ཉེ་བའི་ལོ་ཤས་རིང་། མངའ་རིས་ས་ཁུལ་རུ་ཐོག་རྫོང་གིས་བྱ་སྤྱོད་དངོས་ཀྱི་ཐོག་ནས་ས་མཐོའི་ས་གཙང་སྲུང་སྐྱོང་བྱས་ཏེ་ཐོན་ལས་སྐྱེ་ཁམས་ཅན་དང་སྐྱེ་ཁམས་ཐོན་ལས་ཅན་དུ་འགྱུར་བའི་འཕེལ་རྒྱས་ཀྱི་བསམ་ཕྱོགས་མཐའ་འཁྱོངས་ཀྱིས་སྐྱེ་ཁམས་ལ་བརྟེན་ནས་དཔལ་འབྱོར་ལ་སྐུལ་ཁྲིད་དང་དཔལ་འབྱོར་ལ་བརྟེན་ནས་སྐྱེ་ཁམས་ལ་སྐུལ་འདེད་བཏང་སྟེ་དཔལ་འབྱོར་འཕེལ་རྒྱས་དང་སྐྱེ་ཁམས་སྲུང་སྐྱོང་གཉིས་ཀར་དམ་འཛིན་ཧུར་ཐག་བྱས་པ་རེད།

རུ་ཐོག་རྫོང་གིས་རྒྱལ་ཁབ་ས་ཆ་སྔོ་འགྱུར་གྱི་བྱ་སྤྱོད་ཧུར་ཐག་སྤེལ་ཞིང་། ད་ལོར་མ་དངུལ་སྒོར་ཁྲི་570ལྷག་ཙམ་བཏང་སྟེ་རྫོང་གྲོང་གི་མཐའ་འཁོར་དུ་སྔོ་ལྗང་ཤིང་འཛུགས་བྱ་སྤྱོད་སྤེལ་ནས་རྒྱ་ལྕང་རྐང་ཁྲི་3ལྷག་ཙམ་བཏབ་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རིམ་རྩིས་བརྒྱབ་ན་རུ་ཐོག་རྫོང་གིས་མ་དངུལ་སྒོར་ཁྲི་9800བཏང་ནས་རྒྱ་ལྕང་གི་ཡུག་ཁུལ་ཆེན་པོ་བཞིའི་སྡོང་ཕྲུག་རྟེན་གཞི་འཛུགས་སྐྲུན་བྱས་པར་ད་ཆ་སྡོང་ཕྲུག་རྟེན་གཞིའི་རྒྱ་ཁྱོན་ལ་མུའུ་ཉིས་སྟོང་ལྷག་ཙམ་ཟིན་པ་དང་། ཤིང་སོན་བཙོང་ཚད་དུས་མཚུངས་ལས་119.4%འཕར་ཡོད། 2023ལོར་ཤིན་སོན་བཙོངས་པར་མང་ཚོགས་ལ་ཡོང་འབབ་སྒོར་ཁྲི་1097བྱུང་བ་དང་རྒྱ་ལྕང་དེ་རུ་ཐོག་མང་ཚོགས་ཀྱི་འབབ་འཕར་གྱི་དཔག་བསམ་ཤིང་ལྟ་བུར་གྱུར་ཡོད།

རུ་ཐོག་རྫོང་གིས་མཚོ་མོ་ངང་ལ་རིང་མོའི་མཛེས་ལྗོངས་ཁུལ་གྱི་ཡུལ་སྐོར་ཞབས་ཞུའི་སྤུས་ཚད་རྒྱུན་ཆད་མེད་པར་ལེགས་སུ་བཏང་སྟེ་མཚོ་མོ་ངང་ལ་རིང་མོའི་མཛེས་ལྗོངས་ཁུལ་གྱིས་ལྟེ་བར་བྱས་པའི་ཡུལ་སྐོར་ཐོན་རྫས་རྩེ་གྲའི་ལམ་ཐིག་བཏོད་ནས་མཚོ་མོ་ངང་ལ་རིང་མོ་དང་། སྡེ་རུབ་གྲོང་ཚོ། རུ་ཐོག་གྲོང་ཚོ། དབུས་བྱང་གྲོང་ཚོ་བཅས་ཀྱི་ཡུལ་སྐོར་ལམ་ཐིག་སྐྲུན་མགྱོགས་སུ་བཏང་སྟེ་གྲོང་གསེབ་ཀྱི་ཡུལ་སྐོར་ཐོན་ཁུངས་གསར་སྤེལ་ཤུགས་ཆེན་བྱས་ནས་ལྟ་སྦྱོང་ཡུལ་སྐོར་དང་། རིག་གནས་སྤྲོ་གསེང་མྱོང་རོལ་ཡུལ་སྐོར། ཕྱི་རོལ་གྱི་མྱུལ་དཔྱད་ཡུལ་སྐོར། བརྗོད་དོན་གཙོ་བོའི་པར་ལེན་ཡུལ་སྐོར། གསར་བརྗེའི་ཡུལ་སྐོར་བཅས་གཙོ་གནད་ཐོག་འཕེལ་རྒྱས་བཏང་ནས“རིག་གནས་ཡུལ་སྐོར་གྱི་རྫོང་གྲགས་ཅན”གྱི་མིང་གྲགས་བཏོད་ཡོད། མིག་སྔའི་བར་ཡུལ་སྐོར་བ་མི་ཐེངས་ཁྲི་9.30ལ་སྣེ་ལེན་ཞུས་པར་ཡུལ་སྐོར་ཡོང་འབབ་སྒོར་དུང་ཕྱུར་1.2བྱུང་ཡོད།

རུ་ཐོག་རྫོང་གིས་ཁུ་ལུ་ལས་སྣོན་ཞིབ་ཚགས་ཐོན་ལས་རྒྱ་སྟོབས་ཆེ་རུ་བཏང་སྟེ་རུ་ཐོག་གི་ཁུ་ལུ་དཀར་པོའི་ཐོན་ལས་ཀྱི་གསོན་ཤུགས་འཕེལ་བར་བྱས་ནས་ཁུ་ལུ་ཧབ་འཚོང་གི་བྱེད་སྒོ་སྐབས་གསུམ་པ་དང་བཞི་པ་བདེ་བླག་ངང་གཉེར་ནས་རུ་ཐོག་རྫོང་གི་ཁུ་ལུ་དཀར་པོ་འཛམ་གླིང་ལ་སྐད་གྲགས་ཆོད་པར་བྱས་ཡོད། 2023ལོར་ལོ་ཧྲིལ་པོར་ཁུ་ལུ་ཏུན་83.4བཙོངས་པར་ཡོང་འབབ་སྒོར་ཁྲི་2583.95བྱུང་བའི་ཁྲོད་རིམ་པ་ལེགས་ཤོས་ཀྱི་ཁུ་ལུ་འཇམ་པོ་སྤྱི་རྒྱ་རེར་སྒོར་1355བྱས་ནས་འཚོང་རྒྱུའི་ཚོང་འགྲིགས་ཏེ། མ་བཅོས་ཁུ་ལུའི་ལོ་རྒྱུས་ཐོག་གི་རིན་གོང་མཐོ་ཤོས་བཏོད་ནས་རིན་གོང་གསེར་དང་མཉམ་ཡོད། ཁུ་ལུ་དཀར་པོའི་ར་གསོ་སྤེལ་དུད་ཚང་ལ་ཁ་ཡོད་ལག་ཡོད་ཀྱི་དངུལ་སྨར་ཡོང་འབབ་བྱུང་ཡོད།