ཉེ་ཆར། སིང་ཀ་ཕོར་གྱི་ཙུང་ལི་གཞོན་པ་ཝང་རུའེ་ཅེ་ཡིས་བཟོ་ལས་ཕྱོགས་སྒྱུར་གྱི་ཨེ་ཤེ་ཡ་དང་ཞི་བདེ་རྒྱ་མཚོ་ཆེན་པོ་ཁུལ་གྱི་དངོས་མང་སྟོན་ཚོགས་སྐབས་བདུན་པའི་འགོ་ཚུགས་མཛད་སྒོའི་ཐོག སིང་ཀ་ཕོར་གྱིས་2030ལོར་བཟོ་སྐྲུན་ལས་རིགས་ཀྱི་ཟུར་སྣོན་རིན་ཐང་50%མཐོ་རུ་གཏོང་རྒྱུ་དང་སིང་ཀ་ཕོར་དེ་ཉིད་གོ་ལ་ཧྲིལ་པོའི་སྔོན་ཐོན་བཟོ་སྐྲུན་ལས་རིགས་ཀྱི་ལྟེ་གནས་ཤིག་ཏུ་བསྐྲུན་རྒྱུའི་དམིགས་ཚད་ལ་སྐུལ་འདེད་བརྟན་པོ་བཏང་སྟེ། མི་ཐབས་རིག་ནུས་ལ་བརྟེན་ནས་སྐུལ་འདེད་གཏོང་བ་དང་རྒྱུན་མཐུད་ཆོག་པའི་བཟོ་སྐྲུན་ལས་རིགས་ཀྱི་སྐྱེ་ཁམས་ཧུར་ཐག་གཏོད་རྒྱུ་ཡིན་ཞེས་ཁྱབ་བསྒྲགས་བྱས་པ་རེད། མི་རིང་བའི་གོང་སིང་ཀ་ཕོར་སྲིད་གཞུང་གིས་ད་དུང“རིག་ལྡན་རྣམ་པའི་རྒྱལ་ཁབ་ཀྱི་འཆར་གཞི་2.0”ཡོངས་བསྒྲགས་བྱས་པ་དང་། དེའི་དམིགས་ཡུལ་ནི་དམངས་ཡོངས་ཀྱི་གྲངས་འཛིན་རྩལ་ནུས་མཐོར་གཏོང་ལ་སྐུལ་འདེད་བཏང་ནས་གྲངས་འཛིན་སྤྱི་ཚོགས་བསྐྲུན་རྒྱུ་དེ་རེད།

ཉེ་བའི་ལོ་ཤས་རིང་སིང་ཀ་ཕོར་སྲིད་གཞུང་གིས་རིག་ལྡན་རྣམ་པའི་རྒྱལ་ཁབ་འཛུགས་སྐྲུན་ལ་སྐུལ་འདེད་ཧུར་ཐག་གཏོང་བ་དང་ཚན་རྩལ་གྱི་སྟོབས་ཤུགས་ལ་བརྟེན་ནས་གྲངས་འཛིན་དཔལ་འབྱོར་དར་རྒྱས་བཏང་ཡོད། ཁེ་ལས་འབྲིང་ཆུང་གིས་སིང་ཀ་ཕོར་ས་གནས་དེ་རང་གི་ཁེ་ལས་བསྡོམས་འབོར་གྱི་99%ཙམ་བཟུང་བ་དང་མི་སྤྱོད་མི་གྲངས་ཀྱིས་སྤྱི་ཚོགས་ཀྱི་མི་སྤྱོད་བསྡོམས་འབོར་གྱི་65%ཡན་བཟུང་བ་དེ་ནི་སིང་ཀ་ཕོར་གྱི་བཟོ་སྐྲུན་ལས་རིགས་གྲངས་འཛིན་ཅན་ལ་ཕྱོགས་སྒྱུར་བྱེད་པའི་འགག་རྩ་རེད། 2017ལོར་སིང་ཀ་ཕོར་སྲིད་གཞུང་གིས“ཁེ་ལས་འབྲིང་ཆུང་གི་གྲངས་འཛིན་ཅན་གྱི་འཆར་གཞི”བཏོན་པ་དང་ཁེ་ལས་འབྲིང་ཆུང་ཁྲི་9ལྷག་ཙམ་འཆར་གཞི་དེའི་ནང་ཞུགས་ཡོད། 2019ལོར་སིང་ཀ་ཕོར་སྲིད་གཞུང་གིས་སླར་ཡང“གྲངས་འཛིན་ཅན་གྱི་འགོ་འཛུགས་འཆར་གཞི”བཏོན་ནས། ཁེ་ལས་འབྲིང་ཆུང་གིས་ཤིན་ཀྲན་དངུལ་ཁང་དང་ཏ་ཧྭ་དངུལ་ཁང་སོགས་མཉམ་ལས་རོགས་ཟླར་འབྲེལ་ཡོད་དོན་ཚན་བློ་འདྲི་བྱེད་ཆོག་པས། གྲངས་འཛིན་ཅན་གྱི་འཕེལ་རིམ་མགྱོགས་སུ་ཕྱིན་ཡོད། འཆར་གཞི་ལག་བསྟར་བྱས་ཚུན་ཁེ་ལས་འབྲིང་ཆུང་ཁྲི་3.7ལྷག་ཙམ་ལ་དེའི་ཁྲོད་ནས་ཕན་པ་ཐོབ་ཡོད།

ཁེ་ལས་འབྲིང་ཆུང་གི་གྲངས་འཛིན་ཅན་གྱི་ཕྱོགས་སྒྱུར་རྒྱུན་ཆད་མེད་པར་མགྱོགས་སུ་ཕྱིན་པ་དང་བསྟུན་ནས་དྲ་རྒྱའི་བདེ་འཇགས་ཀྱི་ཉེན་ཁའང་ཆེ་རུ་འགྲོ་བཞིན་ཡོད། ལག་རྩལ་གྱི་རྙོག་འཛིང་རང་བཞིན་དང་མ་གནས་ཀྱི་གནོན་ཤུགས་ཀྱིས་ཚོད་འཛིན་ཐེབས་པའི་དབང་གིས་ཁེ་ལས་འབྲིང་ཆུང་མང་པོ་ཞིག་གིས་འཐུས་སྒོ་ཚང་བའི་དྲ་རྒྱའི་བདེ་འཇགས་ཀྱི་མ་ལག་ཅིག་འཛུགས་ཐུབ་ཀྱི་མེད། བསྡོམས་རྩིས་གྲངས་གཞི་ལས་མངོན་པར། སིང་ཀ་ཕོར་གྱི་ཁེ་ལས་འབྲིང་ཆུང་30%ཙམ་གྱིས་དགོས་ངེས་ཀྱི་དྲ་རྒྱའི་བདེ་འཇགས་བྱེད་ཐབས་སྤྱད་ཡོད་པ་ལས་གཞན། ཁེ་ལས་བཅུ་ཆ་བརྒྱད་ཙམ་ལ་ཚད་གཞི་མི་འདྲ་བའི་དྲ་རྒྱའི་བདེ་འཇགས་ཀྱི་ཚུར་རྒོལ་ཕོག་མྱོང་ཡོད། ཁེ་ལས་འབྲིང་ཆུང་ལ་དྲ་རྒྱའི་འཇིགས་སྐུལ་འགོག་རོགས་བྱ་ཆེད།“གྲངས་འཛིན་ཁེ་ལས་ཀྱི་འཆར་གཞིའི”ནང་ཁེ་ལས་འབྲིང་ཆུང་ལ་དམིགས་པའི་དྲ་རྒྱའི་བདེ་འཇགས་ཐོན་ཁུངས་གཙོ་གནད་ཐོག་བསྡུ་སྒྲིལ་བྱས་ཏེ་རིམ་པ་མང་བའི་དྲ་རྒྱའི་བདེ་འཇགས་ཀྱི་འགོག་སྲུང་མ་ལག་འཛུགས་རྒྱུ་ཡིན་པའི་ནང་དྲ་རྒྱའི་བདེ་འཇགས་ཀྱི་ཇུས་གཞི་དང་ཚད་ལེན་ལག་ཆ། བློ་འདྲིའི་ཞབས་ཞུ། ལས་རིགས་ཀྱི་དྲ་རྒྱའི་བདེ་འཇགས་ཀྱི་ཚད་གཞི་སོགས་ཚུད་ཡོད།