ཉེ་ཆར་མངའ་རིས་ས་ཁུལ་གྱི་2024ལོའི“119”མེ་ཟོན་དྲིལ་བསྒྲགས་ཟླ་བའི་བྱེད་སྒོ་སྤེལ་འགོ་ཚུགས་པའི་མཛད་སྒོ་དང་སྤྱི་ཚོགས་ཕན་བདེའི་སྒྲིག་གཞིའི་མེ་ཟོན་བདེ་འཇགས་ཚད་ལྡན་དོ་དམ་གྱི་ས་གནས་ས་ཐོག་གི་ཚོགས་འདུ་མངའ་རིས་ས་ཁུལ་གྱི་གཅིག་སྡུད་བསྙེན་བཀུར་ཟུང་གི་ལྟེ་གནས་སུ་འཚོགས་ཤིང་། མངའ་རིས་ས་ཁུལ་འཕྲལ་འདོམས་ཅུས་དང་། མེ་ཟོན་རོགས་སྐྱོབ་ཉིང་ལག་རུ་ཁག དམངས་སྲིད་ཅུས། མཐའ་མཚམས་དོ་དམ་ཉིང་ལག་རུ་ཁག མེ་ཟོན་བདེ་འཇགས་ཨུ་ལྷན་བཅས་ཀྱི་ཁོངས་མི་ཚན་པའི་འགན་འཁུར་བློ་མཐུན་གཙོ་བོ་དང་མེ་ཟོན་བདེ་འཇགས་ཀྱི་གཙོ་གནད་ཚན་པའི་འཐུས་མི་དང་། དང་བླངས་པ། མེ་ཟོན་རོགས་སྐྱོབ་མི་སྣའི་འཐུས་མི་བཅས་ཁྱོན་མི་གྲངས་200ལྷག་ཙམ་བྱེད་སྒོར་ཞུགས་ཡོད་པ་རེད།

འགོ་ཚུགས་མཛད་སྒོའི་ཐོག དང་ཐོག་2024ལོ་འཁོར་གྱི“119མེ་ཟོན་སྔོན་ཐོན་མཉམ་སྡེབ”དང“119མེ་ཟོན་སྔོན་ཐོན་མི་སྒེར”ལ་གཟེངས་བསྟོད་བྱས་པ་རེད། དེ་རྗེས་མངའ་རིས་ས་ཁུལ་གྱི་གཅིག་སྡུད་བསྙེན་བཀུར་ཟུང་གི་ལྟེ་གནས་ཀྱིས་མེ་ཟོན་སྒྲིག་བཀོད་སྒྲིག་ཆས་དང་། མེ་ཟོན་བདེ་འཇགས་དོ་དམ་སོགས་ཐད་ནས་མེ་ཟོན་བདེ་འཇགས་ཀྱི་ཚད་ལོན་གསར་གཏོད་ལས་ཀའི་ཉམས་མྱོང་སྤེལ་རེས་བྱས་པ་རེད། བྱེད་སྒོ་སྤེལ་ཡུལ་དུ་མངའ་རིས་ས་ཁུལ་གྱི་མེ་ཟོན་རོགས་སྐྱོབ་ཉིང་ལག་རུ་ཁག་གིས་མཉམ་སྒུལ་ཉམས་ལེན་ཁུལ་མང་པོ་བཙུགས་པའི་ནང་མེ་ཟོན་ཤེས་བྱའི་དྲི་བ་དྲིས་ལན་དང་། མེ་ཟོན་རོགས་སྐྱོབ་ཀྱི་སྒྲིག་ཆས་འགྲེམས་སྟོན། མེ་ཟོན་གྱི་སྤྲོ་འཕེལ་རོལ་རྩེད་སོགས་ཚུད་ཡོད་པ་རེད།