མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར་གསར་འགོད་པར་ཀྲུང་གོ་མི་དམངས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་འཚོགས་པའི་2024ལོའི་དུས་ཚིགས་གསུམ་པའི་གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་བར། 2023ལོ་ནས་ཀྲུང་གོ་མི་དམངས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་ཞིང་ཆེན་འཕེལ་སྒྱུར་ཨུ་ལྷན་དང་རྒྱལ་ཁབ་གློག་དྲ་མཚོ་སྔོན་ཞིང་ཆེན་གློག་ཤུགས་ཀུང་སི་དང་མཉམ་དུ་དངུལ་རྩས་ཁེ་ལས་ཀྱི་ཐཱན་གྱི་རྩིས་ཁྲའི་མ་ལག་འཛུགས་རྒྱུར་རྒྱབ་སྐྱོར་བྱས་ཏེ“ལམ་ལུགས་ཀྱིས་སྣེ་ཁྲིད་དང་། ཞིབ་རྩིས་ཀྱིས་འདེགས་སྐྱོར། ལས་སྟེགས་ཀྱིས་སྐུལ་འདེད། ཡིད་རྟོན་དངུལ་བུན་གྱིས་ནུས་སྤྲོད”བཅས་ཕྱོགས་བཞི་གཞི་གཅིག་ཅན་གྱི་ཐཱན་གྱི་རྩིས་ཁྲའི་དངུལ་རྩའི་ཞབས་ཞུའི་མ་ལག་འཚོལ་ཞིབ་བྱས་ནས་འཛུགས་པ་དང་། དངུལ་རྩའི་སྒྲིག་གཞིས་བཙོག་སྐྱོན་ཉུང་གཏོང་དང་ཐཱན་འཕྲིའི་ཕན་འབྲས་མངོན་གསལ་དོད་པ་དང་ལྗང་མདོག་གློག་སྤྱོད་ཚད་ཀྱི་བསྡུར་ཚད་མཐོ་པོ་བཟུང་བའི་ཁེ་ལས་ལ་དངུལ་བུན་གྱི་ཡིད་རྟོན་དང་། དུས་ཚད། སྐྱེད་ཀ་སོགས་ཀྱི་ཐད་ཁྱད་པར་ཅན་གྱི་གཟིགས་སྐྱོང་བྱས་ཏེ་དངུལ་རྩས“ཐཱན་གཉིས”ཀྱི་འཐབ་ཇུས་ལ་རྒྱབ་སྐྱོར་བྱེད་པའི་མཚོ་སྔོན་གྱི་ལག་ལེན་ཁྱད་ཆོས་མངོན་གསལ་དོད་པོ་ཞིག་རགས་ཙམ་ཆགས་ཡོད།

ཀྲུང་གོ་མི་དམངས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་འབྲེལ་ཡོད་སྡེ་ཚན་དང་མཉམ་དུ《དངུལ་རྩས་ཁེ་ལས་ལ་ཐཱན་གྱི་རྩིས་ཁྲའི་མ་ལག་འཛུགས་རྒྱུར་རྒྱབ་སྐྱོར་བྱེད་པའི་ལག་བསྟར་ཇུས་གཞི》བཀྲམ་ནས་ལས་དོན་གྱི་དམིགས་ཚད་གཙོ་བོ་དང་། གཞི་རྩའི་རྩ་དོན། གཙོ་གནད་ལས་འགན། འགན་འཁྲི་ལས་བགོས། འགན་སྲུང་ལམ་སྲོལ་བཅས་ཁ་གསལ་བཟོས་པ་རེད། 《མཚོ་སྔོན་ཞིང་ཆེན་དངུལ་ཁང་ལས་རིགས་ཀྱིས་ཁེ་ལས་ཀྱི་གློག་ཐཱན་གྱི་རྩིས་ཁྲ་སྤྱད་དེ་དངུལ་རྩའི་ལས་སྒོ་གཉེར་བའི་དོ་དམ་ཚད་གཞི》སྣེ་ཁྲིད་དེ་ཁྱབ་བསྒྲགས་བྱས་ནས་ཁེ་ལས་ཀྱིས་ཐཱན་གྱི་རྩིས་ཁྲ་བཟོ་བ་དང་། དོ་དམ་བྱེད་པ། ཚད་ལེན་ཞིབ་རྩིས་རྒྱག་པ། གདེང་འཇོག་བྱེད་པ། བེད་སྤྱོད་པ་སོགས་ཀྱི་ནང་དོན་ཁ་གསལ་བཟོས་ཏེ་དངུལ་རྩའི་སྒྲིག་གཞིས་ཐཱན་གྱི་རྩིས་ཁྲའི་གྲངས་གཞི་སྤྱོད་རྒྱུར་གཞི་འཛིན་ས་མཁོ་འདོན་བྱས་པ་རེད། 2024ལོའི་དུས་ཚིགས་གསུམ་པའི་དུས་མཇུག་བར། ལྗང་མདོག་རྩིས་ནུས་དང་། ཚྭ་མཚོའི་ལིས་གློག ནུས་རྒྱུ་གཙང་མ་སོགས་གཙོ་གནད་ཁྱབ་ཁོངས་ཀྱི་ཁེ་ལས་506ལ་ཐཱན་གྱི་རྩིས་ཁྲ་བཟོས་པ་མ་ཟད། ཞིང་ཆེན་ཡོངས་ཀྱི་གཙོ་གནད་ནུས་རྒྱུ་ཟད་གྲོན་ཁེ་ལས་641ཚང་མ་དུས་ཐོག་ལྟ་ཞིབ་ཚད་ལེན་ཁྱབ་ཁོངས་ནང་བཅུག་ནས་ཚད་འབེབས་དཔྱད་དཔོག་ཀྱང་བྱས་པ་དང་ཞིང་ཆེན་ཡོངས་ཀྱི་དངུལ་རྩའི་སྒྲིག་གཞིས་ཁེ་ལས་ཀྱི་ཐཱན་གྱི་རྩིས་ཁྲར་དངུལ་བུན་སྒོར་དུང་ཕྱུར་92.2བཏང་ནས་ནུས་རྒྱུ་བསྲི་ཚགས་དང་བཙོག་སྐྱོན་ཉུང་གཏོང་གི་ཁེ་ལས་ལ་སྐྱེད་ཀ་སྒོར་ཁྲི་4407གྲོན་ཆུང་བྱས་ཡོད་པ་རེད།