འབྲུ་དཀར་གྲོང་ཚོའི་སྲོག་ཆགས་གླིང་།
རྟ་ཐོ་ལོག་དང་། ཝ་དཀར། བྱ་རྔ་མོང་། ལུག་རྔ་མོང་སོགས་ནི་བོད་དུ་མཐོང་ཧ་ཅང་དཀོན་པའི་སྲོག་ཆགས་ཤ་སྟག་ཡིན་ནའང་། 2023ལོའི་ཟླ་ལྔ་པར། ས་བབ་མཐོ་ཚད་སྨི་4100ཟིན་པའི་གཞིས་རྩེ་གྲོང་ཁྱེར་ཁང་དམར་རྫོང་གནས་རྙིང་ཤང་འབྲུ་དཀར་གྲོང་ཚོར་སྐྱོད་སྐབས། དེ་གའི་སྲོག་ཆགས་གླིང་དུ་མཐོང་རྒྱུ་འདུག
ཉེ་དུས། གསར་འགོད་པ་གཞིས་རྩེའི“ཇོ་མོ་གླང་མའི་བུ་ཕྲུག་ཚོས་སྐལ་བཟང་རྫོགས་ལྡན་བསུ། རྒྱང་ལམ་གསར་པར་འབད་འབུངས་མདུན་སྐྱོད་བྱེད”ཅེས་པའི་བཅར་འདྲི་ཚོགས་ཆུང་དང་བཅས་པ་འབྲུ་དཀར་གྲོང་ཚོར་བསྐྱོད་པ་དང་། གནས་རྙིང་སྐྱེ་ཁམས་གླིང་དུ་གནས་པའི་སྲོག་ཆགས་གླིང་དུ་འབྱོར་སྐབས་མི་རྣམས་ལ་མཐོང་སྣང་གསར་པ་ཞིག་སྦྱིན།
“སྲོག་ཆགས་གླིང་ཆུང་གྲས་ཤིག་ཡིན་ཡང་དེ་གར་ཤྭ་བ་ཁྲ་རིས་དང་རྨ་བྱ་སོགས་སྲོག་ཆགས་རིགས་10ལྷག་ཙམ་གསོས་ཡོད་པས་ས་གནས་དེ་གའི་མང་ཚོགས་ཀྱིས་ཧ་ཅང་དགའ་པོ་བྱེད་ཀྱི་ཡོད་ལ། གནས་རྙིང་སྐྱེ་ཁམས་གླིང་ལ་ཡོང་མཁན་ཡང་མང་པོ་ཡོད”ཅེས་ཁང་དམར་རྫོང་གནས་རྙིང་ཤང་ཏང་ཨུད་ཀྱི་སྒྲིག་འཛུགས་ཨུ་ཡོན་བསྟན་འཛིན་ནོར་བུས་ངོ་སྤྲོད་བྱས། ཐག་རིང་ནས་ཡོང་བའི་སྲོག་ཆགས་དེ་དག་ལ་ལྟ་རྟོག་ཡག་པོ་བྱ་ཆེད། གནས་རྙིང་ཤང་གིས་ཆེད་མངགས་ལས་དོན་པ་སྒྲིག་འཛུགས་བྱས་ཏེ་ལྷ་ས་གྲོང་ཁྱེར་ཆུ་ཤུར་རྫོང་སྲོག་ཆགས་གླིང་དུ་བསྐྱོད་ནས་སློབ་སྦྱོང་བྱས་ཤིང་། “དགུན་ཁར་ང་ཚོས་སྲོག་ཆགས་ཁག་ཅིག་ཆུ་ཤུར་སྲོག་ཆགས་གླིང་དུ་བསྐྱལ་ནས་གསོ་གི་ཡོད། སྲོག་ཆགས་དེར་འཚོ་གནས་ཡག་པོ་ཐུབ་པས། འདི་ལོ་ད་དུང་ལུག་རྔ་མོང་ལ་ལུག་ཕྲུག་གཅིག་སྐྱེས་སོང”ཞེས་སྲོག་ཆགས་གླིང་གི་ལས་དོན་པ་སྐལ་བཟང་གིས་བརྗོད།
ཉེ་བའི་ལོ་ཤས་རིང་། ཁང་དམར་རྫོང་གནས་རྙིང་ཤང་གིས་འབྲུ་དཀར་གྲོང་ཚོའི་མཛེས་སྡུག་དང་སྡོད་མལ་དཔེ་སྟོན་ཁུལ་འཛུགས་སྐྲུན་ལ་སྐུལ་འདེད་ཏན་ཏིག་བཏང་ནས་སྤྱིའི་ས་བཟུང་རྒྱ་ཁྱོན་སྨི་ངོས་གྲུ་ཁྲི་1.3ཟིན་པའི་གནས་རྙིང་སྐྱེ་ཁམས་གླིང་བཙུགས་པ་དང་འབྲེལ། 2023ལོའི་ཟླ་དྲུག་པར་དངོས་སུ་ཕྱི་ཕྱོགས་ལ་སྒོ་ཕྱེ་ཡོད། སྐྱེ་ཁམས་གླིང་དུ་སྤྲོ་གསེང་ཞག་སྡོད་བྱེད་སའི་གུར་དང་། ཡུལ་སྐོར་སྣེ་ལེན་ལྟེ་གནས། སྲོག་ཆགས་གླིང་ཕྲན། རྐང་རྩེད་སྤོ་ལོའི་ཐང་། སྒྲོམ་སྟེགས་སྤོ་ལོ་ཁང་། བྱིས་པའི་རོལ་རྩེད་སྒྲིག་ཆས་སོགས་བཙུགས་ཡོད་པས་ས་གནས་དེ་གའི་མང་ཚོགས་ཀྱི་རོལ་རྩེད་བྱ་ཡུལ་ཡག་པོ་ཞིག་ཡིན། 2023ལོར་གནས་རྙིང་སྐྱེ་ཁམས་གླིང་ལ་ཚོང་གཉེར་ཡོང་འབབ་སྒོར་ཁྲི་65བྱུང་བ་དང་། འབྲུ་དཀར་གྲོང་ཚོར་བགོ་འགྲེམས་སྒོར་ཁྲི་10ལྷག་ཙམ་བྱུང་ཞིང་། མིག་སྔའི་བར། སྐྱེ་ཁམས་གླིང་ལ་ཚོང་གཉེར་ཡོང་འབབ་སྒོར་ཁྲི་50ལྷག་ཙམ་བྱུང་བ་དེས་འབྲུ་དཀར་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་འགྲོ་བར་སྒུལ་ཤུགས་ཆེན་པོ་བསྣན་ཡོད།