འདི་ནི་ཧུའུ་པེའི་ལྗང་མདོག་རིག་ནུས་གྲུ་གཟིངས་བཟོ་སྐྲུན་ལས་རིགས་གསར་གཏོད་ལྟེ་གནས་ཀྱིས་ཞིབ་བཟོ་བྱས་པའི་གློག་སྒུལ་སྤྲོ་གསེང་གྲུ་གཟིངས་ཡིན་པ།

ཚོད་ལྟ་བྱེད་བཞིན་པའི་གློག་སྒུལ་ཚོད་ལྟའི་གྲུ་གཟིངས་ཨ་མ་གསར་རྐྱང་དེ་སྤྱོད་འགོ་ཚུགས་རྗེས་གློག་སྒུལ་སྤྲོ་གསེང་གྲུ་གཟིངས་སོགས་ནུས་རྒྱུ་གསར་པའི་ཚད་ལྡན་ཅན་གྱི་གྲུ་གཟིངས་གསར་སྤེལ་ཐད་སྤྱོད་རྒྱུ་དང་དེས་རང་རྒྱལ་གྱི་ནང་ཁོངས་ཆུ་ཐོག་དབོར་འདྲེན་ལས་རིགས་དང་གྲུ་གཟིངས་བཟོ་ལས་ཀྱི་ལྗང་མདོག་ཅན་དང་རིག་ནུས་ཅན་གྱི་ཕྱོགས་སྒྱུར་ལ་སྐུལ་འདེད་ཐེབས་རྒྱུ་རེད། ཚོད་ལྟའི་གྲུ་གཟིངས་ཨ་མ་དུས་ཡུན་ཐུང་ངུའི་ནང་བཟོ་ཐུབ་པ་དེ་ཐོན་ལས་འཁོར་འབྲེལ་དང་གསར་གཏོད་འཁོར་འབྲེལ་ཐད་ཚན་པ་མང་པོས་ཤུགས་སྒྲིལ་རོགས་ལས་བྱས་པ་ལས་བྱུང་བ་ཞིག་རེད། “ང་ཚོས་ཚེ་སྲོག་གི་དུས་འཁོར་ཧྲིལ་པོར་ཞབས་འདེགས་ཞུ་བ་དང་ཐོན་ལས་འཁོར་འབྲེལ་གྱི་གོང་འོག་ཁེ་ལས་དེ་བས་མང་བ་སྦྲེལ་མཐུད་ངང་མཉམ་ལས་བྱས་ཏེ་ཚན་རྩལ་གྲུབ་འབྲས་གཞན་སྒྱུར་ལ་སྐུལ་འདེད་གཏོང་གི་ཡོད”ཅེས་ཝུའུ་ཧན་ཐོན་ལས་གསར་གཏོད་འཕེལ་རྒྱས་ཞིབ་འཇུག་ཁང་ཐོན་ལས་མཉམ་ལས་པུའི་པུའུ་ཀྲང་གཞོན་པ་ཝང་ཤིན་ཧྥུང་གིས་བརྗོད།

ཉེ་བའི་ལོ་ཤས་རིང་ནུས་རྒྱུ་གསར་པའི་གྲུ་གཟིངས་རྒྱུན་མཐུད་འཕེལ་རྒྱས་འགྲོ་བཞིན་ཡོད་པ་དེས་གྲུ་གཟིངས་སྒྲིག་ཆས་ཞིབ་སྤེལ་ཐད་བླང་བྱ་དེ་བས་མཐོ་བ་བཏོན་ཡོད། “ཁྲོམ་རའི་དགོས་མཁོར་མགྱོགས་མྱུར་འགྱུར་ལྡོག་འགྲོ་བ་དང་ལག་རྩལ་ཞིབ་སྤེལ་ཐད‘གནས’ཀྱི་ཚད་བརྒལ་ནས‘འཁོར་འབྲེལ’གྱི་ཚད་བརྒལ་བར་གཅིག་སྡུད་བྱེད་དགོས”ཧུའུ་པེའི་ལྗང་མདོག་རིག་ནུས་གྲུ་གཟིངས་བཟོ་སྐྲུན་ལས་རིགས་གསར་གཏོད་ལྟེ་གནས་ཀྱི་ཀྲུའུ་རེན་ཀྲོའུ་ལིང་ཧུའེ་ཡིས་ཚན་པའམ་ཡང་ན་ཁེ་ལས་གཅིག་ཁོ་ནར་བརྟེན་ཚེ་སྤྱི་ཡོངས་ཚད་བརྒལ་ཡོང་ཐབས་བྲལ་བ་ཞིག་རེད་ཅེས་བརྗོད།

དཀའ་གནད་ཇི་ལྟར་སེལ་དགོས་སམ།

2022ལོར་ཀྲོའུ་ལིང་ཧུའེ་སྡོད་སའི་ཀྲུང་གོ་གྲུ་གཟིངས་ཚོགས་པ་ཨང་བདུན་གཅིག་གཉིས་ཞིབ་འཇུག་སུའོ་ཡིས་གྲུ་གཟིངས་ཐོན་ལས་འཁོར་འབྲེལ་གྱི“རོགས་ཟླ་ཆུང་ཆུང”མང་པོ་ཞིག་བཙལ་ནས་གསར་གཏོད་ལྟེ་གནས་བཙུགས་པ་སྟེ། ཝུའུ་ཧན་རང་བྱུང་རིག་པ་དང་བཟོ་སྐྲུན་རིག་པའི་སློབ་ཆེན་དང་། ཝུའུ་ཧན་ནན་ཧྭ་བཟོ་ལས་སྒྲིག་ཆས་ལས་གྲྭ་མ་རྐང་ཚད་ཡོད་ཀུང་སི། ཞན་ཉིང་ཧའེ་ཝུའེ་འདྲེས་སྦྱོར་རྒྱུ་ཆའི་བཟོས་རྫས་ཚད་ཡོད་ཀུང་སི། ཧུའུ་པེ་གྲུ་ཁ་ཚོགས་པ་ཚད་ཡོད་ཀུང་སི་བཅས་རེད།

མི་རིང་བར། ཝུའུ་ཧན་ཐོན་ལས་གསར་གཏོད་འཕེལ་རྒྱས་ཞིབ་འཇུག་ཁང་ཡང་གསར་གཏོད་ལྟེ་གནས་སུ་ཞུགས་ཤིང་། “ཞིབ་སྤེལ་གྱི་སྒྲིག་གཞི་གསར་པ་ཞིག་ཡིན་པའི་ངོས་ནས་ང་ཚོའི་ནུས་པ་ནི‘མཐུན་རྐྱེན་བསྐྲུན་རྒྱུ’དེ་ཡིན་ལ་རང་ངོས་ཀྱི་ལས་སྟེགས་ཐོན་ཁུངས་སྤྱད་དེ་ཚན་རྩལ་གྲུབ་འབྲས་གཞན་སྒྱུར་ཐད་མ་དངུལ་དང་། ཤེས་ལྡན་པ། ལག་རྩལ་སོགས་གསར་གཏོད་གཙོ་རྒྱུ་དེ་བས་མང་བ་ནང་འདྲེན་བྱ་རྒྱུ་དེ་ཡིན”ཞེས་ཝང་ཤིན་ཧྥུང་གིས་ངོ་སྤྲོད་བྱས་པ་རེད།

རྩེར་སོན་ཤེས་ལྡན་པས་འཁྲི་འགན་རང་འཁུར་བྱས་ཤིང་། འོན་ཀྱང་བྱེད་པོའི་མཉམ་ལས་མང་པོ་ཞིག་རྒྱུན་མཐུད་དང་བརྟན་པོའི་ངང་འཕེལ་རྒྱས་འགྲོ་དགོས་ན་ངེས་པར་དུ་མཐུན་སྦྱོར་ལམ་སྲོལ་བཟང་པོ་ཞིག་ལྡན་དགོས།

སྔོན་ཆད‘ཚལ་མངགས་མཁན་གྱིས་ཚལ་མི་ཟ་བ་དང་། ཁ་ལག་ཟ་མཁན་གྱིས་རིན་མི་སྤྲོད་པ’ཞེས་པའི་སྐད་ཆ་ཚིག་ཅིག་ཡོད་པ་དེ་ནི་ཐོན་སློབ་ཞིབ་གསུམ་ཐ་དད་དུ་གྱུར་པའི་སྣང་ཚུལ་ཞིག་རེད། སློབ་ཁྲིད་དང་། དཔྱད་རྩོམ། གསར་གཏོད་བཅས་ཚང་མ་སོ་སོར་གཏོགས་ཡོད”ཝུའུ་ཧན་ཐོན་ལས་གསར་གཏོད་འཕེལ་རྒྱས་ཞིབ་འཇུག་ཁང་གི་ཡོའན་ཀྲང་ལི་ཤིས་ལིང་གིས་ཁེར་རྐྱང་ལས་སྒྲུབ་ནས་མཉམ་སྤྱོད་གཉིས་ཕན་བར་མཐུན་སྦྱོར་གསར་གཏོད་ཀྱི་ལམ་སྲོལ་བཙུགས་ཡོད། ད་ཆ་ཚན་ཞིབ་སྒྲིག་གཞི་དང་ཁེ་ལས་ཆེ་འབྲིང་ཆུང་གསུམ་གྱིས་རང་ཐག་རང་གཅོད་མི་བྱེད་པར་གཙོ་གནད་ཐོན་ལས་གསར་གཏོད་སྦྲེལ་ཐག་ཏུ་བྱས་ནས་འབྲེལ་མཐུད་དམ་ཟབ་བྱེད་ཀྱི་ཡོད་ཅེས་བརྗོད།

ད་ལྟ་ཚོད་ལྟ་བྱེད་བཞིན་པའི་གློག་སྒུལ་ཚོད་ལྟའི་གྲུ་གཟིངས་ཨ་མ་མི་རིང་བར་རྩིས་སྤྲོད་བེད་སྤྱོད་བྱ་རྒྱུ་ཡིན་ཞིང་། “འབྱུང་འགྱུར་ང་ཚོས་མཐུན་སྦྱོར་གསར་གཏོད་ལམ་སྲོལ་སྔར་བས་གཏིང་ཟབ་ཏུ་བཏང་སྟེ་གསར་གཏོད་འཁོར་འབྲེལ་དང་། ཐོན་ལས་འཁོར་འབྲེལ། མ་དངུལ་འཁོར་འབྲེལ། ཤེས་ལྡན་པ་འཁོར་འབྲེལ་བཅས་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་བ་དང་ལྗང་མདོག་རིག་ནུས་གྲུ་གཟིངས་བཟོ་སྐྲུན་ཐོན་ལས་ལ་ཚད་བརྒལ་རང་བཞིན་གྱི་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ་ཡིན”ཞེས་ཀྲོའུ་ལིང་ཧུའེ་ཡིས་ཡིད་ཆེས་ཀྱིས་ཁེངས་བཞིན་དེ་ལྟར་བརྗོད།