འདི་ནི་ས་སྐྱ་རྫོང་བྲག་མཇུག་ཤང་གི་ལི་གྲོའི་ཞིང་ཁ་ཡིན་པ།

ལི་གྲོ་ནི་ཨན་ཏི་སི་རི་རྒྱུད་ཀྱི་ཚྭ་མཚོའི་ས་ཁུལ་ནས་ཐོན་པས། ས་མཐོའི་ཁོར་ཡུག་ལ་ཧ་ཅང་འཚམས་ཤིང་། ཐན་པ་དང་། ཚྭ། གྲང་ཟུག་བཅས་བཟོད་ཐུབ་པའི་སྲོལ་རྒྱུན་གྱི་སྐྱེ་དངོས་ཤིག་རེད། 2019ལོར་ཀྲུང་གོ་ཚན་རིག་ཁང་གི་ཡོན་ཧྲི་ཧན་པིན་གྱི་ཚོགས་པས་གཞིས་རྩེ་གྲོང་ཁྱེར་ཞིང་འབྲོག་ལས་ཚན་རིག་ཞིབ་འཇུག་ཁྱབ་གདལ་ལྟེ་གནས་སུ་སྒོ་བྱང་བཀལ་ནས“ཡོན་ཧྲི་དང་རིགས་གཅིག་མཁས་ཅན་གྱི་ལས་དོན་ས་ཚིགས”བཙུགས་པ་རེད། 2022ལོར་ཡོན་ཧྲི་ཧན་པིན་གྱིས་བོད་ཀྱི་ས་བབ་མཐོ་བ་དང་། སྐམ་ཤས་ཆེ་ལ་དྲོད་ཚད་དམའ་བ། དེ་བཞིན་སྨུག་ཕྱིའི་འོད་འཕྲོ་ཤུགས་ཆེ་བ་བཅས་ཀྱི་ཁྱད་ཆོས་དེ་ལི་གྲོ་སྐྱེ་འཚར་ལ་ཧ་ཅང་འཚམ་པ་མ་ཟད། ལི་གྲོ་བཏབ་ཀྱང་ས་གནས་དེ་གའི་ནས་ཀྱི་འཚོ་གནས་ཁོར་ཡུག་བཟུང་མི་སྲིད་ཅེས་བརྗོད།

ཧྲང་ཧའེ་ཡི་བོད་སྐྱོར་ལས་བྱེད་པའི་མཐུན་སྦྱོར་དང་གཞོགས་འདེགས་འོག་དུས་འགོའི་གྲ་སྒྲིག་ལས་དོན་རབ་དང་རིམ་པ་སྤེལ་རྗེས་གཞིས་རྩེའི་ཀྲུང་གོ་ཚན་རིག་ཁང་གི“ཡོན་ཧྲིའི་ལས་དོན་ས་ཚིགས”དང་པོར་བརྟེན་ནས་དེ་སྔ་མུ་མཐའ་མེད་པའི་བྱེ་ས་དང་རྡོ་ཧྲུག་འདྲེས་མའི་ཐང་རྒོད་དུ་ལི་གྲོ་ཚོད་འདེབས་བྱས་པར་གྲུབ་འབྲས་བཟང་པོ་ཐོབ་པས་2023ལོའི་ཟླ་4པར་ས་སྐྱའི་གངས་ལྗོངས་ས་མཐོའི་ལི་གྲོའི་ཐོན་ལས་རྟེན་གཞིར་དངོས་སུ་འདེབས་འགོ་ཚུགས།

རྨོ་འདེབས་རིང་། རིགས་གཅིག་མཁས་ཅན་ཚོགས་པས་ས་གནས་དེ་གའི་ཞིང་དུད་གླས་ནས་དེ་གའི་མང་ཚོགས་ལས་ཞུགས་ཐུབ་པར་སྐུལ་ཁྲིད་བྱས་པ་དང་དུས་མཚུངས་ཁོང་ཚོར་ལི་གྲོ་འདེབས་སྟངས་བསླབས་པས་2023ལོར་མང་ཚོགས་ལ་འབབ་འཕར་སྒོར་ཁྲི་210བྱུང་བ་རེད།

ས་སྐྱ་རྫོང་བྲག་མཇུག་ཤང་གིས་སྣ་ཁ་མི་འདྲ་བའི་ལི་གྲོ་ཚོད་འདེབས་རྣམ་གྲངས་ལག་བསྟར་བྱས་པས་དཔལ་འབྱོར་གྱི་རིན་ཐང་ས་གནས་དེ་གའི་ཞིང་ལས་ལོ་ཏོག་གཙོ་བོ་ནས་ལས་ལྷག་པ་བྱུང་སྟེ། མུའུ་རེའི་ཡོང་འབབ་ནས་ཀྱི་ལྡབ་4ཡས་མས་ཟིན་གྱི་ཡོད། གཉེར་སྐྱོང་བྱེད་པོ་ཀྲུང་ལིའི་ཚན་རིག(ཧྲང་ཧའེ)ཚན་རྩལ་ཚད་ཡོད་ཀུང་སིས་གྲོང་གསེབ་དར་རྒྱས་གཏོང་རྒྱུ་འབད་འཐབ་ཀྱི་ཁ་ཕྱོགས་སུ་བརྩིས་པ་དང་ཚན་རྩལ་གསར་གཏོད་སྣེ་ཁྲིད་དུ་བྱས་ཏེ་ལི་གྲོའི་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ་རེད།

ཐོན་ལས་རྒྱ་སྟོབས་ཆེ་རུ་བཏང་བས་ཕན་ཐོགས་ཆེ་ཤོས་ཡུལ་དེའི་མི་སེར་ལ་བྱུང་ཡོད། ཞིང་དུད་ཀྱིས་ཚན་རིག་དང་མཐུན་པའི་འདེབས་འཛུགས་ལག་རྩལ་སྦྱངས་པས་ཕན་པ་ཐོབ་པ་དང་དུས་མཚུངས་ད་དུང་ཀུང་སིར་ཕྱིན་ནས་ཡོང་འབབ་གསོག་ཆོག་གི་ཡོད། 2023ལོར་ཤང་དེ་ཡོངས་སུ་ས་མཐོའི་ལི་གྲོ་མུའུ་2000ལྷག་ཙམ་བཏབ་པས་ཐོན་འབབ་ཏུན་400བྱུང་ནས་མང་ཚོགས་1500ལྷག་ཙམ་ལ་མི་རེར་ཆ་སྙོམས་ཡོང་འབབ་སྒོར་2000ལྷག་ཙམ་བྱུང་བ་རེད།

གཞིས་རྩེ་གྲོང་ཁྱེར་ས་སྐྱ་རྫོང་གི་འབྲེལ་ཡོད་འགན་འཁུར་བས། མིག་སྔར་ས་སྐྱ་རྫོང་དང་། ཚན་ཞིབ་སྒྲིག་གཞི། གཉེར་སྐྱོང་བྱེད་པོ་བཅས་ཀྱིས་ལི་གྲོ་འདེབས་འཛུགས་ལས་རིགས་གསར་གཏོད་དང་ཐོན་ལས་རྣམ་གྲངས་མཉམ་ལས་ལ་སྐུལ་འདེད་བཏང་སྟེ་2025ལོར་སླེབས་སྐབས་འདེབས་འཛུགས་རྒྱ་ཁྱོན་མུའུ་ཁྲི་2ཟིན་པ་བྱེད་རྩིས་ཡོད་པ་རེད།

ལི་གྲོའི་ས་བོན་ལ་འཚོ་བཅུད་རིན་ཐང་ཆེ་ཙམ་ལྡན་ཡོད་པ་དང་། གཏེར་རྒྱུའི་འཚོ་བཅུད་སོགས་འཚོ་བཅུད་གཞན་དག་ལོ་ཏོག་གཙོ་བོ་ལས་མང་བ་ཡོད། སྣ་ཁ་མི་འདྲ་བའི་ལི་གྲོ་སྨིན་པའི་དུས་ཚོད་དང་སྙེ་མའི་མདོག་ཁ་མི་འདྲ་བས་ཕར་བལྟས་ན་ཚོས་མདོག་སྣ་ཚོགས་མཐོང་ཐུབ། འདི་ལོ་ལི་གྲོ་བསྡུ་སྐབས་ཉེ་འགྲམ་གྱི་ཞིང་དུད་རྣམས་རང་འགུལ་ངང་དེ་གར་ཡོང་ནས་སང་ལོ་ཚོད་འདེབས་བྱེད་རྩིས་ཡོད་ཚུལ་བརྗོད་པ་དང་རྒྱལ་ལམ་318རྒྱུད་ཀྱི་ཡུལ་སྐོར་བར་རྒྱག་མཁན་ཡང་དེ་གར་ཡོང་ནས་པར་རྒྱག་རྒྱུའི་ཡིད་དབང་བཀུག་ཡོད། ཚན་རྩལ་དང་ཐོན་ལས་ཀྱི་ནུས་པས་གངས་ལྗོངས་ས་མཐོའི་ཐང་རྒོད་དུ་འབབ་འཕར་ལོ་ཏོག་སྐྱེས་ནས་ལི་གྲོའི་ཐོན་ལས་འཕེལ་རྒྱས་ཕྱིན་ཏེ་ས་གནས་དེ་གའི་མང་ཚོགས་ཀྱི་ཡོང་འབབ་མང་དུ་ཕྱིན་པ་དང་མང་ཚོགས་ཚོའི་ཧུར་སེམས་ཆེ་རུ་ཕྱིན་ནས་ཐུན་མོང་འབྱོར་ཕྱུག་གི་ཕྱོགས་སུ་བསྐྱོད་པའི་ཡིད་ཆེས་སྔར་བས་འཕེལ་ཡོད།