ཉིན་ཤས་གོང་། ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས་ཀྲུང་གོས་རྒྱལ་སྤྱིའི་ཤིང་དམར་ནགས་ཚལ་ལྟེ་གནས་ལས་སྟེགས་སུ་བྱས་ཏེ་ཕྱོགས་ཁག་དང་སྤེལ་རེས་དང་མཉམ་ལས་གཏིང་ཟབ་བྱེད་པ་དང་། ཤིང་དམར་ནགས་ཚལ་སྲུང་སྐྱོང་གི་གོ་ལ་ཧྲིལ་པོའི་མཉམ་འབྲེལ་བྱ་སྤྱོད་ལ་སྐུལ་འདེད་གཏོང་བ། ཤིང་དམར་ནགས་ཚལ་གྱི་སྐྱེ་ཁམས་མ་ལག་གི་སྤུས་ཚད་དང་བརྟན་པོའི་རང་བཞིན་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ཏེ་འཛམ་གླིང་མི་དམངས་ལ་བདེ་སྐྱིད་དེ་བས་མང་བ་བསྐྲུན་གྱི་ཡིན་ཞེས་བརྗོད་པ་རེད།

རྒྱལ་སྤྱིའི་ཤིང་དམར་ནགས་ཚལ་ལྟེ་གནས་འཛུགས་པའི་གྲོས་ཆོད་ལ་མིང་རྟགས་འགོད་པའི་མཛད་སྒོ་ཚེས་6ཉིན་གྱི་སྔ་དྲོར་ཧྲེན་ཀྲེན་དུ་འཚོགས་ཤིང་། ཁག་དང་པོའི་ཁོངས་མིའི་རྒྱལ་ཁབ་18ཀྱི་འཐུས་མིས་གྲོས་ཆོད་ལ་དངོས་སུ་མིང་རྟགས་བཀོད་ནས་རྒྱལ་སྤྱིའི་ཤིང་དམར་ནགས་ཚལ་ལྟེ་གནས་ཀྱི་སྒོ་བྱང་ཕྱེ་བ་རེད།

མའོ་ཉིང་གིས་ཉིན་དེའི་ཕྱི་དྲོའི་གསར་འགོད་པའི་འཆར་ཅན་ཚོགས་འདུའི་ཐོག་2022ལོའི་ཟླ་11པར། ཀྲུའུ་ཞི་ཞི་ཅིན་ཕིང་གིས《འདམ་རའི་སྤྱི་ཆིངས》སྐབས་བཅུ་བཞི་པའི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་གྱི་འགོ་ཚུགས་མཛད་སྒོར་ཧྲེན་ཀྲེན་དུ“རྒྱལ་སྤྱིའི་ཤིང་དམར་ནགས་ཚལ་ལྟེ་གནས”འཛུགས་རྒྱུའི་གྲོས་འགོ་བཏོན་གནང་བར་རྒྱལ་སྤྱིའི་སྤྱི་ཚོགས་ཀྱི་ཁས་ལེན་རྒྱ་ཁྱབ་དང་རྒྱབ་སྐྱོར་ཤུགས་ཆེན་ཐོབ་ཡོད། རྒྱལ་སྤྱིའི་ཤིང་དམར་ནགས་ཚལ་ལྟེ་གནས་དེ་ཤིང་དམར་ནགས་ཚལ་སྲུང་སྐྱོང་དང་ལུགས་མཐུན་བེད་སྤྱོད་དང་། ཤིང་དམར་ནགས་ཚལ་སྤེལ་རེས་དང་རྒྱལ་སྤྱིའི་མཉམ་ལས་ལ་ཐུན་མོང་ཐོག་སྐུལ་འདེད་གཏོང་བའི་ལས་སྟེགས་དང་སྐར་ཁུང་གལ་ཆེན་ཞིག་ཏུ་བརྩིས་ནས་སྒོ་དབྱེ་བསྟུན་མཁས་དང་། མཉམ་སྐྲུན་མཉམ་སྤྱོད། མཉམ་ལས་གཉིས་ཁེ་བཅས་ཀྱི་ཤིང་དམར་ནགས་ཚལ་དང་མཚོ་འགྲམ་ཐཱན་སྔོན་སྐྱེ་ཁམས་མ་ལག་གི་རྒྱལ་སྤྱིའི་མཉམ་ལས་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་བ་དང་། གོ་ལ་ཧྲིལ་པོའི་ཤིང་དམར་ནགས་ཚལ་སྲུང་སྐྱོང་བྱ་གཞག་ལ་སྐུལ་འདེད་བཏང་ནས་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་འཕེལ་རྒྱས་ཆོག་པའི་གྲོས་རིམ་དོན་འཁྱོལ་དང་། མི་དང་རང་བྱུང་ཁམས་ཞི་མཐུན་མཉམ་གནས་ཀྱི་སའི་གོ་ལའི་ཁྱིམ་གཞིས་བསྐྲུན་པར་སྐུལ་འདེད་གཏོང་ཆེད་ལེགས་སྐྱེས་ཧུར་ཐག་འབུལ་ཀྱི་ཡིན་ཞེས་བརྗོད་པ་རེད།