“ངས་མཛེས་སྡུག་ལྡན་པའི་གྲོང་གསེབ་ལ་བཀྲག་མདངས་གསར་པ་བསྣན་ཏེ་གྲོང་གསེབ་དར་རྒྱས་ཁྱབ་ཁོངས་ཀྱི་ལས་བྱེད་པ་ཡོངས་དང་མཉམ་དུ་དེ་བས་བརྗིད་ཆེའི་འཆར་གཞི་འགོད་འདོད་ཡོད”ཅེས་པ་ནི་ཀྲུང་གོ་རྡོ་སྣུམ་རྫས་འགྱུར་ཚོགས་པས“ཕུལ་བྱུང་གཞོན་ནུ་བཅུར”བྱ་དགའ་སྐབས་དང་པོ་སྤྲོད་པའི་མཛད་སྒོའི་ཐོག་ལུའུ་ལི་ཤུན་གྱིས་སྤོབས་ཉམས་ཆེ་ལ་ཁེངས་སྐྱུང་ངང་བཤད་པའི་བྱ་དགའ་ཐོབ་པའི་མྱོང་ཚོར་གླེང་སྐབས་ཀྱི་སྐད་ཆ་དུམ་བུ་ཞིག་རེད།

ལུའུ་ལི་ཤུན་ནི་གསར་བརྗེའི་གནས་མཆོག་ཡན་ཨན་ནས་ཡིན་ཞིང་། ཁོང་ནི་ཀྲུང་གོ་རྡོ་སྣུམ་རྫས་འགྱུར་ཚོགས་པའི་ཁག་བཅུ་པའི་བོད་སྐྱོར་ལས་བྱེད་པ་དང་། ཧྲའན་ཤིས་རྡོ་སྣུམ་ཀུང་སི་ཡན་ཨན་ཡན་ལག་ཀུང་སིའི་སྤྱི་ཁྱབ་ཅིང་ལི་གཞོན་པ་ཡིན་ལ། ནག་ཆུ་གྲོང་ཁྱེར་དཔལ་མགོན་རྫོང་གི་རྒྱུན་ལས་རྫོང་དཔོན་གཞོན་པའང་རེད། གསར་བརྗེའི་རིག་གནས་ཀྱི་བག་ཆགས་དང་ཤུགས་རྐྱེན་བཟང་པོའི་འོག བོད་སྐྱོར་དུ་འགྲོ་བའི་གོ་སྐབས་ཡོད་པ་ཤེས་སྐབས་ཁོང་གི་སེམས་ནང་གི་ལས་འགན་སྒྲུབ་སེམས་རང་ཤུགས་སུ་འཕེལ་ཏེ་2022ལོའི་ཟླ་7པར་བོད་སྐྱོར་གྱི་རྒྱང་ལམ་ཐོག་བསྐྱོད་པ་རེད།

ལུའུ་ལི་ཤུན་གྱིས“དཔལ་མགོན་དུ་སླེབས་ཙམ་ལ། རིམས་ནད་སྔོན་འགོག་དང་ཚོད་འཛིན་ལས་དོན་དེ་ངའི་ངོས་ནས་བརྗོད་ན་དམིགས་བསལ་གྱི་ཚོད་བགམ་ཞིག་རེད། རང་ཉིད་ནི་གསར་བརྗེའི་གནས་མཆོག་ཡན་ཨན་ནས་ཡོང་བ་ཞིག་ཡིན་པའི་ངོས་ནས། ཡན་ཨན་གྱི་སྙིང་སྟོབས་རྒྱུན་འཛིན་ཡག་པོ་བྱེད་དགོས་པ་མ་ཟད། བོད་སྐྱོད་པ་རྒན་གྲས་ཀྱི་སྙིང་སྟོབས་དེ་བས་ལག་ལེན་ཡག་པོ་བསྟར་དགོས་ཞེས་རང་ལ་ལྕག་སྐུལ་བྱེད་ཀྱི་ཡོད”ཅེས་བརྗོད།

དཔལ་མགོན་གྱི་གནས་ཚུལ་ལ་ཕྱོགས་ཡོངས་ནས་ཤེས་རྟོགས་བྱ་ཆེད། ལུའུ་ལི་ཤུན་གྱིས་གྲོང་ཚོ་དང་དུད་ཚང་དང་གཞི་རིམ་དུ་བསྐྱོད་པར། དུས་ཐུང་ཟླ་བ་གསུམ་ནང་རྫོང་ཡོངས་ཀྱི་ཤང་གྲོང་10དང་། གྲོང་ཚོ(གྲོང་ལྷན)88 སློབ་གྲྭ་33 ཁེ་ལས་ཁག་གཅིག་བཅས་བསྐོར་ཟིན་ཡོད། ཕྲུ་གུ་ཚོས་སྐོམ་པ་ཆུ་འདོད་ལྟར་ཤེས་བྱ་སྦྱོང་འདོད་ཆེན་པོ་བྱེད་པ་མཐོང་སྐབས་ཁོང་གིས་ཀྲུང་གོ་རྡོ་སྣུམ་རྫས་འགྱུར་ཚོགས་པའི“མི་སེར་ཁྱིམ་གྱི་སྒོ་རྩའི་སློབ་གྲྭ་ཡག་པོ་གཉེར་བའི”ཁས་ལེན་དོན་འཁྱོལ་ཧུར་ཐག་བྱས་པ་དང་། སློབ་གསོའི་རོགས་སྐྱོར་དེ་བོད་སྐྱོར་ལས་དོན་གྱི་གཙོ་གནད་དུ་བརྩིས་ནས། དགེ་རྒན་གྱི་གནས་སྦྱར་གསོ་སྦྱོང་དང་སློབ་མའི་ལྗོངས་ཕྱིར་སྐོར་སྐྱོད་སློབ་སྦྱོང་སྒྲིག་འཛུགས་བྱས་པ་མ་ཟད། བློ་རིག་སློབ་ཁང་དང་ལུས་རྩལ་ཁང་སོགས་ཀྱང་བསྐྲུན་ཏེ་སློབ་ཁྲིད་སྒྲིག་བཀོད་ཕྱོགས་ཡོངས་ནས་ལེགས་སུ་བཏང་བ་རེད།

བསྡོམས་རྩིས་བརྒྱབ་པར་གཞིགས་ན། ཀྲུང་གོ་རྡོ་སྣུམ་རྫས་འགྱུར་ཚོགས་པས་ལོ་གཉིས་ལྷག་ཙམ་རིང་བསྡོམས་མ་དངུལ་སྒོར་ཁྲི་4000ལྷག་ཙམ་བཏང་ནས་རྫོང་སློབ་འབྲིང་དང་། རྫོང་ཆ་ཚང་སློབ་ཆུང་། ཀྲུང་གོ་རྡོ་སྣུམ་རྫས་འགྱུར་སློབ་ཆུང་བཅས་ཀྱི་མཁྲེགས་ཆས་དང་མཉེན་ཆས་ཀྱི་སྒྲིག་བཀོད་འཐུས་སྒོ་ཚང་དུ་གཏོང་བར་སྤྱད་པས། དཔལ་མགོན་རྫོང་ཁོངས་ཀྱི་དེང་རབས་ཅན་གྱི་སློབ་གཉེར་ཆུ་ཚད་མཐོ་རུ་ཏན་ཏིག་ཕྱིན་ཡོད།

ལུའུ་ལི་ཤུན་གྱིས་དཔལ་མགོན་རྫོང་གི་ལས་བྱེད་པ་དང་མང་ཚོགས་ཚོའི་དམར་པོར་གྱུར་པའི་མིག་ཟུང་དང་སྨུག་པོར་གྱུར་པའི་མཆུ་ཏོ་མཐོང་སྐབས། ཁོང་གིས་བདེ་ཐང་འགན་ལེན་རྣམ་གྲངས་ལ་དམ་འཛིན་ནན་པོ་བྱས་ནས། དཔལ་མགོན་རྫོང་གི་གསོ་རླུང་མཁོ་འདོན་ས་ཚིགས་གཉེར་སྐྱོང་བདེ་བླག་ཐུབ་པར་སྐུལ་འདེད་བཏང་བ་རེད། 2022ལོ་ནས་ད་བར། གསོ་རླུང་མཁོ་འདོན་ས་ཚིགས་ཀྱིས་རིམ་རྩིས་བརྒྱབ་ན་40Lཡི་གསོ་རླུང་ལྕགས་དམ་24696སྡེབ་སྐྱེལ་བྱས་ནས་མི་ཁྲི་2ལྷག་ཙམ་གྱི་གསོ་རླུང་གི་དགོས་མཁོ་བསྐངས་ཡོད། དེ་དང་ཆབས་ཅིག དཔལ་མགོན་རྫོང་བོད་ལུགས་གསོ་རིག་སྨན་ཁང་གི་གནས་སྤོས་ཁུལ་གྱི་རྨང་གཞིའི་སྒྲིག་བཀོད་སྒྱུར་བཀོད་རྣམ་གྲངས་དང་། ཤེ་སྒེར་ཤང་གི་དམངས་འཚོའི་འཐུང་ཆུའི་ལས་གྲྭའི་རྣམ་གྲངས། དཔལ་མགོན་རྫོང་ཤེ་སྒེར་ཤང་འཕྲོད་བསྟེན་ཁང་གི་སྒྱུར་བཀོད་ལེགས་བཅོས་རྣམ་གྲངས། དཔལ་མགོན་རྫོང་གི་རིམས་འགོག་སྨན་ཁབ་གྲང་ཉར་གྱི་འཕྲལ་སྡོམ་གློག་གཏོང་སྒྲིག་ཆས་ཉོ་སྒྲུབ་སོགས་ཀྱི་རྣམ་གྲངས་ལག་ལེན་བསྟར་བས། དཔལ་མགོན་རྫོང་གི་མང་ཚོགས་ཀྱི་དམངས་འཚོའི་ཆ་རྐྱེན་ལེགས་སུ་ནུས་ལྡན་ཕྱིན་ནས་མང་ཚོགས་ཀྱི་བདེ་ཐང་དང་ཚེ་སྲོག་གི་བདེ་འཇགས་ལ་འགན་ལེན་ཏན་ཏིག་ཐུབ་ཡོད་པ་རེད།

2022ལོའི་ཟླ་7པ་ཚུན་དུ། ལུའུ་ལི་ཤུན་གྱིས་དཔལ་མགོན་རྫོང་གི་མང་ཚོགས་ཀྱི་སྣེ་ཁྲིད་དེ་སློབ་གསོ་དང་། སྨན་བཅོས། ཐོན་ལས། གྲོང་གསེབ་དར་རྒྱས་ཁྱབ་ཁོངས་སོགས་ཀྱི་རྣམ་གྲངས་42སྔ་རྗེས་སུ་ལེགས་སྒྲུབ་བྱས་པར་མ་དངུལ་སྒོར་དུང་ཕྱུར་1.4ལྷག་ཙམ་བཏང་བ་དང་། དཔལ་མགོན་རྫོང་གི་གྲོང་གསེབ་དར་རྒྱས་དང་། ཐོན་ལས་འཕེལ་རྒྱས། དམངས་འཚོ་ལེགས་གཏོང་། མི་རིགས་མཐུན་སྒྲིལ་སོགས་ལ་ཕན་འབྲས་གསར་པ་ཟམ་མི་ཆད་པར་ཐོན་པར་སྐུལ་འདེད་བཏང་བ་རེད།

ལུའུ་ལི་ཤུན་གྱིས་དཔལ་མགོན་རྫོང་གི་ལས་བྱེད་པ་དང་མང་ཚོགས་ཀྱི་འཚོ་བར་སེམས་ཁུར་ཆེན་པོ་བྱེད་ཀྱི་ཡོད་ལ། དཔལ་མགོན་རྫོང་གི་དཔལ་འབྱོར་འཕེལ་རྒྱས་ལའང་དོ་ཁུར་ཆེན་པོ་བྱེད་ཀྱི་ཡོད། འོན་ཀྱང་། ཁོང་རང་ཉིད་ཀྱི་ནང་མིར་ལྟ་རྟོག་བྱེད་ཁོམ་དེ་ཙམ་བྱུང་མེད། ནམ་རྒྱུན་བཟའ་ཟླ་དང་བརྙན་ལམ་གཏོང་སྐབས་ནི་ཁོང་གི་བདེ་སྐྱིད་ཆེ་ཤོས་ཀྱི་དུས་སྐབས་ཡིན་ཡང་། བརྙན་ལམ་ནས་བཟའ་ཟླ་མཐོང་སྐབས་གནོང་འགྱོད་དབང་གིས་སྐད་ཆའང་ཡག་པོ་ཤོད་མ་ཐུབ་པར་གྱུར།

ལོ་གཉིས་ལྷག་ཙམ་གྱི་བོད་སྐྱོར་ལས་དོན་ནང་ལུའུ་ལི་ཤུན་གྱིས་དཔལ་མགོན་རྫོང་གི་ས་ཆ་ཚང་མར་བསྐྱོད་མྱོང་ཞིང་། རིམ་རྩིས་བརྒྱབ་ན་ལམ་ཐག་སྤྱི་ལེ་ཁྲི་2ལྷག་ཙམ་ཟིན་ཡོད། དུས་ཡུན་རིང་པོའི་ནང་ལས་ཀ་ངལ་དུབ་ཆེ་བ་དང་ངལ་གསོ་ཡག་པོ་རྒྱག་ཁོམ་མ་བྱུང་སྟབས་ཁོང་གི་ལུས་ཟུངས་ཞན་དུ་སོང་ཞིང་། ཕོ་བའི་སྐྲན་ནད་ལ་གཤགས་བཅོས་བྱས་ནས་ཉིན་14ལས་མ་སོང་རུང་ཁོང་གིས་དེ་མ་ཐག་ལས་གནས་ཐོག་ཞུགས་ཏེ། བྱ་སྤྱོད་དངོས་ལ་བརྟེན་ནས་ཡན་ཨན་གྱི་སྙིང་སྟོབས་དང་བོད་སྐྱོད་པ་རྒན་གྲས་ཀྱི་སྙིང་སྟོབས་ལ་གསལ་འགྲེལ་བརྒྱབ་ཡོད།

གྲང་ངར་ཆེ་བ་དང་མཁོ་ཆས་དཀོན་པ་སོགས་པའི་དཀའ་ངལ་གྱིས་རྡོ་སྣུམ་རྫས་འགྱུར་ཚོགས་པའི་བོད་སྐྱོར་བའི་སྤྲོ་སེམས་འགོག་ཐབས་བྲལ། ཡན་ཨན་གྱི་སྙིང་སྟོབས་ནས་བོད་སྐྱོད་པ་རྒན་གྲས་ཀྱི་སྙིང་སྟོབས་བར་དང་། ཧྲའན་པེའི་ས་སེར་ས་མཐོ་ནས་མཚོ་བོད་ས་མཐོའི་བར། ཧྲའན་ཤིས་ཡན་ཨན་ནས་བོད་ལྗོངས་དཔལ་མགོན་བར་བཅས་སུ་ལུའུ་ལི་ཤུན་གྱིས་ཐོག་མཐའ་བར་གསུམ་དུ་གུང་ཁྲན་ཏང་མིའི་འགན་འཁྲི་དང་ཐོག་མའི་བསམ་འདུན་བློ་ལ་བརྟན་པོར་བཅངས་ནས། རང་ཉིད་ནུབ་བྱང་བ་ཞིག་ནས་དཔལ་མགོན་བ་ཞིག་ཏུ་འགྱུར་གང་ཐུབ་བྱས་པར། ཁོང་ལ་དཔལ་མགོན་གྱི་མི་སེར་ཚོའི་དགའ་བསུ་ཆེན་པོ་ཐོབ་ཡོད།