ཤིན་ཧྭ་གསར་འགྱུར་ཁང་ཟི་ལིང་ནས་ཟླ་11ཚེས་11ཉིན་གློག་འཕྲིན་འབྱོར་གསལ། ཚེས་11ཉིན། མཚོ་སྔོན་ཞིང་ཆེན་སྒྲིག་ཨུད་ལྟ་ཞིབ་ཨུ་ལྷན་གྱིས། མཚོ་སྔོན་ཞིང་ཆེན་ཟི་ལིང་གྲོང་ཨུད་ཀྱི་དེ་སྔའི་ཨུ་ཡོན་དང་། རྒྱུན་ཨུ། ཧྲུའུ་ཅི་གཞོན་པ་བཅས་ཡིན་པའི་དབང་ཧྲན་ཆོན་གྱིས་སྒྲིག་འགལ་ཁྲིམས་འགལ་ཚབས་ཆེན་བྱས་པས་ཏང་གི་སྐྱིད་སྡུག་དང་གཞུང་གི་ལས་གནས་ནས་ཕྱིར་འབུད་རྒྱུའི་བརྡ་ཁྱབ་བཏང་བ་རེད།

ཀྲུང་གུང་མཚོ་སྔོན་ཞིང་ཨུད་ཀྱི་ཆོག་མཆན་ཐོབ་པ་བརྒྱུད། མཚོ་སྔོན་ཞིང་ཆེན་སྒྲིག་ཨུད་ལྟ་ཞིབ་ཨུ་ལྷན་གྱིས་ཟི་ལིང་གྲོང་ཨུད་ཀྱི་དེ་སྔའི་ཨུ་ཡོན་དང་། རྒྱུན་ཨུ། ཧྲུའུ་ཅི་གཞོན་པ་བཅས་ཡིན་པའི་དབང་ཧྲན་ཆོན་གྱི་སྒྲིག་འགལ་ཁྲིམས་འགལ་ཚབས་ཆེན་གྱི་གནད་དོན་ལ་གྱོད་དོན་ཐོ་འགོད་བྱས་ཏེ་ཞིབ་བཤེར་དང་བརྟག་དཔྱད་བྱས་ཤིང་། བརྟག་དཔྱད་བྱས་པ་བརྒྱུད། དབང་ཧྲན་ཆོན་ཏང་ཡོན་འགོ་ཁྲིད་ལས་བྱེད་པ་ཞིག་ཡིན་པའི་ངོས་ནས། ཕུགས་བསམ་དང་དད་སེམས་རྦད་དེ་ཉམས་པ་དང་། ཐོག་མའི་བསམ་འདུན་དང་འགན་འཁྲི་རྒྱབ་ཏུ་སྐྱུར་བ། ཏང་གཤིས་ཀྱི་བློ་སྦྱོང་སྤུ་ཙམ་ཡང་མེད་པ། སྲིད་དོན་ལས་རྗེས་ཀྱི་ལྟ་བ་འཛོལ་བ། ཏང་ལ་དོ་དམ་དང་ཏང་བཅོས་སྐྱོང་གི་ཆབ་སྲིད་ཀྱི་འགན་འཁྲི་སྐྱུར་བ། ཏང་ལ་ལྷག་བསམ་རྣམ་དག་དང་གཞུང་དྲང་མི་བྱེད་པ། མ་རུང་ཁོག་བཅུག་གིས་རྩ་འཛུགས་ཀྱི་ཞིབ་བཤེར་ལ་འགྲན་རྒོལ་བཅས་བྱས་པ་དང་། སྐྱིད་པོ་བྱ་རྒྱུར་ཞེན་ཆགས་ཏེ་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་སྣང་མེད་དུ་བཏང་ནས། སྒྲིག་འགལ་ངང་ལག་རྟགས་བླངས་པ་དང་སྒེར་གཉེར་ཁེ་ལས་བདག་པོའི་ཡུལ་སྐོར་བྱེད་སྒོའི་བཀོད་སྒྲིག་དང“བུ་རྫི་རྣམ་པའི”ཞབས་ཞུ་དང་ལེན་བྱས་པ། རྩ་འཛུགས་ཀྱི་འདུ་ཤེས་ཞན་པ་དང་མི་སྒེར་གྱི་འབྲེལ་ཡོད་དོན་གནད་གསང་ནས་མི་ཞུ་བ། སྤྱོད་གཙང་གི་མཐའ་ཚད་མ་བསྲུངས་བར་གཞན་ལ་རོགས་རམ་བྱས་ཏེ་རྒྱུ་དངོས་བླངས་པ། སྒྲིག་ཁྲིམས་དང་བཅའ་ཁྲིམས་ཀྱི་འདུ་ཤེས་སྤུ་ཙམ་ཡང་མེད་པར་སྤྱི་དོན་དབང་ཆ་སྒེར་ཕན་གཉེར་བྱེད་ཀྱི་ལག་ཆར་བརྩིས་ནས་རྒྱུ་དབང་བརྗེ་ཚོང་ཤུགས་ཆེན་བྱེད་པ་དང་། ལས་གནས་ཀྱི་སྟབས་བདེར་བརྟེན་ནས་ལས་གྲྭ་སྒྲུབ་འགན་ལེན་པ་སོགས་ཀྱི་ཐད་མི་གཞན་ལ་ཁེ་ཕན་སྐྲུན་པ་མ་ཟད། ཁྲིམས་འགལ་གྱི་རྒྱུ་ནོར་འབོར་ཆེན་བླངས་ཡོད་པ་རེད།

དབང་ཧྲན་ཆོན་གྱིས་ཏང་གི་ཆབ་སྲིད་ཀྱི་སྒྲིག་ཁྲིམས་དང་། རྩ་འཛུགས་ཀྱི་སྒྲིག་ཁྲིམས། སྤྱོད་གཙང་གི་སྒྲིག་ཁྲིམས་བཅས་ལས་ཚབས་ཆེན་འགལ་ནས། ལས་གནས་ཁྲིམས་འགལ་ཚབས་ཆེན་དང་ལྐོག་རྔན་ལེན་པའི་ཉེས་པ་བསགས་པའི་དོགས་གཞི་ཡོད་ལ། ཏང་གི་ཚོགས་ཆེན་བཅོ་བརྒྱད་པའི་རྗེས་སུའང་སྡུག་ཚོད་མི་ཟིན་པ་དང་སྡུག་ལས་མི་བསྐུམས་པར་ངོ་བོ་ཚབས་ལྕི་ལ་ཤུགས་རྐྱེན་ངན་པ་བཟོས་ཡོད་སྟབས། ཆད་པ་ནན་པོ་གཅོད་དགོས་ཀྱི་ཡོད། 《ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》དང་།《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལྟ་ཞིབ་བཅའ་ཁྲིམས》《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གཞུང་ལས་པའི་སྲིད་དོན་ཆད་གཅོད་བཅའ་ཁྲིམས》སོགས་ཀྱི་འབྲེལ་ཡོད་གཏན་འབེབས་གཞིར་བཟུང་། ཀྲུང་གུང་མཚོ་སྔོན་ཞིང་ཆེན་སྒྲིག་ཨུད་ཀྱི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་ཐོག་ཞིབ་འཇུག་བྱས་པ་དང་འབྲེལ་ཀྲུང་གུང་མཚོ་སྔོན་ཞིང་ཨུད་ལ་ཆོག་མཆན་སྤྲོད་རྒྱུར་བསྐྱལ་བ་བརྒྱུད། དབང་ཧྲན་ཆོན་ཏང་གི་སྐྱིད་སྡུག་ནས་འབུད་རྒྱུའི་ཆད་པ་དང་། མཚོ་སྔོན་ཞིང་ཆེན་ལྟ་ཞིབ་ཨུ་ལྷན་གྱིས་ཁོ་པ་གཞུང་ཞབས་ནས་ཕྱིར་འབུད་བྱེད་པའི་ཆད་པ་བཅད་པ་མ་ཟད། དེའི་སྒྲིག་འགལ་ཁྲིམས་འགལ་ལས་བྱུང་བ་དག་གཞུང་བཞེས་བཏང་ལ། དེའི་ཉེས་གསོག་དོགས་ཡོད་གནད་དོན་ཞིབ་དཔྱོད་ལས་ཁུངས་སུ་ཁྲིམས་ལྟར་ཞིབ་བཤེར་ཞུ་གཏུག་རྒྱག་རྒྱུར་རྩིས་སྤྲོད་པ་དང་། དེ་འབྲེལ་གྱི་རྒྱུ་དངོས་མཉམ་དུ་རྩིས་སྤྲོད་རྒྱུ་རེད།