རྒྱལ་སྲིད་སྤྱི་ཁྱབ་ཁང་གི་2024ལོའི་ཞིང་ཆེན་རིམ་པའི་སྲིད་གཞུང་གི་བདེ་འཇགས་ཐོན་སྐྱེད་དང་མེ་ཟོན་ལས་དོན་གྱི་དཔྱད་ཞིབ་སྐོར་ཞིབ་ཀྱི་ཆེད་དོན་བཞུགས་མོལ་ཚོགས་འདུ་འཚོགས་པ།
ཝང་ཆི་མིན་གྱིས་གསུང་བཤད་གནང་བ་དང་། ཀརྨ་ཚེ་བརྟན་གྱིས་རྣམ་འགྱུར་མཚོན་པའི་གཏམ་བཤད་གནང་བ།
རྒྱལ་སྲིད་སྤྱི་ཁྱབ་ཁང་གི་གཅིག་གྱུར་བཀོད་སྒྲིག་གཞིར་བཟུང་། རྒྱལ་སྲིད་སྤྱི་ཁྱབ་ཁང་བདེ་འཇགས་ཐོན་སྐྱེད་དང་མེ་ཟོན་ལས་དོན་གྱི་དཔྱད་ཞིབ་སྐོར་ཞིབ་ཚོགས་ཆུང་གི་ཚོགས་ཆུང་ཉེར་གཅིག་པས་བོད་དུ་བཅའ་སྡོད་བྱས་ནས་དཔྱད་ཞིབ་སྐོར་ཞིབ་ལས་དོན་སྤེལ་བ་རེད། ཚེས་4ཉིན། དཔྱད་ཞིབ་སྐོར་ཞིབ་ཀྱི་ཆེད་དོན་བཞུགས་མོལ་ཚོགས་འདུ་ལྷ་སར་འཚོགས་ཤིང་། རྒྱལ་སྲིད་སྤྱི་ཁྱབ་ཁང་བདེ་འཇགས་ཐོན་སྐྱེད་དང་མེ་ཟོན་ལས་དོན་གྱི་དཔྱད་ཞིབ་སྐོར་ཞིབ་ཚོགས་ཆུང་གི་ཚོགས་ཆུང་ཉེར་གཅིག་པའི་ཙུའུ་ཀྲང་ཝང་ཆི་མིན་གྱིས་གསུང་བཤད་གནང་བ་དང་། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་སྲིད་གཞུང་ཏང་ཙུའུ་ཡི་ཧྲུའུ་ཅི་ཀརྨ་ཚེ་བརྟན་གྱིས་རྣམ་འགྱུར་མཚོན་པའི་གཏམ་བཤད་གནང་བ་རེད།
རེན་ཝེ་ཡིས་ཚོགས་འདུ་གཙོ་སྐྱོང་གནང་བ་རེད།
ཝང་ཆི་མིན་གྱིས་བསྟན་དོན། བདེ་འཇགས་ཐོན་སྐྱེད་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱས་ནས་བདེ་འཇགས་ཐོན་སྐྱེད་ཡག་པོ་བྱེད་པའི་དོན་སྙིང་གལ་ཆེན་ལ་ངོས་འཛིན་གཏིང་ཟབ་བྱེད་དགོས།
གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱས་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་སློབ་སྦྱོང་ལག་བསྟར་བྱས་ཚུལ་དང་། བདེ་འཇགས་ཐོན་སྐྱེད་ཀྱི་འགན་འཁྲི་དོན་འཁྱོལ་བྱས་ཚུལ། གཙོ་གནད་ལས་དོན་སྤེལ་ཚུལ། དོན་རྐྱེན་ཚབས་ཆེན་གྱི་མངོན་མེད་རྐྱེན་ངན་དང་མང་ཚོགས་ཉེ་འགྲམ་གྱི་མངོན་མེད་རྐྱེན་ངན་གྲལ་བཤེར་བཅོས་སྒྲིག་བྱས་ཚུལ་སོགས་ལ་དམིགས་ནས་ཆེད་དོན་བཞུགས་མོལ་དང་། དཔྱད་གཞིར་ལྟ་འཐེན། འགའ་རེའི་གླེང་མོལ། བཅར་འདྲི་འདྲི་རྩད་སོགས་ཀྱི་བྱེད་སྟངས་ཕྱོགས་བསྡུས་ཐོག་སྤྱད་ནས་ལས་དོན་སྤེལ་བ་དང་། འབྲེལ་ཡོད་ཁེ་ལས་ཚན་པ་དང་བྱེད་སྒོ་སྤེལ་ཡུལ་ལ་མངོན་བཤེར་ལྐོག་ཞིབ་བྱས་ཏེ་བདེ་འཇགས་ཐོན་སྐྱེད་དང་མེ་ཟོན་ལས་དོན་གྱི་ཕན་འབྲས་དངོས་ལ་ཕྱོགས་ཡོངས་དང་དངོས་ཡོད་ཀྱི་སྒོ་ནས་ཞིབ་བཤེར་བྱེད་དགོས། དགོངས་གཞི་ནན་པོ་མཐའ་འཁྱོངས་བྱས་ནས་མཐུན་སྦྱོར་གཞོགས་འདེགས་ལ་ཤུགས་སྣོན་རྒྱག་པ་དང་། ལས་ཀའི་སྒྲིག་ཁྲིམས་ནན་དུ་གཏོང་བ། འབྲེལ་གཏུག་རོགས་ལས་ལ་ཤུགས་སྣོན་རྒྱག་པ། གནད་དོན་དག་ཐེར་ལ་དམ་འཛིན་ནན་པོ་བྱེད་པ། འགན་འཁྲི་རྩད་གཅོད་དང་བདའ་འདེད་ནན་པོ་གཏོང་བ་བཅས་བྱས་ནས་དཔྱད་ཞིབ་སྐོར་ཞིབ་ཀྱི་ལས་དོན་གནད་སྨིན་དང་། ཕན་ཆེ། དངོས་སྒྲུབ་བཅས་ཀྱི་སྒོ་ནས་བསྒྲུབ་དགོས། བོད་ཀྱིས་ཕྱོགས་ཁག་གི་བདེ་འཇགས་ཐོན་སྐྱེད་དང་མེ་ཟོན་བདེ་འཇགས་ཀྱི་འགན་འཁྲི་སྔར་བས་ནན་དུ་ཏན་ཏིག་བཏང་ནས་ཕན་འབྲས་དངོས་ཐོན་པའི་བྱེད་ཐབས་སྤྱད་དེ་དོན་རྐྱེན་ཆེས་ཚབས་ཆེན་ཐོན་རྒྱུར་འགོག་ཟོན་དང་བཀག་འགོག་མཐའ་གཅིག་ཏུ་བྱས་ཏེ་དཔལ་འབྱོར་དང་སྤྱི་ཚོགས་འཕེལ་རྒྱས་ཡོང་བར་བདེ་འཇགས་ཀྱི་ཁོར་ཡུག་བཟང་པོ་བསྐྲུན་རྒྱུའི་རེ་བ་ཡོད།
ཀརྨ་ཚེ་བརྟན་གྱིས་གསུངས་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི“ཚེ་སྲོག་རིན་ཆེན་གསེར་ལས་ལྷག་པའི”མངགས་བཅོལ་ཟབ་མོ་ཐོག་མཐའ་བར་གསུམ་དུ་བློ་ལ་བརྟན་པོར་ངེས་ནས་ཆབ་སྲིད་ཀྱི་ཚུགས་གནས་མཐོ་རུ་གཏོང་བ་དང་བདེ་འཇགས་ཀྱི་འདུ་ཤེས་བརྟན་པོར་བཙུགས་ཏེ“ཕྱོགས་གཅིག་གི་འཕེལ་རྒྱས་ལ་སྐུལ་འདེད་གཏོང་བ་དང་ཕྱོགས་གཅིག་གི་བདེ་འཇགས་སྲུང་བའི”ཆབ་སྲིད་ཀྱི་འགན་འཁྲི་རང་འགུལ་ངང་འཁུར་བ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ལ་གཞིགས་ནས་ལྗོངས་ཡོངས་ཀྱི་གོང་འོག་ཚང་མར་བདེ་འཇགས་ལ་དམ་འཛིན་དང་། བརྟན་ལྷིང་འགན་ལེན། འཕེལ་རྒྱས་ལ་སྐུལ་འདེད་བཅས་ཀྱི་ལས་ཀའི་རྣམ་པ་བཟང་པོ་གཏོད་དགོས། གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱེད་པ་དང་དག་ཐེར་དོན་འཁྱོལ་ལ་དམ་འཛིན་ཡག་པོ་བྱས་ཏེ་དཔྱད་ཞིབ་སྐོར་ཞིབ་ཚོགས་ཆུང་གིས་བཏོན་པའི་གནད་དོན་ཡིན་ཕྱིན་ཚང་མ་མཐའ་གཅིག་ཏུ་བསྡུ་རུབ་བྱས་ནས། འཕྲལ་དུ་དག་ཐེར་བྱས་ཏེ་དཔྱད་ཞིབ་སྐོར་ཞིབ་ཚོགས་ཆུང་ལ་དགོས་མཁོ་ཡོད་པ་དང་འབྲེལ་ཡོད་སྡེ་ཚན་ལ་ལན་སློག་ཐུབ་པའི་འགན་ལེན་བྱས་ནས་གོང་ནས་འོག་བར་དཔྱད་ཞིབ་སྐོར་ཞིབ་ལ་རྒྱབ་སྐྱོར་དང་གཞོགས་འདེགས་བྱེད་པའི་རྣམ་པ་ཟབ་མོ་གཏོད་དགོས། སྲ་བརྟན་མཐོར་འདེགས་ལ་དམ་འཛིན་ཡག་པོ་བྱེད་པ་དང་གྲུབ་འབྲས་གཞན་སྒྱུར་ལ་སྐུལ་འདེད་བཏང་སྟེ་ཆད་སྐྱོན་དང་ཞན་ཆ་སེལ་རིང་ཉམས་མྱོང་ཕྱོགས་སྡོམ་ལ་ཤུགས་སྣོན་རྒྱག་པ་དང་ཕྱོགས་ཡོངས་ནས་སྲ་བརྟན་དང་མཐོར་འདེགས་ཀྱི་ལག་ལེན་ཁྲོད་སྒྲིག་སྲོལ་དང་ལམ་སྲོལ་འཐུས་སྒོ་ཚང་དུ་བཏང་ནས་བདེ་འཇགས་ཐོན་སྐྱེད་ཀྱི་ཕན་འབྲས་དངོས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་སྒུལ་ཤུགས་ཆེན་པོར་བསྒྱུར་གང་ཐུབ་བྱེད་དགོས། ལས་ཀའི་འགན་འཁྲི་ནན་དུ་གཏོང་བ་དང་ལས་བྱེད་པའི་འཇོན་ཐང་ཆེ་རུ་བཏང་ནས་ཏང་སྲིད་འགོ་ཁྲིད་ཀྱི་འགན་འཁྲི་དང་། མངའ་ཁོངས་དོ་དམ་གྱི་འགན་འཁྲི། ལས་རིགས་ལྟ་འདོམས་ཀྱི་འགན་འཁྲི། ཁེ་ལས་ཀྱི་བྱེད་པོའི་འགན་འཁྲི་བཅས་ཕྱོགས་ཡོངས་ནས་ནན་དུ་བཏང་སྟེ་བདེ་འཇགས་ཐོན་སྐྱེད་ཀྱི་འགན་འཁྲིའི་བྱེད་ཐབས་ཁག་གཞི་རིམ་གྱི་མཇུག་སྣེར་ཁྱབ་ཐུབ་པ་དང་། དོན་ཐོག་ཏུ་འཁྱོལ་ཐུབ་པ། ཕན་འབྲས་དངོས་ཐོན་ཐུབ་པ་བཅས་ཀྱི་འགན་ལེན་བྱས་ནས་བོད་ཀྱི་བདེ་འཇགས་ཐོན་སྐྱེད་ཀྱི་དུས་བབ་རྒྱུན་མཐུད་བརྟན་པོའི་ངང་ལེགས་སུ་འགྲོ་རྒྱུར་རྒྱུན་ཆད་མེད་པར་སྐུལ་འདེད་གཏོང་དགོས།