ཤིན་ཧྭ་གསར་འགྱུར་ཁང་གྲོང་ཁྱེར་ཐ་ལིན་ནས་ཟླ་11ཚེས་13ཉིན་གློག་འཕྲིན་འབྱོར་གསལ། ཀྲུང་གོ་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས་སྒྲིག་འཛུགས་བྱས་པའི་ཀྲུང་གོའི་བོད་རིག་པ་མཁས་ཅན་གྱི་སྤེལ་རེས་ཚོགས་པས་ཚེས་10ནས་13ཉིན་བར་ཨེ་སོ་ནི་ཡར་འཚམས་འདྲི་བྱས་ནས་ཨེ་སོ་ནི་ཡའི་ཕྱི་འབྲེལ་པུའི་དཔོན་རིགས་དང་། སྨྱན་སྦྱོར་གྱི་གསར་འགོད་པ། འབྲེལ་ཡོད་མི་སྣ་བཅས་དང་དུས་རབས་གསར་པའི་ཀྲུང་གོའི་བོད་ལྗོངས་འཕེལ་རྒྱས་ཀྱི་གྲུབ་འབྲས་དང་བོད་ཀྱི་མི་རིགས་ཁག་གི་མི་དམངས་ཚོས་སློབ་གསོ་དང་། སྨན་བཅོས། སྐྱེ་ཁམས་ཁོར་ཡུག་སྲུང་སྐྱོང་སོགས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐད་དཔྱད་བསྡུར་དང་སྤེལ་རེས་གཏིང་ཟབ་བྱས་པ་རེད།

བོད་ཀྱི་ཕྱི་ཕྱོགས་རིག་གནས་སྤེལ་རེས་མཐུན་ཚོགས་ཀྱི་དྲུང་ཆེ་ཐན་ཉི་ཡས་སྤེལ་རེས་ཚོགས་པའི་ཚོགས་གཙོ་གནང་བ་དང་ཁོངས་མིའི་གྲས་སུ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་དང་། གློག་རྡུལ་ཚན་རྩལ་སློབ་ཆེན། 《ཀྲུང་གོའི་བོད་རིག་པ》དུས་དེབ་ཀྱི་བོད་རིག་པ་མཁས་ཅན་དང་མཁས་དབང་སོགས་ཚུད་ཡོད་པ་རེད།

ཨེ་སོ་ནི་ཡའི་ཕྱི་འབྲེལ་པུའི་འགྲོ་བ་མིའི་ཐོབ་ཐང་དང་གནས་སྤོས་མི་སེར་ལས་དོན་གྱི་གཞུང་ཚབ་ཆེ་མོ་བ་ཁ་ཐེ་ལིན·ཅི་ཝུའེ་དང་བཞུགས་མོལ་གནང་སྐབས། སྤེལ་རེས་ཚོགས་པའི་རིགས་གཅིག་མཁས་ཅན་གྱིས་ཀྲུང་གོའི་བོད་ལྗོངས་ཀྱི་གཞི་རྩའི་གནས་ཚུལ་ངོ་སྤྲོད་གནང་བ་དང་། བོད་ལ་དམངས་གཙོའི་བཅོས་སྒྱུར་བྱས་ཚུན་མི་རིགས་ཁག་གི་མི་དམངས་ཀྱིས་རྩ་ཁྲིམས་དང་བཅའ་ཁྲིམས་ཀྱིས་དཀྲིས་པའི་དབང་ཆ་ལག་བསྟར་ཧུར་ཐག་དང་འདྲ་མཉམ་ངང་འཕེལ་རྒྱས་བཏང་ནས་སློབ་གསོ་དང་། སྨན་བཅོས། སྐྱེ་ཁམས་ཁོར་ཡུག་སྲུང་སྐྱོང་སོགས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་བྱས་ནས་འཚོ་བ་ཡག་པོ་སྐྱེལ་བཞིན་ཡོད་ཅེས་ནན་བཤད་གནང་བ་རེད། ཅི་ཝུའེ་ཡིས་བཏོན་པའི་བོད་ཀྱི་བོད་སྐད་སློབ་ཁྲིད་དང་ཆོས་དད་རང་མོས་ཀྱི་གནད་དོན་ལ་དམིགས་ནས་སྤེལ་རེས་ཚོགས་པས་ལན་ཧུར་ཐག་བརྒྱབ་པ་དང་འབྲེལ་ཨ་རི་སོགས་ནུབ་ཕྱོགས་རྒྱལ་ཁབ་དང་ཏཱ་ལའི་རུ་ཚོགས་ཀྱིས་དུས་ཡུན་རིང་པོའི་ནང་བོད་དང་འབྲེལ་བ་ཡོད་པའི་དམའ་འབེབས་བཏང་བར་སུན་འབྱིན་བྱས་ཏེ་ཨེ་སོ་ནི་ཡ་ཕྱོགས་ཀྱིས་བོད་ལ་ཡང་དག་པའི་ཤེས་ཚོར་ཞིག་ཡོང་རྒྱུར་རོགས་རམ་བྱས་པ་རེད།

སྤེལ་རེས་ཚོགས་པས་ད་དུང་ས་གནས་དེ་གར་སྨྱན་སྦྱོར་སྤྲོ་གླེང་བྱེད་སྒོ་སྤེལ་ཞིང་། བོད་ཀྱི་དཔལ་འབྱོར་འཕེལ་རྒྱས་ཀྱི་གནས་ཚུལ་དང་། གཞུང་གྲོན་སློབ་གསོའི་མ་ལག དེ་བཞིན་བོད་དུ་ཡུལ་སྐོར་ལ་ཇི་ལྟར་སྐྱོད་པ་བཅས་སྐོར་གྱི་གསར་འགོད་པའི་དྲི་བར་ལན་རྒྱག་སྐབས། སྤེལ་རེས་ཚོགས་པས། 2015ལོ་ནས་བཟུང་བོད་ཀྱི་གྲོང་མི་ཡོངས་ཀྱི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་འཕར་ཚད་ལོ་8བསྟུད་མར་རྒྱལ་ཡོངས་ཀྱི་ཨང་དང་པོར་སླེབས་པ་དང་། བོད་ཀྱང་རྒྱལ་ཡོངས་སུ་ལོ་15ཡི་གཞུང་གྲོན་སློབ་གསོ་ལག་ལེན་བསྟར་བའི་ས་ཁུལ་དང་པོ་དེ་ཡིན་པ། བོད་ཀྱིས་དེ་བས་སྒོ་དབྱེའི་རྣམ་པའི་ཐོག་ནས་འཛམ་གླིང་ས་གནས་ཁག་གི་མི་རྣམས་འདི་གར་འཚོལ་ཞིབ་དང་ཉམས་ལེན་བྱེད་པར་ཡོང་རྒྱུར་དགའ་བསུ་ཞུ་བཞིན་ཡོད་ཅེས་ངོ་སྤྲོད་བྱས་པ་རེད། འཚམས་འདྲི་གནང་རིང་། སྤེལ་རེས་ཚོགས་པས་ད་དུང་ཨེ་སོ་ནི་ཡའི་ཕྱིར་སྡོད་རང་མི་དང་ཕྱི་ཁོངས་ཀྲུང་གོ་བ་དང་། ཕྱི་སྦྱོང་སློབ་མ། ཀྲུང་གོའི་མ་འཇོག་ཁེ་ལས་བཅས་ཀྱི་འཐུས་མིར་ཆེད་དོན་སྙན་སེང་གནང་བ་རེད།