ད་ལོའི་ཟླ་6ཚེས་19ཉིན། “ངོ་མཚར་ཅན་གྱི་ཁམས་པ། བདེ་སྐྱིད་ལྡན་པའི་ཆབ་མདོ”ཞེས་པའི་བོད་ལྗོངས་ཆབ་མདོ་གྲོང་ཁྱེར་གྱི་ཚོང་འགུགས་མ་འདྲེན་གྱི་ཆེད་དོན་འོས་སྦྱོར་འདུ་ཚོགས་ཧྥུའུ་ཀྲོའུ་རུ་འཚོགས་པ་རེད། ད་ཐེངས་ཀྱི་འོས་སྦྱོར་འདུ་ཚོགས་ཐོག་ཆབ་མདོ་གྲོང་ཁྱེར་གྱི་ཚོང་འགུགས་མ་འདྲེན་ལ་གྲུབ་འབྲས་མངོན་གསལ་དོད་པོ་ཐོབ་ནས་ཚོང་འགུགས་མ་འདྲེན་གྱི་གན་རྒྱ་ཁག་10བདེ་བླག་ངང་བཞག་པ་དང་། འདོད་ཕྱོགས་མ་དངུལ་མི་དམངས་ཤོག་སྒོར་དུང་ཕྱུར་34.46ཟིན་ཡོད་ཅིང་། དེ་དག་ནུས་རྒྱུ་གཙང་མ་དང་། རིག་གནས་ཡུལ་སྐོར་གྱི་ལུས་གསོ། ས་མཐོའི་སྐྱེ་དངོས་སོགས་ཀྱི་ཁྱབ་ཁོངས་དང་འབྲེལ་བ་ཡོད་ཅིང་། འདི་ནི་ཆབ་མདོའི་ཚོང་འགུགས་མ་འདྲེན་གྱི་གཙོ་གནད་རྣམ་གྲངས་ཀྱི་གན་རྒྱ་འཇོག་པའི་མཛད་སྒོ་འཚོག་ཡུལ་ཡིན་པ།

ད་ལོའི་ལོ་སྟོད་དུ་ལྗོངས་ཡོངས་ཀྱི་ཚོང་འགུགས་མ་འདྲེན་གྱི་འབྲེལ་ཡོད་སྡེ་ཚན་གྱིས་གནད་ཆེར་དམ་འཛིན་དང་གནད་མེད་ཟུར་འཇོག་མཐའ་འཁྱོངས་ཀྱིས་རྣམ་གྲངས་ཚོང་འགུགས་དང་། ཐོན་ལས་ཚོང་འགུགས། གླིང་ཁུལ་ཚོང་འགུགས། བོད་སྐྱོར་ཚོང་འགུགས་བཅས་ལ་དམིགས་ཏེ། ཚོང་འགུགས་རྣམ་གྲངས་ཀྱི་དུས་འཁོར་ཧྲིལ་པོར་དོ་དམ་བྱ་རྒྱུར་ཤུགས་སྣོན་རྒྱག་པ་དང་ཚོང་གཉེར་ཁོར་ཡུག་གི་བརྒྱུད་རིམ་ཧྲིལ་པོའི་ཞབས་ཞུ་འཐུས་སྒོ་ཚང་དུ་བཏང་ཞིང་། རིམ་རྩིས་བརྒྱབ་ན་ཚོང་འགུགས་མ་འདྲེན་གྱི་རྣམ་གྲངས་ཁག་759ལག་བསྟར་བརྒྱབ་པར་མ་དངུལ་སྒོར་དུང་ཕྱུར་422.5དམིགས་སར་འབྱོར་བ་དང་འཕེལ་རིམ་84.50%ལེགས་གྲུབ་བྱུང་བ་དེ་དུས་མཚུངས་ལས་44.84%འཕར་ཡོད།

ལས་དོན་དོན་འཁྱོལ་ལ་དམ་འཛིན་ནན་པོ་བྱས་པ།

ད་ལོའི་ལོ་སྟོད་དུ་ལྗོངས་ཡོངས་ཀྱི་ཚོང་གཉེར་ཁོར་ཡུག་ལེགས་སུ་གཏོང་བ་དང་ཚོང་འགུགས་མ་འདྲེན་གྱི་ལས་དོན་ཚོགས་འདུ་འཚོགས་ནས་བོད་རང་སྐྱོང་ལྗོངས་ཀྱི་ཚོང་འགུགས་མ་འདྲེན（མ་འཇོག་སྐུལ་འདེད）ལས་དོན་འགོ་ཁྲིད་ཚོགས་ཆུང་བཙུགས་པ་དང་། ནུས་རྒྱུ་གཙང་མ་དང་། ལྗང་མདོག་བཟོ་ལས། ཀུན་སྤྱོད་མཁའ་འགྲུལ་སོཌ་ཐོན་ལས་ཀྱི་ཚོང་འགུགས་ཆེད་དོན་ཚོགས་ཆུང་6བཙུགས་ནས་གལ་ཆེའི་གནད་དོན་ལ་དུས་ཐོག་ཏུ་ཞིབ་འཇུག་དང་ཐག་གཅོད་བྱས་ཡོད། དེས་མ་ཚད“འགོ་ཁྲིད་ཀྱིས་མཐོང་ཆེན་དང་། སྡེ་ཚན་གྱིས་མཐུན་སྦྱོར། གོང་འོག་མཉམ་འགུལ། ཁུར་མཉམ་ལེན་དང་དོན་སྤྱི་སྒྲུབ”བཅས་བྱེད་པའི་ལས་ཀའི་རྣམ་པ་གསར་པ་བཏོད་ཡོད།

རང་སྐྱོང་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་ཕྱོགས་ཡོངས་ནས་དོན་འཁྱོལ་བྱས་ཏེ་ལྷ་ས་གྲོང་ཁྱེར་གྱིས་ཚོང་འགུགས་མ་འདྲེན་དེ“འགོ་ཁྲིད་ཨང་དང་པོའི”འདུ་འགོད་ལ་བརྩིས་ནས《2024ལོའི་ལྷ་ས་གྲོང་ཁྱེར་གྱི་ཚོང་འགུགས་མ་འདྲེན་གྱི་གཙོ་གནད་ལས་དོན་གསལ་ཐོ》བཟོས་ཏེ་ཕྱོགས་ཁག་8ཐད་ཀྱི་གཙོ་གནད་ལས་དོན་ཁག་13གྱི་འགན་འཁྲི་ཞིབ་ཕྲ་ཅན་དང་དུས་ཚོད་མཚམས་ཚིགས་ཅན་དུ་བཏང་ཡོད།

ལྷོ་ཁ་གྲོང་ཁྱེར་གྱིས་ཐོན་ལས་ཚོང་འགུགས་ལ་དམིགས་ནས། སྔ་རྗེས་སུ་ཀན་སུའུ་དང་། ཁྲང་ཧྲ། ཤིས་ཨན། ཁྲེང་ཏུའུ། ཁྲུང་ཆིང་སོགས་སུ་བསྐྱོད་དེ་ཚོང་འགུགས་བྱེད་སྒོ་ཐེངས་8སྤེལ་བ་མ་ཟད། ད་དུང་ལིའུ་ཨན་གསར་སྤེལ་ཁུལ་དང་། ཧྥུའུ་ཅན་ཚོང་ཚོགས། བོད་སྐྱོར་ཞིང་ཆེན་དང་གྲོང་ཁྱེར་བཅས་དང་ཁ་གཏད་སྦྲེལ་མཐུད་བྱས་ནས“གདན་འདྲེན་ཞུ་བའི”ངོ་འཕྲད་གྲོས་མོལ་ཐེངས་30ཙམ་བྱས་ཏེ་གྲོས་མཐུན་ཁག་31བཞག་པའི་ནང“བོད་ཀྱི་ཐོན་རྫས་ཧུའུ་ནན་དུ་འཚོང་བའི”ཞིང་ལས་ཐོན་རྫས་འཁོར་རྒྱུག་མ་ལག་འཛུགས་སྐྲུན་རྣམ་གྲངས་དང་། ཞིང་ཞོར་ཐོན་རྫས་ལས་སྣོན་གཏིང་ཟབ་རྣམ་གྲངས། བེད་མེད་ཐོན་ཁུངས་ཕྱོགས་བསྡུས་བསྐྱར་སྤྱོད་རྣམ་གྲངས་སོགས་རྣམ་གྲངས་གསར་པ་17ཚུད་ཡོད་པ་རེད།

གཞིས་རྩེ་གྲོང་ཁྱེར་གྱིས་ཚོང་འགུགས་མ་འདྲེན་ལས་དོན་ལ་ཚད་མཐོའི་མཐོང་ཆེན་བྱས་ནས་སྔ་རྗེས་སུ་ཁྲུང་ཆིང་དང་། ཤིས་ཨན། ཧྲང་ཧའེ། ཧར་པིན། ཁྲེང་ཏུའུ། ཤིན་ཅང་སོགས་སུ་བསྐྱོད་དེ་ཚོང་འགུགས་མ་འདྲེན་གྱི་བྱེད་སྒོ་ཐེངས་9སྤེལ་ཏེ་གན་རྒྱ་ཁག་37བཞག་པའི་ནང་དེང་རབས་ཞབས་ཞུ་དང་། ལྗང་མདོག་བཟོ་ལས། རིག་གནས་ཡུལ་སྐོར། ནུས་རྒྱུ་གཙང་མ། སྨན་བཅོས་ལུས་གསོ་སོགས་ཚུད་ཡོད་པ་དང་མ་འཇོག་བསྡོམས་འབོར་སྒོར་དུང་ཕྱུར་119.95ཟིན་ཡོད་པ་རེད།

ལྗོངས་ཡོངས་ཀྱི་ཚོང་འགུགས་མ་འདྲེན་སྡེ་ཚན་ཁག་གི་མཐུན་སྦྱོར་གཞོགས་འདེགས་འོག “ས་ཁུལ་དང་གྲོང་ཁྱེར་གྱི་ཚོང་འགུགས་ལ་ཤུགས་སྣོན་ཧུར་ཐག་རྒྱག་པ་དང་། རྣམ་གྲངས་ཚོང་འགུགས་ཏན་ཏན་ཏིག་ཏིག་བྱེད་པ། ཐོན་ལས་ཚོང་འགུགས་ལ་ཕན་འབྲས་མངོན་གསལ་ཐོན་པ། གླིང་ཁུལ་ཚོང་འགུགས་ཐད་ཚོང་པ་སྟོབས་ཆེན་དང་མ་དངུལ་འབོར་ཆེན་འདྲེན་འགུག་བྱེད་པ། བོད་སྐྱོར་ཚོང་འགུགས་ལ་ཤུགས་སྣོན་ཧུར་ཐག་རྒྱག་པ”བཅས་ཀྱི་ལས་ཀའི་རྣམ་པ་བཟང་པོ་ཞིག་ཆགས་བཞིན་ཡོད་པ་རེད།

ཞབས་ཞུ་ལེགས་སུ་བཏང་ནས་ཞན་ཆ་སེལ་བ།

ཆབ་མདོ་གྲོང་ཁྱེར་གོ་འཇོ་རྫོང་གིས“གཅིག་སྒྲིལ་གསུམ”གྱི་ལས་སྟེགས(ཞབས་ཞུའི་ལས་སྟེགས་དང་། མཉམ་འགུལ་ལས་སྟེགས། ལྟ་སྐུལ་ལས་སྟེགས)ནུས་ཤུགས་ཡོད་རྒུས་བཏོད་དེ་12345ཐད་སྦྲེལ་ཁ་པར་གྱི་ལས་ཐོ་བརྒྱུད་སྒྲུབ་དང་། བཟང་ཞན་དཔྱད་འཇོག་ཨང་རྟགས། སྲིད་དོན་ཞབས་ཞུའི་ཐད་སྦྲེལ་ཁ་པར་གྱི“5+2”བཅས་ཀྱི་དྲ་ཐོག་ཞབས་ཞུ་སྒྲུབ་སྟངས་བཅས་དང་ཟུང་འབྲེལ་བྱེད་སྟངས་འཚོལ་ཞིབ་དང་ཁྱབ་གདལ་གཏོང་བ་དང་། དུས་དང་རྣམ་པ་ཀུན་ཏུ་མི་ཐབས་ལ་བརྟེན་ནས་ཞབས་ཞུ་ཚད་ལྡན་དུ་གཏོང་བ། 12345ཐད་སྦྲེལ་ཁ་པར་ནས་ལས་ཐོ་བརྒྱུད་གཏོང་བྱེད་པ་དང་སྲིད་དོན་ཞབས་ཞུའི་ཐད་སྦྲེལ་ཁ་པར་གྱི་འབྲེལ་ཡོད་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་བ་བཅས་བྱས་ཏེ་ཐད་སྦྲེལ་ཁ་པར་བདག་སྤྲོད་དང་རྒྱབ་ཕྱོགས་ཀྱི་ཞབས་ཞུ་འབྲེལ་མཐུད་དམ་ཟབ་ཡོང་བར་བྱས་ཡོད།

ལྷོ་ཁ་གྲོང་ཁྱེར་གྱིས་ཚོང་འགུགས་མ་འདྲེན་གྱི་ཞབས་ཞུའི་སྤུས་ཚད་དང་ཕན་འབྲས་ཆེ་རུ་གཏོང་རྒྱུར་སྣང་ཆེན་བྱས་ཏེ། རྣམ་གྲངས་མཐུན་སྦྱོར་དང་ངོ་འཕྲད་གྲོས་མོལ་བྱེད་པ་དང་། ས་ཆ་བདམས་ནས་དོན་འཁྱོལ་བྱེད་པ། འཛུགས་སྐྲུན་གཉེར་སྐྱོང་སོགས་བརྒྱུད་རིམ་ཧྲིལ་པོར་རྗེས་སྙེག་བྱེད་པའི་ཞབས་ཞུ་ལེགས་སུ་གཏོང་བ་དང་། ཁེ་ལས་ལ་འཕྲད་པའི་དཀའ་ངལ་དང་འགག་གནད་མཐུན་སྦྱོར་ཐག་གཅོད་བྱེད་པ། རྣམ་གྲངས་དོན་འཁྱོལ་དང་འཛུགས་སྐྲུན་ལ་སྐུལ་འདེད་གཏོང་བ་བཅས་བྱས་ནས་ཁེ་ལས་ལ་ལྷོ་ཁའི་སེམས་ཤུགས་ཏན་ཏིག་ཚོར་དུ་བཅུག་སྟེ་སྤུས་ལེགས་ཀྱི་རྣམ་གྲངས་དེ་བས་མང་བ་ལྷོ་ཁར་གཞི་ཚུགས་ཐུབ་པར་བྱས་ཡོད།

ད་ལོ་ནས་བཟུང་། རང་ལྗོངས་ཀྱི་འབྲེལ་ཡོད་སྡེ་ཚན་གྱིས“རྣམ་གྲངས་གཅིག་དང་། འགོ་ཁྲིད་གཅིག ཇུས་གཞི་གཅིག དམ་འཛིན་མཐར་ཕྱིན”བཅས་ཀྱི་བྱ་ཐབས་གཞིར་བཟུང་། ཚོང་འགུགས་མ་འདྲེན་རྣམ་གྲངས་ལ“བརྒྱུད་རིམ་ཧྲིལ་པོ་ཚབ་སྒྲུབ་དང་ཆེད་སྒྲུབ་ཞབས་ཞུའི”ལས་ཀའི་ལམ་སྲོལ་ལག་བསྟར་བྱས་ནས་རྣམ་གྲངས་བློ་འདྲི་དང་། འགྲོ་ལུགས་གཉེར་བ། སྲིད་ཇུས་གསལ་འགྲེལ་སོགས་ཚུད་པའི་གཅིག་འཐུས་རྣམ་པའི་ཞབས་ཞུ་བསྒྲུབས་ཏེ་ཁེ་ལས་ཀྱི་མ་འཇོག་དོན་འཁྱོལ་བདེ་བླག་ཐུབ་པར་འགན་ལེན་བྱས་ཡོད།

སྤུས་ཚད་དང་ཕན་འབྲས་ཆེ་རུ་གཏོང་བར་སྐུལ་འདེད་བཏང་བ།

ལྷ་ས་གྲོང་ཁྱེར་མ་འཇོག་སྐུལ་སྤེལ་ཅུས་ཀྱི་འབྲེལ་ཡོད་འགན་འཁུར་བས། “ད་ལོའི་ལོ་སྟོད་ནས་བཟུང་ང་ཚོས་ཚོང་འགུགས་མ་འདྲེན་རྣམ་གྲངས(ཁེ་ལས)ལ་རྒྱབ་སྐྱོར་བྱེད་ཤུགས་ཆེ་རུ་རྒྱུན་ཆད་མེད་པར་བཏང་བ་དང་། ཁེ་ལས་ཀྱི་དགོས་མཁོར་དམིགས་ནས་སྲིད་ཇུས་གསལ་འགྲེལ་གྱི་བྱེད་སྒོ་སྤེལ་བ། ཆེད་མི་བཀོད་སྒྲིག་བྱས་ནས་གྲོང་ཁྱེར་གྱི་ཚོང་འགུགས་མ་འདྲེན་གྱི་གཟིགས་སྐྱོང་སྲིད་ཇུས་ལ་གསལ་འགྲེལ་སྤེལ་རེས་དང་ས་གནས་ས་ཐོག་ཏུ་དོགས་གནད་ལ་ལན་བཏབ་སྟེ་ཁེ་ལས་ཀྱིས་ཚོང་འགུགས་མ་འདྲེན་གྱི་གཟིགས་སྐྱོང་སྲིད་ཇུས་ཕྱོགས་ཡོངས་ནས་ཤེས་རྟོགས་ཐུབ་པར་བྱས་ཡོད”ཅེས་བཤད།

གཙོ་གནད་ཐོན་ལས་དང་དེ་བཞིན་མ་འཇོག་སྲིད་ཇུས་དྲིལ་བསྒྲགས་ཐད་ལོ་ཧྲིལ་པོར་ཚོང་འགུགས་བྱེད་སྒོ་ཐེངས་22སྤེལ་བ་དེ་རིག་གནས་ཡུལ་སྐོར་དང་ནུས་རྒྱུ་གཙང་མ་སོགས་ཐོན་ལས་10དང་འབྲེལ་བ་ཡོད་པ་དང་། ཁེ་ལས་900ལྷག་ཙམ་ཞུགས་པ། ཁྱོན་རྣམ་གྲངས་ཁག་50ལ་གན་རྒྱ་བཞག་པར་གྲོས་མཐུན་མ་དངུལ་སྒོར་དུང་ཕྱུར་158ཟིན་པ། མིག་སྔར་རྣམ་གྲངས་ཁག་25དོན་འཁྱོལ་ཐུབ་པ་དང་དོན་འཁྱོལ་ཐུབ་ཚད་50%ཟིན་པ། མ་དངུལ་སྒོར་དུང་ཕྱུར་9.31དམིགས་སར་འབྱོར་བ་བཅས་རེད།

ལྗོངས་ཡོངས་ཀྱི་ཚོང་འགུགས་མ་འདྲེན་གྱི་འབྲེལ་ཡོད་སྡེ་ཚན་གྱིས་ལོ་ཧྲིལ་པོའི་སྒོར་དུང་ཕྱུར་500ཡི་ཚོང་འགུགས་མ་འདྲེན་གྱི་དམིགས་ཚད་ལས་འགན་ལ་རྒྱུན་མཐུད་དམིགས་པ་དང་། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་སྣོན་བརྒྱབ་ཁར་བྱེད་ཐབས་སྔར་བས་ཏན་ཏིག་དང་། ལས་ཕྱོད་སྔར་བས་ཆེ་བ། ཞབས་ཞུ་སྔར་བས་ལེགས་པ་བཅས་ཀྱི་ཐོག་ནས་ཚོང་འགུགས་མ་འདྲེན་གྱི་ལས་དོན་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་བཏང་ཡོད།