ར་དང་འཕེལ་རྒྱས་ཀྱི་མདུན་ལམ་ཐད“ཡིད་ཆེས་ཀྱི་སྤ་སེ”འཕངས་པ་རེད། འགྲེམས་སྟོན་ནང་ཞུགས་མཁན་རྒྱལ་སྒྲོལ་ཁེ་ལས་ཀྱི་འགན་འཁུར་བས“ཀྲུང་གོའི་དཔལ་འབྱོར་འཕར་ཚུལ་གཏིང་ཟབ་ངང་ཚོར་བྱུང” “ཀྲུང་གོ་ནི་ཁྲོམ་ར་ཆེན་པོ་ཞིག་ཡིན་ལ་གསོན་ཤུགས་ཆེ་ཤོས་ལྡན་པའི་ཁྲོམ་ར་ཞིག་ཀྱང་རེད”“ང་ཚོས་ཀྲུང་གོའི་ཁྲོམ་རར་ཡིད་ཆེས་ཀྱིས་ཁེངས་ཡོད་ལ་མུ་མཐུད་ཀྲུང་གོ་དང་མཉམ་དུ་འབྱུང་འགྱུར་གཏོད་ཀྱི་ཡིན”ཞེས་གཅིག་རྗེས་གཉིས་མཐུད་ངང་བརྗོད་པ་རེད།

ཀྲུང་གོས་ཆུ་ཚད་མཐོ་བའི་སྒོ་དབྱེར་སྐུལ་འདེད་བཏང་ནས་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་བཞིན་ཡོད་པ་དང་། གཞི་ཁྱོན་ཆེ་བའི་ཁྲོམ་ར་སྔར་བས་སྒོ་དབྱེ་བྱས་ཏེ་ཕྱོགས་ཁག་དང་ལག་གདང་སྦྲེལ་ནས་སྒོ་དབྱེའི་རྣམ་པའི་འཛམ་གླིང་དཔལ་འབྱོར་བསྐྲུན་ཏེ། གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བ་དང་མིའི་རིགས་ལ་བདེ་རྩ་བསྐྲུན་ཆེད་སྟོབས་ཤུགས་དེ་བས་ཆེ་བ་ལེགས་སྐྱེས་འབུལ་གྱི་ཡིན་ཞེས་བརྗོད་པ་རེད།