2024ལོའི་ཟླ་དགུ་པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀན་སུའུ་ལ་རྟོག་ཞིབ་གནང་སྐབས། “ཀན་སུའུ་ཡིས་བཟོ་ལས་ཅན་གསར་པར་སྐུལ་འདེད་ཤུགས་ཆེན་བཏང་ནས་སྲོལ་རྒྱུན་གྱི་ཐོན་ལས་སྒྱུར་བཀོད་དང་རིམ་སྤོར་གང་མགྱོགས་བྱས་ཏེ། ཁྱད་ལྡན་ལེགས་ཆའི་ཐོན་ལས་ཀྱི་རྒྱ་སྟོབས་ཆེ་རུ་དང་། འཐབ་ཇུས་རང་བཞིན་གྱི་གསར་དར་ཐོན་ལས་འཕེལ་རྒྱས་ཤུགས་ཆེན། ཡུལ་བབ་དང་བསྟུན་ནས་ཐོན་སྐྱེད་ནུས་ཤུགས་གསར་མ་འཕེལ་རྒྱས་བཅས་བཏང་སྟེ་རྒྱལ་ཡོངས་སུ་ནུས་རྒྱུ་གསར་པ་དང་ནུས་རྒྱུ་གསར་པའི་སྒྲིག་ཆས་བཟོ་སྐྲུན་རྟེན་གཞི་གཙོ་བོ་གཏོད་དགོས”ཞེས་ནན་བཤད་གནང་ཡོད། 2019ལོའི་ཟླ་བརྒྱད་པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀན་སུའུ་ལ་རྟོག་ཞིབ་གནང་སྐབས། “སྲོལ་རྒྱུན་གྱི་ཐོན་ལས་སྒྱུར་བཀོད་གང་མགྱོཌ་བྱས་ཏེ་གསར་དར་ཐོན་ལས་སྐྱེད་སྲིང་བྱེད་དགོས”ཞེས་གསུངས་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ། ཀན་སུའུ་ཡིས་སྲོལ་རྒྱུན་ཐོན་ལས་རྙིང་བཅོས་གསར་བཟོ་དང་། གསར་དར་ཐོན་ལས་ཧྲག་སྐྱོང་གསར་གཏོད། འབྱུང་འགྱུར་ཐོན་ལས་དེང་བརྒལ་གསར་འཚོལ་བཅས་ཡོང་བར་སྐུལ་འདེད་བཏང་ནས་ཐོན་ལས་མ་ལག་དེང་རབས་ཅན་གྱི་ཆུ་ཚད་ཟམ་མི་ཆད་པར་མཐོ་རུ་བཏང་ཞིང་། འདི་ལོའི་དུས་ཚིགས་དང་པོ་ནས་གསུམ་པའི་བར་ཀན་སུའུ་ཡི་གཞི་ཁྱོན་ཡན་གྱི་བཟོ་ལས་ཀྱི་ཐོན་སྐྱེད་རིན་ཐང་བསྡོམས་འབོར་དུས་མཚུངས་ལས་12.1%འཕར་ཡོད།

སྲོལ་རྒྱུན་ཐོན་ལས་རྙིང་བཅོས་གསར་བཟོ་བྱས་པ།

གཡུས་མོན་གྲོང་ཁྱེར་དུ་ཐོན་ཁུངས་འཚོལ་བའི་མིག་རྒྱང་ས་འོག་ནས་ས་སྟེང་ལ་བསྒྱུར་ཞིང་། རིམ་རྩིས་བྱས་ན་གཡུས་མོན་སྣུམ་ཞིང་གིས་འོད་ཤུགས་གློག་འདོན་རྣམ་གྲངས་6བསྐྲུན་པ་དང་། 2023ལོར་གློག་བཏང་ནས་ཁེ་སྤོགས་སྒོར་ཁྲི་3000ལྷག་ཙམ་བྱུང་ལ། ཧྭ་ཐིང་གྲོང་ཁྱེར་དུ་ལོར་ཏུན་ཁྲི་60ཐོན་སྐྱེད་ཐུབ་པའི་རྡོ་སོལ་ཁྲུན་ཀ་པའི་རྣམ་གྲངས་བསྐྲུན་པ་མ་ཟད། ལོར་ཐོན་སྐྱེད་ཏུན་ཁྲི་20ཐུབ་པའི་འདུས་འདྲེས་ག་སིན་རིན་མཐོ་ཅན་གྱི་ཐོན་ལས་གླིང་བསྐྲུན་པས་རྡོ་སོལ་ཐོན་ལས་ཕྱོགས་སྒྱུར་རིམ་སྤོར་ཐུབ་ནས“རྡོ་སོལ”དེ“གསེར་དཀར་པོ”ལ་གྱུར་ཡོད།

བཟོ་ལས་རྟེན་གཞི་རྙིང་པའི་ལེགས་ཆ་གང་ལེགས་བཏོན་ཏེ་ཀན་སུའུ་ཡིས་སྲོལ་རྒྱུན་ཐོན་ལས་སྒྱུར་བཀོད་དང་རིམ་སྤོར་གང་མགྱོགས་བྱས་ནས་ལོར་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་ཀྱི་རྣམ་གྲངས་སྒྱུར་བཀོད་300ཡས་མས་རྒྱུན་བསྐོར་ངང་ལག་ལེན་བསྟར་བས། སྲོལ་རྒྱུན་གྱི་ཐོན་ལས་འཁོར་འབྲེལ་བསྐྱར་འཛུགས་དང་། ཐོན་ལས་བང་རིམ་དང་འཕེལ་ནུས་རིམ་པ་མཐོ་རུ་ཕྱིན་ནས་སྲོལ་རྒྱུན་ཐོན་ལས་ལ་སྐྱེ་སྟོབས་ཀྱི་དཔལ་འབར་ཐུབ་པ་བྱུང་ཡོད།

རིན་ནུས་དང་གྲངས་འཛིན་བསྒྱུར་ནས་ལན་ཧྲི་ཚོགས་པས“གྲངས་འཛིན་འདྲ་བཟོའི་འཁོར་ཁང”ནུས་ཤུགས་ཡོད་རྒུས་བཏོད་པས། མ་བཅོས་རྒྱུ་ཆ་ཟད་གྲོན་བྱེད་ཚད་ཆེས་ཆེར་དམའ་རུ་ཕྱིན་ཡོད། ཅིའུ་ཆོན་ལྕགས་དང་ངར་ལྕགས་ཚོགས་པས་3Dཔར་འདེབས་ལག་རྩལ་ལ་བརྟེན་ནས་མྱུར་ཚད་མགྱོགས་ཤིང་གནད་ལ་འཁེལ་ཚད་མཐོ་བའི་རིག་ནུས་ཀྱི་དུས་རབས་འགོ་བརྩམས་ཡོད། ཀན་སུའུ་ཡིས་དྲ་རྒྱའི་ལག་རྩལ་གསར་པ་སྲོལ་རྒྱུན་གྱི་ཐོན་ལས་ནང་སྤྱད་དེ་སྒྱུར་བཀོད་བྱས་པས་སྲོལ་རྒྱུན་གྱི་ལེགས་ཆའི་ཐོན་ལས་སྔོན་ལ་འཇོག་པའི་གནས་བབ་བརྟན་དུ་ཕྱིན་ནས་འགྲན་རྩོད་ཀྱི་ལེགས་ཆ་གསར་པ་གཏོད་ཐུབ་ཡོད།

གསར་དར་ཐོན་ལས་ཧྲག་སྐྱོང་གསར་གཏོད་བྱས་པ།

མཐོ་ཚད་སྨི་260ཟིན་པའི་ཚ་སྡུད་མཐོ་ལྕོག་འོག་ཏུ་ཉི་ཕྱོགས་མེ་ལོང་ཁྲི་1.2ཡིས་ཚངས་ཐིག་སྨི་3000ཟིན་པའི་ལྟེ་མཐུན་སྒོར་དབྱིབས་གྲུབ་སྟེ། ཉི་འོད་ཐད་ཀར་མཐོ་ལྕོག་གི་རྩེ་མོའི་ཚ་སྡུད་ཡོ་ཆས་ལ་འཕྲོས་ཀྱི་ཡོད། ཀྲའོ་ཝ་100ཟིན་པའི་ཏུན་ཧོང་གི་ཞུས་ཚྭའི་མཐོ་ལྕོག་འོད་ཤུགས་གློག་ཁང་གིས་ཆུ་ཚོད་རེར་གློག་ཆུ་ཚོད་ཆན་ཝ་ཁྲི་10གཏོང་ཐུབ་ཀྱི་ཡོད།

ཅིའུ་ཆོན་དེ་རང་རྒྱལ་གྱི་སྐམ་སའི་རླུང་གློག་འཕྲུལ་འཁོར་བཟོ་མཁན་རྟེན་གཞི་ཆེ་ཤོས་སུ་གྱུར་ཏེ། ལོར་གློག་འདོན་འཕྲུལ་འཁོར་ནས་གློག་ཅི་ཝ་20ཡན་གཏོང་ཐུབ་པ་དང་། གཡུས་མོན་གྱིས་ཐོན་སྐྱེད་བྱས་པའི་ཀན་སུའུ་ཡི་འོད་ཤུགས་ཤེལ་ལེབ་ཐོག་མ་དེ་སྤྱོད་འགོ་བཙུགས་ནས་ཐོན་སྐྱེད་རིན་ཐང་སྒོར་དུང་ཕྱུར་10གསར་འཕར་བྱུང་བ་སོགས་ཀན་སུའུ་ཡིས་ཆན་ཝ་རིམ་པ་ཁྲི་སྟོང་ཟིན་པའི་རླུང་གློག་རྟེན་གཞི་1དང་ཆན་ཝ་རིམ་པ་ཁྲི་བརྒྱ་ཟིན་པའི་འོད་ཤུགས་གློག་ཁང་རྟེན་གཞི་4བསྐྲུན་པ་དང་ནུས་རྒྱུ་གསར་པའི་གློག་འདོན་འཕྲུལ་འཁོར་ནས་གློག་གཏོང་ཚད་ཆན་ཝ་ཁྲི་6000ཟིན་ཡོད།

“གསར་གཏོད”ལ་ཕྱོགས་པ་དང“སྤུས་ཚད”མཐོ་རུ་བཏང་ནས་ཀན་སུའུ་ཡིས་རྒྱུ་ཆ་གསར་པའི་ཁྱབ་ཁོངས་སུ་ཁེ་ལས་གསར་གཏོད་སྒྲིག་གཞི་5གསར་དུ་བཙུགས་པར་རྒྱལ་ཁབ་རིམ་པའི་ཆེད་ཞིབ་ཁྱད་གསར་བཞི་ལྡན་གྱི“གྱད་མི་ཆུང་ངུའི”ཁེ་ལས་9དང་། ཞིང་ཆེན་རིམ་པའི་ཆེད་ཞིབ་ཁྱད་གསར་བཞི་ལྡན་གྱི་ཁེ་ལས་ཆུང་འབྲིང་28ཐོན་ནས། ཐོན་ལས་ཚོགས་པའི་སྟོབས་ཤུགས་ཆེས་ཆེར་འཕེལ་ཡོད།

ཀན་སུའུ་ཞིང་ཆེན་གྱི་བཟོ་ལས་དང་ཆ་འཕྲིན་ཅན་ཐིང་གི་ཐིང་ཀྲང་ཧན་ཤན་མིན་གྱིས། ད་ལོའི་ཟླ་དང་པོ་ནས་བརྒྱད་པའི་བར། ཞིང་ཆེན་བཟོ་ལས་ཆ་འཕྲིན་ཐིང་གིས་ལྟ་ཞིབ་བྱེད་པའི་རྒྱུ་ཆ་གསར་པའི་རྣམ་གྲངས་28ལ་ཐོན་སྐྱེད་རིན་ཐང་སྒོར་དུང་ཕྱུར་870ཟིན་པ་དེ་དུས་མཚུངས་ལས་28%འཕར་ཡོད་ཅེས་ངོ་སྤྲོད་བྱས།

འབྱུང་འགྱུར་ཐོན་ལས་ལ་གསར་གཏོད་ཚད་བརྒལ་བྱུང་བ།

ཝུ་ཝེ་འབྲས་སྐྲན་སྨན་ཁང་ལྕི་བའི་གྱེས་རྡུལ་ལྟེ་གནས་སུ་ཐཱན་གྱེས་རྡུལ་ཞིག་ཧ་ལམ་འོད་ཀྱི་མྱུར་ཚད་70%ཡི་ཐོག་ནས་བགྲོད་མཉམ་གདུབ་ནས་དོན་ཏེ། གཟུགས་པོའི་གཏིང་གི་སྐྲན་ནད་ལ་གནད་འཁེལ་པོས་རྒྱག་ཐུབ་པ་བྱུང་ཡོད། “ཐཱན་གྱེས་རྡུལ་གྱི་སྨན་བཅོས་མ་ལག་དེ་ཕྱིས་འབྱུང་པར་མ་2.0བཏོན་ནས་སྔོན་མ་ལས་ཆེ་ཆུང་གསུམ་ཆ་གཉིས་ཀྱིས་ཆུང་བ་ཐོན་རྒྱུ་དང་གློག་ཟད་གྲོན་ཡང་བཞི་ཆ་གསུམ་ཉུང་དུ་གཏོང་ཐུབ་པར་བརྟེན། སྨན་ཁང་གི་མ་གནས་སྔར་བས་དམའ་བ་དང་། ནད་པའི་ཁུར་པོ་དེ་བས་ཡང་དུ་འགྲོ་རྒྱུ་རེད”ཅེས་སྨན་ཁང་གི་འགོ་འཛིན་གཞོན་པ་ཀྲང་གཡན་ཧྲན་གྱིས་བཤད།

ཀྲུང་གོ་གློག་འཕྲིན་གྱི“ཤར་གྲངས་ནུབ་རྩིས”རྒྱལ་ཁབ་ལྟེ་བའི་ཆིང་དབྱང་རྩིས་ནུས་ལྟེ་གནས་སུ་སྐྱོད་སྐབས། པར་རིས་སྒྲིག་བཟོའི་ཞབས་ཞུའི་ཡོ་ཆས་1000གིས་འཁོར་སྐྱོད་མྱུར་པོ་བྱེད་བཞིན་འདུག “ང་ཚོས་ཚད་ལྡན་འཁོར་སྒྲོམ་ཁྲི་1.5བཟོས་ནས་སྐྱེལ་འདྲེན་བྱས་པར་སྐར་ཆ་རེར་གཡེང་ཚེག་རྩིས་རྒྱག་ཁྲི་དུང་ཕྱུར་ཁྲི་1.8ཐུབ་ཀྱི་ཡོད”ཅེས་ཆིང་དབྱང་གྲོང་ཁྱེར་གྱི་ཧྲི་ཀྲང་གཞོན་པ་ཀྲང་ཕིང་ཙུང་གིས་ངོ་སྤྲོད་བྱས་པ་དང་། ཁོང་གིས“གྲངས་གཞི་ཆེ་མོའི་ལྟེ་གནས་དང་། སྤྲིན་ཚོམ་དྲ་བའི་ཐོན་ལས། ཁུངས་དྲ་ཐེག་གསོག་ནུས་མང་གསབ་རེས། བཟོ་སྐྲུན་ལས་རིགས། མི་བཟོས་རིག་ནུས་བེད་སྤྱོད་བཅས་ཟུང་དུ་འབྲེལ་བའི”སྒོར་དུང་ཕྱུར་སྟོང་རིམ་པའི་ཐོན་ལས་འཁོར་འབྲེལ་མགྱོགས་མྱུར་ཆགས་བཞིན་ཡོད་ཅེས་བརྗོད།

ལན་ཀྲོའུ་སློབ་ཆེན་གྱི་ཀླད་འཕྲུལ་སྦྲེལ་སྣེའི་རྣམ་གྲངས་གང་མགྱོགས་ལག་ལེན་བསྟར་བ་སོགས་འབྱུང་འགྱུར་ཐོན་ལས་སྐྱེད་སྲིང་ཐད་ཀན་སུའུ་ཡིས་ཚན་རྩལ་གསར་གཏོད་ཀྱི་ཤུགས་རྒྱག་ས་གནད་སྨིན་བཙལ་ནས་འབྱུང་འགྱུར་འགྲན་རྩོད་ཀྱི་མཐོ་ས་བཟུང་ཡོད། མི་ཐབས་རིག་ནུས་བཀོད་སྒྲིག་དང་གསོག་ནུས་གསར་པ་བཅས་འབྱུང་འགྱུར་ཐོན་ལས་ལ་དམིགས་ཏེ《འབྱུང་འགྱུར་ཐོན་ལས་གསར་གཏོད་འཕེལ་རྒྱས་ལ་སྐུལ་འདེད་གཏོང་བའི་ཀན་སུའུ་ཞིང་ཆེན་གྱི་བྱ་སྤྱོད་ཇུས་གཞི》ད་ལོའི་ཟླ་7པར་བཀྲམ་ཡོད།