ས་གནས་དེ་གའི་དུས་ཚོད་ཚེས་5ཉིན། ཀྲུང་གོའི་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་དང་ཀྲུང་གོ་ཕྱི་ཡིག་ཅུས་ཀྱིས་གཙོ་གཉེར་བྱས་པ་དང་། ཕྱི་ཡིག་དཔེ་སྐྲུན་ཁང་དང་ཀྲུང་གོ་ཕྱི་ཡིག་ཅུས་མེ་གླིང་ཁྱབ་སྤེལ་ལྟེ་གནས་ཀྱིས་གཉེར་འགན་ཁུར་བའི《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》ཡི་ཀྲུང་ཕེའི་ཀློག་པ་པོའི་འདུ་ཚོགས་ཕེ་རུའི་རྒྱལ་ས་ལི་མ་རུ་གྲུབ་འབྲས་ཐོབ་པའི་ངང་འཚོགས་ཤིང་། ཀྲུང་ཕེ་རྒྱལ་ཁབ་གཉིས་པོའི་སྲིད་ཕྱོགས་ལས་རིགས་དང་། དཔེ་སྐྲུན་ལས་རིགས། རིག་གཞུང་ལས་རིགས། སྨྱན་སྦྱོར་བཅས་ཀྱི་མི་150ཙམ་ཀློག་པ་པོའི་འདུ་ཚོགས་ལ་ཞུགས་ཡོད།

ཚོགས་ཞུགས་སྐུ་མགྲོན་ཚོས《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》ཡི་ནང་ཀྲུའུ་ཞི་ཞི་ཅིན་ཕིང་གི་རྒྱལ་སྐྱོང་ཇུས་ཆེན་གཅིག་སྡུད་ཐོག་མཚོན་པ་དང་། ཀྲུང་གོའི་ལུགས་ཀྱི་དེང་རབས་ཅན་གྱི་འགྲོ་ལམ་གྱི་རིགས་པའི་གཞུང་ལུགས་ཀྱི་མ་ལག་དང་ལག་ལེན་གྱི་ཐབས་ལམ་ཕྱོགས་ཡོངས་ནས་མངོན་པ། ཀྲུང་གོའི་ལུགས་ཀྱི་དེང་རབས་ཅན་གྱི་མི་དམངས་གོང་དུ་བཀུར་བའི་རིན་ཐང་དོན་གཉེར་དང་། རང་ཚུགས་རང་བདག་གི་འཚོལ་ཞིབ་སྙིང་སྟོབས། སྒོ་དབྱེ་བསྟུན་མཁས་ཀྱི་ཤེས་དཔལ་ནང་དོན། མཉམ་ལས་གཉིས་ཁེའི་ཆོད་སེམས་བརྟན་པོ་བཅས་གང་ལེགས་མངོན་པ་དེ་ནི་རྒྱལ་སྤྱིའི་སྤྱི་ཚོགས་ཀྱིས་ཀྲུང་གོའི་ལུགས་ཀྱི་དེང་རབས་ཅན་ཤེས་རྟོགས་ཐུབ་རོགས་བྱེད་པའི“བསམ་བློའི་སྐར་ཁུང”ལྟ་བུ་ཡིན་པས། ཕེ་རུ་དང་ལ་ཏིང་མེ་གླིང་གི་ལས་རིགས་ཁག་གི་ཀློག་པ་པོས་དུས་རབས་གསར་པའི་ཀྲུང་གོའི་འཕེལ་རྒྱས་ལ་དེ་བས་ལེགས་པ་དང་དེ་བས་དུས་ཐོག་ཀྱི་སྒོ་ནས་ངོས་འཛིན་གཏིང་ཟབ་ཐུབ་པར་ཕན་ཐོགས་ཡོད། ཀྲུང་གོའི་གྲུབ་འབྲས་ཐོབ་པའི་ཉམས་མྱོང་གིས་ཕེ་རུ་ཚུད་པའི་ལ་ཏིང་མེ་གླིང་ས་ཁུལ་དང་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་དགེ་མཚན་ལྡན་པའི་དཔྱད་གཞི་མཁོ་འདོན་བྱས་ཡོད་ཅེས་བརྗོད།

བྱེད་སྒོའི་ཐོག་ཀྲུང་གོ་ཕྱོགས་ཀྱིས་ཕེ་རུ་ཕྱོགས་ལ《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》ཡི་དེབ་བཞི་པའི་སི་ཕེན་ཡི་གེའི་དཔར་མ་སྤྲད་པ་རེད། རྒྱལ་ཁབ་གཉིས་པོའི་རིགས་གཅིག་མཁས་ཅན་དང་མཁས་དབང་གིས་ཀྲུང་ཕེ་དང་ཀྲུང་ལའི་རྒྱལ་སྐྱོང་སྲིད་འཛིན་གྱི་ཉམས་མྱོང་དང་དེང་རབས་ཅན་གྱི་འཚོལ་ཞིབ་ལ་དམིགས་ནས་སྤེལ་རེས་དང་བགྲོ་གླེང་བྱས་པ་རེད། 《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》དེ་2014ལོའི་ཟླ་9པར་དཔེ་སྐྲུན་བྱས་ཚུན། ཡིག་རིགས་42ལ་བསྒྱུར་ཏེ་དཔེ་སྐྲུན་བྱས་ནས་འཛམ་གླིང་གི་རྒྱལ་ཁབ་དང་ས་ཁུལ་180ལྷག་ཙམ་ལ་འགྲེམས་སྤེལ་བྱས་པ་རེད།