ཞི་ཅིན་ཕིང་གིས་འཛམ་གླིང་གནའ་གཞུང་རིག་པའི་ཚོགས་ཆེན་སྐབས་དང་པོར་རྟེན་འབྲེལ་འཕྲིན་ཡིག་སྤྲིངས་པ།
ཟླ་11ཚེས་7ཉིན་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་འཛམ་གླིང་གནའ་གཞུང་རིག་པའི་ཚོགས་ཆེན་སྐབས་དང་པོར་རྟེན་འབྲེལ་འཕྲིན་ཡིག་སྤྲིངས་པ་རེད།
ཞི་ཅིན་ཕིང་གིས་གསུངས་དོན། གནའ་གཞུང་ཤེས་དཔལ་ནི་སྐར་ཚོགས་བཞིན་རྣམ་པར་བཀྲ་བ་དང་། མི་རབས་རྗེས་མར་ཟམ་མི་ཆད་པར་གསོ་སྐྱོང་དང་བློ་སྒོ་འབྱེད་བཞིན་ཡོད། ལོ་ངོ་ཉིས་སྟོང་ལྷག་ཙམ་གྱི་གོང་ཀྲུང་གོ་དང་ཀེ་རི་སེའི་ཤེས་དཔལ་ཆེན་པོ་གཉིས་ཨེ་ཤེ་ཡ་དང་ཡོ་རོབ་སྐམ་ས་ཆེན་པོའི་སྣེ་གཉིས་ནས་ཕན་ཚུན་འོད་མདངས་འཕྲོས་ཏེ། མིའི་རིགས་ཀྱི་ཤེས་དཔལ་གྱི་འཕེལ་འགྱུར་ལ་རྨང་གཞི་བཏིང་བར་ལེགས་སྐྱེས་ཕུལ་ཡོད། ཀྲུང་ཀེ་རྒྱལ་ཁབ་གཉིས་པོས་འཛམ་གླིང་གནའ་གཞུང་རིག་པའི་ཚོགས་ཆེན་སྐབས་དང་པོ་ཐུན་མོང་ཐོག་གཉེར་བ་དང་ཨ་ཐེན་སི་རུ་ཀྲུང་གོའི་གནའ་གཞུང་ཤེས་དཔལ་ཞིབ་འཇུག་ཁང་བཙུགས་ནས་ཀྲུང་ཀེ་རྒྱལ་ཁབ་གཉིས་དང་འཛམ་གླིང་རྒྱལ་ཁབ་ཁག་ལ་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་པའི་ལས་སྟེགས་གསར་པ་ཞིག་བཏོད་ཡོད།
ཞི་ཅིན་ཕིང་གིས་ནན་བཤད་གནང་དོན། ཀྲུང་གོས་ཤེས་དཔལ་རྒྱུན་འཛིན་དང་འཕེལ་རྒྱས་ལ་སྐུལ་འདེད་གཏོང་རྒྱུར་ཧུར་ཐག་གཞོལ་བ་དང་། རྒྱལ་སྤྱིའི་མི་ཆོས་རིག་གནས་སྤེལ་རེས་ལ་ཤུགས་སྣོན་རྒྱག་པ། གོ་ལ་ཧྲིལ་པོའི་ཤེས་དཔལ་གླེང་མོལ་ལ་སྐུལ་འདེད་གཏོང་བ། ཤེས་དཔལ་མི་འདྲ་བའི་ཁྲོད་ནས་བློ་གྲོས་འཚོལ་ཞིབ་དང་འཚོ་བཅུད་བསྡུ་ལེན་ལ་མཐོང་ཆེན་བཅས་བྱས་ཏེ། ཕྱོགས་ཁག་དང་མཉམ་དུ་གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་ལག་ལེན་བསྟར་བ་དང་མིའི་རིགས་ལ་ཐུན་མོང་ཐོག་འཕྲད་པའི་འགྲན་སློང་སྣ་ཚོགས་ལག་གདང་སྦྲེལ་ནས་ཁ་གཏད་བཅག་སྟེ་མིའི་རིགས་ཀྱི་ཤེས་དཔལ་འཕེལ་རྒྱས་དང་ཡར་ཐོན་ལ་ཐུན་མོང་ཐོག་སྐུལ་འདེད་གཏོང་འདོད་ཡོད། རིགས་གཅིག་མཁས་ཅན་དང་མཁས་དབང་ཚོས་གནའ་གཞུང་རིག་པའི་ཞིབ་འཇུག་གི་འགན་འཁྲི་ཕྲག་ཏུ་ཁུར་ནས་ཤེས་དཔལ་རྒྱུན་འཛིན་དང་འཕེལ་རྒྱས་ལ་སྐུལ་འདེད་གཏོང་བ་དང་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་རྒྱུའི་རེ་བ་ཡོད།
འཛམ་གླིང་གནའ་གཞུང་རིག་པའི་ཚོགས་ཆེན་སྐབས་དང་པོ་དེ་ཉིན་པེ་ཅིང་དུ་འགོ་ཚུགས་ཤིང་། བརྗོད་དོན་གཙོ་བོ་ནི“གནའ་གཞུང་ཤེས་དཔལ་དང་དེང་རབས་འཛམ་གླིང”ཞེས་པ་དེ་ཡིན་པ་དང་། ཀྲུང་གོ་སྤྱི་ཚོགས་ཚན་རིག་ཁང་དང་། ཀྲུང་གོ་སློབ་གསོ་པུའུ། ཀྲུང་གོ་རིག་གནས་དང་ཡུལ་སྐོར་པུའུ། ཀེ་རི་སེ་རིག་གནས་པུའུ། ཀེ་རི་སེ་ཨ་ཐེན་སི་ཚན་རིག་ཁང་བཅས་ཀྱིས་ཐུན་མོང་ཐོག་གཙོ་གཉེར་བྱས་པ་ཞིག་རེད།