ཉིང་ཁྲི་གྲོང་ཁྱེར་བྲག་ཡིབ་ཆུས་ཉིང་ཁྲི་གྲོང་རྡལ་སྤྲིན་པ་གྲོང་ཚོའི་ཁོངས་གཏོགས་ཀྱི་རང་བྱུང་གྲོང་ཚོ་ཞིག་ཡིན་པའི་ཀ་ལ་གྲོང་ཚོ་ནི་རྒྱལ་ལམ་318ལམ་རྒྱུད་དུ་གནས་ཡོད།

སྔོན་ཆད་ཀྱི་ཀ་ལ་གྲོང་ཚོར་གྲོང་མི་ཚོས་སྲོལ་རྒྱུན་གྱི་རྣམ་པ་ལྟར་ཐོན་སྐྱེད་དང་འཚོ་བ་སྐྱེལ་བ་དང་། ད་ཆ་ཀ་ལ་གྲོང་ཚོས་ཏང་གི་དམངས་བདེ་དམངས་ཕན་གྱི་སྲིད་ཇུས་ལ་བརྟེན་པ་དང་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་གྲོང་གསེབ་ཀྱི་ཡུལ་སྐོར་འཕེལ་རྒྱས་ཤུགས་ཆེན་གཏོང་བཞིན་ཡོད། 2021ལོ་ནས་བཟུང་། ཀ་ལ་གྲོང་ཚོས་རིམ་རྩིས་བརྒྱབ་ན་ཡུལ་སྐོར་བ་མི་ཐེངས་ཁྲི་28.5ལ་སྣེ་ལེན་ཞུས་པར་ཡུལ་སྐོར་ཡོང་འབབ་སྒོར་ཁྲི་933ལྷག་ཙམ་བྱུང་བ་དང་། དུད་ཚང་རེར་ཆ་སྙོམས་ཁེ་སྤོགས་སྒོར་ཁྲི་20ཙམ་བྱུང་ཡོད། ཡུག་དང་ཡུག་ཁུལ་བྱས་ནས་བཞད་པའི་ཁམ་བུའི་མེ་ཏོག་གིས་ཀ་ལ་གྲོང་ཚོར“ཕྱུག་འགྱུར་ལམ་བུ”ཞིག་བཏིང་བ་རེད། ལྷག་པར་དུ་ཀ་ལ་གྲོང་ཚོས་བཏོད་པའི“མཐུན་སྒྲིལ་ལ་བསྟོད་གླུ་འབུལ་བའི”འགྲེམས་སྟོན་ཁང་སྒོ་ཕྱེ་བ་ནས་བཟུང་། རྒྱལ་ཁབ་ཕྱི་ནང་གི་ལྟ་སྐོར་ཚོགས་པ་ཁག་800ལྷག་ཙམ་དང་མི་ཐེངས་ཁྲི་3ལྷག་ཙམ་ལ་སྣེ་ལེན་ཞུས་ཏེ། “གསར་བརྗེའི་ཡུལ་སྐོར་དང་ལྗང་མདོག་ཡུལ་སྐོར”གྱི་ལམ་བུ་གསར་པར་བསྐྱོད་ཡོད་པ་རེད།

ཏང་གི་སྲིད་ཇུས་བཟང་པོས་ཀ་ལ་གྲོང་ཚོའི“བདེ་སྐྱིད་ཀྱི་སྒོ་མོ”ཕྱེ་ཞིང་། ཀ་ལ་གྲོང་ཚོས་རྒྱལ་ཁབ་ཀྱི་གཙོ་གནད་རྣམ་གྲངས་འཛུགས་སྐྲུན་གྱི་གོ་སྐབས་བཟང་པོ་དམ་འཛིན་གྱིས་ཞིང་འབྲོག་པའི་སྐྱེལ་འདྲེན་རུ་ཁག་བཙུགས་པར་ཡོང་འབབ་སྒོར་ཁྲི་1500ཙམ་བྱུང་བ་དང་། གྲོང་མིས་མ་དངུལ་སྒོར་ཁྲི་50རང་གྲབས་བྱས་ནས་མུའུ་100ལྷག་ཙམ་ཡོད་པའི་ཡུལ་སྐོར་ཤིང་འབྲས་འཐུ་ས་བསྐྲུན་པར་ཡོང་འབབ་སྒོར་ཁྲི་70ཙམ་བྱུང་བ་དང་། ས་ཞིང་མུའུ་100ལྷག་ཙམ་བརྒྱུད་བཤུག་བྱས་པར་ཆ་སྙོམས་མུའུ་རེ་ནས་བོགས་དངུལ་སྒོར་1300ཟིན་ཏེ། སྐྱེ་ཁམས་རིན་ཐང་བརྗེ་སྒྱུར་གྱི་ལམ་བུ་ནུས་ལྡན་ངང་རྒྱ་ཆེར་ཕྱིན་ཡོད་པ་རེད། ཀ་ལ་གྲོང་ཚོས་ཁམ་བུའི་མེ་ཏོག་གི་མཛེས་ལྗོངས་ཁུལ་གཙོ་བོར་བྱེད་པ་དང་། ཞིང་འབྲོག་པའི་སྐྱེལ་འདྲེན་རུ་ཁག་དང་ཡུལ་སྐོར་ཤིང་འབྲས་འཐུ་ས་མཉམ་དུ་འཕེལ་རྒྱས་འགྲོ་བའི་ཐོན་ལས་ཆེན་པོ་གསུམ་བཏོད་པས། གྲོང་ཚོའི་མཉམ་སྡེབ་དཔལ་འབྱོར་ཉིན་བཞིན་སྟོབས་ཆེར་ཕྱིན་པ་དང་གྲོང་མིའི་ཡོང་འབབ་ཀྱང་ཉིན་རེ་བཞིན་མང་དུ་ཕྱིན་པ་རེད།