ཉེ་ཆར་མི་སྤྱི་པུའུ་དང་། ནོར་སྲིད་པུའུ། རྒྱལ་ཁབ་ཁྲལ་དོན་སྤྱི་ཁྱབ་ཅུས་བཅས་ཀྱིས་མཉམ་འབྲེལ་ཐོག《ཁེ་ལས་ཀྱི་ལས་བཟོའི་གཞི་རྩའི་རྒན་གསོ་འགན་བཅོལ་ནང་ལོ་ན་ཆེ་བའི་ལས་ཤོར་འགན་བཅོལ་དངུལ་ལེན་མཁན་ཞུགས་པའི་འབྲེལ་ཡོད་གནད་དོན་སྐོར་གྱི་བརྡ་ཐོ》བཀྲམ་ནས་ལོ་ན་ཆེ་བའི་ལས་ཤོར་འགན་བཅོལ་དངུལ་ལེན་མཁན་གྱི་གཞི་རྩའི་འཚོ་བ་འགན་ལེན་བྱེད་པ་དང་དུས་མཚུངས་ཁེ་ལས་ཀྱི་ལས་བཟོའི་གཞི་རྩའི་རྒན་གསོ་འགན་བཅོལ་ནང་ཞུགས་པར་རྒྱབ་སྐྱོར་བྱས་ཏེ་ལས་ཤོར་འགན་བཅོལ་གྱི་མཐའ་ཚད་ཏན་ཏིག་སྲུང་རྒྱུ་རེད།

བརྡ་ཐོའི་ནང་ལས་ཤོར་འགན་བཅོལ་ཐེབས་རྩ་ཡིས་ལོ་ན་ཆེ་བའི་ལས་ཤོར་འགན་བཅོལ་དངུལ་ལེན་མཁན་གྱིས་རྒན་གསོ་འགན་བཅོལ་དངུལ་འཇལ་བའི་སྲིད་ཇུས་སྔར་བས་ཞིབ་ཕྲ་བཟོས་ནས། སྲིད་ཇུས་ལག་བསྟར་བྱ་ཡུལ་དང་། གཏོང་སྤྲོད་ཚད་གཞི། སྒྲུབ་གཉེར་བྱེད་སྟངས་སོགས་ལ་གཏན་འབེབས་ཞིབ་ཕྲ་བྱས་ཡོད་པ་སྟེ། གཅིག་ནས་མི་སྣའི་ཁྱབ་ཁོངས་ཁ་གསལ་བཟོ་དགོས། ལས་ཤོར་འགན་བཅོལ་དངུལ་བླངས་པ་མ་ཟད་ཁྲིམས་གཏན་འཁེལ་བའི་རྒན་ཡོལ་ཞུ་བའི་ལོ་ཚད་ཟིན་ནས་ལོ་གཅིག་ཀྱང་མ་ལོན་པའི་ལས་ཤོར་མི་སྣ(གཤམ་དུ“ལོ་ན་ཆེ་བའི་དངུལ་ལེན་མཁན”ཞེས་བསྡུ་རྒྱུ)དང་ལས་ཤོར་འགན་བཅོལ་དངུལ་མུ་མཐུད་སྤྲོད་པའི་མི་སྣ་ཚུད་པ་ཚང་མ་འགན་སྲུང་ཁྱབ་ཁོངས་སུ་འཇུག་རྒྱུ། གཉིས་ནས་གཏོང་སྤྲོད་ཚད་གཞི་ཁ་གསལ་བཟོ་དགོས།

ལོ་ན་ཆེ་བའི་དངུལ་ལེན་མཁན་གྱིས་ལས་ཤོར་འགན་བཅོལ་དངུལ་ལེན་ཡུལ་དུ་མི་སྒེར་གྱི་མིང་ཐོག་ནས་ཁེ་ལས་ཀྱི་ལས་བཟོའི་གཞི་རྩའི་རྒན་གསོ་འགན་བཅོལ་ནང་ཞུགས་ཏེ་དངུལ་འཇལ་བ་ཡིན་ན། དེའི་ནང་ས་གནས་དེ་གའི་སྟབས་བསྟུན་ལས་ཞུགས་མི་སྣའི་གྲོན་འཇལ་ཚད་གཞི་དམའ་ཤོས་ཀྱི་ཆ་ཤས་དེ་ལས་ཤོར་འགན་བཅོལ་ཐེབས་རྩ་ནས་སྤྲོད་རྒྱུ། གསུམ་ནས་སྒྲུབ་གཉེར་བྱེད་སྟངས་ཁ་གསལ་བཟོ་དགོས། “སྔོན་ལ་འཇལ་བ་དང་རྗེས་སུ་གསབ་པའི”བྱེད་སྟངས་ལ་གཞིགས་ནས་སྲིད་ཇུས་དོན་འཁྱོལ་བྱས་ཏེ་ལོ་ན་ཆེ་བའི་དངུལ་ལེན་མཁན་གྱིས་ཁེ་ལས་ཀྱི་ལས་བཟོའི་གཞི་རྩའི་རྒན་གསོ་འགན་བཅོལ་ནང་རང་དགར་ཞུགས་ནས་དངུལ་འཇལ་རྗེས་སྒྲུབ་གཉེར་སྒྲིག་གཞིར་བསྐྱོད་དེ་ལས་ཤོར་འགན་བཅོལ་ཐེབས་རྩས་གསབ་པའི་གྲོན་དངུལ་ལེན་རྒྱུའི་རེ་ཞུ་བྱེད་ཆོག དེ་དང་ཆབས་ཅིག་སྒྲུབ་གཉེར་སྒྲིག་གཞིར་ཆ་རྐྱེན་འཛོམས་པའི་ལོ་ན་ཆེ་བའི་དངུལ་ལེན་མཁན་ལ་འབྲེལ་ཡོད་སྲིད་ཇུས་རང་འགུལ་ངང་ཤོད་དགོས་པའི་བླང་བྱ་བཏོན་ཡོད། 2025ལོའི་ཟླ་1ཚེས་1ཉིན་ནས་བཟུང་སྲིད་ཇུས་ལག་བསྟར་བྱེད་འགོ་བཙུགས་ནས་2039ལོའི་ཟླ་12ཚེས་31ཉིན་བར་ལག་བསྟར་བྱ་རྒྱུ་རེད།