འདི་ནི་རྨ་རོ་གྲོང་ཚོའི་ཐོན་ལས་ཀྱི་ཁེ་སྤོགས་བགོ་འགྲེམས་རྒྱག་པ་དང་གླ་ཕོགས་སྤྲོད་པའི་མཛད་སྒོ་འཚོག་ཡུལ་ཡིན་པ།

འདི་ནི་རྨ་རོ་གྲོང་ཚོར་ཡུལ་སྐོར་བས་ཕྱུར་བ་བཟོ་སྟངས་ལ་ལྟ་བཞིན་པ།

ས་བབ་མཐོ་ཚད་སྨི་4608ཡོད་པའི་ཆུ་གསུམ་རྫོང་ཆུ་མདོ་རྒྱང་ཤང་རྨ་རོ་གྲོང་ཚོ་ནི་འབྲོག་ལས་རྐྱང་པའི་སྲིད་འཛིན་གྲོང་ཚོ་ཞིག་རེད།

ཉེ་བའི་ལོ་ཤས་རིང་། རྨ་རོ་གྲོང་ཚོའི་ཏང་ཀྲི་པུས་ཏང་འཛུགས་སྐྱོང་གིས་སྣེ་ཁྲིད་བྱ་རྒྱུ་མཐའ་འཁྱོངས་བྱས་ཐོག རྒྱལ་ཁབ་ཀྱི་མ་དངུལ་སྒོར་ཁྲི་1500བརྩོན་ལེན་ཧུར་ཐག་བྱས་ནས་ཁྱད་ལྡན་ཐོན་ལས་འཕེལ་རྒྱས་བཏང་བ་རེད། 2022ལོར་ལུག་དུས་ཐུང་རྒྱགས་གསོའི་རྟེན་གཞིའི་རྣམ་གྲངས་ལག་བསྟར་བྱས་ཚུན། རྨ་རོ་གྲོང་ཚོར་གྲོང་ཚོའི་མཉམ་སྡེབ་ཀྱིས་སྣེ་ཁྲིད་བྱེད་པ་དང་། ཐོན་ལས་རྟེན་གཞིས་དཔེ་སྟོན་བྱེད་པ། མང་ཚོགས་མ་རྐང་ནང་ཞུགས་པ། མཉམ་ལས་ཁང་གིས་གཉེར་སྐྱོང་བྱེད་པ་བཅས་ཀྱི་གསོ་ཚགས་ལས་དོན་གྱི་རྣམ་པ་གསར་པ་ཞིག་རིམ་བཞིན་ཆགས་ནས། ཐོན་ལས་བརྟན་པོ་དང་མང་ཚོགས་ལ་འབབ་འཕར་ཡོང་བའི་ཕྱུག་འགྱུར་ལམ་བུ་ཞིག་བཏོད་ཡོད་པ་རེད།

ཏང་འཛུགས་སྐྱོང་གིས་སྣེ་ཁྲིད་བྱས་པས།

མཉམ་སྡེབ་དཔལ་འབྱོར་འཕེལ་རྒྱས་དང་མང་ཚོགས་ལ་འབབ་འཕར་ཡོང་བའི“མཐོར་གཏོང་གཉིས”མངོན་འགྱུར་བྱུང་བ།

ཉེ་བའི་ལོ་ཤས་རིང་། རྨ་རོ་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གིས་གྲོང་གསེབ་དར་རྒྱས་ལ་སྐུལ་འདེད་གཏོང་བའི་དཀའ་ཚེགས་ཆེ་བའི་ལས་འགན་ལ་དམིགས་ནས། གོང་རིམ་ཏང་ཨུད་དང་སྲིད་གཞུང་གི་རྒྱབ་སྐྱོར་དང་ཁྲིད་སྟོན་འོག་ལུག་དུས་ཐུང་རྒྱགས་གསོའི་རྟེན་གཞིའི་རྣམ་གྲངས་ལག་བསྟར་ཤུགས་ཆེན་བྱས་ཏེ། ཞིང་འབྲོག་མང་ཚོགས་ལས་ཞུགས་འབབ་འཕར་གྱི་ཐབས་ལམ་རྒྱ་ཆེར་གཏོང་བར་འཚོལ་ཞིབ་ཧུར་ཐག་བྱས་པ་རེད།

རྨ་རོ་གྲོང་ཚོས“མང་རུབ་དངུལ་བསྡུ”ཡི་རྣམ་པའི་ཐོག་ནས་གྲོང་མི་ཚོར་དངུལ་སྨར་དང་རྩྭ་ར་སོགས་མ་རྐང་ནང་འཇོག་རྒྱུའི་ལྕག་སྐུལ་བྱས་ཤིང་། གྲོང་ཚོ་ཡོངས་ཀྱི་དུད་ཚང་50ཡིས་དངུལ་སྨར་སྒོར་5000རེ་བཏོན་ནས་མ་རྐང་ནང་ཞུགས་པར་ཁྱོན་རྐང་དངུལ་སྒོར་ཁྲི་26གྲབས་གསོག་ཐུབ་པ་དང་། དངུལ་སྨར་བཏོན་ནས་མ་རྐང་ནང་ཞུགས་མཁན་ལ་རྐང་དངུལ་གྱི་20%ཡི་བསྡུར་ཚད་ལྟར་ལོ་མཇུག་ཏུ་ཁེ་སྤོགས་བགོ་བཤའ་རྒྱག་གི་ཡོད་པ་རེད། དེ་དང་ཆབས་ཅིག རྩྭ་ར་སྤྱོད་དབང་བརྒྱུད་བཤུག་བཏང་ཞིང་། གྲོང་ཚོ་ཡོངས་ཀྱི་མང་ཚོགས་235ཡིས་རྩྭ་ར་མུའུ་124.2རེ་མ་རྐང་ནང་བཞག་པར་གྲོང་ཚོའི་མཉམ་སྡེབ་ཀྱིས་ལོ་ལྟར་རྩྭ་ར་མུའུ་1རེར་ཁ་གསབ་སྒོར་3.62རེ་སྤྲད་དེ་རྣམ་གྲངས་གཉིས་ཁེ་གཉིས་ཕན་ཡོང་བར་རྨང་གཞི་བརྟན་པོ་བཏིང་བ་རེད།

རྣམ་གྲངས་ལག་བསྟར་བྱེད་རིང་། རྟེན་གཞིས་ཡུལ་དེ་གའི་མང་ཚོགས་ཀྱི་ལུག་ཉོས་ནས་གཅིག་གྱུར་ཐོག་གསོ་ཚགས་བྱས་ཏེ་ཁ་ཐོར་གསོ་ཚགས་ནས་ལེགས་བསྡུས་གསོ་ཚགས་ཕྱོགས་སུ་ཕྱོགས་སྒྱུར་བྱས་པ་དང་། 2024ལོ་ནས་བཟུང་། རྟེན་གཞི་དེའི་གསར་སྐྱེས་ལུ་གུ་གསོན་ཚད་93%ཟིན་པ་དང་། ལུག་1181(དུས་མཚུངས་ལས་490%འཕར་བ)བཙོངས་པར་ཡོང་འབབ་སྒོར་ཁྲི་93.3རག་ཡོད་པ་རེད། དེ་དང་ཆབས་ཅིག རྣམ་གྲངས་ཀྱི་སྐུལ་ཁྲིད་ནུས་པ་གང་ལེགས་བཏོན་ཏེ་མང་ཚོགས་ཀྱི་ཁྲོད་ནས་ལུག་རྫི་3ཆེད་མངགས་བསྡུས་པར་ལོ་རེར་ལས་ཀའི་ཡོང་འབབ་སྒོར་ཁྲི་19.44རག་གི་ཡོད་པ་རེད། སྐབས་འཕྲལ་ལས་མི་དང་ལུ་གུ་སྐྱེ་བསུ་བྱེད་མཁན་མི་ཐེངས་900ཙམ་བསྡུས་པས་མང་ཚོགས་ལ་སྒོ་རྩ་ནས་འབབ་འཕར་སྒོར་ཁྲི་17ལྷག་བྱུང་བ་རེད།

བྱེད་སྟངས་ལེགས་སུ་བཏང་བས།

སྤུས་རྟགས་དང་ཕྱིར་འཚོང་གཉིས་ཀར་སྐུལ་འདེད་ཐེབས་པ།

རྨ་རོ་གྲོང་ཚོས“སྐྱེ་ཁམས་ཁོར་ཡུག་སྲུང་སྐྱོང་དང་སྟབས་བདེ་ཁུ་བསྡུའི”འདུ་ཤེས་མཐའ་འཁྱོངས་བྱས་ནས“ཨེ·ཆུ་མདོ་རྒྱང”གི་སྤུས་རྟགས་བཏོད་པ་མ་ཟད། མཐོ་གྲང་གསོ་ཚགས་དང་། འབོལ་ལ་བྲོ་བ་ཆེ་བ། འཚོ་བཅུད་ཕུན་སུམ་ཚོཌ་པ་བཅས་ཀྱི་ལུག་ཤ་དང་། ཚགས་ཤ ཕྱུར་བ། མར་སོགས་མཐོ་གྲང་ཁྱད་ལྡན་འབྲོག་ལས་ཀྱི་ཞིང་འབྲོག་ཐོན་རྫས་དང་དེ་བཞིན“ཨེ·ཆུ་མདོ་རྒྱང”གི་སྤུས་ལེགས་ཕྱག་རྟགས་ཆ་སྒྲིག་མ་དང་། སྐྱེ་ཁམས་ཁོར་ཡུག་སྲུང་སྐྱོང་ཁུག་མ། མི་རིགས་ཀྱི་ཁྱད་ཆོས་ལྡན་པའི་སྒྲིལ་ཐུམ་ཐོན་རྫས་བཅས་བཏོན་ཏེ་གྲོང་གསེབ་ཀྱི་ཐོན་ལས་སྔར་བས་སྤུས་ཕན་ལེགས་གཉེར་ཡོང་བར་བྱས་ཡོད་པ་རེད།

རྨ་རོ་གྲོང་ཚོས་ཚད་གཞིའི་མ་ལག་འཐུས་སྒོ་ཚང་དུ་བཏང་ནས་འབྲོག་པའི་འཚོ་བའི་ཉམས་ལེན་ཁང་བཏོད་དེ་ཡུལ་སྐོར་བ་སྦྲ་གུར་ནང་བསྐྱོད་དུ་བཅུག་སྟེ་འོ་མ་བཞོ་བ་དང་། མར་དང་ཕྱུར་བ་འདོན་པ། རྡོ་སྒོར་རྒྱག་པ། སྒོར་གཞས་འཁྲབ་པ། འབྲོག་ཁུལ་གྱི་ཁྱད་ལྡན་ཞིམ་ཟས་ཀྱི་བྲོ་བ་མྱོང་བ་སོགས་དངོས་སུ་བྱེད་པའི་བྱེད་སྒོ་སྤེལ་བས་རིམ་རྩིས་བརྒྱབ་ན་ཡུལ་སྐོར་བ་300ལྷག་ཙམ་གྱི་ཡིད་དབང་བཀུག་པ་དང་མིག་སྔའི་བར་མང་ཚོགས་ལ་འབབ་འཕར་སྒོར་ཁྲི་10ཙམ་བྱུང་བ་རེད། དུས་མཚུངས་ཡར་ཀླུང་རིག་གནས་ཡུལ་སྐོར་དུས་ཆེན་དང་ཆུ་མདོ་རྒྱང་ཤང་གི་འབྲོག་པའི་རིག་གནས་དུས་ཆེན་སོགས་ལས་སྟེགས་དང་གཞི་རྟེན་ལ་བརྟེན་ནས། ཁྱད་ལྡན་ཞིང་འབྲོག་ཐོན་རྫས་འགྲེམས་ཚོང་བྱེད་སྒོ་སྤེལ་ཞིང་། མིག་སྔའི་བར་ཕྱིར་ཚོང་ཡོང་འབབ་སྒོར་ཁྲི་6ལྷག་ཙམ་ཟིན་ཡོད་པ་རེད།

ཚོགས་སྒྲིག་འཕེལ་རྒྱས་བཏང་བས།

གྲོང་ཚོ་ཚང་མ་མཉམ་འབྲེལ་ཐུབ་ནས་ཀུན་ལ་ཁེ་འབབ་རག་པ།

གྲོང་གསེབ་དར་རྒྱས་གཏོང་བའི་འགག་རྩ་ནི་མི་དང་ལས་དོན་སྒྲུབ་རྒྱུར་ཐུག་ཡོད། རྨ་རོ་གྲོང་ཚོས་ལུག་དུས་ཐུང་རྒྱགས་གསོའི་ལས་དོན་རྒྱུན་མཐུད་སྤེལ་བ་དང་དུས་མཚུངས། དཔེ་སྟོན་སྣེ་ཁྲིད་དང་བབ་བསྟུན་འཕྲལ་སྒྲུབ་མཐའ་འཁྱོངས་ཀྱིས་ཆུ་མདོ་རྒྱང་ཤང་གི་ཐོན་ལས་འཕེལ་རྒྱས་འཆར་འགོད་དང་ཟུང་འབྲེལ་གྱིས་གཅིག་གྱུར་བཀོད་སྒྲིག་བྱས་པ་དང་། གྲོང་གསེབ་ཀྱི་ཐོན་ལས་གསར་པ་དང་ལས་རྣམ་གསར་པ་སྐྱེད་སྲིང་བྱས་ནས་མང་ཚོགས་ལ་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་དེ་བས་མང་བ་ཡོང་བར་བྱས་ཡོད།

ཆུ་མདོ་རྒྱང་ཤང་གིས“གྲོང་སྒྲོལ་མཉམ་སྐྲུན”གྱི་ཏང་འཛུགས་སྐྱོང་བྱེད་སྟངས་འཚོལ་ཞིབ་ཀྱི་ཁྲིད་སྟོན་ཧུར་ཐག་འོག་ཏང་ཀྲི་པུའུ་དང་ཀུང་སི་ཟུང་འབྲེལ་བྱེད་པའི་དོ་དམ་བྱེད་སྟངས་གཞིར་བཟུང་། ཤང་ཡོངས་ཀྱིས་རྨ་རོ་གྲོང་ཚོ་ཚུད་པའི་གྲོང་ཚོ་ཁག་གི་མཉམ་སྡེབ་དཔལ་འབྱོར་གྱི་མ་དངུལ་སྒོར་ཁྲི་30ལྷག་ཙམ་བསྡུ་སྒྲིལ་བྱས་ནས་2022ལོ་ཚུན་དུ་ཁྲུས་ཁང་དང་གོས་ཁྲུས་ཁང་གཉིས་གསར་དུ་བཙུགས་པ་དང་། ས་གནས་དེ་གས་ཆུ་མདོ་རྒྱང་ཤང་དང་དེ་བཞིན་སྟོད་གཟིགས་ཤང་གི་གྲོང་ཚོ་ཁག་གི་2024ལོའི་རྨང་བརྟན་དམངས་ཕན་མ་དངུལ་སྒོར་ཁྲི་111.32བསྡུ་སྒྲིལ་བྱས་ནས་ཆུ་ཟོམ་གྱི་ཆུའི་རྣམ་གྲངས་ལག་བསྟར་བྱས་པ་དང་ཁྲོམ་རའི་གཏན་འཇགས་ཀྱི་དགོས་མཁོ་དང་ཟུང་འབྲེལ་བྱས་རྗེས། སྔོན་དཔག་བྱས་ན། ལོ་ལྟར་ཡོང་འབབ་ཁེ་གཙང་སྒོར་ཁྲི་50བྱུང་ནས་གྲོང་ཚོ་ཁག་གི་མང་ཚོགས་ལ་རྒྱུན་མཐུད་ཡོང་འབབ་ཡོང་རྒྱུར་འདེགས་སྐྱོར་བྱས་ཡོད་པ་རེད།