ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་8ཉིན་གློག་འཕྲིན་འབྱོར་གསལ། ཟླ་11ཚེས་8ཉིན། སྐབས་སོ་བཞི་པའི་ཀྲུང་གོའི་གསར་འགྱུར་བྱ་དགའ་དང་སྐབས་བཅོ་བརྒྱད་པའི་འབྲི་ཆུ་ཐའོ་ཧྥེན་བྱ་དགའ་སྤྲོད་པའི་སྙན་ཞུའི་ཚོགས་འདུ་པེ་ཅིང་དུ་འཚོགས་ཤིང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀྲུང་དབྱང་དྲིལ་བསྒྲགས་པུའི་པུའུ་ཀྲང་ལི་ཧྲུའུ་ལེ་ཚོཌ་འདུར་ཕེབས་ནས་གསུང་བཤད་ཀྱང་གནང་བ་རེད།

ཚོགས་ཞུགས་འཐུས་མི་ཚོས་ཞི་ཅིན་ཕིང་གི་རིག་གནས་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་དོན་འཁྱོལ་བྱེད་པ། ཀུན་འདུས་སྨྱན་སྦྱོར་ཐོན་སྐྱེད་དང་སྒྲོག་སྤེལ་ལས་དོན་དང་འཚམ་པའི་ལམ་སྲོལ་དང་གདེང་འཇོག་མ་ལག་འཛུགས་པ། གཙོ་རྒྱུན་སྨྱན་སྦྱོར་གྱི་བརྒྱུད་རིམ་རང་བཞིན་གྱི་འཕོ་འགྱུར་ལ་སྐུལ་འདེད་གཏོང་བ་བཅས་བྱེད་དགོས་པ་དང་། གསར་འགྱུར་འཐབ་ཕྱོགས་ཀྱིས་འགན་འཁྲི་འཁུར་སེམས་དང་། ལས་འགན་སྒྲུབ་སེམས། དགོས་གཏུགས་ཀྱི་བསམ་པ་བཅས་ཆེ་རུ་གཏོང་བ་དང་། དྲ་སྦྲེལ་གྱི་བསམ་གཞིག་ལ་བརྟེན་ནས་ཐོན་ཁུངས་ལེགས་སྒྱུར་བསྡུ་སྒྲིལ་ལ་སྐུལ་འདེད་གཏོང་བ། གཙོ་ཤུགས་དམག་ཕྱོགས་ཡོངས་ནས་གཡུལ་ས་གཙོ་བོར་བསྐྱོད་རྒྱུར་སྐུལ་མ་གཏོང་བ་བཅས་བྱས་ཏེ། གསར་འགྱུར་གླེང་ཕྱོགས་ལས་དོན་གྱི་རྣམ་པ་གསར་པ་ཧུར་ཐག་གཏོད་དགོས་པའི་ངོས་འཛིན་བྱས་ཡོད།

ཚོགས་ཞུགས་འཐུས་མི་ཚོས། བསམ་བློའི་འདུ་ཤེས་བསྐྱར་དུ་བཙུགས་ནས་ནང་དོན་སྤུས་ལེགས་དང་། ཆེད་ལས་ཤེས་ལྡན་པ། ཐོན་ཁུངས་དེ་བས་མང་བ་བཅས་དྲ་སྦྲེལ་གྱི་གཡུལ་ས་གཙོ་བོར་འདུས་རྒྱུར་སྐུལ་འདེད་གཏོང་དགོས་པ་དང་། ནང་དོན་ཐོན་སྐྱེད་བྱེད་སྟངས་ལེགས་བཅོས་བྱས་ཏེ་དྲ་སྦྲེལ་དང་འཚམ་པའི་ནང་དོན་ཐོན་སྐྱེད་བྱེད་སྟངས་དང་ཐོན་སྐྱེད་ནུས་པ་ཆགས་པར་བྱེད་དགོས་པ། དོ་དམ་ལམ་སྲོལ་གསར་གཏོད་བྱས་ནས་ཀུན་འདུས་སྨྱན་སྦྱོར་གྱི་སྒྲོག་སྤེལ་ཆོས་ཉིད་དང་མཐུན་པའི་དཔྱད་ཞིབ་གདེང་འཇོག་ལམ་ལུགས་བཙུགས་ཏེ་གཙོ་རྒྱུན་སྨྱན་སྦྱོར་གྱི་གསར་གཏོད་དང་འགྱུར་ལྡོག་ཡོང་ཐབས་བྱེད་པའི་ནང་སྐྱེས་སྒུལ་ཤུགས་འཕེལ་བར་བྱེད་དགོས་པ། གཙོ་རྒྱུན་སྨྱན་སྦྱོར་གྱི་རྒྱལ་སྤྱིའི་སྒྲོག་སྤེལ་ལམ་སྲོལ་སྒྱུར་བཅོས་དང་གསར་གཏོད་གཏིང་ཟབ་ཏུ་བཏང་ནས་གཙོ་རྒྱུན་སྨྱན་སྦྱོར་གྱི་རྒྱལ་སྤྱིའི་སྒྲོག་སྤེལ་གྱི་ཕན་ནུས་ཕྱོགས་ཡོངས་ནས་ཆེ་རུ་གཏོང་དགོས་པ། གསར་འགྱུར་ཤེས་ལྡན་པའི་རྩལ་ནུས་ཀུན་འདོན་ལ་ཕན་པའི་སྲིད་ཇུས་ཀྱི་ཁོར་ཡུག་བསྐྲུན་ནས་སྒྱུར་བཅོས་ཀྱི་སྙིང་སྟོབས་དང་གསར་གཏོད་ཀྱི་ནུས་པས་ཕྱུག་པའི་གསར་འགྱུར་ཤེས་ལྡན་པ་སྔར་བས་མང་བ་གསོ་སྐྱོང་བྱེད་དགོས་པ། སྐད་ཆ་གསར་གཏོད་དང་རྩོམ་ཉམས་ལེགས་སུ་བཏང་ནས་ཀྲུང་གོའི་ས་གཞི་ཆེ་མོར་ཁྱབ་པ་དང་མང་ཚོགས་ཀྱི་སེམས་ནང་ཟུག་པའི་གསར་འགྱུར་འབྲི་དགོས་ཞེས་བརྗོད་པ་རེད།