ཉེ་ཆར། སྣ་དཀར་རྩེ་རྫོང་མི་དམངས་ཞིབ་དཔྱོད་ཁང་གིས་རྫོང་བཟོ་ཚོང་ལས་རིགས་མཉམ་འབྲེལ་ལྷན་ཚོགས་སུ་བཙུགས་པའི“ཞིབ་དཔྱོད་ཀྱིས་ཁེ་ལས་ལ་སྲུང་སྐྱོང་བྱེད་པའི་འབྲེལ་གཏུག་ས་ཚིགས”ཀྱི་སྒོ་བྱང་གི་ཡོལ་ཁེབས་དངོས་སུ་ཕྱེ་བ་རེད།

“ཞིབ་དཔྱོད་ཀྱིས་ཁེ་ལས་ལ་སྲུང་སྐྱོང་བྱེད་པའི”ཆེད་དོན་བྱ་སྤྱོད་ནི་ཞིབ་དཔྱོད་ལས་ཁུངས་ཀྱིས་དམངས་གཉེར་དཔལ་འབྱོར་ལ་ཞབས་འདེགས་ཞུ་བའི་གཞི་རྟེན་གལ་ཆེན་ཞིག་རེད། འབྲེལ་གཏུག་ས་ཚིགས་དེ་འཛུགས་པའི་དམིགས་ཡུལ་ནི་སྡེ་ཚན་མཉམ་འགུལ་དང་ཁུར་མཉམ་ལེན་དང་དོན་སྤྱི་སྒྲུབ་ཀྱི་ལས་ཀའི་རྣམ་པ་བཏོད་དེ། ཞིབ་དཔྱོད་ཀྱི་འགན་སྒྲུབ་ཞབས་ཞུར་བརྟེན་ནས་དམངས་གཉེར་དཔལ་འབྱོར་འཕེལ་རྒྱས་ལ་འགན་ལེན་བྱེད་པའི་ཐབས་ལམ་གསར་པ་དང་བྱེད་སྟངས་གསར་པ་འཚོལ་ཞིབ་བྱ་རྒྱུ་དེ་ཡིན་ཞིང་། དེས་ཐོན་སྐྱེད་གཉེར་སྐྱོང་བྱེད་རིང་ཁེ་ལས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་ཧུར་ཐག་བྱས་ནས་ཞིབ་དཔྱོད་ལས་ཁུངས་ཀྱིས་དམངས་གཉེར་ཁེ་ལས་ལ་ཞབས་འདེགས་ཞུ་བའི“མཐའ་མའི་འགག་གནད”སེལ་རྒྱུ་རེད།

སྣ་དཀར་རྩེ་རྫོང་མི་དམངས་ཞིབ་དཔྱོད་ཁང་གིས་དོན་དངོས་ལ་གཞི་ཚུགས་ཏེ་བཟོ་ཚོང་ལས་རིགས་མཉམ་འབྲེལ་ལྷན་ཚོགས་དང་མཉམ་ལས་མཉམ་འགུལ་བྱེད་ཤུགས་ཆེ་རུ་གཏོང་བ་དང་། དམངས་གཉེར་ཁེ་ལས་དང་འབྲེལ་གཏུག་དམ་ཟབ་བྱེད་པ། ཁེ་ལས་ཀྱི་བཅའ་ཁྲིམས་རེ་ཞུ་ཉན་པ། བཅའ་ཁྲིམས་ཀྱི་ཞབས་འདེགས་ཡག་པོ་ཞུ་བ། དམངས་གཉེར་ཁེ་ལས་ཀྱི་སེམས་ཁྲལ་དང་དཀའ་ངལ་སེལ་བ། ཁྲིམས་སྐྱོང་ཅན་གྱི་ཚོང་གཉེར་ཁོར་ཡུག་སྐྲུན་པར་སྐུལ་འདེད་གཏོང་བ། “ཞིབ་དཔྱོད་ཀྱིས་ཁེ་ལས་ལ་སྲུང་སྐྱོང་བྱེད་པའི”ཆེད་དོན་བྱ་སྤྱོད་ལ་ཁེ་ལས་རང་འགུལ་ངང་ཞུགས་པ་བཅས་བྱས་ནས། ཁེ་ལས་སྲུང་སྐྱོང་གི་བྱ་ཐབས་ཁག་དོན་ཐོག་ཏུ་འཁྱོལ་བར་ཐུན་མོང་ཐོག་སྐུལ་འདེད་བཏང་བ་རེད།

སྣ་དཀར་རྩེ་རྫོང་མི་དམངས་ཞིབ་དཔྱོད་ཁང་གི་ཏང་ཙུའི་ཧྲུའུ་ཅི་གཞོན་པ་དང་ཅན་ཁྲ་ཀྲང་གཞོན་པ་སངས་རྒྱས་ཀྱིས“ཞིབ་དཔྱོད་ཀྱིས་ཁེ་ལས་ལ་སྲུང་སྐྱོང་བྱེད་པའི་འབྲེལ་གཏུག་ས་ཚིཌ”བཙུཌ་པ་ནི“ཞིབ་དཔྱོད་ཁང་དང་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཟུང་དུ་འབྲེལ་བའི”མཉམ་ལས་ཀྱི་གསར་གཏོད་གྲུབ་འབྲས་ཤིག་ཡིན་ལ། ཁྲིམས་སྐྱོང་ཅན་གྱི་ཚོང་གཉེར་ཁོར་ཡུག་གཏོད་པའི་གསོན་ཉམས་དོད་པའི་ལག་ལེན་ཞིག་ཀྱང་རེད། ཕྱོགས་གཉིས་པོའི་ཐུན་མོང་འབད་བརྩོན་འོག སྣ་དཀར་རྩེ་རྫོང་གི་དམངས་གཉེར་ཁེ་ལས་ཀྱི་འཕེལ་རྒྱས་ཁོར་ཡུག་དེ་བས་ལེགས་སུ་ཕྱིན་ནས། ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གསོན་ཤུགས་གསར་པ་སྣོན་རྒྱུ་རེད་ཅེས་བརྗོད་པ་རེད།