ཀྲུང་གོ་མི་དམངས་དངུལ་ཁང་གིས་ཁྱབ་བསྒྲགས་བྱས་པའི་2024ལོའི་དུས་ཚིགས་གསུམ་པའི་ཀྲུང་གོའི་དངུལ་ལོར་སྲིད་ཇུས་ཀྱི་ལག་བསྟར་སྙན་ཞུ་ལས་མངོན་པར། ད་ལོ་ཚུན་དུ་འཐུས་སྒོ་ཚང་བའི་དངུལ་ལོར་སྲིད་ཇུས་སྟབས་བསྟུན་འོས་འཚམ་དང་གནད་སྨིན་ནུས་ལྡན་བྱུང་ནས་དུས་འཁོར་ལས་ལྡོག་པའི་སྙོམས་སྒྲིག་བྱེད་ཤུགས་ཆེ་རུ་ཕྱིན་ཏེ་དཔལ་འབྱོར་བསྐྱར་འཕར་དང་ལེགས་སུ་འགྲོ་རྒྱུར་འཚམ་པའི་དངུལ་ལོར་དང་དངུལ་རྩའི་ཁོར་ཡུག་བཏོད་ཡོད་པ་རེད། དངུལ་རྩའི་སྤྱི་འབོར་ལུགས་མཐུན་ངང་འཕར་ཞིང་། ཟླ་དགུ་པའི་ཟླ་མཇུག་ཏུ་སྤྱི་ཚོགས་ཀྱི་མ་དངུལ་བསྡུ་སྒྲིལ་གཞི་ཁྱོན་དང་ཁྱབ་ཆེའི་དངུལ་ལོར་Ｍ2དུས་མཚུངས་ལས་8.0%དང་6.8%སོ་སོར་འཕར་བ་དང་། དུས་ཚིགས་དང་པོ་ནས་གསུམ་པའི་བར་མི་དམངས་ཤོག་སྒོར་གྱི་དངུལ་བུན་སྒོར་དུང་ཕྱུར་ཁྲི་16གསར་དུ་འཕར་ཡོད། ཡིད་རྟོན་དངུལ་བུན་གྱི་གྲུབ་ཆ་རྒྱུན་མཐུད་ལེགས་སུ་ཕྱིན་ནས་ཟླ་དགུ་པའི་ཟླ་མཇུག་ཏུ་ཀུན་ཕན་གྱི་ཕྲན་ཚེགས་དངུལ་བུན་དང་བཟོ་སྐྲུན་ལས་རིགས་ཀྱི་དུས་ཡུན་རིང་འབྲིང་གི་དངུལ་བུན་དུས་མཚུངས་ལས་14.5%དང་14.8%སོ་སོར་འཕར་ནས་དངུལ་བུན་ཚང་མའི་འཕར་ཚད་ལས་བརྒལ་ཡོད། མ་དངུལ་བསྡུ་སྒྲིལ་གྱི་མ་གནས་བརྟན་པོའི་ཁྲོད་ཆག་པ་དང་ཟླ་9པར་གསར་དུ་སྤྲད་པའི་ཁེ་ལས་ཀྱི་དངུལ་བུན་རྩིས་བསྐོར་གྱི་ཆ་སྙོམས་སྐྱེད་ཚད་3.51%ཟིན་པ་དེ་ལོ་གོང་མའི་དུས་མཚུངས་ལས་བརྒྱ་ཆའི་གྲངས་0.31གིས་དམའ་བ་ཡོད། མི་དམངས་ཤོག་སྒོར་གྱིས་མང་བསྡུས་དངུལ་ལོར་བརྟན་པོའི་ངང་འཕར་བ་དང་ཟླ་9པའི་ཟླ་མཇུག་ཏུ་ཀྲུང་གོ་ཕྱི་དངུལ་ཉོ་ཚོང་ལྟེ་གནས་ཀྱི་མི་དམངས་ཤོག་སྒོར་གྱི་འཛའ་ཐང་སྟོན་གྲངས་དེ་ལོ་གོང་མའི་ལོ་མཇུག་དང་བསྡུར་ན་1.0%འཕར་ཡོད་པ་རེད།

སྙན་ཞུའི་ནང་། དུས་མཚམས་རྗེས་མར་ཀྲུང་གོ་མི་དམངས་དངུལ་ཁང་གིས་དུས་ཐུང་དང་ཡུན་རིང་དང་། བརྟན་པོའི་ངང་འཕར་བ་དང་ཉེན་ཁ་སྔོན་འགོག ནང་ངོས་དོ་སྙོམས་དང་ཕྱི་རོལ་དོ་སྙོམས་བཅས་ཀྱི་འབྲེལ་བ་སྙོམས་སྒྲིག་བྱ་རྒྱུར་སྣང་ཆེན་བྱེད་པ་དང་། རྒྱབ་སྐྱོར་རང་བཞིན་གྱི་དངུལ་ལོར་སྲིད་ཇུས་ཀྱི་ལངས་ཕྱོགས་མཐའ་འཁྱོངས་བརྟན་པོ་བྱེད་པ། དངུལ་ལོར་སྲིད་ཇུས་ལ་ཚོད་འཛིན་བྱེད་ཤུགས་ཆེ་རུ་གཏོང་བ། དངུལ་ལོར་སྲིད་ཇུས་ཀྱི་གནད་སྨིན་རང་བཞིན་ཆེ་རུ་གཏོང་བ་བཅས་བྱས་ཏེ། དཔལ་འབྱོར་བརྟན་པོས་འཕར་བ་དང་སྤུས་ཚད་མཐོ་པོས་འཕེལ་རྒྱས་འགྲོ་ཆེད་དངུལ་ལོར་དང་དངུལ་རྩའི་ཁོར་ཡུག་བཟང་པོ་ཞིག་གཏོད་རྒྱུ་ཡིན་ཞེས་བཏོན་ཡོད།