འདི་ནི་ཉིན་མོའི་ལྟ་རྟོག་ཁང་དུ་ངལ་གསོ་བཞིན་པའི་རྒན་རྒོན་ཡིན་པ།

ཞོགས་པ་སྔ་པོར། གཞིས་རྩེ་གྲོང་ཁྱེར་ཁང་དམར་རྫོང་ཉིང་རུ་སྨད་ཤང་རྣ་སྟོད་གྲོང་ཚོའི་ལོ་71ལ་སླེབས་པའི་རྒད་པོ་ཕན་ཐོགས་ཀྱིས་རང་ཉིད་ཀྱི་ལོ་གཉིས་ལ་སླེབས་པའི་ཚ་བོ་ཁྲིད་དེ་ཁྱིམ་ནས་ཐོན། ལམ་བར་དུ་རྒན་འཁོགས་མང་པོས་ཕྲུ་གུ་ཁྲིད་ནས་མ་གྲོས་གཅིག་མཐུན་ངང་ཁ་ཕྱོགས་གཅིག་ལ་སྐྱོད་བཞིན་པ་དང་ཐུག

“དེ་རིང་གཟའ་པ་སངས་ཡིན་པས། གྲོང་ཚོའི་ཉིན་མོའི་ལྟ་རྟོག་ཁང་གི་གཅིག་སྡུད་སྒོ་དབྱེའི་དུས་ཚོད་རེད”ཅེས་ཕན་ཐོགས་ཀྱིས་འཛུམ་དམུལ་དམུལ་ངང་གསར་འགོད་པར་བཤད།

གསར་འགོད་པ་རྣ་སྟོད་གྲོང་ཚོའི་ཉིན་མོའི་ལྟ་རྟོག་ཁང་དུ་འཛུལ་འཕྲལ་དྲོ་སོབ་སོབ་ཀྱི་ཚོར་སྣང་ཞིག་སྦྱིན་པ་མ་ཟད། ཚང་མའི་ངོ་གདོང་ལ་འཛུམ་མདངས་ཀྱིས་ཁེངས་པ་མཐོང་བྱུང་། གྲོང་ཚོའི་ལས་བྱེད་པ་དང་། གྲོང་སྡོད་ལས་དོན་རུ་ཁག་དང་ཏང་ཡོན་དང་བླངས་ཞབས་ཞུའི་རུ་ཁག་གི་རུ་མིས་དང་བླངས་པ་བྱས་ཏེ། ལ་ལས་ཇ་སྲུབས་མ་བཟོ་བ་དང་། འགའ་ཞིག་གིས་ཚལ་བཀྲུ་རོགས་བྱེད་པ། ཁ་ཅིག་གིས་བདེ་ཐང་བརྟག་དཔྱད་ཡོ་ཆས་ལ་ཞིབ་བཤེར་བྱེད་པ། ད་དུང་རེ་འགས་རོལ་རྩེད་ཡོ་ཆས་སྒྲིག་རོགས་བྱེད་བཞིན་ཡོད།

“ཉིན་མོའི་ལྟ་རྟོག་ཁང་ཉིན་ལྟར་སྒོ་ཕྱེ་ནའང་། གཅིག་སྡུད་སྒོ་དབྱེའི་ཉིན་མོར་ང་ཚོས་སྒོར་གཞས་འཁྲབ་པ་དང་། གསར་བརྗེའི་གླུ་གཞས་ལེན་པ། སྐྱེས་སྐར་གཏོང་བ་སོགས་ཀྱི་བྱེད་སྒོ་སྤེལ་ནས་རྒན་རྒོན་དང་ཕྲུ་གུ་ཚོར་དུས་ཆེན་གཏོང་བ་ལྟ་བུའི་སྐྱིད་སྣང་སྦྱིན་ཡོད”ཅེས་ཉིང་རུ་སྨད་ཤང་ཏང་ཨུད་ཀྱི་ཧྲུའུ་ཅི་བུ་དྲུག་གིས་བཤད།

མི་རིང་བར། གྲོང་ཚོའི་རྒན་རྒོན་ཕལ་ཆེ་བ་རིམ་པས་ཉིན་མོའི་ལྟ་རྟོག་ཁང་དུ་འོང་ཞིང་། ལྟ་རྟོག་ཁང་དུ་སླེབས་དུས་རྒན་རྒོན་ལ་ལས་ལུས་སྦྱོང་བྱེད་པ་དང་། ལ་ལས་ཤོ་རྒྱག་པ། ལ་ལས་ཤིང་འབྲས་བཟའ་ཞོར་ཅི་འཕྲོས་མོལ་འཕྲོས་བྱེད་པ། ལ་ལས་སྒྲིག་ཆས་ཀྱིས་འཕུར་མཉེད་གཏོང་བ་སོགས་བྱེད་པ་དང་། ད་དུང་ཕྲུ་གུ་ཆུང་ཆུང་ཚོ་རྩེད་འཇོར་རོལ་ནས་དགའ་སྤྲོའི་རྣམ་པས་ཁེངས།

“ད་ལོའི་ཟླ་3ཚེས་15ཉིན་རྣ་སྟོད་གྲོང་ཚོའི་ཉིན་མོའི་ལྟ་རྟོག་ཁང་དངོས་སུ་སྒོ་ཕྱེ་བ་དང་། དེ་ཉིན་གྲོང་ཚོ་ཡོངས་ཀྱི་ལོ་60ཡན་གྱི་རྒན་རྒོན་30དང་། ན་སོ་དར་ལ་མ་བབས་པའི་མི་34ལ་རིན་པ་མི་དགོས་པར་ཞབས་འདེགས་ཞུས་ཡོད”ཅེས་བུ་དྲུག་གིས་ངོ་སྤྲོད་བྱས་ཤིང་། ཁོང་གིས་རྣ་སྟོད་གྲོང་ཚོའི་ཉིན་མོའི་ལྟ་རྟོག་ཁང་དེ་སྤྲོ་གསེང་རོལ་རྩེད་དང་། བཟའ་བཏུང་མཁོ་སྤྲོད། འཚོ་བར་ལྟ་རྟོག བདེ་སྲུང་ལུས་གསོ། སེམས་ཁམས་གསེད་བཀྲོལ་བཅས་གཞི་གཅིག་ཏུ་འདུས་ཤིང་། ངལ་གསོ་རྒྱག་ས་དང་། རིག་གནས་ལུས་རྩལ་བྱེད་སྒོ་ཁང་། སྤྲོ་གསེང་རོལ་རྩེད་ཁང་། སྙིང་གཏམ་ཤོད་ས་སོགས་ཡོད་པས། གྲོང་ཚོ་ཡོངས་ཀྱི་རྒན་རྒོན་དང་བྱིས་པ་ཚོའི་ཁྱིམ་ཚང་གཉིས་པ་ལྟ་བུར་གྱུར་ཡོད་ཅེས་བཤད།

ལོ་67ལ་སླེབས་པའི་ལྷག་པ་རྡོ་རྗེས“ད་ཆ་རང་ཉིད་ལོ་མཐོ་པོར་སླེབས་པ་དང་རྐང་ལག་ཀྱང་སྟབས་མི་བདེ་བའི་ཁར་བུ་ཕྲུག་ཕྱིར་ལས་ཀར་འགྲོ་དགོས་སྟབས་འཕྲལ་མར་ལྟ་རྟོག་བྱེད་མི་ཐུབ་ཀྱང་། གྲོང་ཚོའི་ཉིན་མོའི་ལྟ་རྟོག་ཁང་དུ་རང་ཉིད་དང་ལོ་གཅིག་པའི་རྒན་རྒོན་ཚོ་དང་མཉམ་དུ་ཅི་འཕྲོས་མོལ་འཕྲོས་བཤད་ནས་སྡོད་རྒྱུ་ཡོད་པ་མ་ཟད། གུང་ཟས་ལ་རིན་པ་སྤྲོད་མི་དགོས་པས། ང་ཚོའི་ངོས་ནས་བརྗོད་ན་ཧ་ཅང་ཡག་པོ་འདུག”ཅེས་མྱོང་ཚོར་ཟབ་མོས་བརྗོད།

ལོ་ལྟར་ཞིང་དལ་སྐབས། གྲོང་ཚོའི་ངལ་རྩོལ་ནུས་ཤུགས་ལྡན་པའི་དར་མ་མང་པོ་ཞིག་ཕྱིར་གླ་པ་རྒྱུག་པར་འགྲོ་དགོས་པས། ཁྱིམ་དུ་ལུས་པའི་རྒན་རྒོན་དང་བྱིས་པ་དག་གླ་པ་རྒྱུག་མཁན་ཚོའི་སེམས་ཁྲལ་བྱ་ཡུལ་དུ་གྱུར་མོད། ད་ཆ་ཉིན་མོའི་ལྟ་རྟོག་ཁང་གི་ལས་དོན་པས་རྒན་རྒོན་ཚོར་སྐྱིད་སྣང་ཚོར་དུ་བཅུག་ནས་བུ་ཕྲུག་ཚོ་བློ་བདེ་བག་ཕེབས་ཡོང་བར་བྱས་ཡོད།

“ཡུལ་མི་རྣམས་ཀྱིས་ཉིན་མོའི་ལྟ་རྟོག་ཁང་གི་ལས་དོན་ལ་རྒྱབ་སྐྱོར་ཆེན་པོ་བྱས་ཏེ། རང་འགུལ་ངང་འབྲས་དང་། གྲོ་ཞིབ། འོ་རྩམ། སྔོ་ཚལ་སོགས་འཚོ་བའི་མཁོ་ཆས་སྐྱེལ་བར་ཡོང་གི་ཡོད”ཅེས་བུ་དྲུག་གིས་བརྗོད་པ་དང་། ཁོང་གིས་ཉིན་མོའི་ལྟ་རྟོག་ཁང་རྒྱག་སྐབས། ཏང་ཡོན་ལས་བྱེད་པས་སྣེ་ཁྲིད་པ་དང་། ཡུལ་མི་རྣམས་ཀྱིས་ཧུར་ཐག་ཞུགས་ཏེ་ངལ་ནུས་འདོན་པ་དང་མཐུན་སྒྲིལ་རྡོག་རྩ་གཅིག་སྒྲིལ་གྱིས་གཟའ་འཁོར་འགའི་ནང་སྨི་ངོས་གྲུ་150ཟིན་པའི་ཕྱོགས་བསྡུས་བྱེད་སྒོ་སྤེལ་ཡུལ་དེ་བརྒྱབ་ཡོད།

ཉིན་མོའི་ལྟ་རྟོག་ཁང་དེ་ད་དུང་རྣ་སྟོད་གྲོང་ཚོའི་བསམ་བློའི་མཁར་རྫོང་ལྟ་བུ་ཞིག་ཏུ་འགྱུར་བར་བྱས་ཤིང་། གྲོང་ཚོའི“ཨུ་ལྷན་གཉིས”ཀྱི་ཚན་ཁག་དང་གྲོང་སྡོད་ལས་དོན་རུ་ཁག་གིས་རྒན་རྒོན་དང་ན་སོ་དར་ལ་མ་བབས་པའི་མིའི་དོན་དངོས་གནས་ཚུལ་ལ་དམིགས་ཏེ། ལྟ་འདོད་ལ་ཉན་སྤྲོ་བའི་རིག་གནས་དང་ལུས་རྩལ་གྱི་བྱེད་སྒོ་ཧུར་ཐག་སྤེལ་ཏེ་ཁོང་ཚོར་འཚོ་བའི་གོམས་གཤིས་བཟང་པོ་འཇགས་པར་བྱེད་པ་དང་། རྒྱལ་ཁབ་ཀྱི་སྤྱི་སྤྱོད་སྐད་ཡིག་དང་བཅའ་ཁྲིམས་དང་ཁྲིམས་སྲོལ་སོགས་སློབ་སྦྱོང་བྱེད་དུ་བཅུག་ནས་ཏང་དང་། མང་ཚོགས། ལས་བྱེད་པ་བཅས་དབར་གྱི་བར་ཐག་ཉེ་རུ་བཏང་ཡོད།

ཉེ་བའི་ལོ་ཤས་རིང་། ཁང་དམར་རྫོང་གིས་མང་ཚོགས་ཀྱི་དགོས་མཁོ་ཕྱོགས་སྟོན་དུ་འཛིན་རྒྱུ་མཐའ་འཁྱོངས་དང་མང་ཚོགས་བློ་ཡིད་ཚིམ་པོ་ཡོང་བར་བྱ་རྒྱུ་དམིགས་ཚད་དུ་བྱས་ཏེ། ཏང་འཛུགས་སྐྱོང་གིས་གྲོང་གསེབ་བཅོས་སྐྱོང་ལ་སྣེ་འཁྲིད་རྒྱུར་སྐུལ་འདེད་གཏིང་ཟབ་གཏོང་རིང་། གཞི་རིམ་རྩ་འཛུགས་ཀྱི་ཞབས་ཞུ་སྣེ་ཁྲིད་ཀྱི་འཇོན་ཐང་ཆེ་རུ་འགྲོ་བར་མཐོང་ཆེན་བྱས་ནས་མང་ཚོགས་ཀྱིས་དོ་ཁུར་དང་སེམས་ཁུར་བྱེད་པའི“རྒན་བྱིས་གཉིས”ལ་ལྟ་རྟོག་གི་གནད་དོན་དམིགས་སུ་ཐག་གཅོད་བྱས་པ་མ་ཟད། གྲོང་ཚོ་རིམ་པའི་རྩ་འཛུགས་ཀྱི་བྱེད་སྒོ་སྤེལ་ཡུལ་ལ་བརྟེན་ནས་གཅིག་སྡུད་ཉིན་མོའི་ལྟ་རྟོག་དང་བདེ་ཐང་ལྟ་འདོམས་གཞི་གཅིག་ཏུ་འདུས་པའི་ཉིན་མོའི་ལྟ་རྟོག་ཁང་20བསྐྲུན་ནས། དམངས་ལ་ཕན་བདེ་སྐྲུན་པའི“གོམ་པ་བརྒྱའི་འཚོ་བའི་འཁོར་རྒྱ”ཞིག་བཏོད་དེ་རྫོང་ཡོངས་ཀྱི“རྒན་བྱིས་གཉིས”ཀྱི་མི་ཚོགས་1800ལྷག་ཙམ་ལ་ཁྱབ་པར་བྱས་ནས་བྱིས་པར་ལྟ་རྟོག་དང་རྒས་དུས་ལྟ་སྐྱོང་བྱེད་མཁན་ཡོད་པར་བྱས་ཡོད།