ཉིན་ཤས་གོང་གསར་འགོད་པས་འབྲེལ་ཡོད་སྡེ་ཚན་ནས་ཤེས་རྟོགས་བྱས་པར། ད་ལོ་ཚུན་དུ་བོད་ཀྱིས་བཟའ་བཅའི་བདེ་འཇགས་ལས་དོན་ལ་མཐོང་ཧ་ཅང་ཆེན་པོ་བྱས་ཏེ་བཟའ་བཅའི་བདེ་འཇགས་ཀྱི“འགན་འཁྲི་གཉིས”(ཁོངས་གཏོགས་དོ་དམ་གྱི་འགན་འཁྲི་དང་ཁེ་ལས་ཀྱི་བྱེད་པོའི་འགན་འཁྲི)དོན་འཁྱོལ་ལ་སྐུལ་འདེད་གཏོང་བ་དེ་ཐོག་མཐའ་བར་གསུམ་དུ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས་འགན་འཁྲི་དོན་འཁྱོལ་སྔར་བས་ལེགས་སུ་གཏོང་བ་དང་བརྒྱུད་རིམ་ཧྲིལ་པོའི་ལྟ་འདོམས་ལ་སྐུལ་འདེད་བཏང་སྟེ་ཞིང་ལས་ཐོན་རྫས་ཀྱི་འཆར་ཅན་ལྟ་ཞིབ་ཚད་ལེན་བྱས་པའི་ཚད་གཞི་ལོན་ཚད་98%ཡན་རྒྱུན་འཁྱོངས་ཐུབ་པ་དང་བཟའ་བཅའི་བདེ་འཇགས་ཀྱི་གདེང་འཇོག་ཚད་གཞི་ལོན་ཚད་99%ཡན་རྒྱུན་འཁྱོངས་ཐུབ་ནས་ས་ཁོངས་རང་བཞིན་དང་བརྒྱུད་རིམ་རང་བཞིན་གྱི་ཉེན་ཁ་མི་ཐོན་པའི་མཐའ་ཚད་བརྟན་པོ་བསྲུངས་ཡོད་པ་རེད།

ཤེས་རྟོགས་བྱུང་བར་གཞིགས་ན། བོད་ཀྱིས་ཐོག་མཐའ་བར་གསུམ་དུ་ཏང་སྲིད་འགན་འཁྲི་གཅིག་མཚུངས་མཐའ་འཁྱོངས་བྱས་ཏེ་ཚད་གཞི་མཐོ་པོས“འགན་འཁྲི་གཉིས”ཏན་ཏིག་ཡོང་བར་སྐུལ་འདེད་བཏང་བ་རེད། གྲོང་ཁྱེར་དང་ས་ཁུལ་7གྱི་རྫོང(གྲོང་ཁྱེར་དང་ཆུས)74ཡི་ཏང་ཨུད་དང་སྲིད་གཞུང་གིས“འགན་འཁྲི་གཉིས”དོན་འཁྱོལ་བྱེད་པ་དེ“འགོ་གཙོ་དང་པོའི”འདུ་འགོད་ལ་བརྩིས་ནས་ལྗོངས་ཡོངས་ཀྱི་འགོ་ཁྲིད་ལས་བྱེད་པ་ཁྲི་1.7ལྷག་ཙམ་གྱིས་བཟའ་བཅའི་ཁེ་ལས་ཁྲི་6.5འགན་གཙང་ལེན་པར་སྐུལ་འདེད་བཏང་བས“ཁོངས་གཏོགས་ཀྱི་དོ་དམ་དང་། ལས་རིགས་ཀྱི་ལྟ་སྐུལ། ཁེ་ལས་ཀྱི་བྱེད་པོ་བཅས་ཟུང་དུ་འབྲེལ་བའི”འགན་འཁྲི་དོན་འཁྱོལ་འབྲེལ་མཐུད་ནུས་ལྡན་བྱུང་བ་རེད། ཁེ་ལས་ཀྱིས་བྱེད་པོའི་འགན་འཁྲི་དོན་འཁྱོལ་ལ་རིགས་དབྱེ་མཛུབ་ཁྲིད་བྱས་ནས་ཉེན་ཁ་དོ་དམ་དང་ཚོད་འཛིན་གྱི་གསལ་ཐོ་བཟོས་ཏེ་ལྗོངས་ཡོངས་སུ་བཟའ་བཅའི་བདེ་འཇགས་ཀྱི་སྤྱི་ཁྱབ་ལྟ་ཞིབ་པ་ཁྲི་1.5ཙམ་དང་བཟའ་བཅའི་བདེ་འཇགས་པ་ཁྲི་6ཙམ་བཀོད་སྒྲིག་བྱས་པས“ཉིན་ལྟར་དོ་དམ་ཚོད་འཛིན་དང་། གཟའ་འཁོར་རེའི་གྲལ་བཤེར། ཟླ་རེའི་བཀོད་གཏོང”བཅས་ཀྱི་ལམ་ལུགས་རྒྱུན་གཏན་ལྟར་འཁོར་སྐྱོད་ཐུབ་པ་རེད།

དེ་དང་ཆབས་ཅིག རང་སྐྱོང་ལྗོངས་བཟའ་བཅའ་དང་སྨན་རྫས་བདེ་འཇགས་གཞུང་ལས་ཁང་གིས་ད་དུང“བོད་ཀྱི་ཁྲོམ་རའི་ལྟ་འདོམས”ཞེས་པའི་སྐད་འཕྲིན་སྤྱི་རྟགས་སུ《ལྗོངས་ཡོངས་ཀྱི་བཟའ་བཅའ་ཐོན་སྐྱེད་གཉེར་སྐྱོང་པས་བཟའ་བཅའི་བདེ་འཇགས་ཀྱི་བྱེད་པོའི་འགན་འཁྲི་རང་རྟོགས་ངང་དོན་འཁྱོལ་བྱེད་དགོས་པའི་སྐོར་གྱི་གསལ་འདེབས》ཡོངས་བསྒྲགས་བྱས་པ་དང་། “མཛོད་གཉིས་དང་ལས་སྟེགས་གཅིག”གི་བྱ་རིམ་ཆུང་ངུ་གང་ལེགས་སྤྱད་དེ་དྲ་ཐོག་གི་གསོ་སྦྱོང་དང་དྲི་བ་དྲིས་ལན་བཏོན་ནས་བཟའ་བཅའ་གཉེར་སྐྱོང་ཁེ་ལས་ཀྱི་བཟའ་བཅའི་ལས་དོན་པ་གསོ་སྦྱོང་དང་དཔྱད་ཞིབ་བྱེད་པར་ཤུགས་སྣོན་བརྒྱབ་སྟེ་བཟའ་བཅའི་བདེ་འཇགས་ཀྱི་དོ་དམ་ནུས་པ་ཆེ་རུ་གཏོང་བར་སྐུལ་འདེད་བཏང་བ་རེད།