2024ལོའི་ཀྲུང་གོའི་དཔལ་འབྱོར་དང་སྤྱི་ཚོགས་གླེང་སྟེགས་ཧྲང་ཧའེ་རུ་འཚོགས་པ།
ཤིན་ཧྭ་གསར་འགྱུར་ཁང་ཧྲང་ཧའེ་ནས་གློག་འཕྲིན་འབྱོར་གསལ། ཉེ་ཆར། 2024ལོའི་ཀྲུང་གོའི་དཔལ་འབྱོར་དང་སྤྱི་ཚོགས་གླེང་སྟེགས་ཧྲང་ཧའེ་རུ་འཚོགས་ཤིང་། རྒྱལ་ཁབ་ཕྱི་ནང་གི་སྐུ་མགྲོན་140ལྷག་ཙམ་གྱིས“མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་བ་དང་། ཕན་ཚུན་ལག་གདང་སྦྲེལ་ནས་འཛམ་གླིང་གི་དེང་རབས་ཅན་གཏོད་རྒྱུར”དམིགས་ནས་སྤེལ་རེས་གཏིང་ཟབ་བྱས་པ་རེད། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་དྲུང་ཆེ་གཅིག་ལྕོགས་ཀྲུང་གོའི་དཔལ་འབྱོར་དང་སྤྱི་ཚོགས་ལས་འཛིན་ལྷན་ཚོགས་ཀྱི་ཀྲུའུ་ཞི་ཝང་ཏུང་ཧྥུང་ཚོགས་འདུར་ཕེབས་པ་དང་འབྲེལ་གཙོ་དོན་གཏམ་བཤད་ཀྱང་གནང་བ་རེད།
ཝང་ཏུང་ཧྥུང་གིས་བསྟན་དོན། ཀྲུའུ་ཞི་ཞི་ཅིན་ཕིང་གིས“ལས་དབང་གཅིག་མཐུན་ཚོགས་པ་འཛུགས་རྒྱུ་ནི་མིའི་རིགས་ཀྱི་ཐུན་མོང་ཕུགས་འདུན་ཡིན་པ་དང་། དེང་རབས་ཅན་ནི་ཕུགས་འདུན་དང་དངོས་ཡོད་སྦྲེལ་མཐུད་བྱེད་པའི་ལྡོག་མེད་ཀྱི་ལམ་བུ་ཡིན”ཞེས་བསྟན་ཡོད། ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱལ་ཁབ་ཁག་ཐུན་མོང་ཐོག་འཕེལ་རྒྱས་འགྲོ་བར་གོ་སྐབས་དེ་བས་མང་པོ་བཏོད་ཡོད། ཀྲུང་གོས་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཚུད་པའི་རྒྱལ་ཁབ་ཁག་དང་མཉམ་དུ་ཞི་བདེ་འཕེལ་རྒྱས་དང་། གཉིས་ཕན་མཉམ་ལས། ཐུན་མོང་དར་རྒྱས་བཅས་ཀྱི་འཛམ་གླིང་དེང་རབས་ཅན་མངོན་འགྱུར་ཡོང་བར་སྐུལ་འདེད་བཏང་ནས། རྒྱལ་ཁབ་ཚང་མ་གོ་ལ་ཧྲིལ་པོའི་འཕེལ་རྒྱས་ནང་ཞུགས་མཁན་དང་། ལེགས་སྐྱེས་འབུལ་མཁན། ཕན་པ་ཐོབ་མཁན་བཅས་སུ་འགྱུར་བར་བྱེད་འདོད་ཡོད། ཀྲུང་གོའི་དཔལ་འབྱོར་དང་སྤྱི་ཚོགས་ལས་འཛིན་ལྷན་ཚོགས་ཀྱིས་སྤྱི་པའི་ཕྱི་འབྲེལ་དང་། དམངས་ཁྲོད་ཕྱི་འབྲེལ། ཇུས་འདོན་ཚོགས་པའི་ཕྱི་འབྲེལ་བཅས་ཐད་ཀྱི་ནུས་པ་སྔར་བས་འདོན་སྤེལ་བྱས་ཐོག་རྒྱལ་ཁབ་ཁག་དང་ལས་རིགས་ཁག་གི་གྲོགས་པོ་དང་སྤེལ་རེས་མཉམ་ལས་བྱེད་ཤུགས་ཆེ་རུ་བཏང་ནས་ཕན་ཚུན་ལག་གདང་སྦྲེལ་ཏེ་འཛམ་གླིང་གི་དེང་རབས་ཅན་འཛུགས་སྐྲུན་བྱ་ཆེད་ལེགས་སྐྱེས་འབུལ་རྒྱུ་ཡིན།