མི་དམངས་ཀྱི་གྲོང་ཁྱེར་གྱི་འདུ་ཤེས་ལག་ལེན་གཏིང་ཟབ་བསྟར་ནས་གྲོང་ཁྱེར་འཛུགས་སྐྲུན་དང་བཅོས་སྐྱོང་ནང་ཧུར་ཐག་ཞུགས་པ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“རྒན་གྲས་སྒྲོག་འགྲེལ་ཚོགས་པའི”བློ་མཐུན་ཡོངས་ལ་སྤྲིངས་གནང་བའི་འཕྲིན་ལན་གྱིས་མི་སེམས་ལ་སྐུལ་ལྕག་ཐེབས་པ་དང་མི་རྣམས་དཔའ་ངར་ཆེན་པོས་མདུན་སྐྱོད་བྱེད་པར་སྐུལ་མ་ཐེབས་པ།
ཉེ་ཆར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྲང་ཧའེ་གྲོང་ཁྱེར་དབྱང་ཕུའུ་ཆུས་ཀྱི“རྒན་གྲས་སྒྲོག་འགྲེལ་ཚོགས་པའི”བློ་མཐུན་ཡོངས་ལ་འཕྲིན་ལན་སྤྲིངས་ནས། ཁོང་ཚོར་བྱམས་བརྩེའི་འཚམས་འདྲི་གནང་བ་དང་འབྲེལ་ཐུགས་རེ་ནན་པོ་ཡང་བཅོལ་གནང་ཡོད།
ཚང་མས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་དང་ཐུགས་རེ་ནན་པོ་བློ་ལ་བརྟན་པོར་ངེས་ནས་རང་ཉིད་ཀྱི་མྱོང་བ་དངོས་དང་ཟུང་འབྲེལ་གྱིས་གྲོང་མིར་ལོ་རྒྱུས་དང་། ཏང་གི་གསར་གཏོད་རིགས་པའི་གཞུང་ལུགས། དུས་རབས་གསར་པའི་ཧྲང་ཧའེ་གྲོང་ཁྱེར་ལ་བྱུང་བའི་དགའ་འོས་པའི་འགྱུར་ལྡོག་བཅས་བརྗོད་དེ། ཧྲང་ཧའེ་མི་དམངས་ཀྱི་གྲོང་ཁྱེར་སྐྲུན་ཆེད་ལེགས་སྐྱེས་དེ་བས་ཆེ་བ་འབུལ་གྱི་ཡིན་ཞེས་བརྗོད།
ལོ་93ལ་སླེབས་པའི“བདུན་གཅིག་བྱས་རྗེས་གཟེངས་རྟགས”ཐོབ་མཁན་དང་ངལ་རྩོལ་དཔེ་བཟང་བ་རྒན་གྲས་ཧོང་པའོ་མའེ“རྒན་གྲས་སྒྲོག་འགྲེལ་ཚོགས་པར”ཞུགས་ཚུན། ཐོག་མཐའ་བར་གསུམ་དུ་སྒྲོག་འགྲེལ་ལས་ལ་གཞོལ་བཞིན་ཡོད་པ་མ་ཟད། ད་དུང་གདན་ཞུས་ལྟར་ཐད་གཏོང་སྒྲོག་འགྲེལ་བྱས་པར་ན་གཞོན་ཚོས་ཧ་ཅང་དགའ་པོ་བྱེད་ཀྱི་ཡོད། དབྱང་ཕུའུ་གཙང་འགྲམ་གྱི“ཀུན་སྡོད་ཁང་པའི”ཏང་དམངས་ཞབས་ཞུ་ས་ཚིགས་སུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“རྒན་གྲས་སྒྲོག་འགྲེལ་ཚོགས་པའི”བློ་མཐུན་ཡོངས་ལ་སྤྲིངས་གནང་བའི་འཕྲིན་ལན་སློབ་སྦྱོང་ནན་ཏན་བྱས་རྗེས། ཧོང་པའོ་མའེ་ཡིས“བདེ་སྐྱིད་ལྡན་པའི་འཚོ་བ་ནི་ལས་སླ་པོར་བྱུང་བ་ཞིག་མིན་པས་ངས་ད་དུང་མུ་མཐུད་འབད་བརྩོན་བྱས་ཏེ། རང་ཉིད་ཀྱི་མྱོང་བ་དངོས་དང་ཟུང་འབྲེལ་བྱས་ནས་མི་དེ་བས་མང་བར་གྲོང་ཁྱེར་ལ་བྱུང་བའི་དགའ་འོས་པའི་འགྱུར་ལྡོག་དང‘བདེ་སྐྱིད་ནི་འབད་འཐབ་ལ་བརྟེན་ནས་བྱུང་ལུགས’བརྗོད་ཀྱི་ཡིན”ཞེས་སེམས་འགུལ་ཆེན་པོ་ཐེབས་བཞིན་བརྗོད།
མི་དམངས་ཀྱི་གྲོང་ཁྱེར་གྱི་འདུ་ཤེས་ཀྱི་ཁྲིད་སྟོན་འོག་ཧྲང་ཧའེ་ཡི་ཚན་རྩལ་གསར་གཏོད་དེ་བས་དར་འཕེལ་དང་། སློབ་གསོ་དང་སྨན་བཅོས་ཀྱི་ཐོན་ཁུངས་དེ་བས་འབེལ་བ། མི་སྡོད་ཆ་རྐྱེན་ལེགས་བཅོས་ཆེན་པོ། འཚོ་བའི་ཁོར་ཡུག་དེ་བས་མཛེས་པ་བཅས་བྱུང་ཡོད།
དེ་སྔའི“བཟོ་ལས་འཕེལ་རྒྱས་མི་ཐུབ་པའི་རྒྱུད”ནས“འཚོ་བའི་མཛེས་ལྗོངས་རྒྱུད”དུ་གྱུར་ཡོད། “རྒན་གྲས་སྒྲོག་འགྲེལ་ཚོགས་པའི”འགན་འཁུར་བ་དང་དབྱང་ཕུའུ་ཆུས་ཁྲང་ཧའེ་ལམ་ཁྲོམ་གཞུང་ཏང་གི་ལས་དོན་ཨུ་ལྷན་གྱི་དེ་སྔའི་ཧྲུའུ་ཅི་ཉི་ལའེ་ཏིས་དབྱང་ཕུའུ་གཙང་འགྲམ་གྱི་འགྱུར་ལྡོག་གི་བདེན་དཔང་བྱས་ཤིང་། ཁོང་གིས“ང་ཚོས་ངེས་པར་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་ངེས་ནས་ཉེ་འགྲམ་གྱི་གསོན་ཉམས་དོད་པའི་གཏམ་རྒྱུད་ཡག་པོ་བརྗོད་པ་དང་། མི་དམངས་ཀྱི་གྲོང་ཁྱེར་གྱི་འདུ་ཤེས་ལག་ལེན་གཏིང་ཟབ་བསྟར་ཏེ‘རྒན་གྲས་སྒྲོག་འགྲེལ་ཚོགས་པའི’སྒྲོག་འགྲེལ་གྱི་ཆུ་ཚད་དང་སྤུས་ཚད་མཐོ་པོ་མངོན་གང་ཐུབ་བྱེད་ཀྱི་ཡིན”ཞེས་བརྗོད།
“དབྱང་ཕུའུ་ཆུས་ཀྱི་གྲོང་མི་ཞིག་ཡིན་པའི་ངོས་ནས་གྲོང་ཁྱེར་འཛུགས་སྐྲུན་ལ་གཡུར་ཟའི་གྲུབ་འབྲས་ཐོབ་པ་མིག་མཐོང་ལག་ཟིན་བྱུང་བས་དགའ་ཚོར་ཆེན་པོ་བྱུང་ལ་བདེ་སྐྱིད་ཡང་ཚོར་བྱུང”ཞེས་སྔར་བཞིན་ལས་ལ་བྲེལ་བཞིན་ཡོད་པའི་ལོ་95ལ་སླེབས་པའི“མི་དམངས་ཀྱི་སློབ་གསོ་མཁས་ཅན”དང“སྒྱུར་བཅོས་གདོང་ལེན་པ”ཡུས་དབྱི་ཡིས་བརྗོད་པ་དང་། ཁོང་གིས“ངས་རྨང་གཞིའི་སློབ་གསོའི་ལས་དོན་གྱི་དམིགས་བསལ་ལེགས་ཆ་མུ་མཐུད་བཏོན་ནས་ཏང་དང་རྒྱལ་ཁབ་ཀྱི་ཆེད་དུ་ཤེས་ལྡན་པ་གསོ་སྐྱོང་བྱས་ཏེ། མི་དམངས་ཀྱི་གྲོང་ཁྱེར་སྐྲུན་པར་ལེགས་སྐྱེས་ཧུར་ཐག་འབུལ་གྱི་ཡིན”ཞེས་བརྗོད།
“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འཕྲིན་ལན་གྱི་ཡིག་འབྲུ་རེ་རེའི་ནང་ནས་མི་དམངས་ལ་བཅངས་པའི་བརྩེ་སེམས་ཟབ་མོ་མངོན་གྱི་འདུག”ཅེས་རྒྱལ་ཡོངས་ཀྱི་ལས་བྲལ་ལས་འཁྱུར་བྱས་པའི་ལས་བྱེད་པའི་སྔོན་ཐོན་མི་སྒེར་དང་ཧྲང་ཧའེ་གྲོང་ཁྱེར་ཞུས་ཧུའེ་ཆུས་ཀྱི“གཟི་བརྗིད་ལྡན་པའི་ཚེ་མཇུག”གི་རྒན་གྲས་ལྔའི་སྙན་ཞུ་ཚོགས་པའི་ཚོགས་གཙོ་ལོའུ་ཡུན་ཁྲང་གིས་བརྗོད་པ་དང་། ཁོང་གིས“གྲོང་ཁྱེར་འདིའི་འཕེལ་རྒྱས་དང་འགྱུར་ལྡོག་ཧ་ཅང་ཆེན་པོ་རང་ངོ་མས་བདེན་དཔང་ཐུབ་པ་དང་དངོས་སུ་བརྒྱུད་མྱོང་ཡོད་པས། ངས་གཏམ་རྒྱུད་མི་དེ་བས་མང་པོར་བརྗོད་ཀྱི་ཡིན”ཞེས་བརྗོད།
“རྒན་གྲས་སྒྲོག་འགྲེལ་ཚོགས་པའི”ཁོངས་མིའི་དང་བླངས་སྙིང་སྟོབས་དང་ལེགས་སྐྱེས་འབུལ་བའི་སྙིང་སྟོབས་ཀྱིས་ཧྲང་ཧའེ་ཡི་གྲོང་མི་དེ་བས་མང་པོར་མི་དམངས་ཀྱི་གྲོང་ཁྱེར་གྱི་འདུ་ཤེས་ལག་ལེན་གཏིང་ཟབ་བསྟར་བ་དང་། གྲོང་ཁྱེར་འཛུགས་སྐྲུན་དང་བཅོས་སྐྱོང་ནང་ཧུར་ཐག་ཞུགས་པ། ཞི་མཐུན་མཛེས་སྡུག་ལྡན་པའི་གྲོང་ཁྱེར་མཉམ་དུ་སྐྲུན་པ། བདེ་ཞིང་སྐྱིད་པའི་འཚོ་བ་མཉམ་དུ་གཏོད་པ་བཅས་བྱེད་པར་སྐུལ་ཁྲིད་ཐུབ་བཞིན་ཡོད།
སྒྲོག་འགྲེལ་ཡག་པོ་བྱེད་དགོས་པ་མ་ཟད་བྱ་སྤྱོད་ཐོག་དེ་བས་དོན་ཐོག་ཏུ་འཁྱོལ་བར་བྱེད་དགོས་ཤིང་། “རྒན་གྲས་སྒྲོག་འགྲེལ་ཚོགས་པའི”ཁོངས་མི་དང་དབྱང་ཕུའུ་ཆུས་ཨུད་དྲིལ་བསྒྲགས་པུའི་དེ་སྔའི་པུའུ་ཀྲང་གཞོན་པ་ཧུའུ་ཅུན་གྱིས“ངས་བདག་པོའི་འདུ་ཤེས་ཟབ་ཏུ་བཏང་ནས་མི་དམངས་ཀྱི་གྲོང་ཁྱེར་འཛུགས་སྐྲུན་དང་། འཕེལ་རྒྱས། བཅོས་སྐྱོང་བཅས་ཀྱི་ཚ་ཚ་འུར་འུར་གྱི་ལག་ལེན་ནང་ཧུར་ཐག་ཞུགས་ཀྱི་ཡིན”ཞེས་བརྗོད།
ཧྲང་ཧའེ་གྲོང་ཨུད་རྩ་འཛུགས་པུའི་པུའུ་ཀྲང་གཞོན་པ་དང་ལས་བྱེད་པ་རྒན་གྲས་ཅུས་ཀྱི་ཅུས་ཀྲང་ཝང་ཆིང་ཀྲོའུ་ཡིས“ང་ཚོས་བརྩེ་སེམས་ཟབ་མོས་བློ་མཐུན་རྒན་གྲས་ཀྱི་ནུས་པ་འདོན་པར་ལས་སྟེགས་དང་གཞི་རྟེན་ཡག་པོ་བསྐྲུན་ཏེ་ཚང་མ་ཞུགས་པ་དང་། ཚང་མས་འགན་འཁྲི་འཁུར་བ། ཚང་མས་ལེགས་སྐྱེས་འབུལ་བ། ཚང་མས་མཉམ་སྤྱོད་བཅས་བྱེད་པའི་གྲོང་ཁྱེར་བཅོས་སྐྱོང་གི་གཅིག་མཐུན་ཚོགས་པ་གཏོད་པར་རམ་འདེགས་བྱ་ཆེད་བློ་མཐུན་རྒན་གྲས་ཀྱི་བློ་གྲོས་དང་སྟོབས་ཤུགས་རྒྱུན་ཆད་མེད་པར་ལེགས་སྐྱེས་འབུལ་གྱི་ཡིན”ཞེས་བརྗོད་པ་རེད།