ཀྲུང་གོ་ཟོག་འགྲེམས་དང་ཉོ་སྒྲུབ་མཉམ་འབྲེལ་ལྷན་ཚོགས་ཀྱིས་ཁྱབ་བསྒྲགས་བྱས་པའི་ཟླ་བཅུ་པའི་ཀྲུང་གོའི་ཟོག་འགྲེམས་ལས་རིགས་ཀྱི་འཕེལ་ཚུལ་སྟོན་གྲངས་52.6%ཟིན་པ་དེ་དུས་མཚུངས་ལས་བརྒྱ་ཆའི་གྲངས་0.2བསྐྱར་འཕར་བྱུང་ཡོད།

ཟླ་བཅུ་པར་ཡན་ལག་རྣམ་གྲངས་ཕལ་མོ་ཆེའི་སྟོན་གྲངས་ཟླ་གོང་མ་ལས་བསྐྱར་འཕར་བྱུང་བའི་ཁྲོད་ལས་སྒོའི་བསྡོམས་འབོར་སྟོན་གྲངས་དང་། མངགས་ཐོ་གསར་པའི་སྟོན་གྲངས། མཛོད་ཉར་འཁོར་རྒྱུག་ཐེངས་གྲངས་སྟོན་གྲངས། མ་དངུལ་འཁོར་རྒྱུག་བྱེད་ཚད་སྟོན་གྲངས་སོགས་ཚང་མ་འཕེལ་ཚུལ་བར་མཚམས་སུ་རྒྱུན་འཁྱོངས་ཐུབ་ཡོད། ལས་སྒོའི་བསྡོམས་འབོར་སྟོན་གྲངས་52.6%ཟིན་པ་དེ་ཟླ་གོང་མ་ལས་བརྒྱ་ཆའི་གྲངས་0.2བསྐྱར་འཕར་བྱུང་བ་དང་། མངགས་ཐོ་གསར་པའི་སྟོན་གྲངས་52.7%ཟིན་པ་དེ་ཟླ་གོང་མ་ལས་བརྒྱ་ཆའི་གྲངས་0.4བསྐྱར་འཕར་བྱུང་ཡོད། ཁེ་ལས་ཀྱི་འཕར་ཚད་སྔོན་དཔག་དགའ་འོས་པ་ཞིག་ཡོད་པ་དང་། ལས་སྒོའི་བྱེད་སྒོའི་སྔོན་དཔག་སྟོན་གྲངས་57.7%ཟིན་ཏེ་ཟླ་ཤས་བསྟུད་མར་འཕེལ་ཚུལ་བར་མཚམས་སུ་གནས་ཡོད། བཟོ་ལས་ཀྱི་ཐོན་རྫས་དང་། གྲོང་མིའི་འཛད་སྤྱོད། དངོས་ཟོག་ཆེ་རིགས་སོགས་ཀྱི་ཟོག་འགྲེམས་དགོས་མཁོ་ཚང་མ་བསྐྱར་འཕར་བྱུང་ཞིང་། བཟོ་ལས་ཀྱི་ཟོག་འགྲེམས་ཁྱབ་ཁོངས་དང་། འཕྲིན་གཏོང་སྒྲིག་ཆས། ཁྱིམ་སྤྱོད་གློག་ཆས། ནུས་རྒྱུ་གསར་པའི་རླངས་འཁོར་སོགས་ཀྱི་སླར་གསོའི་རྣམ་པ་ཡག་པོ་ཡོད། དུས་ཆེན་དང་ངལ་གསོའི་རྒྱུ་རྐྱེན་དང་ས་གནས་ཁག་གི་འཛད་སྤྱོད་སྐུལ་སྤེལ་སྲིད་ཇུས་ཀྱི་སྐུལ་འདེད་ལ་བརྟེན་ནས་གྲོང་མིའི་ཟོག་འགྲེམས་འཛད་སྤྱོད་དགོས་མཁོ་བརྟན་པོ་ཡོད། དྲ་ཕྱིའི་ཚོང་དོན་སྡེབ་ཚོང་ཁྲོམ་རའི་ཟོག་འགྲེམས་གང་མགྱོགས་འཕར་བ་དང་། ཚོང་ཁང་དང་སྒོ་རྩིས་ཚོང་ཁང་གི་སིལ་ཚོང་ལས་སྒོ་སླར་གསོའི་ངང་འཕར་བ་མ་ཟད། དྲ་ཐོག་ཚོང་དོན་དང་དྲ་ཐོག་ཉོ་སྒྲུབ་ཀྱི་བྱེད་སྒོའང་དར་བཞིན་ཡོད་པ་རེད།