ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་9ཉིན་གློག་འཕྲིན་འབྱོར་གསལ། ཉིན་ཤས་གོང་། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་གིས་བཀའ་རྒྱར་མཚན་རྟགས་བཀོད་ནས《དམག་དཔུང་གི་གོ་མཚོན་འགན་ལེན་སྲོལ་ཡིག》ཁྱབ་བསྒྲགས་གནང་བ་དང་2024ལོའི་ཟླ་12ཚེས་1ཉིན་ནས་ལག་བསྟར་བྱ་རྒྱུ་རེད།

《སྲོལ་ཡིག》ནང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱེད་པ་དང་། དམག་དཔུང་སྟོབས་ཆེར་གཏོང་བའི་ཞི་ཅིན་ཕིང་གི་དགོངས་པ་ལག་བསྟར་གཏིང་ཟབ་བྱེད་པ། དུས་རབས་གསར་པའི་དམག་དོན་འཐབ་ཇུས་བྱེད་ཕྱོགས་ལག་བསྟར་གཏིང་ཟབ་བྱེད་པ། དུས་རབས་གསར་པའི་མི་དམངས་དམག་དཔུང་གི་འགན་འཁྲི་དང་ལས་འགན་ནུས་ལྡན་ངང་བསྒྲུབ་རྒྱུར་དམིགས་པ། དམག་གྲབས་དམག་རྒྱག་ལ་ཕྱོགས་ཡོངས་ནས་དམིགས་པ། གོ་མཚོན་འགན་ལེན་ལས་དོན་གྱི་ཁྱད་ཆོས་དང་ཆོས་ཉིད་ཁོང་དུ་གཏིང་ཟབ་ཆུད་པ། དུས་བབ་གསར་པའི་འོག་གི་གོ་མཚོན་འགན་ལེན་ལས་དོན་གྱི་གཞི་རྩའི་བླང་བྱ་དང་ལམ་ལུགས་བཀོད་སྒྲིག་ཚན་རིག་དང་མཐུན་པའི་ངང་ཚད་ལྡན་དུ་གཏོང་བ་བཅས་བྱས་ཡོད་ལ། དམག་དཔུང་གི་གོ་མཚོན་འགན་ལེན་ལས་དོན་གྱི་གཞི་འཛིན་ས་གཙོ་བོ་ཞིག་ཀྱང་རེད།

《སྲོལ་ཡིག》ལ་ཁྱོན་ལེའུ་8དང་དོན་ཚན་92ཡོད་པ་དང་། དམག་ཨུད་ཀྱིས་དོ་དམ་གཙོ་བོ་བྱེད་པ་དང་། འཐབ་ཁུལ་གཡུལ་ས་གཙོ་བོར་བྱེད་པ། དམག་རིགས་འཛུགས་སྐྱོང་གཙོ་བོར་བྱེད་པ་བཅས་ཀྱི་སྤྱིའི་རྩ་དོན་གཞིར་བཟུང་སྒྲིག་སྲོལ་གསར་པ་དང་སྒྲིག་ཁོངས་གསར་པའི་འོག་གི་དམག་དཔུང་གི་གོ་མཚོན་འགན་ལེན་ལས་དོན་གྱི་ལམ་སྲོལ་ཚད་ལྡན་དུ་གཏོང་བ་དང་། རིམ་ཁག་གོ་མཚོན་འགན་ལེན་སྡེ་ཚན་གྱི་འགན་ནུས་ཁ་གསལ་བཟོ་བ། གོ་མཚོན་འགན་ལེན་གྱི“མཁོ་སྤྲོད་དང་། དོ་དམ། ལེགས་སྒྲིག”བཅས་ཀྱི་ལམ་སྲོལ་གོ་རིམ་ལེགས་སུ་གཏོང་བ། གོ་མཚོན་འགན་ལེན་ལས་དོན་གྱི་བཙན་ཐབས་འཆུན་འདོམས་ལ་ཤུགས་སྣོན་རྒྱག་པ་བཅས་བྱས་ནས་དམག་དཔུང་གི་གོ་མཚོན་འགན་ལེན་ལས་དོན་གྱི་གསར་གཏོད་འཕེལ་རྒྱས་ལ་སྐུལ་འདེད་ཤུགས་ཆེན་གཏོང་རྒྱུ་ཡིན་པ་རེད།