ལོ་མང་རིང་། རྫ་ཡུལ་རྫོང་རྫ་ཡུལ་རོང་སྟོད་གྲོང་རྡལ་གྱིས་གཞི་རིམ་གྱི་སྤྱི་ཚོགས་བཅོས་སྐྱོང་གི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་པ་དང་འབྲེལ་ཐུན་མོང་གི་ངོས་འཛིན་ཞིག་ཀྱང་ཆགས་ཤིང་། དེ་ནི་དུས་རབས་གསར་པར་ངེས་པར་དུ་གཞི་རིམ་བཅོས་སྐྱོང་དེ་བས་མངོན་གསལ་དོད་པའི་གནས་བབ་གལ་ཆེན་དུ་བཞག་ནས“བཅོས་སྐྱོང་བཞི་དང་སྟོབས་ཤུགས་བཞི”ལ་བརྟེན་ཏེ་གཞི་རིམ་བཅོས་སྐྱོང་གི་སྤྱི་ཚོགས་ཅན་དང་། ཁྲིམས་སྐྱོང་ཅན། རིག་ནུས་ཅན། ཆེད་ལས་ཅན་བཅས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་སྟེ། མང་ཚོགས་ལ་གཞི་རིམ་བཅོས་སྐྱོང་གི་ཕན་འབྲས་སྔར་བས་ལེགས་པ་ཐོབ་པར་བྱེད་རྒྱུ་དེ་རེད།

རང་བཅོས་རྨང་བརྟན་མཐའ་འཁྱོངས་བྱས་ཏེ། གཞི་རིམ་བཅོས་སྐྱོང་གི་ནང་སྐྱེས་སྒུལ་ཤུགས་འཕེལ་བར་བྱས་པ།

རྫ་ཡུལ་རོང་སྟོད་གྲོང་རྡལ་གྱིས་སྟབས་བདེའི་ནུས་ཆེའི་དྲ་མིག་དོ་དམ་མ་ལག་ཧུར་ཐག་བཏོད་དེ་གཞི་རིམ་གྱི་རང་བཅོས་གཞི་རྩ་སྔར་བས་བརྟན་དུ་བཏང་བ་དང་། དྲ་མིག་དཔོན་དང་དྲ་མིག་ལས་དོན་པ་ལེགས་འདེམས་བཀོད་སྒྲིག་བྱས་ཡོད། དྲ་མིག་དཔོན་དང་། དྲ་མིག་པ། དུད་སྦྲེལ་སྤྱི་མི་བཅས་ཀྱི་འགན་འཁྲི་ནན་དུ་བཏང་ནས་དྲ་མིག་ནང་གི་ཞིང་འབྲོག་ཏང་ཡོན་གྱི་སྤྱི་ཡོངས་ཀྱི་འདུ་ཤེས་དང་། ཐོབ་ཐང་གི་འདུ་ཤེས། རང་འགུལ་གྱི་འདུ་ཤེས། སྐྱེས་འབུལ་གྱི་འདུ་ཤེས་བཅས་རྒྱུན་ཆད་མེད་པར་ཟབ་ཏུ་བཏང་སྟེ་གཞི་རིམ་གྱི་རང་བཅོས་ལ་ཞུགས་པའི་མང་ཚོགས་ཀྱི་བརྩོན་སེམས་ཆེ་རུ་སོང་ཡོད།

རྫ་ཡུལ་རོང་སྟོད་གྲོང་རྡལ་གྱིས“བརྒྱ་བདུན”མང་ཚོགས་ཀྱི་ལས་དོན་སྒྲུབ་ཐབས་རྒྱུན་མཐུད་སྤེལ་ནས་མང་ཚོགས་ལ་ཞབས་ཞུ་དང་འབྲེལ་གཏུག་དང་དེ་བཞིན་མང་ཚོགས་ཀྱི་དཀའ་ངལ་སེལ་བའི་འགོ་ཁྲིད་ལས་བྱེད་པའི་ནུས་པ་ཁྱོན་ཡོངས་ནས་ཆེ་རུ་བཏང་བ་དང་། མང་ཚོགས་ཀྱི་དོན་དག་དེ་གལ་ཆེ་ཤོས་ལ་བརྩིས་ནས་ཐག་གཅོད་བྱས་ཏེ་མང་ཚོགས་ལ་ཏང་དང་སྲིད་གཞུང་གི་ཐུགས་ཁུར་གང་ལེགས་ཚོར་དུ་བཅུག་ཡོད།

ད་ལོ་ནས་བཟུང་། “བརྒྱ་བདུན”མང་ཚོགས་ཀྱི་ལས་དོན་སྒྲུབ་ཐབས་ལ་བརྟེན་ནས་རྫ་ཡུལ་རོང་སྟོད་གྲོང་རྡལ་གྱིས་ཡུན་རིང་ཐག་གཅོད་མ་ཐུབ་པའི་མང་ཚོགས་ཀྱི་བསམ་འཆར་དང་གྲོས་འགོ་ཁག་40བསྡུ་རུབ་བྱས་ནས་ཁག་14ཐག་གཅོད་མཐར་ཕྱིན་བྱས་ཤིང་། དེའི་ནང་ནས་ཁག་5ནི་གྲོང་ཚོའི“ཨུ་ལྷན་གཉིས”ཀྱིས་མང་ཚོགས་སྒྲིག་འཛུགས་བྱས་ཏེ་སོ་སོས་ཐག་གཅོད་བྱས་པ་དང་། རྣམ་གྲངས་འདུན་ཞུ་ཁག་26ནང་ནས་རྣམ་གྲངས་8ལ་ཡུན་རིང་རྗེས་སྙེག་བྱེད་དགོས་ཀྱི་ཡོད། རྫ་ཡུལ་རོང་སྟོད་གྲོང་རྡལ་གྱི“གཅིག་འཐུས་རྣམ་པའི”འགལ་བ་འདུམ་འགྲིག་ལྟེ་གནས་ཀྱིས་ཁྱོན་མང་ཚོགས་ཀྱི་ངོ་བཅར་ཐེངས་144ལ་སྣེ་ལེན་ཞུས་པ་དང་། ཁག་118ལ་འདུམ་འགྲིག་བྱུང་བ། འདུམ་འགྲིག་གྲུབ་ཚད་82%ཟིན་པ། མ་དངུལ་སྒོར་ཁྲི་1373.72དང་འབྲེལ་བ། མ་དངུལ་སྒོར་ཁྲི་807.64ཐག་གཅོད་བྱས་པ་བཅས་ཐུབ་ནས་མང་ཚོགས་དང་བར་ཐག་ཉེ་རུ་ཕྱིན་ཏེ་མང་ཚོགས་བློ་ཡིད་ཚིམ་ཚད་དང་ཐོབ་སྣང་དེ་བས་ཆེ་རུ་སོང་ཡོད།

ཁྲིམས་སྐྱོང་དྲིལ་བསྒྲགས་མངོན་གསལ་དོད་དུ་བཞག་སྟེ།   གཞི་རིམ་བཅོས་སྐྱོང་འགན་སྲུང་བྱེད་ཤུགས་ཆེ་རུ་བཏང་བ།

ཁྲིམས་སྐྱོང་ནི་སྤྱི་ཚོགས་བཅོས་སྐྱོང་དེང་རབས་ཅན་གྱི་མཚོན་རྟགས་གལ་ཆེན་ཡིན་ལ། གཞི་རིམ་གྱི་སྤྱི་ཚོགས་བཅོས་སྐྱོང་གི་རྨང་གཞིའི་རང་བཞིན་གྱི་འགན་སྲུང་ཡང་ཡིན། ཁྲིམས་ལུགས་ཁྱབ་གདལ་དང་དྲིལ་བསྒྲགས་བྱེད་ཤུགས་མུ་མཐུད་ཆེ་རུ་གཏོང་བ་དང་། གཞི་རིམ་གྱི་ཁྲིམས་སྐྱོང་ཁོར་ཡུག་ཡག་པོ་གཏོད་པ། ལས་སྒྲུབ་ཁྲིམས་ལྟར་དང་། གནས་ཚུལ་འཕྲད་ན་ཁྲིམས་ལ་བརྟེན་པ། གནད་དོན་སེལ་བར་ཁྲིམས་ལུགས་སྤྱོད་པ། འགལ་བ་སེལ་བར་ཁྲིམས་ལུགས་ལ་བརྟེན་པ་བཅས་ཀྱི་ཁོར་ཡུག་བཟང་པོ་ཆགས་པར་སྐུལ་འདེད་གཏོང་བ་ནི་གཞི་རིམ་བཅོས་སྐྱོང་བྱེད་ཤུགས་ཆེ་རུ་གཏོང་བའི་འགན་སྲུང་རེད།

རྫ་ཡུལ་རོང་སྟོད་གྲོང་རྡལ་གྱིས་གྲོང་སྡོད་ལས་དོན་གྱི་གནས་སྐབས་ཏང་ཀྲི་པུའུ་དང་གྲོང་སྡོད་ལས་དོན་རུ་ཁག་ཁག་གི་ནུས་པ་འདོན་སྤེལ་གང་ལེགས་བྱས་ནས“ལོ་ལྔ་ཚན་བརྒྱད་པའི”ཁྲིམས་ལུགས་ཁྱབ་གདལ་དང་ཁྲིམས་སྐྱོང་དྲིལ་བསྒྲགས་ཀྱི“བདུན་སྤེལ”བྱེད་སྒོ་གཏིང་ཟབ་སྤེལ་བ་དང་། དུས་བདེ་འཛུགས་སྐྲུན་གྱི་དྲིལ་བསྒྲགས་ཟླ་བ་སོགས་ཀྱི་གོ་སྐབས་གང་ལེགས་སྤྱད་དེ་ནག་སེལ་གཤེད་བཅོམ་དང་། གསང་མྱུལ་འགོག་རྒོལ། བདེ་འཇགས་ཐོན་སྐྱེད་སོགས་ཀྱི་ནང་དོན་གཙོ་གནད་དུ་བཟུང་ནས། རྒྱ་ཆེའི་ཞིང་འབྲོག་མང་ཚོགས་ལ《བོད་རང་སྐྱོང་ལྗོངས་ཀྱི་དུས་བདེ་འཛུགས་སྐྱོང་སྲོལ་ཡིག》དང《ཆོས་ལུགས་ལས་དོན་སྲོལ་ཡིག》སོགས་བཅའ་ཁྲིམས་དང་ཁྲིམས་སྲོལ་གཙོ་གནད་དུ་སྒྲོག་འགྲེལ་བྱས་ཡོད། རིམ་རྩིས་བྱས་ན་དྲིལ་བསྒྲགས་ལག་དེབ་1500ལྷག་ཙམ་སྤྲད་ཡོད་པ་རེད།

སྤྱོད་སྐྱོང་གི་རྨང་གཞི་བརྟན་དུ་བཏང་ནས།   གཞི་རིམ་བཅོས་སྐྱོང་གི་བློ་འགུག་ནུས་པ་ཆེ་རུ་བཏང་བ།

མང་ཚོགས་ཀྱི་ཀུན་སྤྱོད་འདུ་ཤེས་ཟབ་ཏུ་མ་བཏང་ན་རང་སྐྱོང་དང་ཁྲིམས་སྐྱོང་ཇི་འདྲ་ལེགས་ཀྱང་རྨང་གཞི་བརྟན་པོ་མེད། གཞི་རིམ་གྱི་སྤྱི་ཚོགས་བཅོས་སྐྱོང་བྱེད་སྐབས་རང་སྐྱོང་དང་ཁྲིམས་སྐྱོང་ལ་བརྟེན་ནས“གཟུགས་བརྙན་གཏོད”དགོས་ལ། སྤྱོད་སྐྱོང་གི་བློ་འགུག་ནུས་པ་འདོན་སྤེལ་བྱེད་པར་ཡང་དོ་སྣང་བྱེད་དགོས།

རྫ་ཡུལ་རོང་སྟོད་གྲོང་རྡལ་གྱིས་སྤྱོད་སྐྱོང་དེ་གཞི་རིམ་བཅོས་སྐྱོང་ནང་བཅུག་ནས་བསམ་བློ་ཀུན་སྤྱོད་ཀྱི“བསེར་བུ་ལྡང་བས་ཆར་པ་བབས”དང“སྦྲང་ཆར་ཟིལ་མས་སྐྱེ་དངོས་བརླན་པའི”བློ་འགུག་ནུས་པ་ཆེ་རུ་བཏང་བ་རེད། སོག་བརླིང་གྲོང་ཚོ་ཚོད་ལྟ་བྱ་ཡུལ་དུ་བརྩིས་ཐོག“གསར་བརྗེའི་རིག་གནས་ཁྱིམ་ཚང”ལ་བརྟེན་ནས་རྒྱལ་གཅེས་རིང་ལུགས་དང་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་གསར་བརྗེའི་སློབ་གསོའི་དཔེ་སྟོན་རྟེན་གཞི་ཕྱོགས་ཡོངས་ནས་བཏོད་ཡོད། གཞི་རིམ་བཅོས་སྐྱོང་ཁྲོད་ཀྱི་གྲོང་སྲོལ་དམངས་ཆིངས་ཀྱི་ནུས་པ་གལ་ཆེན་འདོན་སྤེལ་གང་ལེགས་བྱས་ཡོད། འདི་ལོའི་ཟླ་6པར་རྫ་ཡུལ་རོང་སྟོད་གྲོང་རྡལ་གྱིས་སྲིད་འཛིན་གྲོང་ཚོ་22སྒྲིག་འཛུགས་བྱས་ནས་གྲོང་སྲོལ་དམངས་ཆིངས་ལ་སྔར་བས་བཟོ་བཅོས་དང་འཐུས་སྒོ་ཚང་དུ་བཏང་སྟེ་གྲོང་སྲོལ་དམངས་ཆིངས་དེ་གོ་བདེ་ཤེས་སླ་དང་ཀློག་བདེ་བའི“བྱིས་པའི་གཙུག་ལག་འབྲུ་གསུམ་པར”རྩོམ་སྒྲིག་བྱས་ཡོད། དེ་དང་ཆབས་ཅིག་སྲོལ་རྙིང་གོམས་ངན་དེ་བས་མེད་པར་བཟོས་ཏེ་གོམས་སྲོལ་བསྒྱུར་རྒྱུར་སྐུལ་འདེད་བཏང་བ་དང་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་ལག་ལེན་བསྟར་ནས། མང་ཚོགས་ཀྱི་རང་ངོས་དོ་དམ་དང་། རང་ངོས་སློབ་གསོ། རང་ངོས་ཞབས་ཞུ་བཅས་ཀྱི་རང་རྟོགས་རང་བཞིན་དང་འཇོན་ཐང་ཆེ་རུ་བཏང་སྟེ། ཡུལ་སྲོལ་གོམས་གཤིས་ལ་བརྟེན་ནས་མང་ཚོགས་ཀྱིས་བཟང་བཀུར་དགེ་ཕྱོགས་བྱ་རྒྱུར་ཁྲིད་སྟོན་བྱས་པ་རེད།