ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་4ཉིན་གློག་འཕྲིན་འབྱོར་གསལ། ཚེས་4ཉིན། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀྲུང་དབྱང་ཕྱི་ཕྱོགས་གཞུང་དོན་ཁང་གི་ཀྲུའུ་རེན་ཝང་དབྱིས་པེ་ཅིང་དུ་རི་པིན་གྱི་རྒྱལ་སྲིད་ལས་ཁུངས་ཀྱི་དམིགས་བསལ་བློ་འདོན་པ་དང་རྒྱལ་ཁབ་བདེ་འཇགས་སྲུང་སྐྱོང་ཅུས་ཀྱི་ཅུས་ཀྲང་ཆིའུ་ཡེ་ཀང་ནན་དང་ཀྲུང་རིའི་རིམ་མཐོའི་ཆབ་སྲིད་གླེང་མོལ་ལམ་སྲོལ་གྱི་གྲོས་མོལ་བྱས་པ་རེད།

ཝང་དབྱིས། ཀྲུང་རིའི་འབྲེལ་བ་དེ་ལེགས་ཕྱོགས་སུ་འཕེལ་རྒྱས་འགྲོ་བའི་འགག་རྩའི་དུས་མཚམས་སུ་སླེབས་ཡོད་པས་ཕྱོགས་གཉིས་པོས་རྒྱལ་ཁབ་གཉིས་པོའི་འགོ་ཁྲིད་པའི་ཐུན་མོང་ངོས་འཛིན་གཞིར་བཟུང་། ཀྲུང་རིའི་འབྲེལ་བ་ལེགས་ཕྱོགས་སུ་འཕེལ་རྒྱས་འགྲོ་བའི་ཡང་དག་པའི་ཁ་ཕྱོགས་མཐའ་འཁྱོངས་ཀྱིས་དུས་རབས་གསར་པའི་བླང་བྱ་དང་འཚམ་པའི་དགེ་མཚན་ལྡན་ལ་བརྟན་པའི་ཀྲུང་རིའི་འབྲེལ་བ་གཏོད་དགོས། རི་པིན་ཕྱོགས་ཀྱིས་ཕྱི་རོལ་ཡུལ་གྱི་དོན་དངོས་དང་མཐུན་ལ་དཔྱོད་ཤེས་ཀྱི་སྒོ་ནས་ཀྲུང་གོར་ངོས་འཛིན་ཡང་དག་བྱེད་པ་དང་། ཐའེ་དབན་གྱི་གནད་དོན་ཐད་བཏོན་པའི་ཆབ་སྲིད་ཀྱི་ཁས་ལེན་དམ་པོར་སྲུང་བ། ཀྲུང་རིའི་འབྲེལ་བའི་ཆབ་སྲིད་ཀྱི་རྨང་གཞིར་སྲུང་སྐྱོང་ཏན་ཏིག་བཅས་བྱས་ཏེ། བྱ་སྤྱོད་དངོས་ཀྱི་ཐོག་ནས“ཕན་ཚུན་དབར་མཉམ་ལས་རོཌ་ཟླ་ཡིན་པ་ལས་ཕན་ཚུན་དབར་འཇིཌ་སྐུལ་མི་བཟོ་བའི”ཐུན་མོང་གི་ངོས་འཛིན་གལ་ཆེན་དོན་འཁྱོལ་བྱས་ཏེ། ཕྱོགས་གཉིས་པོའི་འབྲེལ་བ་བརྟན་བགྲོད་རྒྱང་འཁྱོལ་ཡོང་བར་སྐུལ་འདེད་གཏོང་དགོས་ཞེས་གསུངས་པ་རེད།

ཕྱོགས་གཉིས་པོས་ཀྲུང་རིའི་ཆབ་སྲིད་ཀྱི་ཡིག་ཆ་བཞིའི་ནང་གཏན་འཁེལ་བྱས་པའི་རྩ་དོན་དང་ཐུན་མོང་གི་ངོས་འཛིན་ལ་བརྩི་སྲུང་ཞུས་ནས། ཀྲུང་རིའི་འཐབ་ཇུས་ཀྱི་གཉིས་ཕན་འབྲེལ་བར་ཕྱོགས་ཡོངས་ནས་སྐུལ་འདེད་གཏོང་བར་གཞོལ་རྒྱུའི་བསྐྱར་བསྒྲགས་བྱས་པ་རེད།

ཕྱོགས་གཉིས་པོས་མཐོ་རིམ་དབར་གྱི་འགྲོ་འོང་དང་ཁྱབ་ཁོངས་ཁག་གི་གླེང་མོལ་དང་སྤེལ་རེས་རྒྱུན་འཁྱོངས་བྱས་ནས་ཕྱི་ཕྱོགས་ལ་དགེ་མཚན་ལྡན་པའི་དྲང་ཕྱོགས་ཀྱི་བརྡ་རྟགས་དེ་བས་མང་བ་གཏོང་གི་ཡིན་ཞེས་གསུངས་པ་རེད།

ཕྱོགས་གཉིས་པོས་ཀྲུང་གོ་དང་རི་པིན་ཁྱིམ་མཚེས་རྒྱལ་ཁབ་གལ་ཆེན་གཉིས་པོའི་འཕེལ་རྒྱས་འབྲེལ་བ་དམ་ཟབ་ཡོད་པ་དང་དཔལ་འབྱོར་ཐད་ཚད་མཐོའི་གསབ་རེས་བྱེད་པར་བརྟེན“འབྲེལ་ཐག་ཆད”་མི་འོས་ལ་ཆད་མི་སྲིད་པས་དཔལ་འབྱོར་ཚོང་དོན་མཉམ་ལས་སྐྱོན་བྲལ་ངང་འཕེལ་རྒྱས་དང་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་བརྟན་པོ་དང་ཤར་གཏོང་ཐུབ་རྒྱུར་ཐུན་མོང་ཐོག་སྐུལ་འདེད་གཏོང་རྒྱུ་ཡིན་པའི་ངོས་འཛིན་བྱེད་ཀྱི་ཡོད་པ་རེད།