“སྒོར་ཁྲི་1.1བཏང་སོང་། སྒོར་ཁྲི་1.15བཏང་སོང་། འོ་ཡ་སྒོར་ཁྲི་1.2བཏང་སོང”ཞེས་སྡིངས་ཆའི་འོག་ནས་ཧབ་ཚོང་གི་རིན་གོང་བྱང་བུ་བར་མེད་དུ་བཀྱག་པ་དང་བསྟུན་ནས་ཧབ་ཚོང་སྐུལ་མཁན་གྱིས་རིན་ཕབ་གསར་པ་ཟམ་མི་ཆད་པར་སྒྲོག་བཞིན་མཆིས། རེས་སྐོར་མང་པོ་འགྲན་བསྡུར་བྱས་པ་བརྒྱུད། རུ་ཐོག་རྫོང་ར་བང་ཤང་རྩྭ་ཕུག་གྲོང་ཚོས་སྒོར་ཁྲི་1.25ཡི་ཐོག་ནས་འོས་མཚམས་དང་པོར་རུ་ཐོག་གི་ཁུ་ལུ་དཀར་པོའི་རྒྱུད་ལེགས་ར་ཐུག་རག་ཅིང་། འགྲན་ར་ཡོངས་ཀྱི་སྤྲོ་སེམས་འཁོལ་བའི་དགའ་བསུའི་ཁྲོད་དུ་རྩྭ་ཕུག་གྲོང་ཚོའི་མང་ཚོགས་ཀྱི་འཐུས་མིས་དགའ་ཚོར་ཆེན་པོས་ཧབ་ཚོང་སྡིངས་ཆའི་ཐོག་ཏུ་བསྐྱོད་དེ་ར་ཐུག་འཁྲིད་ནས་ལོག

དེ་ནི་གསར་འགོད་པས་ཉིན་ཤས་གོང་གཉེར་བའི་རུ་ཐོག་རྫོང་གི་ར་དཀར་པོའི་ཁུ་ལུ་གསལ་འབྱེད་དང་ཐོན་རྫས་ཧབ་ཚོང་གི་བྱེད་སྒོ་སྐབས་ལྔ་པ་ནས་མཐོང་བའི་རྣམ་པ་ཞིག་རེད། རུ་ཐོག་གི་ར་དཀར་པོའི་ཁུ་ལུ་ནི་རྒྱལ་ཁབ་ཕྱི་ནང་དུ་སྐད་གྲགས་ཡོད་ཅིང་། ཁུ་ལུ་ཤིན་ཏུ་འཇམ་ལ་ཚགས་དམ་པས་རིན་ཐང་ཆེན་པོ་ཡོད་ཅེས་ཟེར་སྲོལ་ཡོད།

ད་རེས་ཀྱི་བྱེད་སྒོར“མཁའ་མཐའི་རུ་ཐོག·ཁུ་ལུའི་འཇིག་རྟེན”ཞེས་བརྗོད་དོན་གཙོ་བོར་བྱས་ཤིང་། ཞིང་ཞོར་ཐོན་ཟོག་འགྲེམས་ཚོང་དང་། ར་དཀར་པོའི་ཁུ་ལུའི་རིག་གནས་ཁྱབ་གདལ་ཉམས་ལེན་ལྟེ་གནས་སྒོ་འབྱེད་མཛད་སྒོ ར་ཐུག་དང་ཁུ་ལུ་ཧབ་ཚོང་སོགས་ཀྱི་ལྷུ་ཚིགས་བཀོད་སྒྲིག་བྱས་ཡོད། བྱེད་སྒོར་ཀྲུང་གོ་འབྲོག་ཟོག་འཁོར་རྒྱུག་མཐུན་ཚོགས་དང་། ཧོ་པེ་ཞིང་ལས་སློབ་ཆེན། ཧོ་པེ་ཞིང་ཆེན་ཆིང་ཧོ་རྫོང་གི་ཏང་སྲིད་འཐུས་མི་དང་དེ་བཞིན་ལྗོངས་ཕྱི་ནང་གི་ཁུ་ལུའི་ཁེ་ལས་ཀྱི་འཐུས་མི་10ལྷག་ཙམ་ཞུགས་ཡོད་པ་རེད།

དེ་རྗེས་གཉེར་བའི་ཁུ་ལུ་ཧབ་ཚོང་ཡང་གོང་དང་འདྲ་བར་ཧ་ཅང་འཁྲུག་པོ་ཡོད། ཆེས་འཇམ་པའི་ཁུ་ལུ་རིམ་པ་དང་པོ་དང་གཉིས་པ་སྤྱི་རྒྱ་རེར་སྒོར་650ཡི་ཐོག་ནས་ཏུང་ཀོན་གྲོང་ཁྱེར་བདེ་རོང་ཁུ་ལུའི་བཟོས་རྫས་ཚད་ཡོད་ཀུང་སིར་རག་ཡོད། དམིགས་བསལ་འཇམ་པའི་ཁུ་ལུ་རིམ་པ་དང་པོ་དང་གསུམ་པ་སྤྱི་རྒྱ་རེར་སྒོར་305ཡི་ཐོག་ནས་བོད་ལྗོངས་ནོར་འཛོམས་ཁུ་ལུའི་ལས་རིགས་ཚད་ཡོད་ཀུང་སིར་རག་ཡོད། དེ་མིན་གྱི་འོས་སྐུལ་གཞན་དག་གི་ཁུ་ལུ་ཡང་ཁེ་ལས་ཁག་སོ་སོར་རག་ཡོད།

ཧབ་ཚོང་བྱེད་རིང་གྲོང་ཚོ་ཁག་གི་མང་ཚོགས་ཚོར་ཡང་རང་རང་གི་བློ་ལ་བབས་པའི་ར་ཐུག་ཉོ་ཐུབ་ཡོད།“ད་ཐེངས་ཧབ་ཚོང་གི་རིམ་པ་གཉིས་པ་དང་གསུམ་པར་སྤུས་ལེགས་ཀྱི་ར་ཐུག་ཉོ་ཐུབ་བྱུང་། ར་དེ་གཉིས་གྲུང་ཤ་དོད་པ་དང་རྒྱུད་པ་བཟང་ལ་ཁུ་ལུ་ཡང་འཇམ་པོ་འདུག དེ་གཉིས་ཉོས་རྗེས་གྲོང་ཚོའི་ཁུ་ལུ་དཀར་པོའི་རའི་རྒྱུད་པ་ཇེ་ལེགས་སུ་བཏང་ནས་དཔལ་འབྱོར་གྱི་ཕན་འབྲས་སྔར་བས་ལེགས་སུ་གཏོང་ཐུབ། ཕྱིས་སུ་བྱེད་སྒོ་འདི་རིགས་མང་ཙམ་སྤེལ་རྒྱུའི་རེ་བ་ཡོད”ཅེས་རུ་ཐོག་རྫོང་རི་གསུམ་ཤང་ལྕགས་སྒང་གྲོང་ཚོའི་ཏང་ཨུད་ཀྱི་ཧྲུའུ་ཅི་སྐལ་བཟང་དོན་གྲུབ་ཀྱིས་བརྗོད།

རུ་ཐོག་རྫོང་གི་རྫོང་དཔོན་གཞོན་པ་ཝང་ཧུའུ་ཕིང་གིས་ངོ་སྤྲོད་བྱས་དོན། ད་རེས་ཁུ་ལུ་དཀར་པོའི་ར་ཐུག་དང་ཁུ་ལུ་གསལ་འབྱེད་དང་ཐོན་རྫས་ཧབ་ཚོང་གི་བྱེད་སྒོར་ཁྱོན་བསྡོམས་ར་ཐུག་10ཧབ་ཚོང་བྱས་པར་རིན་ཐང་སྒོར་ཁྲི་7.25རི་བ་དང་། ཁུ་ལུ་ཏུན་41.6ཧབ་ཚོང་བྱས་པར་རིན་ཐང་སྒོར་ཁྲི་1332.95རི་བ། རྫོང་ཡོངས་ཀྱི་གསོ་ཚགས་མཉམ་ལས་ཁང་14དང་ཕྱུགས་རིགས་གསོ་ཚགས་དུད་ཚང་2195ལ་ཕན་ཐོགས་བྱུང་ནས་ཆ་སྙོམས་དུད་ཚང་རེར་ཁེ་བཟང་སྒོར་5700ལྷག་ཙམ་བྱུང་ཡོད།