ཟླ་11ཚེས་8ཉིན་གྱི་དགོང་མོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་དུ་དབྱི་ཐ་ལིའི་ཙུང་ཐུང་མཱ་ཐ་ལེ་ལ་དང་ལྷན་དུ་ཀྲུང་དབྱིའི་རིག་གནས་མཉམ་ལས་ལམ་སྲོལ་ཚོགས་ཆེན་དང་ཀྲུང་དབྱིའི་སློབ་ཆེན་གྱི་སློབ་སྤྱིའི་གླེང་མོལ་ཚོགས་འདུར་ཞུགས་མཁན་ཕྱོགས་གཉིས་པོའི་འཐུས་མིར་མཇལ་འཕྲད་གནང་ཞིང་། འདི་ནི་མཇལ་འཕྲད་མ་གནང་གོང་། རྒྱལ་ཁབ་གཉིས་པོའི་གཙོ་བདག་གིས་ཕྱོགས་གཉིས་པོའི་འཐུས་མི་དང་ལྷན་བཞུགས་སྐུ་པར་སྐྱོན་བཞིན་པ།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་8ཉིན་གློག་འཕྲིན་འབྱོར་གསལ། ཟླ་11ཚེས་8ཉིན་གྱི་དགོང་མོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་དུ་དབྱི་ཐ་ལིའི་ཙུང་ཐུང་མཱ་ཐ་ལེ་ལ་དང་ལྷན་དུ་ཀྲུང་དབྱིའི་རིག་གནས་མཉམ་ལས་ལམ་སྲོལ་ཚོགས་ཆེན་དང་ཀྲུང་དབྱིའི་སློབ་ཆེན་གྱི་སློབ་སྤྱིའི་གླེང་མོལ་ཚོགས་འདུར་ཞུགས་མཁན་ཕྱོགས་གཉིས་པོའི་འཐུས་མིར་མཇལ་འཕྲད་གནང་བ་རེད།

རྒྱལ་ཁབ་གཉིས་པོའི་གཙོ་བདག་གིས་ཀྲུང་དབྱིའི་རིག་གནས་དང་སློབ་ཆེན་མཉམ་ལས་ཀྱི་འབྲེལ་ཡོད་གནས་ཚུལ་སྐོར་གྱི་ཕྱོགས་གཉིས་པོའི་འཐུས་མིའི་སྙན་སེང་གསན་པ་རེད།

ཞི་ཅིན་ཕིང་གིས་གསུངས་དོན། ཀྲུང་གོ་དང་དབྱི་ཐ་ལིའི་དབར་གྱི་ལོ་ངོ་སྟོང་གི་མཛའ་གྲོགས་འགྲོ་འོང་གི་ལོ་རྒྱུས་ལས་རྒྱལ་ཁབ་གཉིས་པོའི་མི་རབས་ནས་མི་རབས་བར་གྱི་མི་ཆོས་རིག་གནས་ཀྱི་སྤེལ་རེས་བསྐྱངས་པ་དང་། གནའ་བོའི་དར་གོས་ལམ་བུས་ཤར་ཕྱོགས་དང་ནུབ་ཕྱོགས་དབར་གྱི་སྤེལ་རེས་ཀྱི་སྲོལ་བཏོད་པ། མཱ་ཁོ·པོ་ལུའོ་ཡིས་ནུབ་ཕྱོགས་འཛམ་གླིང་གིས་ཀྲུང་གོ་ཤེས་རྟོགས་བྱེད་པའི་སྐར་ཁུང་བཏོད་པ། མི་རབས་ནས་མི་རབས་བར་གྱི་ཕོ་ཉས་རྒྱལ་ཁབ་གཉིས་པོའི་མཛའ་གྲོགས་ཀྱི་ལེའུ་རྒྱུན་མཐུད་བརྩམས་པ། འཛམ་གླིང་གི་ཤེས་དཔལ་མི་འདྲ་བ་འདྲ་མཉམ་ངང་སྐད་ཆ་ཤོད་རེས་དང་ཐུན་མོང་ཐོག་འཕེལ་རྒྱས་འགྲོ་བའི་དཔེ་མཚོན་བཏོད་ཡོད། ཉེ་བའི་ལོ་ཤས་རིང་། ཀྲུང་དབྱིའི་རིག་གནས་མཉམ་ལས་ལམ་སྲོལ་གྱིས་རྒྱལ་ཁབ་གཉིས་པོས་ཕན་ཚུན་རིག་གནས་དང་ཡུལ་སྐོར་ལོ་གཉེར་རྒྱུར་སྐུལ་འདེད་དང་། མཉམ་འབྲེལ་རྒྱལ་ཚོགས་ཚན་སློབ་རིག་གསུམ་རྩ་འཛུགས་ཀྱི་འཛམ་གླིང་ཤུལ་བཞག་ཁུལ་འབྲེལ་མཐུད་བྱེད་སྟངས་གསར་གཏོད། རྒྱལ་ཁབ་གཉིས་པོའི་མཐོ་སློབ་ཀྱིས་རིག་གཞུང་དང་གཞོན་ནུའི་སྤེལ་རེས་རྒྱ་ཁྱབ། གསར་དར་རིག་ཚན་གྱི་མཉམ་འབྲེལ་ཞིབ་འཇུག་རྒྱ་སྐྱེད་བཅས་བྱས་པར་གཡུར་དུ་ཟ་བའི་གྲུབ་འབྲས་ཐོབ་ཡོད།

ཞི་ཅིན་ཕིང་གིས་ནན་བཤད་གནང་དོན། དེང་གི་འཛམ་གླིང་ནི་གཡོ་འགུལ་དང་འཕོ་འགྱུར་གྱི་དུས་སྐབས་གསར་པར་སླེབས་ཡོད། ཤེས་དཔལ་ལྡན་པའི་གནའ་བོའི་རྒྱལ་ཁབ་གཉིས་ཡིན་པའི་ཀྲུང་གོ་དང་དབྱི་ཐ་ལིས་ངེས་པར་དུ་དོན་འཁྱོལ་ལ་དམ་འཛིན་ཧུར་ཐག་གིས་རིག་གནས་ལ་བརྟེན་ནས་མི་སྣ་ལེགས་སྐྱོང་དང་ཀུན་སྤྱོད་ལ་བརྟེན་ནས་རང་ཚུགས་སྐྱོང་བ་དར་སྤེལ་གཏོང་བ་དང་། མི་ཆོས་རིག་གནས་ཀྱི་བརྩེ་བ་ཟབ་མོར་བརྟེན་ནས་མིའི་རིགས་ཀྱི་ལས་དབང་ལ་ལྟ་སྐྱོང་བྱེད་པ། མཉམ་བསྡུ་མཉམ་ལེན་གྱི་ཁོག་རྒྱར་བརྟེན་ནས་འགལ་ཟླ་དང་གདོང་ཐུག་གི་བར་བརྒལ་ལས་སྒྲོལ་བ། འཆམ་མཐུན་མཉམ་གནས་ཀྱི་འདུན་པ་བཅངས་ནས་འཕེལ་རྒྱས་ཀྱི་མཉམ་ཤུགས་གཅིག་ཏུ་སྒྲིལ་བ་བཅས་བྱས་ནས་ཤེས་དཔལ་གྱི་ལམ་སྟོན་སྒྲོན་མེས་མིའི་རིགས་མདུན་སྐྱོད་ཀྱི་ཡང་དག་པའི་ལམ་བུར་འོད་སྣང་འཕྲོ་བར་བྱེད་དགོས། ཕྱོགས་གཉིས་པོས་མཉམ་དུ་འབད་བརྩོན་བྱས་ཏེ། དཔྱོད་ལྡན་པ་དེ་བས་མང་བས་ཀྲུང་དབྱིའི་མཛའ་གྲོགས་མཉམ་ལས་ཀྱི་ལག་ལེན་པ་དང་། ཤར་ཕྱོགས་དང་ནུབ་ཕྱོགས་ཀྱི་ཤེས་དཔལ་དཔྱད་གཞིར་འཛིན་རེས་ཀྱི་སྐུལ་འདེད་པ། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པའི་ནང་ཞུགས་མཁན་བཅས་བྱ་རྒྱུར་སྐུལ་འདེད་བཏང་སྟེ། འཛམ་གླིང་ཞི་བདེ་དང་འཕེལ་རྒྱས་ལ་སྐུལ་འདེད་གཏོང་ཆེད་ཀྲུང་དབྱིའི་ལེགས་སྐྱེས་འབུལ་རྒྱུའི་རེ་བ་ཡོད།

མཱ་ཐ་ལེ་ལ་ཡིས་དབྱི་ཀྲུང་གི་རིག་གནས་མཉམ་ལས་ལམ་སྲོལ་དང་སློབ་ཆེན་གྱི་སློབ་སྤྱིའི་གླེང་མོལ་ཚོགས་འདུས་དབྱི་ཀྲུང་རྒྱལ་ཁབ་གཉིས་པོའི་མི་དམངས་དབར་ཕན་ཚུན་ཤེས་རྟོགས་དང་། མཛའ་གྲོགས། མཉམ་ལས་བཅས་ལ་སྐུལ་འདེད་གཏོང་ཆེད་ལེགས་སྐྱེས་གལ་ཆེན་ཕུལ་བར་གདེང་འཇོག་གང་ལེགས་གནང་ཞིང་། ཁོང་གིས་དབྱི་ཀྲུང་རྒྱལ་ཁབ་གཉིས་པོ་ནི་ཤེས་དཔལ་ལྡན་པའི་གནའ་བོའི་རྒྱལ་ཁབ་ཡིན་པ་དང་འོད་སྟོང་འཕྲོ་བའི་རིག་གནས་ཡོད་ལ། རྒྱལ་ཁབ་གཉིས་པོའི་མི་དམངས་དབར་ཕན་ཚུན་དགའ་པོ་དང་ཕན་ཚུན་བརྩི་འཇོག་ཀྱང་བྱེད་ཀྱི་ཡོད། མཱ་ཁོ·པོ་ལུའོ་དང་ཀྲུང་གོའི་དབར་སྤེལ་རེས་བྱུང་བའི་གཏམ་སྙན་འདི་ནི་ཤར་ཕྱོགས་དང་ནུབ་ཕྱོགས་ཀྱི་ཤེས་དཔལ་ཕན་ཚུན་སློབ་སྦྱོང་དང་དཔྱད་གཞིར་འཛིན་པའི་མཚོན་ཚུལ་ཞིག་རེད། ཕྱོགས་གཉིས་པོས་ཉམས་མྱོང་ཕྱོགས་སྡོམ་དང་མཛའ་གྲོགས་རྒྱུན་འཛིན་བྱས་ཏེ་མི་ཆོས་རིག་གནས་སྤེལ་རེས་ཀྱི་འབྲེལ་ཟམ་སྔར་བས་མང་བ་འཛུགས་པ་དང་། མཐུན་སྒྲིལ་ལ་ཤུགས་སྣོན། འགྲན་རྒོལ་ལ་ངོ་རྒོལ་བཅས་བྱས་ཏེ་དབྱི་ཀྲུང་གི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་འཕེལ་རྒྱས་འགྲོ་རྒྱུར་རྨང་གཞི་བརྟན་པོ་འདིང་བ་དང་འདེགས་སྐྱོར་བྱེད་དགོས་ཞེས་གསུངས་པ་རེད།